Jumat, 28 Juni 2013

Bahan Jamita Evangelium Minggu V Dung Trinitatis, 30 Juni 2013

Mangihuthon Jesus Dibagasan Tulus Ni roha
Matius 8 : 18 – 22 (Luk.9: 57 – 62)
      A.      Patujolo
Evangelium Matius di turpuk on manaringoti angka jolma nanaeng mangihuthon Jesus dihalongangan na masa. Jala ditingki i pardalanan ni Jesus dohot angka namangihuthon Ibana manaripari tao Galilea laho tu huta Gadara dung jolo dipamalum simatua boru ni si Petrus di Kapernamum. Alai molo tajaha di Evangelium Lukas didok do disi Jesus naeng laho tu Jerusalem, naeng mangulon hian ma disada huta ni halak Samaria. Alai ndang dijanghon nasida Ibana disi ala diboto laho tu Jerusalem do Jesus, gabe huta na asing ma ditopot. Molo naeng manontuhon ingananna sian dua evanglium on tung maol do tinontuhon na masa on.
Dibaritahon do tung godang na mangihuthon Ibana termasuk do angka siboto surat. Dua ma namanungkun Jesus ima sian sibotosurat dohot sahalak sian sisean ni Jesus. Sian dua halak na manungkun taringot tu namangihuthon Ibana boi gabe sada sungkunsungkun na balga do on di hita. Ala na sada sibotosurat jala nasadanari sahalak sisean ni Jesus; na pasti ingkon nunga tangkas di nasida pangantusion di namangihuthon Jesus. Ala ni porlu do uhalanta sian turpuk on; boha do sikap manang ruhutruhut di na laho mangihuthon Jesus ?
Diondolhon dibagasan turpuk on do tu angka nanaeng mangihuthon Ibana taringot tu hapolinon ni roha laho manggohi panjouon ni Harajaon ni Debata sian saluhutna. Dipatuduhon do sian turpuk on panjouon ni sahalak nanaeng gabe siseanNa. Jala sian turpuk on ma naeng tandaonta ruhutruhut na gabe siihuthon Jesus. Sude do angka na porsea gabe siihuthon Jesus jala na gabe angka siseanNa jala gabe aleale ni Jesus jotjot do didok dohot istilah ‘Alter Christi”. Toho do songon i parjadina ? Sian turpuk on ma naeng botoonta sian pandohan ni Jesus na gabe siihuthon Jesus ima halak na porsea, angka halak Kristen manang sitinda rupa hakristenon (orang Kristen samaran)? Tauhal ma turpuk asa lam tumangkas.

      B.      Hatorangan
     1.       Ayat 18-20; Songon naung dipatorang dipatujolo nangkin; mansai marasing do hatorangan nanijaha di Mateus dohot di Lukas tarlumobi taringot konteks situasi na masa i. Molo pandok Prof.F.V.Filson, dihilala Jesus do panghilalaan ni natorop i mamereng angka halongangan napinatupaNa i diadopan nasida, gabe ndang tenang be pingkiran nasida siala holan mamingkiri parsaut na so hea masa i sian angka naung niajarhon Jesus. Ido umbahen dipangido Jesus tu angka siseanNa i asa muli nasida marparao tu bariba ni tao Galilea. Sangombas jahaon ayat on sai hira ditonga borngin na masa i dung ayat 16 paboahon taringot halongangan napinatupaNa. Alai dapot hita do hatorangan sian turpuk paralelna di Evangelium Markus 1 : 34 – 35, ia di tingki i Jesus ndang mamangke parau di tonga borngin.
Ditingki nangkok Jesus tu parao i, sahalak sibotosurat manungkun naeng mangihuthon Jesus, asa boi marsiajar sian Ibana. Alai dipaingot Jesus do nasida molo na naeng mangihuthon Ibana ingkon tongtong do ihuthonon do nang di sitaononNa. Somalna hampir sude do angka siboto surat ndang olo mangihuthon Jesus, ala mansai karas do Jesus mangorai halak sibotosurat na munafik, gok hageduhon, ndang marholong ni roha. Ala ni i tung torop do sian sibotosurat i mangalo Jesus, sai dilului nasida do hasalaan ni Jesus. Jala laos nasida do na mamparsilangkon Jesus, hape di sude barita Nauli di Evangelium Matius tung mansai godang do dibaritahon konfrontasi sibotosurat tu Jesus. Ayat 19 on ma na gabe sungkunsungkun di hita. Jala dialusi Jesus marhite “majas ironi”; Na marliang do molo antuasu, na marasar do pidong na martongatonga langit, alai anggo di Anak ni jolma i ndang adong hapeahan ni uluna! Antuasu (serigala) ima binatang na gok tahi na jat, jala jotjot do digombarhon angka jolma na jat i songon antuasu (isarana si Herodes). Alai binatang songon on didok Jesus na marliang do. Dungi pidong didok dison ima binatang na gale, ndang margogo tong do adong asarna. Pandohan istilah“Anak ni jolma” on ima na parjolo na dipangke Evangelium Matius nabinuat Jesus sian Daniel 7 : 13. Ima sada gelar di hamuliaon ni Jesus(ptds. Mat.24:30). Alai molo pandok ni angka namalo; asing ni gelar hamuliaon ni goar i adong muse do disi buni istilah ‘napatutoru diri’, na ro ma Ibana sahali sogot dibagasan hamuliaonNa, jala di sada tingki mardalan ma Ibana di tonga ni halak Palestina songon ‘sahalak anak ni jolma’ naunjur. Dibagasan pandohan ni Jesus tu angka sibotosurat taringot tu segi haetehon ni goar “Anak ni jolma” ido na pinatorangNa.
Hape Anak ni jolma i ndang adong hapeahan niuluna. Aha do maksud ni Jesus di pandohanNa i ? Naeng do patorangon ni Jesus tu sibotosurat  i : “Molo naeng ihuthononmu Ahu, ingkon olo do ho manarita songon Ahu”. Ia taboto do ndada na marhasongangan ngolu na niadopan ni Jesus alai sabalikna do tung godang angka ambatambat nang tantangan, direhei, ndang adong ingananna na hot, diparsilanghon. Hape boi do ra didok roha sibotosurat i molo mangihuthon Jesus targoar ma dohot ibana, siala tung tarbarita angka halongangan napinatupa Jesus, jala marhite halongangan i tung mansai tabo ma molo gabe sisean manang mangihuthon Jesus i ala tung boi do patupaon ni Jesus manang aha pe. Hape mansai marasing do na dirohana sian na niajarhon Jesus. Angka siihuthon Jesus ndang na gabe holan na tabo ngoluna alai gok hasusaan jala olo berkorban.
Ima gombaran parmahanion ni Jesus, sian hapogoson-Na, dohot sian angka ambatambat na ro sian musuNa. Dipaingot Jesus do tu sibotosurat i; molo naeng mangihuthon Jesus gabe ‘halak na asing jala na “so aman” tudos songon Jesus. Digombarhon Jesus do di turpuk on taringot tu ngolu ni halak Kristen. Disada sisi sai jaloon ni angka na porsea i do panogunoguon ni Jesus sian tangiangNa i (ptds. Mat.7:7-11); alai di segi na asing, godang do hamaolon na niadopan ni halak Kristen; siala ndang boi tudos manang sarombang pangalahona dohot portibi na gok dosa on. Ala ni i sahalak Kristen mansai tandi do sian portibi o n (ptds. 1 Petrus), jala jotjot do ndang dihalomohon angka halak pardosa, jala jotjot di lohai, diganggu angka halak sileban.
     2.       Ayat 21-22; Dipatorang do di turpuk on taringot sahalk sisean ni Jesus; na marlapatan sahalak sisean nunga mangoloi di pangajarion ni Jesus jala tardok do nunga denggan parsaoranna dohot Jesus. Molo tabandingkon tu Evangelium Lukas bindu 9 ayat 59-60 tangkas do dipatorang taringot sisean i. Dijou Jesus do ibana, alai didok do sidalianna: ua, loas ahu jolo mananom damang! Molo tanggapan Prof.F.V.Filson sahalak theolog na sian Amerika dohot pandok ni Prof. Barclay, sahala theolog sian Inggris, ai ndang marujung ngolu dope ianggo damang na i. Molo di tingki ni Jesus di Palestina, molo marujung ngolu sasahalak pintor dipataru do tu udean sadarina i, alai ndang moru sian onom jom lelengna proses i sahat tu udean  laho ditanom. Jala partingkian i pasti gok iluilu dohot tangis do di nalaho tu udean i. Jala molo anak sihahaan do ibana, ingkon ibana do mananom damangna i. Ala ni i molo tung pe masa sisongon ndang mungkin adong tingkina holan laho manghatai dohot Jesus hatiha i. Tontu lapatan ni pandohanna i na mandok; paima marujung ngolu ma damang na i asa ihuthononna Jesus Ala molo tardisi haJahudion; marhite patik pa-V hon i ingko dipasangap do natorasna uju di ngoluna sahat tu hamamatena. Hape so binoto andingan marujung ngolu manang sadia leleng paimaonna. Jadi molo sai dibagasan hahipason do damang na, tontu olo do martaontaon paimahon haradeonna laho mangihuthon Jesus. Manang sabalikna boi do gabe parjolo ibana marujung ngolu sian damang na i. Alai adong do sahalak na malo ahli Theolog na margoar Dr.A.Plummer  mandok; boi do betak nunga gok umur ni damang na i, jala diroha siseanNa i ndang ganjang be umurna. Ala ni i mansai tajom do alus ni Jesus tu ibana ; “Ahu ma ihuthon! Angka na mate i ma pasombu mananom na matena!”. Mansai koras do pandohan i, hape somalna Jesus mangajarhon holong laho pasangaphon natoras(ptds. Luk.18:18-20), alai naeng diondolhon Jesus do taringot na ingkon mangharingkothon Harajaon ni Debata sian keluarga. Unang gabe tading na ringkot diHarajaon ni Debata ala ni keluarga. Prof. Barclay mandok; unang gabe mago di ulaon na denggan molo ala ni na marsidalian.
Dibuat Jesus do istilah na sian Zakaria 11 : 9  “Jadi ningku ma: Ndang olo be ahu marmahan hamu: Mate tusi na mate! Siap tusi na siap i! Jala na teba i dipangan be tusi sibuk ni donganna.” Boi do pangantusion na mate ima tu halak na naeng mate ndang holan mate sambing. Dilehon Jesus do pandohan na paradoks; ndada hamatean nanaeng patuduhonon ni Jesus alai hangoluan do dibagasan HarajaonNa. Ala ni angka na manulak panjouonNa i ima angka “halak na mate”. Nang di dihaJahudion molo mananom halak na mate sada ulaon na sangap di didok rohanasida i, tarlumobi na mananom keluargana na mate i ima sahalak natoras; laos patuduhon  Patik pa.V hon i do i. Hape sasintongna pandohan ni Jesus; patujolohon ma Harajaon ni Debata asa binaritahon i tu angka na mangolu. Ai tingki dihangoluonna i do ringkot tangihononna taringot tu Harajaon ni Debata marhite Barita Nauli i. Ndada na rumingkot jumolo hamatean i, Ala ni andorang so songgop hamatean i sai dipatuduhon ma naung taruli ibana di Barita Nauli i asa dapotan haluaon dohot hangoluan na salelengnilelengna ibana dibagasan Jesus Kristus i.
     C.      Sipahusorhusoron
v  Jesus gabe Anak  ni jolma na badia ala ni pardangolanNa di portibi on, jotjot do Ibana ditulak jala direhei jolma, laos songon i do adopan ni angka na porsea siihuthon Jesus i; ndang aman jala gok musu na manjehehon dungi ditulak portibi on. Boi do penolakan secara tidak langsung ro sian najumonok tu hita ima sian keluarganta. Alai ingkon ingot do hita laho mangihuthon Jesus adopanta konflik dua kepentingan: antara keluarga atau Tuhan Yesus ? ala ni  ingkon ingotonta  ma nanidok ni Jesus di Matius 6 : 33 Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna! Na marlapatan sian sude ulaon nang kewajibantai ingkon unduk tu tuntutan ni Harajaon ni Debata. Angka na so rade manjalo akibatna i unang ma diihuthon Jesus.
v  Molo di Epistel dipatorang do taringot panurirang Elia napaloashon si Elisa mangumma damang dohot dainang, Boasa ? Jesus ndada holan sahalak panurirang alai nunga dihamham Jesus TOLU TOHONAN I ima: MALIM, PANURIRANG, dohot RAJA. Jadi panjouonNa i ndang marhite perantara be songon panurirang Elia na manampakhon sampesampena. Alai Jesus holan marhite HATANA i do adong huaso disi ima huaso n Debata (ptds.Pilipi 2:6). Tung dipaloas si Elia pe ala na mangalehon PENGHORMATAN na parpudi do si Elisa tu namangolu disi ndada tu na mate. Jadi tangkas ma oraora ni Jesus i dipandohanNa i. Ala ni i do didok Jesus di Lukas 9:62 Alai ninna Jesus ma mandok ibana: “Na manjama ninggala, huhut mamereng tu pudi, tung na so tau ma i tu harajaon ni Debata.” Molo dibereng tu pudi na marlapatan do i naeng sai mempertahanhon warisan nilai-nilai dan pengalaman masa lampau. Somalna do ditiop ninggala i di sada tangan, jala tangan na sadanari mengawasi lombu na manarik ninggala i. Ala ni i ingkon gogo do nitiop jala diparrohahon ruasruas na nilaluhonna asa tongtong tigor. Alai disi sanga dibereng ibana tu pudi boi do gabe sega ruasruas na i ndnag tigor be. Laos songon i ma gombaranna laho mangihuthon Jesus i, ingkon barani do ibana laho manotophon dirina laho mangihuthon Jesus huhut maniranghon diri sian warisan-warisan masa lampau na gabe penghalang. Ingkon rade ma ibana laho manjanghon Harajaon ni Debata so pola repot ala ni hasomalan-hasomalan na gabe penghalang. Mansai andul do pamingkiron ni portibi on sian sangkap ni Debata dibagasan Jesus i (Ptds. Jes. 55:8; Rom 11:33). Naeng tadok songon pandohan ni Ap.Paulus di Pilipi 3 : 14 “On do tahe: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i”.
v  Mangihuthon Jesus dibagasan tulus ni roha. Di zaman nuaeng tung mansai godang do kebutuhan-kebutuhan ni hita jolma ala ni perkembangan nang hamajuon ni tehknologi dohot ilmu pengetahuan. Secara langsung manang ndang sai digorgori do rohanta laho mangalului sinamot nang angka jabatan laho  manggohi angka kebutuhanta i. Boi do ala ni panosak ni portibi on di hamajuonna gabe lalap hita angka na porsea i. Bolas holan na mangharingkothon panjouon ni hisap ni daging nang portibi on asa sonang tahilala. Hape dia ma dapot hhita sian i, ndanda hasonangan na manongtong, parsatongkinan do hape sude na diportibi on. Hape tading ma hasonangan na salelengnileleng na ditawarhon Jesus tu hita ima laho mangihuthon Ibana. Dibagasan Ibana do hasonangan i; ala adong haluaon napinarade Jesus tu hita angka na mardosa on. Boi do masa pangalahonta songon sikap ni sibotosurat salah mangantusi laho mangihuthon Jesus jala na lebih parah molo masa ma di hita songon pangalaho sahalak sisean ni Jesus i na so apala tangkas pangihuthononna di Jesus. Betak holan Kristen do tardok hita hape Kristen Imitasi, ndang asli; songon sahalak sisean ni Jesus i na manungkun Ibana i. Tasulingkiti ma panjouon ni Tuhan i tu hita ganup marsadasada, unang adong be sian hita na marsiadalian, binsan dilehon Tuhan i di hita tingki on ima tingki parasian talehon ma bulus rohanta mangihuthon Jesus. Amen. (ptds. Matius 7:22-23; Heb.10:7).

Senin, 24 Juni 2013

Bahan Jamita Epistel Minggu V Dung Trinitatis, 30 Juni 2013

Mangihuthon Tuhan Ndang Marsidalian
I Rajaraja 19 : 19 – 21

        A.      Patujolo
Sada buku na ginurithon John Maxwell na margoar 21 Hukum Kepemimpinan Sejati, dipatorang ibana do taringot karateristik na mansai ringkot di sadasada uluan na jotjot dilupahon ima laho mangaririt sahalak uluan tu tingkina muse. Tung mansai godang do angka na targoar uluan mansai hebat diulaonna. Alai, dung lengser manang marujung ngolu, gabe dohot do mansohot angka sintasintana nang sangkapna ala soada na manorushon ulaonna.
Laos ido na tinaringotan dibagasan turpuk on ima si Elia, sahalak panurirang bolon na paradehon hajongjongan ni si Elisa na gabe gantinna. Adong dua ruhutruhut naniulahon si Elia dibagasan proses on; Naparjolo, Dilehon Ibana do otoritas dohot gabe haposan tu si Elisa (ay.19). Disamppakhon ibana do sampesampe na i gabe sada simbol otoritas na nilehonna tu si Elisa. Napaduahon, diajari ibana do si Elisa na gabe siseanna. Hape pandok  ni angka na malo di theologia, sahalak na mora do si Elisa on tarboto do i sian godang ni pinahanna i. Alai dipatutoru si Elisa do dirina jala mangihuthon si Elia gabe naposona. Tangkas do tarida tubu pangalaho naolo marhaladoi dibagasan diri ni si Elisa andorang so dipaojak ibana gabe sahalak panurirang.

Alai asa lam tangkas turpuk on tauduti ma manguhal di hatorangan on.
       B.      Hatorangan
    1.       Ayat 19; Dijou si Elia do si Elisa na dibagasan parkarejoanna ibana, ndada ditingki na so mulaulaon manang menganggur. Dos do na masa i di Padan na Imbaru tu sisean ni Jesus ima si Petrus, Andreas, Johannes, dohot si Jakobus (Mat.4 : 18-22) dohot si Matius (Mat.9:9 ; hundul diparbeoan, na marlapatan ndada na marlapatan losok rohana, alai songon i ma ibana mangula, ala sijalobeo hundul do ibana laho mangula parkarejoanna), sian i ma dipatuduhon sikap ni Debata laho mamillit nahinalomohonNa ima angka na mangula jala na olo karejo; ndada manjou angka na losok roha. Ditingki dijou Tuhan i hita ditingki mangula ulaonta hita na patuduhon ndada na mangambati angka ulaonta i laho mangihuthon dohot mambege panjouon ni Tuhan i. Ala ni i sude hita tarjou do laho gabe naposo ni Debata. Alai jotjot do tatulak angka ulaon i dibagasan rohanta mandok “ndang sanga tingkingkku” manang tadok do “mansai godang dope urusanku”. Hape sasintongna ndada na mangambati angka parkarejoanta i laho mangihuthon Tuhan i marhite angka ulaon panghobasion. Jala na jumorbut muse dipartingkian on lam marsigulut do jolma i di parkarejoanna ala ni kompetisi na mansai timbo, dohot dikebutuhan-kebutuhan na lam mangimbukbuk. Gabe madabu ma godangan jolma holan lalap di parkarejoanna sian manogot sahat tu botari, laos gabe di par’debata’hon ma parkarejoanna i. Na mandok dirohana parkarejoanna i do na rumingkot sian sasude (tarmasuk sian keluarga dohot sahat sian Tuhan i). Alai mansai andul do sikap napinatuduhon ni si Elisa, dungkon dilungkuphon si Elia sampesampena tu si Elisa, pintor mangihut do mangoloi si Elisa nang pe tardok na mora ibana uju i na marnampunahon 12 pinahan. Jala dipatuduhon do nang pe ditingki mangula ibana alai dilehon do rohana di panjouon naposo ni Tuhan i. Sampesampe ni panurirang, ima napatuduhon ulaon sahalak ni panurirang. Ditingki si Elia nangkok tu surgo, dapot ni si Elisa so sampesampena i (2 Raja 2:13). Ala ni i molo dilangkuphon (dilemparkan) sada sampesampe ni panurirang tu sasahalak; na mandok ingkon ihuthononna do panurirang i, ndang boi be manulak panjouon i. Sian na gabe sisean ni panurirang i dungi sahat tu na manggantihon ibana ditingkina muse. (ptds. Luk.14: 33).
    2.       Ayat 20; Boi do dapot rohanta dipanjaloon ni si Elisa i, molo pandok ni angka na malo di Pulpit Commentary hal.464; siala nunga leleng holsoan bangso i marningot lam moru moral nang pangalaho ni jolma nang tarlumobi maradophon Debata, jadi na manghilala do si Elisa di namasa i. Dungkon dioli Raja Ahab si Isebel, lam sega ma parugamaon ni Bangso Israel uju i. Ala si Isebel ima boru ni Raja Et-Baal di Sidon na sumomba debata baal. Gabe terpengaruh do Raha Ahab nang Bangso Israel gabe manomba debata baal. Dipartingkian sinuaeng on boi do dohonon mangkilala hita di keadaan nang situasi ni  negaranta Indonesia on. Alai ise ma na olo patuduhon pangkilalaanna i ? manang na holan mangkilala do alai ndang dipatuduhon pangkilalaanna i marhite pambahenan ?. Tung apala dipatuduhon si Elisa do kepedulianna i marhite na mangoloi pannjouon i asa gabe naposo ni si Elia jala gabe panurirang. Ditadingkon sude artana i, na marlapatan; artana i ndang marlapatan i sian na mangihuthon Tuhan i na gabe naposoNa marhite Panurirang Elia. Na mangihut muse didok do disi ibana na mangumma daamang nang dainang; na patuduhon diparsangapi si Elisa do natorasna asa mangido izin (pamit) tu natorasna i laho mangihuthon panurirang Elia. Diulahon ibana do patik palimahon i. Diloas si Elia do jala di paingot tu si Elisa : “Aha do na hubahen i tu ho ?” sian sungkunsungkun on ndada na marlapatan asa dialusi si Elisa i jala asa laho mangorai ibana tu natorasna; Alai paingothon si Elisa aha naung binahen ni si Elia tu ibana ima sada panjouon na badia do i gabe naposona asa dipaboa panjouonna i tu natorasna. Molo tapatudos tu panjouon ni Jesus tu nanaeng mangihuthon Ibana (na gabe siseanNa) di Luk 9 : 61-62 mansai kontradiktif do; ai didok Jesus do: “Na manjama ninggala, huhut mamereng tu pudi, tung na so tau ma i tu harajaon ni Debata”. Ala diboto Jesus do molo laho nasida martinading hata tu keluargana boi do laos diambati keluargana i nasida laho mangihuthon Jesus. Molo si Elisa ndang dapot hita hatorangan na mardua roha ibana, alai bulus do rohana naeng mangihuthon si Elia.
Nabi Elia mengizinkan Elisa pulang untuk pamitan terlebih dahulu kepada orang tuanya. Yesus tidak memberi izin orang itu pulang untuk pamitan. Mengapa? Yesus bukan hanya seorang nabi dan bersamaan dengan karya-Nya Kerajaan Allah sudah diambang pintu. Nabi Elia mengizinkan Elisa pamitan dengan orang yang masih hidup. Yesus tidak mengizinkan pamitan, karena orang itu mau memberi penghormatan terakhir kepada orang mati. Kiranya panggilan untuk pergi memberitakan Kerajaan Allah harus dimenangkan dari pada penguburan orang mati. Karena itu Yesus berkata: "Setiap orang yang siap untuk membajak tetapi menoleh ke belakang, tidak layak untuk Kerajaan Allah." Menoleh ke belakang searti dengan ingin mempertahankan warisan nilai-nilai dan pengalaman masa lampau. Bajak biasanya dipegang dengan satu tangan saja dan tangan yang lain digunakan sebagai pengontrol lembu yang menarik bajak itu. Karena itu pembajak harus kuat dan setia memperhatikan agar alur-alur bajakan tetap lurus. Kalau menoleh ke belakang, maka alur-alurnya akan menjadi tidak karuan. Demikian halnya dengan pengikut Yesus. Ia harus berani memutus hubungan dengan warisan-warisan dari masa lampau yang menjadi penghalang. Ia harus siap menyambut tuntutan Kerajaan Allah tanpa merepotkan diri dengan kewajiban-kewajiban yang menjadi penghalang. Ia harus mengambil alih cara Yesus menilai dunia ini, yang kadang terbalik dengan cara dunia ini menilai pada umumnya. Paulus kiranya menjadi gambaran pengikut Yesus yang tepat: "Aku melupakan apa yang telah di belakangku dan mengarahkan diri kepada apa yang di hadapanku, dan berlari-lari kepada tujuan untuk memperoleh hadiah, yaitu panggilan surgawi dari Allah dalam Kristus Yesus" (Filipi 3: 13-14).
    3.       Ayat 21; Dipatuduhon si Elisa do parsitutuonna di panjouon i, olo do ibana manadinghon arta dohot natorasna; manadinghon parkarejoanna dohot keluargana. Jala ndang adong na mangambati ibana, parkarejoan, arta manang keluargana. Adam clarke mandok: “Marjea ma natoras na mangambati  ianangkhonna mangihuthon Jesus holan ala ni  sinamot na marlaok i sian na mamaritahon barita nauli tu dongan sabangsona na dibagasan parmaraan,dohot haholomon. Tung diharingkothon do na holan manarihon ngolu na mangalului hepeng sian na paluahon godang jolma sian haholomon.”  Dipatuduhon si Elisa do balga ni rohana di panjouon i marhite na dipotong na sapasang horbona i, jala ulaula ni horbo i do dipangke marmasak juhut i. Molo tapatudos tu si Petrus na mangoloi panjouon ni Jesus i, ditadingkon do jala na i alai ndang disegai (Mat.4: 18-22). Ala ni i dungkon mate Jesus, mulak  do muse nasida gabe sijala dengke (Joh.21:1-). Alai molo tabandinghon sian Ap.Paulus na mulaulaon songon na memaksa do ibana (Ul.Ap.18: 2 – 3; 1 Kor.9:6 ). Molo tajaha di Lukas 5 : 28-29 sahalak levi ima si Matius dijou Jesus, dipatupa ibana do marsipanganon songon partadingan. Songon naniulahon si Elisa patuduhon haunduhonna sian na mora na marnampunahon naposo, alai gabe sahalak naposo na mangihuthon si Elia. Laos songon i do si Josua sian mula na i na gabe naposo ni si Musa (1 Musa 24: 13; Jos.1:1), dungi si Samuel gabe marhalado dijolo ni si Elia ( 1 Sam 3:1). Si Markus (Johannes) gabe naposo ni si Barnabas dohot si Paulus (Ul.Ap.13:5). Saluhutna i ima laho marsiajar marhalado jala huhut mangajari roha asa marhaserepon (menyangkal diri).
     C.      Sipahusorhusoron
     1.       Mangihuthon Tuhan i tung mansai godang do tantangan nang hambatan; boi do ala ni parkarejoan, bisnis  na semakin memuncak, dohot angka ulaon adat, lan na asing pe. Alai dipatuduhon turpuk on do pangalaho ni si Elisa na so adong hambatan diibana laho mangihuthon panjouon ni  Tuhan i marhite panurirang Elia. Tung dilehon do rohana jala na mandok ummarga do na mangihuthon Tuhan i sian na asing. Asa dibagasan ngolunta boi masa do angka pangalaho sisongon i. Dijou Tuhan i do hita nang pe mangula angka ulaonta hita. Asa taargahon panjouon ni Tuhan i na rumingkot sian na asing.  (Mat.6: 33  Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!)
     2.       Pangke ma sude silehonlehon ni Debata laho marhalado i. Tung godang do angka silehonlehon ni Debata tu hita ganup jolma. Jotot do hita mamangke i holan tu kepentinganta sandiri. Hape ndang taboto saluhutna i sian Debata do, asa tapangke ma muse i tu hasangapon ni Debata. Ndada hea molo gabe sarjana sasahalak dungi karejo ma ibana holan tu dirina sandiri, Alai bersifat sosial do i na gabe element ni masyarakat hita melayani nasida. Ala ni naeng ma sadar hita jolma di angka talenta, silehonlehon ni Debata tu hita asa pangkeonta laho marhaladoi ditonga masyarakat; na tarjou do hita patuduhon hagogoon, hamoraon ni Debata ditonga ni bangso dohot negaranta Indonesia. Asa gabe pasupasu ma hita saluhutna laho paluahon torop jolma ditonga ni masyarakat nang bangsonta sian haholomon. Songon si Elisa ndang holan dirina diparrohahon, nang pe namora ibana alai diparrohahon do keadaan ni negarana, asa naeng songon nanidok di Jeremia 29:7 Ringkoti hamu huhut hasonangan ni huta habuanganmuna na hubahen i, jala tangiangkon hamu nasida tu Jahowa, ai molo marhasonangan huta i, marhasonangan ma dohot hamu.

     3.       Taoloi ma panjouon ni Tuhan i dibagasan bulus ni roha. Songon bulus ni roha si Elisa namangoloi panjouon ni si Elia songon singkat panjouon ni Debata tu ibana, songon i ma  nian bulusni rohanta mangoloi panjouon ni Debata dibagasan ngolunta. Unang marsidalian, jala tarlalap binahen ni portibi on. Ai na diportibi on parsatongkinan doi adong do ujung ni i sudena, molo taihuthon doi na marisuang ma haporseaonta. Ai ulaula ni sibolis do i na na naeng manait rohanta, sotung gabe tarlalap hita binahen ni sibolis i, molo taihuthon sibolis, tu hamatean do ujung ni i ; asa gabe madabu tu dosa jala upa ni dosa ima hamatean na salelengnilelengna. Rom 6:23 Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i.Alai molo taiuhuthon do Tuhan i; ima hangoluan na salelengnilelengna,  gok las ni roha do molo taihuthon Tuhan i dibagasan ngolunta ala pinargogoanNa do angka na mangihuthon dohot na pajonokhon diri tu Ibana. (ptds. Jak.4:8). Laos tanggung jawab ni angka siihuthon Jesus do laho mewariskan tongkat estafet kepemimpinan (ada recruitment ; pemuridan) na berkelanjutan. Asa tarida ma dikepedulian ni sude ruas ni huria laho mangajari sundut naumposo laho mangihuthon Jesus dibagasan ngoluna, unang lalap holan mangharingkothon parsiaran ilmu na asing sajo alai gabe tading laho marparsiajari Hata ni Debata. Tapasahat ma bohal partondion sian Hata ni Tuhan asa adong bohal hagogoon di partondion nasida laho mangadopi tondi ni zaman on. Ringgas ma ibana marminggu laos ringgas mulaulaonna. Panjouon ni Tuhan i tarida ma na ringgas do ibana. Ala najinou ni Tuhan i angka na ringgas rohana mulaulaon do ndang dijou angka na losok rohana(ptds. 2 Tess.3:10). Johannes 14:12 Na tutu situtu do na hudok on tu hamu; Patupaon ni na porsea di Ahu do songon angka ulaon na huula i; na sumurung sian i dope patupaonna tahe, ai na laho ma Ahu tu Damang. Amen.

Kamis, 20 Juni 2013

Bahan Jamita Evangelium Minggu IV Dung Trinitatis, 23 Juni 2013

Tuhan Na Manjaga Hita
Mateus 10 : 16 – 22
      A.      Patujolo
Molo tajaha sude bindu 10 on, saluhutna manaringoti taringot panaritaan tu angka siihuthon Jesus. Didok Tuhan Jesus hajongjongan ni angka na porsea i di portibi on ima sai songon birubiru ditongatonga ni babiat. Molo tabereng sian sudut logika; boha do parsautna sada birubiru na mansai gale boi mangolu ditongatonga ni babiat ?, alai nian sian pandohan on ndada songon i nian. Diajari Jesus do hita nang pe ditongatonga ni babiat ingkon  marbisuk do hita songon ulok jala lidang songon darapati; ala ni i ndada holan marbisuk alai dohot do na lidang jala ido hagogoonta. Alai molo sangombas hagogoon on ndada tarbereng hita alai kenyataanna na mambuktihon birubiru i ndang mate. Bisuk molo so mardongan lidang gabe mambahen sasahalak malo mangotootoi. Ala ni taingot ma samalomalo ni jolma mangotootoi sai hona otoan do nasida haduan. Sablikna molo halidangon i so mardongan habisuhon tudos doi tu halak na oto, alai gabe korban ni halak. Ditonga ni portibi on taadopi do godang angka musu na naeng mamolgak hita

      B.      Hatorangan
      1.       Ayat 16. Dibagasan ayat on dilehon Jesus do sipaingotNa tu angka na sinuruna sai dibagasan hasusaan do songon birubiru ditongatonga ni babiat. Sasintongna laos songon i do angka siihuthon Kristus dibagasan huria i disuru do tu tongatonga ni portibi on ndang boi holip  sian angka hamaolon. Molo dibagasan hamaolon do angka huria i, jala disoro musu i, ingkon bisuk do songon ulok jala lidang (marroha) songon darapati. Molo didok dison “bisuk” ndada na mandok bisuk laho mangotootoi, alai malo jala marroha. Marhite on naeng dohonon ni Jesus, asa dipangke nasida pangalaho nang parhataan na marbisuk jala marimpola, asa malua nasida sian mara. Alai raphon dohot pangalaho songon darapati ima : halidangon ingkon tongtong dipeop. Di hata Gorik didok ma “akeraios”, na marharoroan sian hata “a” ima :”ndang”, jala “kerannumi”, na marlapatan “marlaok” jadi akeraios marlapatan “ndang marlaok”, polin jala tulus. Diboto halak Jahudi do ia pidong darapati ima pidong na dao sian hapantason (kelicikan). Pangalaho i dapot hita do molo sai tapanotnoti darapati i. Di pigapiga ende ni halak Latin sai diparalohon do darapati dohot pidong sigak. Ditonga ni habisuhon, halidangon naeng tarida dingolu ni halak na porsea i.
2.       Ayat 17-18. Molo naeng gabe siihuthon Kristus hita jala gabe sitindangi, naeng ma jaga hita tu sude jolma. Ala nunga madabu jolma i tubagasan dosa sian mulana, ala ni i, ndada muramura jolma i manjalo barita nauli i nabinoan ni angka sitindangi ni Kristus. Naeng ma sai manghilala hita molo laho mamaritahon taringot tu Kristus i diingot ma asa marbisuk patupahonsa, ima lapatan ni ayat on. Asa tarida ma panghorhonna, sai adopan ni angka siihuthon Kristus ido angka gangguan nang ambatambat. Adopan nasidama angka sintua ni malim. Dihata gorik didok “sunedrion” na marlapatan Mahkamah Agama (Rapot godang) Jahudi na tumimbo, nang angka sintua ni halak Jahudi na maringan disi. Rapot godang i songon sada pengadilan na boi patupahon kebijakanna tu angka halakJahudi na manirpang sian paraturan ni halak Jahudi; marhite na mangalingsing nasida tolupulu sia hali. Ala ni i didok Jesus angka siseanNa i na ingkon mangadopi linsinglinsing dibagasan bagas joro. Dung i di ayat 18 didok angka siihuthon Kristus i boanonna do tu angka panggomgomi dohot raja. Hata “penguasa (panggomgomi) di hata asli gorik didok “hegemon”, molo di Padan na Imbaru sai marlapatan doi angka wali-wali ni masyarakat (negeri) na dipajongjong bangso Rom di sude habangsana. Molo didok dison raja martudutudu ma i tu Herodes Antipas dohot Herodes Agripa (na sasintongna unduk tu Kaisar Rom). Alai pandohan on ndang apala marhahonaan tu angka siseanna i na sampuludua i disituasi dohot kondisi di tingki i. Pandohan i ma sa do di tingki Apostel Paulus  ( 2 Korint 11: 24). Jadi adong do huaso ni angka panggomgomi laho mangalo haKristenon i marhite angka sintua nihalak Jahudi. Boi masa do nang sahat tu partingkian sinuaeng on; masa pangaleleion tu halak Kristen na ingkon mangadopi paruhuman (dipengadilan) ni angka hakim, holan ala Kristen hita na mambaritahon Barita Na Uli i.
     3.       Ayat 19-20. Dihasusaan i boi do gabe mambiar siihuthon Kristus i, aha na naeng sidohononna dijolo ni angka hakim manang ditonga paruhuman i. Ala ni i diapuli Jesus do rohanasida, na marbagabagahon Tondi Parbadia na mangalehon bisuk tu nasida uju ditonga ni Rapot Godang i. Dipardalanan ni huria na parjolo i pe masa do songon nanidok ni Jesus i na mangadopi paruhuman dijolo ni hakim, sai pinargogoan ni Tondi Parbadia do nasida laho mangalehon alus na tangkas. Isarana si Polikarpus, sahalak ama na matua mandok dijolo ni Panggomgomi Rom (Gubernur Romawi) asa mangihuthon Kristus asa malua nasida sian uhum hamatean. Didok Polikarpus do: “Nunga ualupulu onom taon ahu lelengna gabe siihuthon Kristus, jala sai diparade Kristus i do angka na denggan di ahu; boha bahenongku mamburai Rajangku na paluahon ahu?”
    4.       Ayat 21 – 22; Angka siihuthon Kristus ima angka parjambar di hangoluaon sogot, alai siadopanna ditonga ni portibi on, ima angka na manghosomi, dohot na so manghalomohon angka siihuthon Kristus i. Didok do pangalaho dibuhai sian tonga jabu: keluarga. Angka na satia tu Kristus i sipabotohononna do tu angka panggomgomi, jala dipasahat keluargana sandiri. Ala ni i tantangan na umborat boi do sian angka na tahaholongi manang na jumonok sian hita. Boi do gabe muba rohanta hinorhon ni pengaruh ni keluarga. Ala tung aha pe na masa sai unang ma tasoadahon Kristus i diadopanta. Asa molo manahan do hita sahat diujungna, dapotan haluaon ma hita. Pangungkapon 2 : 10c  Sai burju ma ho rasirasa mate; dung i lehononku ma tu ho tumpal hangoluan i!

     C.      Sipahusorhusoron
Sian hatorangan i ringkot do botoonta angka pigapiga ruhut siingotonta;
    1.       Angka na porsea i naeng  ma nian mangaranapi realitas ni portibi on. Dalan ni Jesus laho marsuru angka siseanna mansai marasing situtu- angka sisean i ndada dipaloas mamboan siboanonna alai ndada na mandok na so parduli Jesus ta nasida, ndang, alai dilehon Tuhan Jesus do di nasida huaso laho pamulihon angka tondi na jat jala laho pamalumhon ragam ni sahit dohot angka hagaleon. (ptd. Mat.10:1). Angka sisean i pe dilehon huaso na asing ima; molo ndang ditangihon jolma na tinopot bagas nasida hatana dapothononna ma bura di nasabagas i, ala i sabalikna molo dijalo nasabagas i do Hata ni Debata dapotan pasupasu ma nasabagas i. Mansai  balga do huaso na nilehon ni Tuhan i dinasida, alai taingot ma, unang ma lalap hita binahen ni portibi on, mansai torop do musunta. Dihosomi portibi on do angka siihuthon Kristus. Ingkon ingotonta do ndada hea Jesus marpadan mandok na so aeonta nagka nadokdok i. Ndang! Alai angka siihuthon Kristus ingkon manarita, pinasiaksiak portibi on songon birubiru ditongatonga ni babiat. On ma keadaan ni portibi on, ala ni ima asa realistis hita mamereng portibi on didok Tuhan i jala secara holistik. Mansai asi do roha marnida angka halak Kristen i na sai holna mamereng sada sisi ni portibi on na holan mamereng positif na sajo jala manghuphupi angka na negatif. Ala ni i ma ndang pola heran hita molo songgop sahit, sitaonon, angka arsak tu hita olo do muruk hita tu Tuhan i. Alai taingot ma ndada hea Tuhan i marjanji asa sai dibagasan las ni roha hita mandalani ngolunta raphon Ibana. Ndang ! alai dibagabagahon Tuhan i do di hita hagogoon, dibagasan panggomgomionNa dohita asa marlas ni roha.
      2.       Angka na porsea i molo mangulahon manang aha pe naeng ma dibagasan motivasi na polin
Sian mulana nunga dipungka Tuhan Jesus tu portibi on angka na positif dohot na negatif tu angka siseanNa. Ndada hea ditawari Jesus tu hita angka na songon na tonggi jala imitasi. Naeng lam risik hita jala tinggil mangadopi angka sipaotooto na sian sibolis i. Nunga madabu tu bagasan dosa portibi on, nang hita pe nunga dibagasan dosa i. Alai dijou do hita haruar sian i marhite na tajalo Jesus Sipalua i. Dibagasan portibi na mardoa on gok angka angkal na bisuk ni portibi laho mangelaela hita. Adopanta ma angka babiat panoro na naeng mamolgak hita. Didok portibi on do marhite jolma i ; na denggan do di portibi on. Hape ndang disadari nasida holan sai hira fatamorgana do portibi on, berengon bagak alai ndada mangalehon hasonangan na manongtong, parsatongkinan do. Ala ni i ro ma pandohan na jat (Problrm of evil): “Molo adong do Tuhan i, boasa masa angka parsahiton dohot parungkilon ? sungkunsungkun i adong ala nunga madabu jolma i tubagasan dosa. Hape ndang disadari jolma i angka sahit, nang parungkilon i saluhutna ala ni pambahenan ni jolma i sandiri do. Jolma i do na manegai portibi on, ala ni i ndang boi tasalahon Tuhan disi. Ala ni i ingkon marbisuk ma hita jala lidang songon darapati laho mangadopi zaman on.
3. Jaga ma hita mangadopi partingkian on. Molo di dok jaga, ndada marlapatan gabe ndang mangula be hita, manang mansohot sian angka ulaon. Ndang ! alai dituntut do asa aktif hita di angka ulaonta. Ndang mura hita dipalindaklindak portibi on. Unang be marpangalaho na komprimistis hita (na menolerir) sude na masa, gabe so taboto be hasintongan dohot hatigoran. Molo naeng jaga hita disude situasi ni ngolunta; ringkot ma tabohali dirinta marhite Hata ni Debata, ingkon jahaonta do i na gabe sinjatanta sian pigapiga sinjata na naeng pangkeonta mangadopi sumbia ni portibi on. Asa marhite i ndnag muramura hita dipaotooto portibi on. (Ptds. Psalm.119:105; Jes.55:11; Joh.17:17; 2 Tim.4:2; 1 Joh.1 :10). Unang ma mabiar hita molo dipasahat hita tu paruhuman ni portibi on ala hasintongan di Kristus i. Sotung ala ni biar ni rohanta gabe penghianat hita marbalik sian hasintongan i. Alai taingot ma na nidok di Matius 10 : 28  Unang pola mabiar hamu mida angka na mambunu daging, angka na so tuk mambunu tondi; alai na marhuaso mangagohon daging dohot tondi tu na roko, i do sihabiaranmuna. Na parpudi asa margogo hita mangadopi i naingkon pangidoanta do gogo sian Tuhan i asa margogoihon hita. Tapanggomgomhon ngolunta tu Ibana. Na ingkon sangkambona do hita dohot Tuhan i marhitehite Tondi na Tondi Parbadia i. Johanes  15:5 Ahu do hau anggur i, hamu do ranting i. Na mian di bagasan Ahu jala Ahu di bagasan ibana, i ma na marparbuehon godang; ai ndang tarula hamu agia aha, anggo so mardongan Ahu.  Amen.

Selasa, 11 Juni 2013

Bahan Sermon Jamita Epistel Minggu IV Dung Trinitatis, 16 Juni 2013

Sai Taingot Ma Tuhan Napaulihon Hita
Galatia 4 : 4 – 9
      A.      Patujolo
Denggan do laho mangantusi turpuk jinaha sian ayat pamuhai sian ayat 1 asa dapot hita pangantusion di turpuk on. Dipatorang do di jolo ni turpuk on; saleleng dakdanak dope “panean” (hak pewaris), ndang dia imbarna tu “anak somang” (tidak memiliki hak wwaris), hot dope dibagasan gomgoman manang huaso ni perwakilan sahat tu tingki na tertentu, ndang adong hakna mambahen haputusan taringot tu dirina, jala ndang adong huasona mangaramoti dirina sandiri, ai hibul do ibana dibagasan huaso ni perwalianna. Asa doshon tu halak na tarhurung do jolma na so malua sian gomgoman huaso ni dosa, ndang mampu mangadopi tantangan, muramura mandele. Ndolu na tarhurung, i ma ngolu na pesimistis, ala ndang jumpang di ibana “visi” dohot “optimisme”. Suang songon i do didok ap.Paulus ima ngolu ni halak Kristen, ngolu ni siihuthon Kristus i andorang so Kristen, doshon “dakdanak” dope di portibi on, unduk tu huaso ni sisiasia ni hasiangan on, unduk jala niatur ni angka parbintang (ilmu astronomi; ilmu falak). I do umbahen dipamasa halak Galatia pesta-pesta na mardomu  tu angka ari Minggu, Bulan dohot Taon na tertentu (patds. Ay.10). Ala ni i do didok si Paulus : “diparhatoban sisiasia ni hasiangan on do...” Ngolu na pinarhatoban ni portibi on, i ma ngolu na godangan terfokus tu angka hal-hal duniawi, jala ndang jumpang di ibana pos ni roha, ala nunga targantung roha dohot  pingkiranna tu angka benda-benda alam (magis, dunamisme dohot animisme).
      B.      Hatorangan
1.    Ganup jolma na unduk tu tondi ni hasiangan on sarupa ma i tu dakdanak, ndang adong hak pewarisanna, ai dirajai hhuaso ni portibi on dope. Dung pe ro Jesus Kristus pasingkophon Patik i, gabe malua ma jolma i sian parhatobanon ni Patik, jala gabe muba ma statusna sian “anak somang” (hatoban) tu “anak ni Debata”, naung malua (merdeka) jala huhut nunga gabe panean di arta na pinarade ni Debata. I ma haluaon sian dosa dohot hangoluan na salelengnilelengna. Ala ni i do ganup na porsea sai tongtong do ibana optimis, nang pe rongom sitaonon ala nunga dihilala ibana naung “dipalua” manang dimerdekakan Jesus Kristus.
2.    Andorang so “anak ni Debata” hita, nang pe nunga targoar “anak ni Patik” ndang adong hakta manjouhon tu Debata: “Abba” manang “Ale Amang”, alai dung pe ro Jesus Kristus na tubu sian sada boruboru na ginomgoman ni Patik i, gabe dipadomu ma hita tu Debata, dipatupa ma relasi na imbaru maradophon Debata, gabe adong ma hakta mandok: “Ale Amang”. Ala nunga malua ibana sian gomgoman ni Patik nunga gabe halak na merdeka, jala nunga gabe pewaris di hangoluan salelenglelengna, gabe adong ma di ibana “habaranion haporseaon” manjou Debata, mandok “Ale Amang”. Lapatanna; ngolu ni jolma naung dapotan relasi na imbaru maradophon Debata, sai tongtong doi girgir jala mangaradoti parsombaon dohot partangiangonna tu Debata Ama i.

      C.      Sipahusorhusoron
Adong ma sahalak pelatih sirkus na pauliulihon sada pinahan babi. Dibahen ma pahean ni pinahan babi i na mansai bagak; dibahen sarungna, dibahen rompina jala dibahen ma songon jas na na birong. Dibahen muse dasi kupukupu di  osangosangna dungi di bahen tahulukna na birong na marsurat “Olimpiade” huhut dihunti ma banderana, sai hira peserta kontingen. Dungi di jujui ma pinahan babi i asa mardalan di pentas, jala marnidasa marsuraksurak ma angka penonton ala mansai uli dibereng nasida pinahan babi i sai hira jolma ma dibereng nasida pinahan babi i. Dungkon marujung acara i, muli ma pinahan i tu pudi ni pentas ala adong disi tano na maraek jala margambo. Nang pe nunga dipauli pinahan babi i jala dibahen paheanna, tong do goarna pinahan babi. Pangalahona sai songon i dope nang pe sai niajaran. Ndang pola dibuha paheanna pintor marlange do pinahan babi i tu tano na margambo i. 2 Petrus 2: 12 “Alai songon binatang na so marroha do nasida, angka sitangkupon jala sibunuon hian, umbahen na tubu; na manginsahi do nasida di na so binotonasida, gabe mago ma di hamagoannasida.” Ayat 22. Jumpang do di nasida hata ni umpama na sintong on: Na mulak do biang tu utautana, jala na margulu do babi di na rotakna, dung mangarembe.
Hamu angka dongan sian barita illustrasi i; songon i ma digombarhon pangalaho ni halak Kristen di Galatia uju i. Angka na porsea jala naung dipaias Tuhan Jesus dosadosana i alai sai mulak dope rohana tu ngolu na dibagasan haholomon madabu tu gambolisop ni dosa. Boi do masa pangalaho ni halak Kristen di Galatia ujui tu partingkianta sinuaeng on. Nunga sega hita binahen ni dosa i uju so tajalo dope Barita Nauli ima Jesus i, alai dungkon tajalo Sipalua i ; Jesus Kristus dibagasan habadiaonNa gabe dipauli ma hita marhite hasesaan ni dosanta. Alai mulak muse roha ni halak Kristen i tu ngolu na robi. Alai molo sai tapahusorhusor do pandohan ni Johannes 3 : 16  Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana. Lapatanna marhitehite AnakNa Jesus Kristus nunga dipadame hita dohot Debata. Nunga diburi dosa-dosanta marhite mudarnNa i asa malum hita ja badia ala na badia do Debata; jadi nunga dipauli Debata hita asa tama hita mangadop HabangsaNa Nabadia i. Molo nunga uli rohanta nang haporseaonta, gabe pelean jala uap na hushus ma i tu adopan ni Habangsa ni Debata. Ndang tama pelehononta dirinta molo sai bau ala ni dosadosanta i. Unang ma hita manghalupahon denggan ni basaNa i. Sai taingot ma Tuhan Napaulihon hita. Amen.


Senin, 10 Juni 2013

Bahan Jamita Evangelium Minggu III Dung Trinitatis, 16 Juni 2013

Haporseaonmi Do Paluahon Ho
Lukas 7 : 40 – 50

     A.      Patujolo
Digoari angka pande bisuk ni Padan Naimbaru evangelium Lukas on borhat sian pangumpolanna i songon sada  evangelium sosial (ptds. Luk.5:32; 19:10). Tarida do kepedulian ni si Lukas tu angka masyarakat  na dibagasan hapogoson jala angka na metmet na gale. Jala dipatuduhon do sada sian kepedulian i di bagasan turpuk tu sada parompuan na mardosa. Na dibuhai do turpuk on sian panamueon ni si Simon, sahalak Parise di sada huta, di na bongot Jesus tu luat nasida. Marpardomuan tusi, ingkon tangkas ma di hita hasomalan manang budaya ni halak Jahudi di  ombas ni turpuk on taringot tu partamueon. Alai ndada diulahon si Simon na targoar halak Parisi na menekankan ha-Jahudion dibagasan ngoluna. Bolas do holan Parompuan na popgos jala tardok pardosa di roha ni halak Jahudi na mamiahi pat ni Jesus. Ibana  dio na umboto manamuei manang manjanghon Jesus sian nasa rohana. I do umbahen parumpamaan i laho mangajari si Simon do asa manghilala di pambahenan ni parompuan i tu Jesus martimbanghon na soada nabinahenna tu Jesus. Haluaon i do jambar ni na manjanghon Jesus songon panjanghonon ni parompuan i.
Haluaon di hata Heber di dok “syalom” ima haluaon na marpardomuan tu ngolu sisaonnari di portibi on, dohot haluaon di ngolu sogot di Surgo i. Ala ni i, ndada holan ngolu partondionna hinamham ni “Haluaon” i, alai dohot do nang ngolu pardagingon di portibi on. Haluaon na songon i do na gabe impola ni jamita ni turpuk minggu on.Marhite turpuk on dipatorang do holan sada do dalan laho manjalo haluaon i, i ma : holan marhite haporseaon (Solafide). Mangihuthonm ajaran Martin Luther, taringot tu dalan manjalo haluaon, adong do tolu  sola, i ma : Sola Fide, Sola Gratia, Sola Scriptura, sisada ihot do na tolu i so boi tarsirang marojahan tu haporseaon. Sada do dalan laho manjalo haluaon manang keselamatan ima marhite “Haporseaon” (Epe. 2 : 8; Gal.2:16).
      B.      Hatorangan
      1.       Ayat  40 – 43; Laho patorangkhon kondisi ni parompuan i, dihatahon Jesus ma umpama sada taringot tu dua halak parutang . Umpama i secara langsung mangonai ndada holan tu boruboru pardosa i, alai langsung mangonai tu sude jolma pardosa. AI rajumon parutang do sude jolma pardosa tu Debata. Ia parutang na gumodang di turpuk on, 500 rupiah utangna. Na sada nari 50 rupiah utangna. Anggo dihata aslina, 500 dinar dohot 50 dinar do i. Ala ni i, ndang  jadi tabaen ukuran sian segi nilai rupiah, nang pe di Bibel on tarsurat dibagasan rupiah. Alai na pasti, duansa parutang i ndnag mampu manggarar utangna. Ala nunga utang na godang i jala borat umbahen so mampu nasida manggarar na tinudu ni umpama i, boruboru i ma termasuk parutang na godang, ima parutang si 500 rupiah. Alai halak Parise, termasuk si Simeon, ima parutang si 50 dinar, na dianggap otik dope, alai ndnag mampu manggarar. Duansa do parutang i diampuni parsingir i, jala disesa utangna i so pola be gararonna. Laos osngon i do nasa pardosa, marhite haroro ni Jesus disesa do sude dosana so ala ni pambahenanna. Inti ni sude umpama i, i ma “pengampunan” so ala ni jasa nni parutang i, alai melulu ala ni asi ni roha ni parsingir i, i ma Debata. Umpama i manggombarhon pengampunan ni Debata tu sude jolma pardosa so ala ni pambahenanna manang pangidoan ni jolma. Ala dung trajalo hasesaan ni Dosa i, patut do hita patuduhon las ni roha manghamauliatehon hasesaan ni dosa i. Disi do saut hasesaan ni dosa i molo taauhon jala tahamauliatehon hasesaan ni dosa i. Alai molo ndang itahalashon hasesaan ni dosa i, ndang tutu sesa dosanta.
     2.       Ayat 44 –  46 ; Di ruhut  partamueon ni halak Jahudi naung suan sian Padan Narobi hasomalan : dung sahat tamue i di jolo ni jabu, ingkon dihalaputi do manopot tamue i jala peakhononna tanganna tu abarana huhut ummaon tangganna. Marhite on naeng patuduhonon ni na manamuei i do las ni rohana diharoro ni tamue i huhut patuduhon roha na gok dame. Andorang so bongot tu jabu, ingkon diburi do pat ni tamue i. Marhite i ma patuduhon toruk ni rohana nang las ni rohana manjanghon haroro ni tamuena i, asa taruli las ni roha mamasuhi bagasna i, ai nunga sian pardalanan na mansai dao tamue i ro tontu na boi do hona angka orbuk ni tanoi simanjojaknasida. Dungi roma parbagas i mangusehon miak na hushus  tu simanjujung ni tamue i. Marhite i nanaeng patuduhon na mansai pinarsangapan do tamue i ro tu bagas na. Jala di turpuk on dibaritahon na ro do Jesus martamue tu bagas ni si Simon. Nunga tarsar barita taringot tu Jesus ima sahalak Guru manang didok Rabbi. Alai disi ro Jesus martamue tu bagas ni si Simon, ndang diulahon ruhutruhut hasomalan di namartamue di halak Jahudi. Bolas sahalak parompuan do jala na tangkas dibege baritana sahalak pardosa sian tongatonganasida mangalapu dohot obukna, patupahon penghormatan na tumimbo, paboa na ditanda jala dihaporseai boruboru i do Jesus songon Mesias jala Tuhan Sipalua. . Ala ni habaranion ni parompuan i laho mangusehon miak na arga situtu. Hape molo dihepenghon gabe panghorhon pangomoan na mansai balga tu ngolu siganup ari. Hape anggo si Simon, dianggap jolma biasa do Jesus i na gabe panurirang, ndada songon Tuhan. Ala ni i do ndang apala na istimewa pambahenan ni si Simon tu Jesus.

     3.       Ayat 47 –  50 : Sian pambahenan parompuan i do tarida haporseaon, laos i do bukti hasesaan ni dosa. Songon halak na marbada, molo dung mardame jala masimaafan, sian pambahenan siganup ari do tarida naung toho mardame. Laos songon i do hasesaan ni dosa tarida ma i sian holong ni roha tu Jesus. Ganup halak naung holong rohana tu Jesus, i do naung manjalo hasesaan ni dosa. Laos tarida do holong ni roha i sian pambahenan siganup ari, jala laos i do bukti hasesaan ni dosa. Hasesaaan ni dosa i dijalo boruboru i holan ala asi ni roha ni Jesus. Sasintongna ndang sae holan pambahenan ni boruboru i asa gabe sesa dosana, ai tung pardosa bolon do ibana. Manesa dosa ima huaso ni Jesus tu ganup manisia na porsea di Ibana. Pandohan : “Haporseaonmi do na paluahon ho....” na marlapatan haporseaon ni boruboru  i manghorhon godang na imbaru dibagasan dirina, gabe barani ibana mandapothon Jesus. Aut sugari ndang adong haporseaon i, ndang barani ibana mandapothon Jesus. Haporseaon i manghorhon hasesaan ni dosa dohot ngolu na imbaru. Laos haporseaon i mambahen sungkunsungkun sude na mangingani inganan i, ala Jesus barani manesa dosa ni parompuan i.Dipingkir nasida Jesus ima holan sahalak Guru manang Rabbi sambing, hape Jesus ima  Tuhan na marhuaso manesa dosa ni jolma. Markus 2:10 Alai asa diboto hamu, marhuaso do Anak ni jolma i di tano on manesa angka dosa.

     A.      Sipahusorhusoron
Ø Tapamanat Haporseaontabe. Ia turpuk on mambaritahon taringot tu sikap nang pangalaho ni Halak Jahudi na merasa nunga “diatas angin” di haporseaon, dos dohot turpuk epistel i na patoranghon taringot pangalaho ni Raja David merasa ndang adong hasalaanna ala dirajumi dirina na marhuaso, jala sahalak panguhum di masyarakatna, hape gabe lupa diri ibana di pangalahona na lam dao sala sian adopan ni Debata. Ai dilapati halak Jahudi manang halak Parise do haluaonna marhite haporseaon oppungnasida si Abraham asa gabe pasidohot nasida disi; jala sai hira ditengahon nasida ma i. Hape nada songon i haporseaon namangihuthon Jesus. Haporseaon ganup jolma i do mangihuthon Jesus dibagasan ngoluna. Asa tung boi do masa pangalaho ni si Simon (mewakili sikap nang pangalaho halak Jahudi nang halak Parise hatiha i) masa di tonga ni halak Kristen sinuaeng on, na manghilala dirina halak Kristen na naung disesa jala dipalau Jesus sian dosa, boi gabe madabu tu “kesombongan rohani”. Boi do didok rohana dirina nunga dipalua Jesus jala parjambar di hangoluan sogot, alai molo angka parugamo na asing i ndang pasidohot, manang menganggap sipardosa bolon asa dirina songon hatorangan ni carita ni Jesus i. Hape ndang hea tatambortambori haporseaonta asa lam tang di pangantusion Hata ni Debata. Hape Jesus si Palua saluhut natinompana do “Juru Selamat Dunia” ndada holan milikta Tuhan i, alai Tuhan Jesus milik ni saluhut (ido asa didok Baritahon barita Nauli i tu sandok portibi  on, asa marhite i ditanda Portibi on ise Jesus Sipalua i). Ala ni i sotung tartading hita dina mangulahon haporseaonta i sian parugamo na asing sian hita Kristen. (ptds. Lukas 6: 32-34; 10:25-37)
Ø Ganup hita angka na porsea tama do masipaingotan angka dosanta; asa disi ma naeng tarida roha na masipauliulian, ndada na masipasombuan. Molo peduli hita tu donganta tontu tapaingot do di angka hasalaan nang dosana. Asa tarida ma roha na olo pangoluhon haporseaon do i songon jamita minggu na salpu “ Roha Napangoluhon” haporseaon na naung mate (mintop). Dibagasan turpuk epistel tung dos do sikap nang cara ni Panurirang Natan dohot Jesus laho paingothon jolma na mardosa i; dipatupa do songon sada carita pendahuluan laho patoranghon hasalaan dohot dosana i, saluhutna pangalaho songon sada habisuhon na sian Debata do i, asa diantusi na mardosa i hasalaanna nang dosana. Gabe sada tiruan ma on di angka na porsea, asa tapangido sian Tuhan i gogo dohot bisuk laho paingothon dosa nang hasalaan ni donganta, asa tarjalo nasida hata nang sipaingotta (Yeh.33:8-9; Mal.3: 16; Kol.3:16; I Tess. 5: 11; Ibr.10:25; 2 Petr.1:12-13)
Ø Tama ma hita masisesaan dosa. Diarahon turpuk on do hita laho manghaporseai dohot manghangoluhon pandohan ni Jesus: “Nunga sesa dosami..”asa masisesaan dosa nang hita na porsea di Jesus Kristus. Asa di pangalaho masisesaan i do naeng patuduhononta mangolu Tondi Parbadia i di hita ganup angka na porsea jala patuduhon pangalaho na sada dohot Tuhan i do hita disi, songon hasadaon ni Tondi Parbadia, Jesus Kristus dohot Debata Ama i; hasitolusadaon (Trinitatis). Efesus 4 : 32 Alai gabe na basar ma hamu sama hamu, angka parasiroha; masisesaan dosa ma hamu, songon panesa ni Debata di dosamuna di bagasan Kristus. (ptds.Luk.11:4; 17:4; Joh.20:23; Kol.2:13; 3:13; 1 Joh.1:9). Songon topik di minggunta on mandok : “Nunga Disesa Angka Dosam”. Taulahon ma na masiseaan dosa i asa tarida ma Holong ni Debata marhitehite Jesus i tu hita jolma pardosa on dibagasan ngolunta (Joh.3:16). Amen.

Kamis, 06 Juni 2013

Bahan Jamita Epistel Minggu III Dung Trinitatis 12 Juni 2013

Tuhan Manesa Dosanta
2 Samuel 12 : 10 – 14
      A.      Patujolo
Tung mansai las situtu do roha ni Bangso Israel marnida si Daud asa si Saul siala peranan ni ibana na balga laho manghajongjonghon harajaon Israel. Jala Raja Daud do nanihalashon rohanasida na mangalehon godang pamingkirion, laos ala ni pangalaho i ma dihirim ni roha ni bangso i haroro ni Mesias laho paluahon bangso Israel , jala laos tarida doi muse panghorhonna di Padan na Imbaru haroro ni Mesias i ima Jesus Kristus na sian pinompar ni si Daud. Dipatuduhon si Daud doi di masa harajaonna pajongjonghon bangunan istana, mamuhai angka dalan na balga, pabangkithon ekonomi ni rakyatna manghorhon hagabeon ni harajaonna. Alai ndada holan i naniula ibana, alai songon naposo ni Debata Ibana ( 1 Sam 13:14), sai diingot do laho paulihon parsombaon nasida tu Debata Jahowa. Diboan ibana ma poti parpadanan ni Jahowa sian Kiryat-Yearim jala di peakhon di undungundung na pinajongjong di Jerusalem. Mansai godang do angka paraturan parugamoon na pamorahon kebaktian nasida di bagas joro ni Debata di ari na mangihut. Tarmasuk ma i angka pesalmen na sian Raja Daud.
 Dimasa kejayaan ni bangso i di parugamoon i gabe baliksa Raja Daud madabu tubagasan dosa di na sengaja ibana mangaloas si Uria tu parporangan asa mate tarbunu. Dungi dosa na mangihut i ma mangalangkup ibana mambuat Batsyeba gabe jolmana.
Alai dipaingot Debata ma dosadosana i marhite Panurirang  Natan. Gabe muba ma roha ni si Daud na manolsoli dosadosana i tu Debata sian nasa ateatena. Alai nunga masa angka na masa na gabe bukti ni pambahenan ni dosana. Dosa na manegai sangkap ni Debata tu naposoNa si Daud. Panolsolion ni dosa si Daud i dibege Debata na paubahon uhuman hamatean hian nama gabe ndang marlangku be. Pangalaho ni si Daud i do na tarataratai di bagasan turpuk on.

B. Hatorangan
     1.       Ayat 10-12 : Mansai ringkot do nian tajaha sian ayat 1 sahat tu ayat 9, asa boi taralusanta boasa tubu pandohan on. Ima pandohan ni panurirang Natan tu si Daud Raja ni Israel. Marbonsir ma i sian pangalaho ni si Daud di angka dosana i. Diboto Debata do pangalaho ni si Daud na so dos tu lomo ni roha dohot sangkap ni Debata, ido umbahen dilumbahon Debata tu ibana marhite panurirang Natan. Nang pe sai barita las ni roha sipasahaton Panurirang i alai ndada mangambati laho paboahon hasalaanna manang uhuman ni Debata na na ingkon masa diibana. Ala ni i asa diantusi si Daud aha do dosana i, dibahen si Natan ma sada parumpamaan. Ia Raja Daud marhajongjongan songon panguhum do hatiha i, naingkon patigor uhum dohot hasintongan tu bangsona (8:15). Siala ni i ma panurirang Natan mancaritahon sada parkaro na ingkon sitimbangkonon ni si Daud marhite hajongjonganna songon panguhum. Alai ndada sadar si Daud na mandabuhon uhum tu dirina sandiri do i. Dipaboa si Natan ma sada Parumpamaan sahalak na mora na mambuat anak nibirubiru ni sahalak na pogos. Na mora ndada na holan mangahut tu diri, jala holit, alai na sai holan mamingkirhon dirina sandiri do, jala ndang asi rohana tu na pogos i. Nunga pogos na pogos i lam marpogos ma ala ni pambahenan ni na mora i. Dung dibege si Daud parumpamaan i, didok ibana ma pangkilalaanna taringot tusi, ima na so adong ketidak-adilan di na pogos i. jadi marpiarpiar ma rimas ni si Daud mambege pangalaho ni na mora i. Ninna ma mandok si Natan: Songon sintongna mangolu Jahowa, ingkon marutang hosa baoa na mambahen songon i (ay.5). Dung i ninna si Natan ma mandok si Daud: Ho do baoa i !. Dipatorang si Natan ma dosana i na mambunu si Uria marhitehite podang ni halak Amon jala ihutma muse si Daud mambuat jolma ni si Uria gabe jolmana. Ndada pe ndang apala si Daud na langsung mamunu si Uria, alai ibana do na merencanakan i sude asa boi ibana marlomolomo laho mambuat si Batsyeba gabe jolmana. Ala ni i dua dosa na mangalaosi patik ni Debata Mamunu dohot mangalangkup (ptds. Patik VI,VII, X ), jadi ndang sumurut podang i sian jabu ni si Daud ro di salelenglelengna. On ma na gabe bura di si Daud dibagasan ngoluna; mambarontak do si Absalom laho mangalo si Daud, jala tolu anakna mate dibunu marhite podang ima si Amnon, Absalom dohot Adonia. Mangihut ma muse uhuman ni Debata tu ibana mardomu tu pangalangkuponna i. Masa ma jea di pinomparna. Molo si Daud mangulahon dosa i diinganan na buni ima holan na diboto dongan sabagasna do. Alai di uhuman i mandok angka jolmana i buatonma di arian, jala botoon ni saluhut Israel ma na masa i. Jala na mangulahon i ndada sian duru ni jabuna alai sian bagasan keluargana sandiri do. Pangalaho i masa ma di si Absalom na mambuat jolma ni si Daud dijolo ni halak Israel (16:22)                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                      
     2.       Ayat  13 – 14; Ndada na gabe ujarujaran si Daud songon na binahen ni si Saul tu si Samuel najolo, alai langsung do mangoku si Daud di angka dosadosana i. Ala ni pengakuanna i ma, gabe ro ma hata ni Panurirang Natan taringot tu hasesaan ni dosa na sian Debata. Hasesaan i mardomu songon pandohan ni Panurirang Hesekiel di Hesekiel 18: 23 Tung tagamon marlomo ni roha ma ahu mida hamatean ni parjahat i, ninna Tuhan Jahowa; nda tagonan nian, molo muba rohana i sian dalanna angka na sai laon, asa mangolu ibana. Jadi uhuman mate na ingkon masa di Si Daud i ndangbe dipamasa si Natan. Parsaoran ni si Daud dohot Debata nunga dipauli marhite pangkauanna dohot hasesaan nidosana. Alai pambahenan ni si Daud i ndada holan mangonai tu Debata, alai sahat do panghorhonna tu jolma. Asa angka musu ni Debata na mamboto dosa ni si Daud, boi do gabe insahan nasida pangalaho i molo so dipamasa Debata uhum taringot tu pangalangkuponna i. Asa unang gabe dilapati molo anak haholongan ni Debata si Daud gabe ndang masa uhuman diibana. Ido umbahen anak natinubuhon sian pangalangkupon i ingkon mate. Asa sude jolma umboto sikap ni Debata tu pangalaho ni si Daud i, jala asa sude jolma manghabiari uhuman ni Debata i.

    C.      Sipahusorhusoron
  Ø  Tatopoti angka dosanta. Ndang adong na buni diadopan ni Debata, sudena i patar do diadopanNa termasuk ma di angka dosa ni jolma i. Jala ndang mardiaimbar na pogos manang na mora, na lea manang na sangap, hatoban manang raja, sude dos diadopan ni Debata. Termasuk ma Raja Daud na hinaholongan ni Debata. Ala ni dosana i, masa ma tolu uhuman di ngolu ni si Daud, ima : Naparjolo; Angka pinomparna sai dibagasan hagunturon (pemberontakan) dohot parporangan. Napaduahon; sude angka jolmana diangkupi di jolo ni sude halak Israel. Napatoluhon; anak na sian boni pangalangkuponna dohot si Batsyeba i ingkon mate. Ala ni dosa boi mangkhorhon tu na deba. Parmaraan ala ni dosa ndada holan na nihilalaon ni na mambahensa ali tung boi do sahat pangontakna tu keluarga dohot pinomparna (ptds. 2 Musa 20 : 5; Poda 28 : 13)  1 Johannes 1 : 9 “Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.”
  Ø  Manghamauliatehon Pasupasu ni Debata. Sai ro do dosa marhitehite sibolis laho mangelaela hita jolma jala ndang siida bohi; tung sude do jolma i naeng unjunanna asa madabu tubagasan dosa. Songon si Daud na marhasangapon i ala ni habalgaonna dohot peran ni ibana di harajaon i. Alai disi ro songgop dosa i di ibana roma hasusaan dingoluna. Ndang dihalashon ibana na adong diibana (ptds. Patik X; “unang manghaliangi/ jangan mengingini”). Raja Daud ndang merasa puas na adong di ibana. Pangalaho i boi do masa dibagasan ngolunta, asa manat hita mandalani sidalannta. Tahamauliatehon ma angka pasupasu ni Debata dibagasan ngolunta jala tarpahaseang ma i gabe hasangapon di Tuhan i. 1 Tessalonika 5 : 18 “Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus”
  Ø  Masipaingotan ma hita. Mansai uli napinatupa Panurirang Natan laho paingothon dosa ni si Daud i, ndang pintor tullomtullom ibana paboahon dosa ni si Daud alai marhite gogo dohot bisuk na sian Tuhan i do ibana paboahon dosa ni si Daud. Laos songon i ma nang hita molo tabereng adong hasalaan manang dosa nataboto diulahon donganta nang jolma na asing, denggan do masipaingotan. Jala dipangido ma gogo nang habisuhon sian Tuhan i asa tau ibana laho paingothon dosa nang hasalaan ni donganna. Boi do ala so taboto cara paingothon hasalaan nang dosa ni dongan gabe patubu partuktuhan manang hamaolon manjalo sipaingot i (2 Ptrs. 1 : 13). Kolosse 3:16 Gugun ma hata ni Kristus maringanan di tongatongamuna; mardongan sandok hapistaran ma hamu masiajaran jala masipaingotan marhitehite angka ende psalmen, endeende pujipujian dohot ende partondion; endehon hamu ma Debata di bagasan rohamuna marroha hamauliateon
  Ø  Nunga Sesa Dosam. Ndada adong sahalak sian hita jolma na boi malua sian dosa ia so Debata na manesa dosanta marhitehite AnakNa Jesus Kristus Tuhanta i. Ala ni dosa i do na manegai parsaoranta dohot Debata nang dohot dongan jolma. Pengkhotbah 7:20 menyatakan, “Di bumi tiada seorang pun yang saleh: yang berbuat baik dan tidak pernah berbuat dosa!” 1 Yohanes 1:8 menyatakan, “Jika kita berkata bahwa kita tidak berdosa, kita menipu diri sendiri dan Allah tidak ada di dalam kita.” Semua dosa adalah perbuatan menentang Tuhan (Mazmur 51:4). Akibatnya, kita amat memerlukan pengampunan Tuhan. Jika dosa kita tidak diampuni, kita akan menderita selama-lamanya disebabkan berdosa (Matius 25:46; Yohanes 3:36). Nunga dilehon Debata tu hita Sipalua  i ma Jesus Kristus i laho padamehon hita marhite hasesaan ni angka dosanta. Asa mardame hita dohot Debata nang dohot dongan jolma. Angka naung manjalo hasesan i ma naginoaran angka siihuthon Jesus Kristus na gabe Sipalua saluhut jolma. Laos angka siihuthon Kristus i naeng patuduhon pangalaho na masisesaan dosa songon na niajarhon Jesus ditangiangna i tu hita di Luk 11:4 : “....Sesa ma dosanami, songon panesanami di dosa ni dongan namardosa tu hami....”(ptds.Mark.11:25-26; Joh.20:23; Ef.4:32;Kol.3:13; 1 Joh.1:9). Amen

Jamita Jumat Agung - 29 Maret 2024

Dibungka Jesus Do DI Hita Dalan na Imbaru    (Yesus Membuka Jalan Yang Baru Dan Yang Hidup) Heber 10: 16 – 25     a)       Dihita na...