BAHAN SERMON DISTRIK, MINGGU ADVENT I, 29 NOPEMBER 2009

HABIBINSAR NI BINTANG SIPARTOGI
Ev. : 4 Musa 24: 15-17

1. Patujolo
Diorai do Bangso Israel laho mamolus Edom, siala ni i ditundalhon nasida do laho mamolus sian i (21:4). Ingkon boluson nasida do tano ni halak Amori dohot na manjalo izin laho mamolus dibagasan dame, alai Sihon raja ni halak Amori manulak pangidoan nasida. Siala ni i ingkon marporang do bangso Israel laho manaluhon halak Amori (1y. 21-25). Ndung i masuk ma nasida tu tano Moab, sada bangso na parpudi na ingkon boluson nasida manopot tano Kanaan. Ala marnida saluhutna i gabe bobonosan ma halak Moab jala mabiar Raja Balas, so tung suda ma nasida saluhutna dohot bangsona. Dibagasan arsak ni rohana, Balas Raja ni halak Moab mangalului pangurupion sian Bileam, sahalak panurirang sian Mesopotamia na targoar siala pinamasana bura na marhuaso (22:6). Si Bileam na so sian halak Israel, ndang hot hadirionna olo do manonditnondit. Ditingki Balas manosak panurirang Bileam, ro do Debata laho paingothon panurirang Bileam asa na holan hataNa sipasahaton. Unang mambura alai mamasumasuma dompak bangso ni Debata i ma bangso Israel.
Hehe do si Bileam manogotna i jala dipalanoi halodena boruboru jala mardalan ibana udur dohot angka induk ni Moab. Alai marpiarpiar ma rimas ni Jahowa ala mardalan ibana, jala jongjong suruan ni Jahowa di tongan dalan naeng mangalo ibana. Dungi diida halode i ma suruan ni Jahowa jongjong di tongan dalan marpodang sintak di bagasan tanganna, jadi manimbil ma halode i sian dalan laho tu ladang; alai sai dilombuti si Bileam ma halode i paulakkon tu dalan nian sahat pola tolu hali (ptds.2 Ptr.2:15-16) Debata ni Israel ima Debata na marhuaso laho mangarantei jolma. Boi do dipatupa Debata manang aha gabe parhiteanNa laho paingothon hita jolma. Suang songon i tarlumobi panurirang na sian Mesopotamia i na mangadopi Debata, holan angka na ditonahon ni Debata do na ingkon hatahonnonna. Sahat pola na ingkon manghatai halodena i asa ingot si Bileam tona ni Debata.

2. Hatorangan
a) Pangungkapon ni si Bileam. Dipungka muse mandok tonggona,na marlapatan sian pigapiga hali si Bileam sai tong manghatahon tona ni Debata tu si Balas. Ndang olo rohana manimbil sian dalan na pinaboa ni Debata. Tarida ma parsitutuon ni si Bileam laho manghatindanghon na tutu tu adopan ni nanaeng manjehehon bangso Israel. Sahalak panurirang na tarbarita do ianggo si Bileam, ndada na holan pasahathon tona ni Debata alai songon sahalak panurirang na gabe hitehite ni Debata. Somal do si Bileam dipangke Debata laho patolhashon hataNa. Pandohan “Baoa na tonggor matana” hata Heber /ﬧאָﬣ Ra’a; melihat, Ndada na marhite simalolong ni pardagingon manang parnidaan sambing boti, alai na umbagas lapatanna dison i ma parnidaan ni si Bileam tu ari sogot. Dipangke Debata do si Bileam laho patauhon angka na masa sogot tu bangso Israel. Holan marhite Tondi ni Debata do na boi patauhon hita angka na masa sogot. Asa angka jolma ndang tau nanihalomohon ni roha ni Debata molo so marhite hagogoonNa. Ala ni i ma Debata do na patuduhon dalan i asa taboto angka na naeng sipamasaon ni Debata dibagasan ngolunta. Ndada sangkap na roa nanaeng patuduhononNa alai sangkap haluaon do, i ma laho patuduhon haluaon tu bangso Israel. Ndung sahat haluaon tu bangso i nang tu hita dipatau ma hita laho mangantusi angka pambahenan ni Debata dibagasan ngolunta. Ndang tau jolma angka sangkap nanaeng sipatuduhonon ni Debata molo marhite gogo, hapistaran dohot bisuk ni jolma, alai holan ala asi ni roha ni Debata sambing do na mangula dibagasan ngolunta. Ingkon niungkap do roha dohot pingkiran laho mangaloas Debata mangarajai roha dohot pingkiranta. Asa marhite ima dipangke hita laho patauhon sangkap ni Debata tu angka dongan jolma naso mananda Ibana dohot sintong (Ul.Ap.26:20; 1 Kor.9:1; 15:58; 1 Tess.1:3). Halak na porsea dibagasan panobusion ni Kristus tung mangarajumi dirina gabe parhitean diangka ulaon marbarita nauli dohot pasahaton tona nang hata ni Debata. Asa ndada holan panghataion sambing alai dohot ma patuduhonon di angka na porsea marhite parulaonna siganup ari.
b) Somal umbege Hata ni Debata. Asa tama hita dipangke Debata gabe ulaulaNa, ingkon holan marhite na olo hita umbege jala tumangihon HataNa. Siala holan Hata ni Debata do na gabe pedoman ni angka jolma dohot na porsea laho mamboto sangkap ni Debata. Mambege hata ni Debata ingkon sada kewajiban ni angka na tinobus ni Kristus, asa tau manimbangi dia do lomo ni roha ni Debata dibagasan ngoluna. Hata ni Debata do pangoluhon partondionta na manogihon hita tu dalan hasintongan (ptds. Jos. 1:8; Pslm.119: 105, 130; Jes. 55:11; Yoh.8:31; 17:17Rom.10:17; Plp.2:16; 2 Tim.3:16). Ingkon niulahon do hataNa songon sada parsuruon tu hangoluan na sintong diadopan ni Debata. Ndang sae holan na sai manangihon hataNa alai ingkon tongtong do dihatindanghon jala niulahon dibagasan ngolunta. Jakobus 1: 22 mandok: “Alai gabe siulahon Hatai ma hamu, unang holan pananginangi, angka na paotootohon dirina!”. Sian hasomalan na umbege do asa tau hita mangulahonsa, tarlumobi ma HataNa i.
c) Mamboto Parbinotoan Natumimbul. Na gabe sungkunsungkun; “boha do carana hita mamboto parbinotoan Natumimbul ?” Lam bagas do muse dipangido sian hita sahat tu ingkon mamboto parbinotoan Natumimbul. Ai holan mangasahon gogo dohot bisuk na sian Debata do asa tau hita dia do parbinotoan Natumimbul, ndungkon sian HataNa ma diungkap tu hita dungi asa lam umbagas ma muse mamboto sangkap na denggan jala nauli sian Natumimbul i. Marnida zaman nuaeng on na lam maju, na holan mamboto angka siulahononna sambing do jolma i. Hinorhon ni kesibukan di parkarejoan, nang lalap di arta portibi, dohot habisuhonna, lam leleng lam lupa do torop jolma laho mamboto sangkap ni roha ni Debata. Nunga lam gumodangan jolma na holan manuntun lomona sambing( Rom. 8:7; Gal. 5:172 Tim 4:3; 1 Ptr.2 :11; 1 Joh. 2:17). Ali boha do hita lam mamboto na sinangkap ni Debata dibagasan parngoluanta. Asa tujuan ni ngolu ni angka na porsea ingkon ma saguru tu lomo ni rohaNa, na ingkon saut do dibaritahon Barita Na Uli tu sandok portibi on. Disuru do hita laho mambaritahon hasintongan songon na pinatudu ni si Bileam tu si Balak dohot tu bangso Israel. Didok Tuhanta Jesus di Markus 16: 15 “Laho ma hamu tu liat portibi on; jamitahon hamu ma barita na uli i tu nasa na tinompa” Naeng nian angka na porsea memiliki missi yang sama dalam memberitahukan berita Injil agar orang lain mengetahui kuasa Tuhan. Siala ni i tau ma angka jolma mamboto parbinotoan ni Natumimbul i.(Psalm 9:12; Mat.24:14; Mark. 13:10; 14:9; Luk.9:60; Ul.Ap.4:31)
d) Marnida Parmataon ni Nasunhinagogo. Dipangke Debata do si Bileam laho marnida parmataon ni Nasunhinagogo. Nda tung boi marhite hajolmaonta nang mangasahon hagogoonta laho marnida parmataon ni Nasunhinagogo. Ali holan ala ni asi ni roha do i di si Bileam, nang tu hita holan ala asiasiNa do i tu hita umbahen diloas hita marnampunahon silehonlehon i jala patuduhon hagogoon ni Debata tu adopan ni angka natorop, jala tu angka na so mananda Debata Jahowa. Toropan jolma sinuaeng on, holan na maraksi jala na lomoan rohana mamangke parnidaaan ni haportibion. Jala tarlalap do godangan jolma marnida haulion ni portibion hape haulion ni roha nang partondionna dihalupahon jala ditundalhon. Unang ma nian masa di angka na porsea holan uli tarida dipardompahan sambing, alai di roha jorbut do. Ala ni i ma angka na porsea ingkon do mamangke parnidaan ni Debata sian na olo rohana nirajaan ni huaso Tondi Parbadia(Gal.5: 22-23). Asa uli ma pangalahona nang panatapanna tu jolo ni ngoluna na gok basabasa dohot asi ni roha ni Debata. Parmataon na tutu sian Debata ima asa malua hita sian hadosaon, siala ni i ndang lomo ni roha ni Debata hamamate ni pardosa i alai hamumulak na do tumundalhon dalanna tu hamubaon dohot tu haimbaruon ni ngolu. (Yeh.18: 32; 33:11). Margogo do Ibana laho paluahon hita sian hadosaonta marhite AnakNa Jesus Kristus. Laos parmataon na songon i do (paluahon) na ingkon taulahon tu angka donganta na tongtong dope dibagasan taban ni sibolis dohot dosa. Tung godang do dipangke Debata ulaulaNa laho pasauton lomo ni rohaNa. Nunga Ingkon lam bagas jala lam denggan parsaoranta dohot Debata, marhite parsaoran na denggan dohot Debata asa tau hita manatap dao, ima haluan di angka nahinaholonganNa. Jala ingkon tungkap do nasa na mangoloi parsuruonNa, songon na masa tu Apostel Paulus na ditangkup ni Tondi ni Kristus ibana di tingki panglaeleon napinamasana tu angka halak Kristen di Damsyik (uju i goarna si Saulus; Ul.Ap. 9:3-9). Tungkap do Ibana, siala ndang boi pangkeon parnidaan ni daging tu na songkal jala Natumimbul i.Laos dipangke Debata do si Paulus laho mambaritahon Holong ni Jesus Kristus.
e) Panatapan ni Na Porsea. Tangkas do di ayat 17 on panghilalan ni si Bileam maradophon na masa di panatapanna i. Sian mata haporseaonna i boi ibana manghatindanghon tu si Balak sahalak na naeng ro tu portibi on, alai ndang dope ditingkina hatiha i. Holan panatapan ni sahalak panurirang (Si Bileam) do na boi dihatindanghon: Ai ndada dabudabu na pinamasa si Bileam alai pasupasu do tu bangso ni Debata, i ma bangso Israel. Pandohan “Binsar do sogot sada bintang sian Jakob...” sada panurirangon taringot tu Mesias na naeng ro sian tongatonga bangso Israel (Jakob). Bintang ni si Jakob na naeng ro gabe sada tanda na pina masa di hatutubu ni Jesus di Betlehem. Habibinsar i paboahon sada tanda haroro ni Kristus tu tongatonga portibi on. Sahalak Raja Natumimbul jala Nasunhinagogo, ndang tau angka bangso na asing manaluhonsa. Ibana do Raja diatas saluhut raja na adong di portibi on. Gok huaso do Raja i manaluhon sorop ni sibolis, dosa dohot hamatean. Ndang tuk Moab (sian pomparan ni si Lot dohot boruna sihahaan; 1 Musa 19:37), naniuluhon ni Raja Balak laho manaluhon bangso ni Debata dohot sandok pinompar ni si Set. Siala na ro ma Raja hamuliaon nabinagabagahonna i laho patundukkon sude huaso ni portibi on. Sian pomparan ni si Jakob do habibinsar ni Mesias i, i ma na ginoaran Jesus Kristus. Ndang holan raja ni sada bangso alai Raja ni saluhut na di portibi on.

3. Sipahusorhusoron
 Pangke ma ngolum laho patimbulhon Hata Na tingkos na sian Debata. Tung pe godang angka na bernit dohot parmaraan di ngolunta, sai tongtong ma hita marsihohot di poda nang Hata ni Debata. Unang ma loas hagogoon ni portibi on manaluhon haporseanta di Jesus i. Asa dapot hita hamonangan dohot hasonangan na salelengnilelengna. Huhut ma tahatindanghon HataNa i. Angka na porsea sai dihangoluhon do Barita Nauli i gabe hangoluon ni partondion nang di pardagingon. Sai margogo do na porsea molo sai manghalomohon HataNa nang parsuruonNa. Ndang ganggu be rohana marnida na masa di portibi on, alai gabe margogo ma ala ni HataNa i. Alai angka jolma na so mian dibagaan hataNa, sai ro do biar ni roha dohot ganggu ni pingkiran.Bboi do targadis haporseaonna sialani arta ni portibi on. Alai ingkon patimbulhononta do goarNa tung pe godang napinalumehon ni portibi on: arta, sere,nang perak pe, ndang tau mangago dohot paliluhon haporseaonta tu Debata (24:10-13).
 Targoar siala Hasintongan ni Debata. Targoar do si Bileam tu angka bangso siala parsitutuonna di Hata ni Debata. Godang do angka na porsea di Jesus Kristus targoar siala parsitutuonna di hasintongan ni Debata. Unang ma adong nian sian angka na porsea targoar siula hajahaton manang sialani maralo tu hatigoran dohot hasintongan ni uhum ni bangso. Ali naeng do dihirim sian hita boi mamboanhon goar ni Jesus i, asa targoar tu saluhut bangso nang dihumaliangta na tuk patupahon na denggan, laos targoar ma nang goarta siala taulahon na nidok ni Debata dingolunta (Luk. 10: 20; Heb. 12:23). Hasomalan di parulaon, nang pangalaho na denggan diadopan ni jolma tarlumobi diadopan ni Debata (2 Kron.33:13; Ams. 3:6Mat. 10:32; Luk. 12:8).
 Habibinsar ni Bintang si Partogi, diparade Debata laho “memproklamasikan” haroro ni Anak-Na, i ma Jesus Kristus Tuhanta i. Diparade Debata do marhite api na marsijongjong dohot ombun na marsijongjong laho manuluhon dohot manogihon bangso Israel ditongatonga ni halongonan. Laos songon i do dipatupa Debata Bintang Sipartogi laho manogihon pardalanan ni angka halak Majus sahat tu Betlehem laho manomba Kristus Jesus. Nang di tingki sisaonnari on, sai pangkeon-Na do HataNa gabe parhiteanNa laho manguluhon pardalanan ni angka jolma di hasiangan on, dohot ditongatonga ni portibi na gok dosa dohot pangalaosion. Habibinsar ni bintang i masa doi di angka jolma na manghalomohon HataNa dibagasan ngoluna (1Pet 1:19). Ido umbahen di dok di Psalm 119: 105 “Hatami do sulusulu ni pathu jala hatiuron di dalanku”.
 Domu tu goar ni Minggunta i ma Advent I; sian hata Adventus= kedatangan. Molo dipangantusion ni huria di dok ma: “managam haroro ni Mesias”. Istilah ini dahulu dipakai dalam kekaisaran Romawi untuk menyambut kedatangan kaisar yang dianggap sebagai dewa, kemudian dipakai oleh pengikut-pengikut Kristus untuk menyatakan bahwa bagi mereka bukan kaisar, melainkan Kristus adalah Raja dan Tuhan. Masa Advent adalah masa persiapan sebelum Natal, yakni masa persiapan untuk menghayati makna kedatangan Kristus, sesuai dengan penantian Mesias oleh umat Israel yang terungkap dalam Alkitab Perjanjian Lama, juga sehubungan dengan kedatanganNya pada akhir Zaman (Pslm. 27:14; 37:34; 40: 2; 130:5; Poda 20:22; Jes. 30:18; Jer. 23:5; 33:15; 40:31; Sak.3:8 Mark 15:43; Heb. 9:28; Pil. 3:20).
Tatagam do hatiuron ni Kristus na manondangi rohanta. Asa dinalaho managam haroro ni Mesias i, tajaga ma pangalaho nang rohanta asa ias jala tau inganan Natumimbul laho pasauthon bagabagaNa. Ala ni i ingkon rade do rohanta managam haroroNa, asa taparade ma ngolunta dibagasan ngolu na marhaimbaruon, napinauliuli jala nigomgoman ni Tondi Parbadia. Ai ndada hita sandiri na marnampunahon ngolunta nang dagingta on, alai di Debata do. Tau hasangapon ma ngolunta diadopan ni Debata. Amen. (EM).