Senin, 30 Maret 2015

Bahan Jamita Partangiangan Passion 1, Selasa-31 Maret 2015

Jesus Kristus Do Tiruan di Sude Angka na Porsea
Heber 12: 1 – 3
a.    Ia turpuk on laho mangondolhon lapatan ni haporseaon tu Jesus Kristus, boha do halak na porsea di Kristus Jesus i mangadopi angka na masa (penderitaan) di tongatonga ni Huria i ? Tadingkonon nasida do huria i jala mulak tu ugamona hian manang tongtong manahan aha pe na masa ?  Nunga dipaingot Jesus hian angka siseanNa taringot tu angka na naeng masa jala na ingkon adopan nasida. Adopan nasida do penderitaan, bahkan mungkin sahat ro di na mate. Jala pangaleleion i ndada holan sian angka halak na leban alai dohot do nang sian parugamo Jahudi na mandok dirina porsea tu Debata Jahowa. Paduruonna do nasida sian punguan ni halak Jahudi, jala ganup halak na mamunu nasida manghilalahon ulaon na sintong do niulana disi, na mangoloi patik ni Debata do nasida didok rohana (ptds. Mat.24: 9; Joh.16: 2)
b.    Marhite pandohan “dibahen i....” tarida do pardomuan ni turpuk on tubindu na di jolo. Disosoi do huria i asa mamparateatehon angka naung masa. Nunga torop angka sitindangi, i ma angka na porsea tu Debata. Angka pergumulan dohot haporseaon nasida naeng ma dohot mangalehon inspirasi tu ngolu ni huria i di tingki nuaeng. Molo angka na porsea di Padan na Robi i mampu mempertahanhon haporseaonna, boha do ia huria nuaeng ? Halak Kristen diibarathon songon halak na mandohoti sada pertandingan di gelanggang. Asa monang, tontu do ingkon adong persiapan na denggan. Jala ganup halak na bertanding ingkon mampu memusatkan perhatian  manang konsentrasina tu tujuan na naeng dicapai. Sude boban na mambahen ibana ketinggalan ingkon ditanggali. Ala ni i, di ayat parjolo diondolhon do dua hal: tapeakhon ma na pasorathon dohot dosa; marbenget ni roha ma marlojong. Lapatanna, dosa do (pangalaho na robi ) na mambahen boban tu jolma i, gabe ndang tarbahen ibana mananda dirina naung tarjou mangihuthon Kristus. Hape ganup halak Kristen ingkon tangkas umboto: aha do gabe tujuan ni ngoluna di portibi on (Heb.4: 9). Alai andorang so sahat tu tujuan i, na ingkon marlojong do hita dibagasan habengeton (ptds. Heb.10: 32, 36; 12: 7).
c.     Ndang pola ganggu halak Kristen marlojong, ai Kristus naung paujungkon saluhutna i do mangalehon gogo asa mampu hita sahat tujuan. Jesus Kristus nunga manaon laho manghophop jolma, huhut sekaligus mangalehon tiruan na denggan (ptds. 1 Ptr.2: 21). I do na umbahen na didok ayat 2: “Tabereng ma induk ni haporseaon i....”, lapatanna, nunga dilehon Jesus tu angka siseanNa aha na ingkon bahenonnasida tu na asing. Ndang adong na boi mangurupi halak Kristen di parlojongonna i, asing sian Tuhan Jesus Kristus. Jesus sandiri nunga manghamonanghon paraloan na dokdok i, jala dipaujung do i marhite hamonangan (ptds. Heb.2: 10). Jesus Kristus sandiri do na secara sempurna mangulahon dohot mangoloi na nidok ni Debata Ama i. Ala ni i, Ibana do Tuhan ni saluhut jolma, termasuk dohot angka na porsea na ginoaranNa di Padan na Robi (ptds. Heb.11: 40). Ibana do naung hundul di siamun ni Ama i. Pandohan “tabereng ma” mengandung pangantusion; menyerahkan diri, ala tangkas manghirim holan sian Ibana do dapot pangurupion.
d.    Pandohan “paingot ingot hamu ma Ibana” (ingatlah selalu akan Dia) naeng mangondolhon perenungan na mendalam, pertimbangan yang baik, jala dung i tangkas mambuat sada keputusan. Asa ganup halak Kristen ingkon mangalehon alus na tangkas marhite na mambuat keputusan di dirina, mulak do ibana tu ugamona hian manang torus ibana mampartahanhon haporseaonna tu Tuhan Jesus, nang pe mungkin ingkon masa angka penderitaan. Ganp halak Kristen ingkon tangkas merenungkan naung niula ni Tuhan Jesus, na di bagasan habengeton manaon angka reherehe sahat ro di na mate Ibana, alai ndang sumurut pangoloionNa. Ndang adong alasan ni halak Kristen sumurut sian haporseaonna tu Jessus, ndang jadi mandele manang mandate (ptds.. Heb.13: 20 – 21).
e.    Marhite turpuk on disosoi do huria nuaeng manang hita, asa mampu mamereng angka na masa ditongatonga  ni portibi on lumobi dohot di na humaliang hita songon sada dalan panogunoguon ni Debata laho mendewasakan haporseaonta. Jala marhite angka na masa na taida manang tabolus, gabe tabuat keputusan tongtong mamereng dompak Jesus. Lam tamba ma kesadaran di hita, ala ni i, pergumulan di masyarakat ndang tarhamonanghon hita sian dirinta sandiri. Lai, Jesus Kristus naung manghamonanghon hita i do na gabe Induk ni Haporseaonta, jala na tahaporseai mampu mangurupi.
f.     Songon na marlojong di portibi on ingkon tulus do tujuan ni, jala sada do tujuan; i ma haluaon na saleleng ni lelengna. Sude na tadapot, tabolus, taalami, na tonggi dohot na paet, gabe paingothon hita tu tujuan i. Ndang portibi on na gabe tujuan ni ngolunta jala ndang dison hita maringan saleleng ni lelengna. Ala ni i, hot ma hita marhaporseaon tu Ibana manang aha pe na masa! Amen.

ATURAN NI PARPUNGUAN DI TINGKI PARNINGOTAN DI PANAONON NI TUHANTA JESUS SIPANGKEON DI HURIA KRISTEN BATAK PROTESTAN (Malam 1)

01.  Marende BE No.76 : 1 – 2                        “Sada Nama Sangkap”                      BL.199
·  Sada nama sangkap ni rohangku di sandok portibi on
Ndang tagamon na so las rohangku, molo jumpang au inon
Naeng ma sai ingoton ni rohangku, na binaen ni Jesus tu tondingku
Uju pinorsanNa i, saluhutna dosangki.

·  Ingkon sai Ibana ingotonku, uju na tarpajal i
Tu hau pinarsilang ginantungkon, sai mabaor mudarNa i
Ai humophop au ditaon uasNa, asa dohot au muse upaNa
Ai ditatap do au on, di pandokNa: 'Nunga sun!'


Agenda :
Marhitehite Goar ni Debata Anak dohot Goar ni AnakNa Tuhan Jesus Kristus dohot Goar ni Tondi parbadia. Amen.
Tabereng ma induk ni haporseaon i jala na paujunghonsa, i ma Jesus na manaonhon parsilangon i, singkat ni las ni roha tohapNa i hian, so dietong i hailaon, gabe hundul di siamun ni habangsa ni Debata : Paingotingot hamu ma Ibana, na pataontaon paraloan sisongon i dompak Ibana sian angka u sipardosa, asa unang marnaloja hamu, unang mandate tondimuna!

Martangiang ma hita :
AIe Tuhan Debata, Amanami na di Banuaginjang! Asi ma rohaM di hami halak na gale on. Diida Ho, na gogo do musunami, sai talu do hami dibahen, ala ni hagaleonnami. Dibahen i hupangido hami tu Ho : Sai pargogoi jala pamonang ma hami maralohon musu i marhitehite panaonon ni Anak haholongan ni rohaM, Tuhan Jesus Kristus. Amen.

02.  Marende BE No.152 : 1                            “Jesus Na Mamorsan”                      BL.120
·  Jesus na mamorsan dosa ni portibi on, pangolu hami
Jesus na marmosan dosa ni portibi on, pangolu hami
Jesus na mamorsan dosa ni portibi on, sai pasonang hami
Amen, Amen, Amen.

Jadi diarahon Jesus ma na sampuludua i, jala didok ma, nasida: Na nangkok ma hita tu Jerusalem, jala tuius ma tu Anak ni Jolma i sasudena, na tarsurat di angka panurirang.
Ai pasahaton ma Ibana tu angka parbegu, gabe insahanna, leaanna jala tijuranna ma Ibana; dung i mulak mangolu ma Ibana di ari patoluhon. AIai ndang diantusi nasida agia otik sian i; na buni do Hata i sian i rohanasida, ndang diboto nasida na hinatahonNa i. Dung i dipansang angka Sintua ni malim i dohot angka Parise ma rapot godang, didok nasida : Aha ma bahenonta? Ai lan do tanda dibahen Halak i! Molo itapasombu lbana porsea ma halak saluhutna tu lbana, gabe roma halak Rom mangarampas tanonta dohot bangsonta. Alai hehe ma sada sian nasida i ma si Kayapas, sintua ni malim di na sataon i, didok ma tu nasida : Na hurang roha do hamu! Ndang dipingkiri rohamuna, denggan do mate sahalak humophop natorop i, unang laho mago sandok bangso i.
Alai ndang sian rohana sandiri dihatahon i; ala sintua ni malim ibana di na sataon i umbahen na disuriranghon, na naeng mate ma Jesus humophop bangso i. Alai tahe, ndada holan laho manghophop bangso i, alai naeng papunguonNa angka anak ni Debata, ; angka na-marserak dope, laho pasadahon. Asa olat ni sadari i martuptup ma nasida laho mamusa Ibana. Alai didok nasida ma: Unang ma di pesta i, sotung guntur natorop i!



03.  Marende BE No.77 : 4                              “Hamu Saluhut Halak”          BL.65
·  Au on ro di dosangku na so tardok rohangku dibaen godangNa i.
I do na pinorsanMu disi ale Tuhanku marsipal Ho binaen ni i

Dung i onom ari nari asa dapot Pesta Paska i, sahat ma Jesus tu huta Bethania, na niinganan ni si Lazarus, na sinunggul ni Jesus sian na mate. Jadi dipaulinasida ma disi panganon ujuan di lbana : si Marta do manghobasi, si Lazarus ma sada donganNa mangan disi. Gabe dibuat si Maria ma sahati miak Nardus na arga na so marsaor, dimiahi ma pat ni Jesus, obukna ma dibahen mangalap. Jadi digohi uap ni miak i ma bagas i. Jadi sada sian angka siseanNa, si Judas Iskariot na naeng manjehehon ibana, mandok: Boasa so ginadis miak i arga tolu ratus hupang, bahen silehonlehon nian di angka na pogos. AIai ndada na pogos sinarihonna, umbahen na didok ibana songon i; panangko do ibana tahe, diusung do asiasi ni halak, ai tu ibana dipasahat puro i. Dung i ninna Jesus ma : Pasombu ma ibana, ai diparade do i hira tu ari hatatanomHi. Ai tongtong do adong na pogos di tongatongamuna, jala asal ma olo hamu, tarpatongon hamu do na denggan tu nasida; alai anggo Ahu ndang manongtong di hamuna. Intap na tarbahensa do na niulana i; na manjoloani do ibana mamiahi pamatangHu songon di na mananom. Situtu do hatangkon tu hamu. Manang di dia di liat portibi on dijamitahon muse Barita na uli on, hatahononna do nang na binahenna i gabe baritana.

04.  Marende BE No.79 : 7                              “Di Na Ponjot Rohangku”     BL.124
·        Sai naeng ma tioponku pambaenanMi di au
Tu sasude donganku Jesus urupi au
Manghaholongi donganki, unang tung marpambuat
nang marpangansi pe

Dung i torang ni arina i, dibege halak natorop na ro tu pcsta i, na naeng ro ma Jesus tu Jerusalem, jadi dibuat nasida rna angka maremare laho manomunomu lbana huhut manjoujouhon; Hosianna! Pinasupasu ma na ro marhitehite Goar ni Tuhan i, Raja ni Israel. Dung i dapot Jesus ma halode sada i ma dihunduli hombar tu na tarsurat : Unang ho mabiar ale boru Sion ida ma : Rajam do na ro, marsihundul di anak ni halode. Jala halak Parise, dohot deba na sian natorop i mandok tu lbana : Orai antong angka siseanMi, Guru! Alai ninna ma mangalusi : Hudok ma di hamu, aut mauhom nasida, manjoujou ma angka batu. Alai dibongoti sibolis i do si Judas na margoar Iskariot, sahalak sian na sampuludua i.
Gabe laho ibana martuptup dohot angka sintua ni malim raphon angka panuggganei, manang dia dalanna pasahathon Ibana tu nasida. Jadi sian las ni rohanasida marpadan ma nasida mangalehon hepeng tu ibana. Dioloi si Judas ma i, jadi dilului ma tingki na une pasahathon Ibana so sian pamotoan ni natorop i.

05.  Marende BE No.86 : 1 – 2                                    “Silang Na Badia i”                BL.67
·  Silang na badia i Ho do lombulombungki
Maralohon dosa i dohot pandelean i
Di sude sitaonon i Ho ma lombulombungki.

·  Nasa na huula i ndang tau hasonanganki
Nang ringkot pe rohangki pola ro nang ilungki
Holan asi ni rohaM Pangurupi o, Tuhan


Alai di ari parhobason parjolo ni Pesta Paska i, didapothon siseanNa ma Jesus, angka ninna ma : Tu dia ma patureonna di Ho panganon Paska i, dipangido roham? Gabe didok ma: Laho ma hamu tu huta i manopot si Anu, dok hamu ma tu ibana : Tona ni Guru i, Na dapotne ma tingkingku, di ho ma ahu sorang laho mangan Paska i rap dohot siseanku. Jadi saut ma disuru Ibana siseanNa dua halak jala didok ma tu nasida : Molo laho hamu tu huta, pajumpang ma hamu disi dohot sada halak na mangusung aek sahudon ibana ma ihuthon hamu. Tu ibana ma dok hamu : Di dia do bilut inganan, asa hupangan hami paska i? Jadi patuduhononna ma tu hamu bilut parginjang sada, na lambas, na tipak hinembangan, disi ma pature hamu di hita. Jadi borhat ma siseanNa, dibongoti ma huta i, jadi jumpang nasida ma tutu songon na nidokNa i, gabe dipature ma Paska i. Asa dung bot ari, ro ma Jesus dohot na sampulu dua i. Jadi di na mangan nasida, hehe ma Jesus sian na mangan i, ditanggal ma ulosNa, dibuat ma basahan ditapolhon tu Ibana. Diusehon ma aek tu sambong, dung i diburi ma pat ni angka siseanNa, diapusi ma dohot basahanNa na tinapolhonNa i.

06.  Koor :

Dung i sahat ma Ibana tu si Simon Petrus, jadi didok i ma mandok Ibana : Tung Ho ma ale Tuhan mamuri pathu? Dung i ninna Jesus ma mangalusi ibana: Ndang diantusi ho pambahenanKu na tu ho anggo nuaeng, muse pe botoonmu i. Dung i didok si Petrus ma tu Ibana : Matua tano on, ndang burionMu pathu. Dung i ninna Jesus ma mangalusi ibana : Molo so burionKu ho, ndang partohap ho di Ahu. Dung i ninna si Simon Petrus ma : Ale Tuhan, unang ma holan pathu, dohot ma tangan dohot ulungku. Gabe didok Jesus ma tu ibana, halak naung maridi i, ndang ingkon he burion; ai nunga sude ibana ias. Naung ias do anggo hamu, alai ndang luhut hamu. Ai ditanda do sipasahat Ibana, umbahen na didok : Ndang saluhut hamu ias. Asa dung diburi Jesus patnasida, dipangke ma muse ulosNa, hundul ma Ibana, didok ma tu nasida : Ai diantusi hamu do pambahenanKi tu hamu? Digoar hamu do Ahu Guru dohot Tuhan, jadi ture do pandokmu disi, ai i do Ahu tutu. Asa molo Ahu Tuhan jala Gurumuna mamuri patmuna, tama ma nang hamu masiburian pat! Ai sitiruon do Hulehon tu hamu, asa dibahen hamu songon naung hubahen i tu hamu! Na tutu situtu do na hudok on tu hamu : Ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa.

07.  Marende BE No.82 : 2                         “O Jesusku Tu BugangMu”               BL.21
      Tung di patMu, o Jesusku, solsolanku rohangki.
Tangisanku na tinaonMu, ala jat ni rohangki.

Jadi di na mangan i nasida, ninna Jesus ma : Situtu do na hudok on tu hamu : Sada sian hamu naeng pasahathon Ahu! Dung i marsak situtu ma nasida, gabe dipandok be ma tu Ibana : Nda tung ahu i Tuhan? AIai ninna ma mangalusi : Ia i na rap dohot Ahu manurdukhon tanganna tu paringkauan, i do na pasahathon Ahu! Tong do nian ujung ni Anak ni Jolma i songon na tarsurat hian; alai marjea do halak na pasahathon Anak ni Jolma i. Tagonan unang ma sanga tubu ibana tu hasiangan on. Alai adong ma sada sian angka siseanNa i, na hundul jumonok tu Ibana, haholongan ni Jesus i. I ma dihilap si Petrus, jadi ninna ma mandok ibana : Sungkun ma, ise na nidokNa i. Jadi dipajonok ma tu Iambung ni Jesus mandok tu ibana : Tuhan, ise i? Gabe dialusi Jesus ma : Ia tusi hulehon na santopik na husornophon on, i ma ibana. Jadi disornophon ma santopik, dilehon ma tu si Judas Iskariot, anak ni si Simon.
Jadi dung dibondut i, dibongoti sibolis i ma ibana. Dung i didok Jesus ma tu ibana : Humatop ma ula siulaonmu. Asa dung dijalo si Judas na santopik i, pintor laho do ibana tu balian, alai borngin ma uju i.

08.  Marende BE No.173 : 4                       “Sai Mulak”                                   BL.63
      Sai mulak, sai mulak ai na sonang ma ho
Molo sesa dosam Jala sabam roham
O parjalang ho. Mulak, mulak ma ho. Mulak, mulak ma ho

Jadi di na mangan i nasida, dihindat Jesus ma roti, dipasupasu ma, diponggoli ma jala diparlehon ma tu angka siseanNa, huhut ma didok : Jalo hamu, pangan hamu, dagingKu do on.
Dung i dihindat ma panginuman i, didok ma,mauliate, dilehon ma tu nasida, huhut ma didok : Sude hamu manginum sian i.  Ai mudarHu do on, mudar parpadanan i, na niusehon humophop torop bahen hasesaan ni dosa. Alai hudok ma tu hamu : Na so tupa be inumonKu olat ni on sian parbue ni hau anggur i sahat ro di ari sogot; disi ma inumonKu na imbaru rap dohot hamu di Harajaon ni Damang. Jadi dung diendehonnasida endeende pujipujian l, ruar ma nasida tu dolok Jetun. Disi ma didok Jesus tu nasida : Saluhut do hamu naeng targasip mida Ahu di na saborngin on. Ai na tarsurat do : lombutanku ma parmahan i, gabe marserak ma birubiru na sapunguan i. AIai ninna si Petrus ma mangalusi Ibana: Agia sude nasida targasip mida Ho, anggo ahu na so tupa targasip. AIai ninna Jesus ma mandok ibana : O Simon, Simon, nunga dipangido sibolis naeng segeonna hamu songon dahanon. AIai Ahu do manangianghon ho, unang mintop haporseaonmi. Jadi dung mulak sogot roham, pargogoi ma roha ni angka hahaanggim! Alai ninna si Petrus ma mandok Ibana : Tuhan, na hobas do ahu mandongani Ho tu hurungan, nang tu hamatean pe. Alai ninna Jesus ma : Hudok ma tu ho Petrus; Ndang martahuak manuk saborngin on, so jolo toluhali soadahononmu na so tinandam Ahu.

09.  Koor :

10.  Marende BE No.180 : 1 – 2                      “Ro Tu Jesus Ho Na Loja”              BL.228
      Ro tu Jesus ho na loja na maheu i
Lam lumbang do di lambungNa rohami.

      Bereng di hau pinarsilang daon ni sahitmi.
Tuhanmi na hona uhum singkatmi.

Dung i sahat ma Jesus rap dohot nasida tu porlak sada na margoar Getsemane. Jadi didok ma tu angka siseanNa i: Hundul ma hamu jolo dison saleleng disan Ahu martangiang. Dung i ditogihon ma si Petrus dohot anak ni si Sebedeus na dua i, dung i, gabe marsak situtu ma lbana jala bobonosan. Jadi didok ma tu nasida : Mansai marsak situtu do rohangKu, hira na mate do. Dison ma hamu dungo rap dohot Ahu. Dung i laho ma lbana saotik tu jolo, dipatungkap ma bohiNa tu tano martangiang, ninna ma : Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangKu, rohaM do. Dung i mulak ma lbana tu angka siseanNa, jala tarpodom nasida didapot jadi didok ma tu si Petrus : Ndang margogo hamu hape dungo rap dohot Ahu nanggo sangombas ? Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging. Dung i laho ma Ibana paduahalihon martangiang, ninna ma : Ale Amang, molo so tarbahen salpu on, nda ingkon huinum, sai saut ma lomo ni roham. Dung i di na ro i lbana, tarpodom muse ma siseanNa i didapot, ai mansai dokdok do salibonnasida. Jadi ditadingkon ma laho martangiang patoluhalihon mandok hata ondeng. Dung i didapothon ma muse angka siseanNa i, jadi didok ma tu nasida : Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa. Hehe ma hamu, laho ma hita. Ndi, nunga ro na pasahathon Ahu.




11.   Marende BE No.79 : 8      “Di Na Ponjot Rohangku”           BL.124
      Sai sonang ma rohangku binaen ni bugangMi
Di na lao tos hosangku marningot mudarMi
Pos ma rohangku baenon ni PamasuhonMu ahu
marnida bohiMi.

AIai diboto, si Judas Parjehe i do inganan i, ai jotjot do marpungu Jesus tusi dohot angka siseanNa. Ia si Judas, diarahon ma angka soldadu dohot angka naposo ni sintua ni malim, didapothon ma tusi mantat sulusulu, palito dohot sinjata. Diboto Jesus do saluhut na naeng songgop tu Ibana jala ruar ma Ibana, didok ma tu nasida: Ise do na jinalahanmu? Gabe ninna nasida ma mangarusi Ibana : Jesus halak Nasaret i do! Dung i ninna Jesus ma mandok nasida : Ahu do i! AIai dohot do si Judas siparjehe i jongjong di lambung nasida asa dung didok tu nasida ahu do i, sumurut ma nasida, angka martinggangan ma tu tano. Dung i diulahi ma manungkun nasida : Ise do na niluluanmuna? Jadi didok nasida ma : Jesus halak Nasaret i do! Dung i ninna Jesus ma mangalusi nasida :  Nunga hupaboa tu hamu, Ahu do i. Asa molo Ahu dilului hamu, loas ma laho angka on! Ai naeng do jumpang na nidokNa i : Ndang adong na mago Hubahen agia sada sian angka nilehonMi tu Ahu. Alai nunga dipabotohon parjehe i hian partinandaan tu nasida ai didok do : Ia i na huumma Ibana mai. I ma tangkup hamu! Asa pintor didapothon ma Jesus, didok ma : Tabi di Ho Guru! Laos diumma. Alai ninna Jesus ma mandok ibana : Martua ho tuson, anggia? O Judas, pangummaon do hape dibahen ho pasahathon Anak ni Jolma i. Dung i ro ma nasida dilaluhon ma tangan nasida tu Jesus manangkup Ibana.

12.  Marende BE No.180 : 3 – 4                       “Ro Tu Jesus Ho Na Loja”              BL.228
      Timbang holong ni rohana na sai godang i
Ai dilehon do hosaNa tobusmi.

      Apulapul sae ni dosa hangoluanmi
Saluhut dilehon Jesus tuami

Dung i adong ma sada sian angka dongan ni Jesus mangalaluhon tanganna, disintak ma podangna, ditampulhon ma tu naposo ni sintua ni malim sahalak, dipisikhon ma pinggolna. Jadi didok Jesus ma tu ibana : pasarung podangmi, ai na manintak podang, mago ma bahenon ni podang! Ai na so tarbahen Ahu do di roham mangido sian Damang, asa dipadiri di Ahu saonari lobi sian sampuludua loksa surusuruan? Alai songon dia ma disi saut hata ni surat i na mandok: Ingkon masa do na songon i! Uju i ma didok Jesus tu angka natorop i : Hira na dompak panamun do hamu hehe marpodang jala marlombutlombut manangkup Ahu. Ariari do Ahu nian hundul mangajari di Bagas Joro, so adong ditangkup hamu Ahu. Alai na masa do sudena on, asa jumpang hata ni angka panurirang i. Dung i ditadinghon saluhut siseani ma Ibana laho maporus.

13.  Marende BE No.182 : 1…….                      “Tu JoloM O Debatangku”      BL.24
(Papungu Pelean)
      Tu joloM o Debatangku sai use do rohangkon
Sai pasiat tangiangku dohot iluilungkon.

      Husolsoli do rohangku na gok dosa i tongtong
Ai godang ariaringku na hubahen ambolong

      Sai jotjot do hutadingkon dalanMi na tigor i
Kristen au, hape hutondong dalan hamagoan i.

      Ala nii tungki rohangku jongjong di adopanMi
Sai asi rohaM Tuhanku sesa nasa dosangki.

      Haburjuon dimangmangkon rohangkon nuaeng di Ho
Naeng tu surgo hutujuhon Jesus taiti au gogo.

14.  Jamita

15.  Marende BE No.82 : 3                     “O Jesusku Tu BugangMu”             BL.21
·  Tu tanganMu ma tondingku, jumpa hamamatengki.
Tu lambungMu, o Tuhanku, alap na tinobusMi.

16. Tangiang Ale Amanami – Amen, Amen, Amen.

Bahan Jamita Evangelium Minggu Palmarum, 29 Maret 2015

Pinuji Ma Na Ro Marhitehite Goar Ni Tuhan I.
Markus 11: 1 – 11
a.    Goar ni Minggunta ima Minggu Palmarum (maremare), i ma ari minggu andorang Paskah. Mingggu Palmarum ima minggu habobongot ni Jesus tu huta Jerusalem, ala na masa on saminggu andorang Tuhan Jesus diparsilangkon. Minggu Palmarum jotjot laho pahusohusorhon habobongot ni Tuhan Jesus tu huta Jerusalem, na laho manon na porsuk ma Ibana asa mate martir ma laho manghophop dosa ni jolma nang portibi on. Di tingki i na ditagam halak Jahudi do haroro ni Anak ni si Daud, laho pahothon harajaon i di halak Israel. Gomgomanna  bangsona dung ro Ibana, jala paluaonna ma bangsona sian penjajahan ni halak Rom, tung ingkon marmulia situtu do bahenonna harajaon i di pomparan ni si Daud. On ma turpuk na patorangkon Jesus songon “raja” di roha ni torop bangso Israel andorang diparsilangkon Ibana.
b.    Disuru Jesus do dua siseanNa laho mambuat anak ni halode na so hea nihundulan. Nampuna ni halak do i, alai ditonahon Jesus do asa dialusi nasida sisean i tu nampunasa halode i, na ringkot di Tuhan i do i. Adong piga piga na mansai menarik putihon manang parsiajaranta:
  1. Disi ndang apala adong roha na mardingkan di angka sisean na dua i, bulus do nasida mangoloi parsuruon ni Jesus. Laos songon i do di halak nampuna ugasan halode i, ndang adong hata ambatambat laho manundati Hata ni Tuhan Jesus i, lapatanna: gabe sipangoloi do nasida di Hata ni Tuhan i.
  2.   Disi ma adong huaso ni Jesus; na so adong manang ise pe laho mangambati hasasaut Hata ni Debata, sude angka na tarsurat di Hata ni Debata nang bagabaga ni Debata  ingkon saut do i. Ndang taraloan manang tarambatan portibi on huaso di Hata ni Debata, na margogo do Hata ni Debata. Tudos songon na tarsurat di Jesaya 55 : 11 “Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos.”
  3.  Disi halode na so hea nihundulan i dilehon asa dipangke Jesus; lapatanna, arta, ugasan, nang angka na adong di hita patut ma antong taparlehon na dumenggan tu Tuhan i, ai na ringkot di Tuhan i do. Nang diparngoluon ni parhuriaon pe tarjou do angka ruas laho mamelehon na dumenggan, ai na ringkot di Tuhan i do i , nang arta, hepeng, silehon lehon ni Debata do i saluhutna asa tapaulak muse tu Ibana marhite huriaNa nang di angka na mangharingkothonsa. Ido umbahen huria i pe na dibagasanna angka ruas  ingkon bersifat sosial do, na tau mangurupi na gale, na pogos, namarhahurangan, na oto, na dibagasan hasusaan. Ai songon juara bagas do i na dihaposi Debata laho mangaramoti ugasan i tu angka ulaon na uli na denggan hombar tu lomo ni roha ni Debata.
c.     Jala na mansai menarik na marsihundul do Jesus di atas anak halode, somalna sahalak raja ingkon marsihundul do di atas ni hoda. Jotjot do dilapati halode binatang na oto jala hohom mangulahon parenta ni tuanna gabe halode boban, lapatanna halode simbol perdamaian. Haroro ni Jesus marhite halode i na mamboan dame marhite toruk ni roha. Ndada ro Ibana marhite hoda na somal dipangke sahalak raja na gabe simbol hagogoon dohot huaso nang hamonangan sian parporangan. Sahalk Raja ndang manghunduli sada halode, aii halode tu na laho manuhuk boban do i, na somal dipangke tu perdagangan nang transportasi. Jala dianggap do tumoru derajat ni halode asa sian hoda.
d.    Di dipenyambutan ni Jesus i adong pandohan “Hosana” somalna ndang apala hata na imbaru i di hita halak Kristen, ala jotjot didok di angka ende nang na manjaha bibel, manang topet di masa prapaskah. Hata Hosiana marharoroan sian Hata Heber “Hosyiana: na marlapatan “urupima”, tolonglah sian kara kata “Hosyia” na marlapatan: paluahon; menyelamatkan. Pandohan i na gabe sada istilah na mansai jotjot dipandok di suraksurak nasida mardongan las ni roha dohot panghilalaan na marhamonangan, somalna dipandok do i di ari raya parlapelapean ditingki mardalan tur nasida. Asing ni hata “hosana” boi do mardalapan “pujian tu na marhuaso”, pandohan on ma na pinasahat ni torop halak di huta Jerusalem, ditingki ro Jesus mamasuhi huta i. Lapatan na sasintongna napinatuduhon ni torop halak i na mandok Hosana tu Jesus ima: joujou na paboahon manjanghon, manang olopolop na patuduhon hamonangan, alai hosana na dibagasan turpuk on dilapati do i: ‘palua ma hami naueng’. Aha do lapatan ni ‘hosana’ di angka situan natorop di huta Jerusalem na laho mamestahon ari raya Paskah ? Naparjolo: joujou i ndada panjouon na somal songon hata parhorasan sambing, alai na marlapatan : “palua hami nuaeng”! on ma joujou pangidoan sian halak na dibagasan pardangolan tu raja manang tu Debata. Hosana ima joujou na mansai  uli na ruar sian haporseaon ni ruas na gok pangkirimon di panogunoguon ni Tuhan ditingki hasusaan. Hosana ima panjouon sian angka jolma na hona gosagosa tu adopan ni Sipalua. Diuju prapaskah on naeng ujionta haporseaonta asa tongtong marsihohot marpangkirimon di joujounta ‘Hosiana’ tu Debata, tudos songon na tarsurat di Rom 10: 13 “Ai malua do ganup na manjou Goar ni Tuhan i!". Napaduahon: joujou Hosana diuduti dohot na pahembanghon paheanna dohot angka bulung bulung na rata di dalan i huhut maniop dangka hau palma dohot spontan, ima patuduhon la sni roha dohot hormat nasida manjangkon Jesus songon raja.
e.    Ala ni i di Minggu prapaskah on, na tarjou do hita asa tongtong marlas ni roha jala sidok mauliate marhite na mandok Hosiana. Molo tadok hosiana, pujipujian, manghamauliatehon haholongon ni Debata dibagasan Jesus Kristus na mate jala hehe laho manghophop hita sian dosa nang hamatean i asa bongot  hita tu hangoluan na saleleng ni lelengna i, naeng do hita tarjou mamboan hamonangan i marhite na olo hita mamangke saluhut na adong di hita laho mangurupi ulaon asi ni roha di huria asa gabe parhitean nang singkat niKristus manogunogu angka jolma na tarsosak, na ginosagosa portibi on, na marsahit, na pinalindak lindak portibi on. Di jaman nuaeng on godang do na tarsosak (songon nabinaritahon ni epistelta di Pslm 69:1-20), lam tamba do pengangguran, maol ni mangalului ngolu ngolu nang sinamot ganup ari, gabe torop do jolma taronjar rohana mangalului sinamot i marhite jalan pintas; adong na mangotootoi, manipu, manangko, mangulahon tindak kejahatan. Suang songon i angka hamaolon hamolon na niadopan na deba jolma. Ala ni i naeng ma hita olo disuru Tuhan i gabe siboan haluaon, songon haroro ni Jesus i na dihirim torop jolma asa mamboan haluaon tu bangso Israel. Hombar tusi molo naeng gabe siboan haluaon hita tu torop jolma asa:
ü  Gabe sipangoloi ma hita di Hata ni Debata; ido Hata hangoluan, las ni roha laho mangulahonsa, ndang adong jumpang ungutungut dibagasan roha nang pamatang pe. Molo tung so boi be hita na gabe pasauthon lomo ni roha ni Debata, na marhuaso do Hata ni Debata laho pasauthon lomo ni rohaNa ditongatonga portibi on.
ü  Hajongjonganta songon halak na porsea ro tu tongatonga ni masyarakat marhitehite unduk dohot serep ni roha, unang ma ro hita marhitehite kesombongan na merasa sude arta nang ugasan, hapistaran nang gogonta i ala ni dirinta sandiri. Hape sude na adong di hita i holan sian Debata Ama i, mula ni nasa pasupasu i. Asa molo ro hita dibagasan serep ni roha tu tongatonga masyarakat, mansai las roha ni jolma nanaeng siurupanta. Ido dalan mangadophon roha nang haporseaonta tu adopan ni Debata Ama i marhite unduk dohot serep ni roha.
ü  Ai ditongos do hita laho marbarita na uli marhitehite Tuhan i tu angka na tarsosak, na dibagasan sitaonon, hasusaan. Asa tarpuji ma halak na ro marhitehite goar ni Tuhan i, ai sude nasa ulaonta na so saut i ia molo so marhitehite Tuhan i; manang gabe si parjamita, parhobas di joro ni Debata, pangajari, pangubati, panguhum, sipangaramoti, panggomgomi, dohot ulaon na asing (1 Kor.10:31; Rom 12: 1-8) 1 Petrus 4:10-11 “Masipatureturean ma hamu, ganup marguru tu asiasi na jinalona, songon angka juara bagas na burju di ragamragaman ni asiasi ni Debata. Ia adong na marjamita, naeng ma songon angka pandohan ni Debata; ia adong na marhobas, naeng ma sian hagogoon na nilehon ni Debata, asa di saluhutna i marsangap Debata, marhitehite Jesus Kristus. Di Ibana ma hasangapon ro di salelenglelengna i! Amen. Asa songon topik ni minggunta ma na mandok: “Pinuji ma na ro marhitehite goar ni Tuhan i.” Amen.

Rabu, 25 Maret 2015

Bahan Jamita Epistel Minggu Palmarum, 29 Maret 2015

Manghalungunhon Jahowa Dihaporsuhon
Psalmen 69: 1 – 20
     a.       Dihilala parpsalmen on do borat ni sitaonon laho mempertahanthon hasatiaonna laho mangihuthon Debata di pardalanan ni ngoluna. Ndang holan sian duru alai dohot do sian keluargana sandiri, tantangan i ala tuduhan tu ibana na mambuat angka ugasan manang arta nasida. Sada tuduhan na so tutu diampehon tu parpsalmen on, hape molo mambege barita nang panindangion ni psarpsalmen on na manghaholongi bagas joro ni Debata na pola do ibana manuhuk halojaon dohot gogo laho pajongjonghon bagas joro i holan ala ni ringkot dohot sihol ni rohana mamuji Debata, ndang mungkin ulahononna na so tama jala na maralo sian Hata ni Debata. Pola do ala ni borat ni tuduhan nang fitnahan na niaena i songon naung gok aek di rungkungna, otik nari nama asa lonong ibana, ima na  manggombarhon panosak ni hasusaan bolon. Disi ma iban mangido pangurupion ni Debata Jahowa. 
    b.      Marhite joujouna tu Debata naeng  luluhon ni Jahowa ibana dompak angka jolma siulahon hajahaton. Ido pos ni roha parpsalmen on, asa Debata Jahowa na tongtong margogoihon ibana. Ndang adong disangkapi parpsalmen on laho mamaloshon sude angka na jat i tu angka musuna, alai dipasahat ibana do sude parungkilon dohot haporsuhonna di adopan ni Debata. Dison ma dipatuduhon parpsalmen roha na unduk dohot biar mida Debata Jahowa na marpos ni roha di hagogoon ni Debata. Roha na biar mida Jahowa do na ingkon jumolo tapatuduhon i ma marhite na mangido hagogoon sian Debata asa didongani hita mangadopi na masa si songon i.
     c.       Parungkilon na nialaman ni parpsalmen on dihilala jala dialami Jesus do i (Joh.2:17 ptds. Ay.10  “Ai hamuruhon humongkop bagasmu do manganhon ahu, jala taha tu ahu do reherehe ni angka na mangarehei Ho.” Parsitutuon ni parpsalmen on laho paulihon bagas joro i, laos i do dapot hita dipengalaman ni Jesus laho paulihon bagas joro ni Debata, ditaon Jesus do angka hata ni natorop i di joro i, alai laos dialusi Jesus do marhite gombaran ni diriNa sandiri na mandok, asa dilohai nasida bagas joro i, ai dibagasan tolu ari do pajongjongonNa muse, alai dagingNa  do na nidokNa joro i  (Mat.21:12-13; Mrk.11:15-17; Luk.19:45-46; Joh.2:13-25). Gabe sada typologi do sitaonon ni parpsalmen on tu sitaonon ni Jesus Kristus mandonokhon silang i. Angka hinsak hinsak dohot reherehe do na tinaon ni Jesus, soada salaNa, godang na manghosomi Ibana.
     d.      Na masuk do hita tu Minggu Palmarum (maremare) na gabe singot singot di hita dipanaonon ni Tuhan Jesus andorang sahat tu hau pinarsilang i. Minggu Palmarum manang minggu maremare ima minggug parpudi di minggu minggu sitaonon ni Tuhan Jesus (minggu minggu passion manang minggu sengsara). Mamuhai sian minggu Septuagesima nunga diarahon hita mamereng dao tu jolo, tu pandang situjuon, i ma silang ni Kristus i. Asa, di minggu parpudi ni minggu passion on naeng ma dimpos jala damos panandaon, panjangkonon dohot panghaporseaonta di Tuhan Jesus i. DI minggu palmarum on singkop ma pambohalionta manjalo Jesus, na tarsilang jala mate di dolok Golgata, gabe Sipalua hita. Sada idaonta disi ima pengorbanan ni Jesus ima BagasJoro na sasintongna i. Asa saut pengorbanan i, dipatuduhon do i marhite haunduhon dohot pangoloion. Ido na dipatuduhon parpsalemn on tu hita, nang pe manosak portibi on ndada gabe umbiaran ibana di sitaonon na manosak i asa sian Debata, laos songon i do Jesus tung borat pe sitaonon i ndada gabe tadingkononna manang melarikan diri sian na manosak i (Ptds. Mat.26: 39  “Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do!”). Ndang umbiaran Jesus tu sitaonon na manosak i asa sian Debata. Debata do Pargogo NA SO Hatudosan. Dipatuduhon Jesus do pangoloionNa dohot haunduhonNa. Neng ma songon i angka siihuthon Kristus i, godang do na manosak hita ala siihuthon Kristus hita, ala bagas joro ni Debata tabahen ngolunta na mambaritahon Baritana Uli i godang na manghosomi hita, godang tantangan. Alai ingot ma hita unang ma umbiaran hita na di portibi on asa sian Debata. Asa umbiaran ma hita tu Debata na so Hatudosan i (ptds. Mat.10:28 “Unang pola mabiar hamu mida angka na mambunu daging, angka na so tuk mambunu tondi; alai na marhuaso mangagohon daging dohot tondi tu na roko, i do sihabiaranmuna.”). Molo aeonta na porsuk ala na mempertahanthon bagasjoro nang secara fisik dohot partondion pe neng ma ingotonta na umporsuk tinaon ni Jesus i laho holan manuhuk dosanta nang dosa ni portibi on. Tajangkon ma Kristus i di ngolunta tanda ni hamonanganta manaluhon portibi on; tahalungunhon ma Ibana disandok gulmit ni ngolunta (Joh.16:33). Amen.
d.

Selasa, 24 Maret 2015

Bahan Jamita Evangelium Minggu Judika, 22 Maret 2015

Marlas Ni Roha Mangoloi Hata Ni Tuhan I
Psalmen 119: 9 – 16
     a.       Molo tajaha Psalmen 119 on dapot rohanta ma bindu na gumanjang sian sude bindu na adong di Buku Psalmen. Molo taparrohahon di Bibelta i, tarida do na disagi do psalmen on tu 22 bagian. Ganup bagian dibahen judul mangihuthon alpabet ni hata Heber. Dibuhai sian Alep jala marujung tu huruf parpudi ni alpabet Heber “Tau”. Molo tapareso Biblica Hebraica (Padan na Robi di hata Heber), dohot judul huruf “Bet” do bagian na tatangkasi. Ala ni i ganup ayat na disi, sai amungka do dohot huruf “Bet”. Ala ni i mansai menarik do cara penyusunan ni Psalm 119 on, didok ma i gaya akrostik. Gaya sastra na songon on ninna angka na malo, dihalomohon halak do dung habuangan Babel. Ala ni i, ninna deba sian nasida, tercipta do Psalm 119 on dungkon na mulak nasida sian Babel. Mangihuthon jenisna, tarmasuk tu horong psalmen kebijaksanaan manang psalmen pangajaran do spalmen on, laho mengajak halak asa diihuthon kebijaksanaan na adong disi songon naung dihangoluhon parpsalmen i. Songon bentuk psalmen pengajaran manang poda, i ma na  bergema sian pengalaman hidup beriman ni parpsalmen i, olo do tarbege disi tangiang mangido pangurupion manang na siala hagaleonna manang ala ni mara na ro sian musuna.
      b.      Mansai godang do diusahahon jolma asa mandapot las ni roha di bagasan ngoluna. Alai las ni roha na sasintongna i dibagasan roha i do jala hombar tu sikapta ndada ala ni na asing. Halak na marlas ni roha ima halak boi hohom, jala benget uju mangadopi hamaolon dohot hasusaan, siala jaloonna do hagogoon sian parsaoranna dohot Debata. Halak na marlas ni roha dilehon gogo asa boi nasida mandapot na dihalomohon ni Debata, jala holongan rohana di Hata nang patik ni Debata, na sai mamingkiri dohot pahusorhusorhonsa di arian nang borngin pe, songon hau na ditanom ditopi ni aek, na marparbuehon parbuena di tingkina, bulungna pe ndang olo malos, angka na diulana marhasil.
     c.       Mansai lomo do roha ni halak Jahudi manjaha Hata ni Debata dohot patik i sian dakdanak. Ndang pola heran hita molo angka halak Jahudi angka na malo do; di bidang ekonomi, tehknologi, militer, dohot di pertanian. Boasa? Siala sai ingot nasida di Hata ni Debata jala mangulahonsa, ido mambahen nasida gabe malo jala  marbisuk. Nuaeng tu hita sungkunsungkun, boasa ndang holan manjaha alai dohot manjahahon ? siala halak na manjahahaon i mangulahi paingothon Hata ni Debata, jala ndang mulak boti ianggo Hata ni Debata (Jes.55: 11). Unang lupa hita, sai diparrohahon Debata do bangsoNa na manjaha manang manjahahon HataNa. Ditingki Filipus marhobas mambaritahon Barita na Uli di Samaria, tompu do ro surusuruan ni Debata tu ibana jala mandok: “Hehe ma ho, laho ma dompak dangsina tu dalan na langlang i, na tuat sian Jerusalem tu huta Gasa!”. Dalan na langlang do i, hape mamolus do sian i sahalak parpangkat  na balga sian Etiopia, siramoti saluhut arta ni si Kandake Raja ni Etiopia manjaha i surat ni si Jesayas, alai ndang diantusi ibana. Disuru surusuruan i do si Filipus mangajari. Boi masa sisongon i dipardalanan ni ngolunta, molo tajaha Hata ni Debata ndang boi antusan manang talapati sian pingkiranta sandiri. Ala ni i andorang so tajaha Hata ni Debata, ringkot do jaloonta gogo nang bisuk sian adopan ni Debata asa diajari hita mangantusi HataNa i, nang marhite angka na pistar na malo na umboto Hata ni Debata. Tondi Parbadia do na mangajari hita asa taantusi HataNa nang snagkapNa di pardalanan ni ngolunta.
    d.  Boha do sikapta di na manjaha Hata ni Debata ?.  Ai didok do di Ro 10: 17 “Asa sian na tumangihon do ro haporseaon; ia panangihon i, sian hata ni Kristus do.” Sude sikap nang caranta mambege nang manjaha Hata ni Debata ido manontuhon kwalitas ni haporseaonta. Godang do na deba jolma manang halak Kristen so pola ringkot manjaha Bibel manang Hata ni Debata, sipata dipeakhon do Bibel holan songon pajangan di lemari, manang holan disimpan denggan. Na deba dijaha i do huhut diapil, alai ndang adong parbuena di siulaon siganup ari, ndang tarida sian pangalahona na boi sihirom gabe tiruan tu loloan, baliksa angka sipinsangon do pangalahona. On ma na jotjot gabe partuktuhan di halak Kristen, naeng do tarida pangalaho ni halak na porsea na boi gabe teladan, tiruan, manang model dohot pioner na denggan di tonga ni bagasna be, di tonga ni msyarakat, huria, di parkarejoan, di tonga ni bangso nang negaranta pe. Unang ma holan na mamboto hata ni Debata alai ndang diboto manguglahonsa. Ndada holan sijalo Barita na Uli i alai ingkon dohot do si pararat Barita na Uli i asa dohot godang jolma taruli pasupasu las ni roha, hamubaon, nang haimbaruon, songon sahalak parjahat na dilambung Jesus na diparsilangkon i gabe muba rohana mamereng na tinaon ni Jesus i. Ia Hata ni Debata ndang sae holan na gabe parbinotoan sambing manang niapil alai naeng do boi manondong roha nang ate ate ni jolma na umbegesa asa boi marhamubaon ni roha tu na denggan. Dipasahat Debata do dua le batu na marisihon Patik ni Debata, sian sundut haporseaon na marlapatan ingkon sinimpan dibagasan roha ang ateate (ay.11).  Naeng ma talehon rohanta di p aimbaru Hata ni Debata siala didok Apostel Paulus do di 2 Timoteus 3: 16-17 “Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa ulaon na denggan.” Naeng do tapatuduhon  panjangkononta di Hata ni Debata dohot positif, molo denggan do tajangkon jaloonta ma pasupasu i, alai sabalikna molo so tajangkon HataNa dohot denggan, gabe siboan mara nang hasusaan do di hita i songn na tarsurat di Poda 13: 13 “Manang ise na so parduli di hata ni Debata, mangago dirina sambing do, alai anggo halak na mangkabiari patik, maruli upa do.” Jala na mangulahon Hata ni Debata, ingkon sai marbisuk do ibana jala marhagogoan mardapotdapot sian Tuhan i songon na nidok ni Jesus di Mateus 7: 24 “Asa na umbege hatangki jala diulahon, sipatudoson ma i tu halak na marroha, na paulihon bagasna diatas batu mamak.” Alai halak na so olo manangihon dohot mangulahonsa tudos do i songon halak na pajongjong bagas na di atas ni rihit, dung ro udan potir, habahaba, mangalantap ma. Ala ni i naeng do siula Hata i hita, ndada holan pananginangi sambing, songon na pinodahon ni Jakobus 1: 22 “Alai gabe siulahon Hata i ma hamu, unang holan pananginangi, angka na paotootohon dirina!”
    e.      Ala ni i tangkas do dipodahon parpsalmen on las ni roha ni na mangulahon Hata ni Debata; siala Hata ni Debata do na gabe pedoman, manjaga pangalahonta asa ias sian dosa. Sai hira buku pandoan do Bibelta i asa sude ngolu nang pangalahonta hombar tu sangkap dohot lomo ni roha ni Tuhan i. Naeng ma songon pangidoan ni parpsalmen i  taringot tu Hata ni Debata i; sai olo do ibana laho marparsiajari, marningot, manimpan dibagasan ateatena huhut mambaritahonsa. Dijalo ibana do hagogoon sian Debata asa tau ibana mangulahon HataNa i. Jala HataNa  i do na gabe sinjatana laho mandopang nasa musu dohot tahi tahi ni sibolis i, ai didok do di Pslm 119: 105 “Hatami do sulusulu ni pathu jala hatiuron di dalanku.” Jala ala ni i do tongtong dipodahon Apostel Paulus angka ruas na di Efesus asa mamangke Hata ni Debata gabe sinjatana mangadopi angka pengaruh pengaruh ni hajahaton Efesus 6: 17 “Jangkon hamu ma nang tahuluk haluaon dohot podang ni tondi, i ma hata ni Debata.” Molo mamereng hajahaton na lam mangimbukbuk nuaeng on (narkoba, begal, korupsi, hamongkuson, fitnah, pamunu, sex bebas, pornografi, margabus, dna) ndada ala ni Hata ni Debata i, alai ala hata ni sibolis dohot na so denggan do diguruhon. Jala taida do ujung ni ngolu ni jolma na mangulahon angka harorangon dohot na so denggan i, mansai paet jala parir do, jala sogot inganan ni i di naroko do. Alai sabalikna angka halak na manghalomohon, manghasiholi, manangihon, manjaha, nang mambaritahon Hata ni Debata huhut diulahon, nasida do na sai taruli pasupasu las ni roha, nang pe sai adopanna angka hamaolon, sai togu do haporseaonna ndang tarambatan tung ala agia manang aha pe (sahit, hamaolon, bencana, tantangan, nang hamatean) ala sai manghirim do nasida di pangurupion ni Debata sahat tu ari marsogot i marhitehite bisukNa dibagasan Jesus Kristus. Ala ni i ndang pola mabiar be angka siihuthon Kristus, alai angka las ni roha nama di ngoluna mangihuthon Tuhan i. Songon topik ni minggunta “Marlas ni roha Mangoloi Hata ni Tuhan i”, boasa? Siala sai mangashon Tuhan i do ibana di pardalanan ni ngoluna. Ala ngolunta na di portibi on gok hasusaan, nang tantangan sian sibolis i dope, ala ni i sai mar-Judika do ibana, lapatanna “luluhon ahu ale Jahowa” (berilah keadilan kepadaku). Sai tu Debata i do ibana mangalualu asa margogo ibana mamolus nasa tingki nang ari ni ngoluna. Ima ngolu na sai marhaposan tu Debata songon na nidok si David di Psalm 23 i, dipatongon do ibana tu jampalan na lomak, ndang holan na lomak na nidaina di ngoluna di portibi on, alai adong do tantangan, ai didok do, nang pe mardalan ahu di rura linggoman ni hamatean. Ingkon sadar do hita na porsea ndang holan na lomak i jaloon nang adopanta di portibi on, alai dohot do angka hamaolon dohot hasusaan, alai disi ro hamolon nang hasusaan i ingkon pos roha panggomgomhon diri tu adopan ni Jahowa Debata. Naung ditaluhon Debata do sorop ni sibolis dohot portibi on songon na didok Jesus di Johannes 16: 33 “Haporsuhon do jambarmuna di portibi on; alai pos ma rohamuna: Nunga talu hubahen portibi on.” Nuaeng tinggal pos ni rohanta na ma di Jesus Kristus naung manaluhon hamatean i sian haheheonNa sian hamatean i. Naeng ma tapatuduhon pos ni rohanta di Jesus Kristus i marhite na marlas ni roha mangoloi Hata ni Tuhan i. Amen.

Selasa, 17 Maret 2015

Bahan Jamita Epistel Minggu Judika, 22 Maret 2015

Marlas Ni Roha Mangoloi Hata Ni Tuhan I
Heber 5 : 5 – 10  
     a.       Songon Anak ni Debata Jesus, ringkot do patuduhononna pangoloionNa (kesetiaan martugas). Tarida do i di pelaksanaan ni tohonanNa: Raja, Malim, Panurirang, na gabe pengantara Ibana, penghubung ni Debata tu jolma, jala antara ni jolma tu Debata. Ala ni i sian Debata Ibana gabe jolma paulakhon jolma tu Debata. Tagan jolma Ibana: adong tingkina ndang jolma, ai na dijolmahon do Ibana, ai Debata hian do. Johannes 1 : 14  didok “dungi gabe daging ma Hata i......”. Tung jolma situtu Ibana, alai ingkon papataronna na Debata situtu jala Ibana sandiri do jolma asli jala sejati hombar na nidok di 1 Musa 1: 26.
    b. Tagan jolma dipelehon pangidoan dohot elekelek mandok ‘disombahon’. Marungkin di hajolmaonNa asa rimpas patuduhononna na so hea mardosa alai mamorsan dosa ni hajolmaon di bagasan dagingna. Dioloi Debata tangiangna di Getsemane, hape mate do Jesus. Nda songon na paradoks ma i? Ndang dipalua sian hatahuton mate, jala gabe mangolu situtu hamamateNa i, sihorhon haluaon tu saluhut jolma. Na gabe maol siat tu roha ni halak Jahudi hatiha i; boi do ditanggali hajolmaonNa i, asa mulak tu ha-DebataonNa?
    c.       Marsiranggut situtu do hajolmaonNa dohot ulaon tohonan na nilohonNa sian Debata Ama i. Songon jolma mansai borat do hamamateNa na pinadomu tu ha-DebataonNa, hape ndang boi mate Debata. On ma sada hahomion na so tarhasigatan ni haporseaon, huaso ni jolma na mar ha-Debataon, ingkon mambutbut sorop ni hamatean, marhite hamatean. Dibagasan pangoloionNa i do sahat ha-Kristuson-Na gabe malim ro di saleleng ni lelengna. Diida Ibana do borat ni ulaon i, gabe pelean pardengganan Ibana, jala songon birubiru ni Debata na mamorsan dosa ni jolma nang portibi on (Joh.1: 29, 36). Marungkil situtu do Ibana di porlak Getsemane laho mananggali hajolmaonNa i, pola malhot hodokNa mardekdehan (marhaltohalto). Na ingkon mate do Ibana, alai ndang pola tahutan, jala hamamateNa i do hangoluan ni sandok manisia ala pangoloion ni jolma di Tuhan i.
    d.      Haunduhon nang pangoloion i do na gabe Anak Hinsu ni hangoluan na sian Debata, songon  na pantik sude sorop ni dosa nang hamatean nang sibolis tu daging ni Jesus, jala hira i dihamatehon. Hape nanaeng pamatehon sorop ni hamatean i do Jesus. Tinggal dihamatean ma sorop i, alai hehe ma ianggo Jesus, jala gabe rimpas, ias, pita jala badia ma ibana dohot na hinophopNa i. Pangoloion ni Jesus i manghorhon haluaon nang hangoluan sisaleleng ni lelengna di sude jolma na mangoloi Ibana. I do umbahen asa dihatindangkon Apostel Paulus na so habiaranna be hamatean i “Jo hamatean didia soropmi....? ( 1 Kor. 15: 54-56). Naung ditaluhon Jesus hamatean i siala pangoloionNa tu Debata Ama i. Pangoloion tu Ama i, ima kunci ni ha-Anahon ni Debata nang tu jolma pardosa na malua. Ha-Anahon i ma bisuk ni Debata na gantung di Hau pinarsilang i.
     e.      Ibana do Sintua ni Malim mangihuthon horong ni si Melkisedek: Molo didok sintua ni malim di ngolu parugamoon ni halak Jahudi, ibana ma na pasahathon pelean tu Debata di Bagas Joro i, jala laos ibana do na pasahathon pasupasu. Di halak Kristen naung porsea di Tuhan Jesus, antusanna do naung termasuk di hadirion ni Jesus tlu pangalaho dohot hadirion, i ma: Hamalimon, Hapanurirangon dohot Harajaon. Tugas ni Jesus songon malim i ma na padomuhon hajolmaon muse asa mulak tu Debata na manompa ibana, ala sebelumna disirang dosa. Marhite Tuhan Jesus Kristus, mulak saor ma hita muse tu Debata. Ia hamalimon na niulahon ni hajolmaon, ndang boi menjamin kwalitas ni hubungan i tu Debata. Alai ianggo hamalimon na niulahon ni Jesus, justru menjamin asa mulak denggan marsaor jolma tu Debata asa taruli di hangoluan  sisaleleng ni lelengna. I do alana umbahen na digoari Jesus malim na bolon, naung manorusi angka banuaginnjang. Molo dung sahat pamerengan ni haporseaonta tusi, naeng ma gomos i tatiop, so tung maon ganggu muse rohanta gabe ndang marfungsi hamalimon ni Jesus ii tu hita ala hagangguon i. Alai na pasti diciptahon Jesus do asa hamalimon na niulahonna i, na sahali ro di saleleng ni lelengna (ex hapax), tongtong berkwalitas di roha ni jolma sian najolo sahat tu sadari on, nang sahat ro di angka ari na aneng ro dope. Unang be muba i saleleng hita mangolu. 
     f.        Sintua ni malim naung saor ditongatonganta na martudutudu tu Tuhan Jesus. Ibana do jolma jala Debata situtu, gabe boi dihilala angka na hinilala ni jolma di ortiibi on. Ai aut so jolma situtu Ibana, maol do hita mandok naung dihilala Jesus na tahilala i. Alai nang Jesus pe tarunjun do Ibana agan pe so mardosa Ibana. Di na pinanghilalahon ni Jesus sude angka na tahilala, ro di sude angka hagaleonta i, laos disi do hita manghilala na dibuati Jesus angka hahuranganta i gabe dimampuhon hita manghirim di pasupasu na marragam dope tu tingki na mangihut, agan pe nian ndang apala siparjambar be hita disi ala ni angka pangalaosionta di sude panggulmiton ni ngolunta di adopan ni Debata.
     g.       Sahat tu tingki on, sai marsaringar do pangantusion na dirajumi do nang parhobas di joro (pandita, Parjamita, guru huria, Bibelvrow, Diakones, Sintua, Evangelis dohot angka sipararat Hata ni Debata) na gabe songon perantara tu Debata na mangolu i. Pemahaman na songon i tong do denggan, jala so tung disalah-gunakan angka partohonan tohonanna laho pasauthon na di rohana, binsan mangoloi ruas i, manang lomolomo ni rohana sambing. Ingkon tongtong do tanggung jawab ni parhalado ni huria angka ruas na p inasahat ni Debata tu huria i, naeng adong sogot alus ni parhalado tu Debata molo disungkun tu dia marlaoan angka ruas i. Naeng ma tutu si tutu diulahon i ndada ala ni sangkap nang roha roha ni pangula i alai ala ni Tuhan i do, jala na ringkot di sangkap ni Tuhan i do songon na tarsurat di Pilippi 2: 4-5 Unang ma na ringkot di hamu be matahon hamu, dohot ma na di dongan! Songon parrohaon ni Kristus Jesus ma parrohaonmuna! Dohot na nidok Jesus di Mateus 16 :23 Alai humusor ma anggo Ibana mandok tu si Petrus: Laho ma ne ho, bolis! Gasip do ho di Ahu, ai ndang diparrohahon ho angka na di Debata, angka na di jolma do.
    h.      Di Padan na robi, na targoar malim na parjolo i ma si Aron. Ia tugas ni malim, i ma na berhubungan tu Debata, na manguluhon angka kebanktian-kebaktian, paradehon angka pelean i dipasahat do i tu malim na manguluhon manang tu angka keluargana, asa bulus hibul rohana dohot tingkina manguluhon dohot mangulahon ruhut ni angka parugamaon so pola lola tingkina mamijngkiri angka haporluan siganup ari. Ala perantara do malim i tu Debata, disi ma dipanghilalahon situan na torop na boi pulih muse hubunganna tu Debata, ala ni pangalaosionna na sai laon. Molo di bagasjoro i jolo, adong do na margoar bilut na badia situtu, holan sahali sataon doo boi i dimasuhi sintua ni  malim. Ndang boi sembarangan masuk markomunikasi tu Debata di tingki i, ai terbatas do kesempatan i dohot halak pe ingkon dikhususkan do. Dung pe di ‘karya’ ni Jesus Kristus maribak ma hirehire na di bagasjoro i, gabe talak ma sahat tu bilut na badia situtu i, na marlapatan ganup jolma nunga bebas markomunikasi tu Debata laho pasahathon sude nasa ngoluna marhitehite Jesus Kristus i (ptds.Johannes 14: 6 “Gabe didok Jesus ma tu ibana: Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu.”). Ala ni i patut ma hita marlas niroha dibagasan Kristus i huhut unduk jala serep marroha mangulahon patik nang HataNa songon topik ni Minggunta: Marlas ni roha Mangoloi Hata ni Tuhan i. Amen.

Jamita Jumat Agung - 29 Maret 2024

Dibungka Jesus Do DI Hita Dalan na Imbaru    (Yesus Membuka Jalan Yang Baru Dan Yang Hidup) Heber 10: 16 – 25     a)       Dihita na...