Translate

Senin, 02 Mei 2016

PARTORDING NI PARNINGOTAN HANANAEK NI TUHAN JESUS, 5 MEI 2016


PARTORDING NI PESTA PARNINGOTAN
(ARI HANANAEK NI TUHAN JESUS)
Kristus Manggohi Saluhutna


 


HKBP CINERE RESSORT CINERE
Kamis, 05 Mei 2016

01.  PANGARADEON
U       :  Huria na hinaholongan ni Tuhan Jesus Kristus, sadari on marpungu hita di bagas joro ni Debata laho manghalashon Pesta Parningotan Hananaek ni Tuhan Jesus tu banua ginjang. Didok Tuhan Jesus do di Johannes 14: 1 – 3: “Unang ma bonsa rohamuna! Porsea ma hamu di Debata, jala porsea ma hamu di Ahu! Torop do inganan di bagas ni Damang. Aut so i, dohononku ma tu hamu: Na laho do Ahu mangarade inganan di hamu? Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu!
            Antong dibagasan las ni roha marende ma hita mamuji Tuhanta sian BE.101

02. Marende sian BE No. 101 O DEBATA MANSAI BL. 27
      1. Taiti gogo ihut tu Ho Palungun rohanami
          Tu surgo i ingananMi O Jesus Tuhannami.
      2. Togu tongtong ma hami on Di dalanMi tu surgo .
         Anggo so i oloanMi Sai saut do hami mago
                       ------ Jongjong ------
      4. Dibahen i, o Jesuski Sai naeng ihuthononku
          Do hataMi, nang langkaMi Saleleng au mangolu

03. Votum – Introitus – Tangiang :  (L=Liturgis ; R=Ruas; S=Sude)
    L       :  Marhitehite Goar ni Debata Ama dohot Goar ni AnakNa   Tuhan Jesus Kristus dohot Goar             Tondi Parbadia na tumompa langit dohot tano on.
   S        :  Amen
L       :  Songon on do didok Tuhan i: BahenonKu do sogot na monang i rap dohot Ahu hundul di habangsangKi, songon Ahu na monang i jala hundul rap dohot Damang di habangsaNa i.   
Haleluya.
   S        :  (Mangendehon) Haleluya...Haleluya...Haleluya.
L       :  Martangiang ma hita : Ale Tuhan Debata, Pargogo na so hatudosan ! Sai pargogoi ma hami manghaporseai AnakMu na sasada i, Sipangolu hami, na manaek tu surgo, asa huparrohahon hami roha banua ginjang marhitehite Anak haholongan ni rohaM, Tuhan Jesus Kristus, Tuhannami. Amen.                                            -------- Hundul -------

04.  Marende sian BE No.638 : 1     “Patimbul Tuhan I”
Ø      Patimbul Tuhan I, di habangsaNa I,
            marhasak baen soarami mamuji Tuhan I,
            endehon ma rajaM sian sandok roham,
            naung mate ala ni dosam, oloi ma Debatam.

05.  Manjaha Patik : 1 Dohot Lapatanna
    L    : Patik di hita di Pesta Parningotan Hananek ni Tuhan Jesus na nienet sian Patik 1 Dohot lapatanna: Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.
R    :  Dia do lapatan ni I ?
L    :  On do; ingkon umbiar rohanta jala humolong jala umpos mida Debata asa mida nasa na adong.
         I ma sahatna, antong rap mangido gogo ma hita sian Tuhan Debata laho mangulahon patikNa i.
S    :  Ale Tuhan Debata sai Pargogoi ma hami mangulahon na hombar tu patikMi. Amen.

06. Marende  sian BE No.267 : 1 + 3   “O TUHAN SULINGKIT”   BL. 100
Ø      o Tuhan sulingkit ma au Sondangi rohangku tangkas.
           Gogongku soada di au;
           Tu Ho paringgas Tu Ho au padonok Di Ho nama au
           Tu Ho paringgas Tu Ho au padonok Di Ho nama au
                     ------- Jongjong --------
Ø      Sude hupasahat tu Ho Ai Ho nampunasa hian.
             Tongtong au marguru tu Ho
             Ai Ho ale Jesus Sihophop sudena Nampuna au on
             Ai Ho ale Jesus Sihophop sudena Nampuna au on

07. Manopoti Dosa :
L    : Tapaunduk ma dirinta di adopan ni Debata laho manopoti dosanta na godang i. Martangiang ma hita : Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami ! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami. Mansai jotjot huarsahi hami Ho marhitehite pingkiran dohot hata dohot pambahenannami na roa i.
R    : (Mangendehon) BE 421:1   "Marsomba au di joloMon" BL.281
          1. Marsomba au dijoloMon, ponjot, targogot rohangkon;
              Dibaen godang ni dosangkon, sai jangkon dohot au,
              Sai jangkon ma au on, na ramun diringkon,
              Tung pos do rohangki di Ho, dijangkon Ho au on.
L    : Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami. Dibahen i tama do rimasanMu jala uhumanMu hami tu hamatean saleleng ni lelengna i.
R    : (Mangendehon) BE 421 :  4   "Marsomba au di joloMon" BL.281
          4. Ndang boi denggan be diringki, sai baen imbaru rohangki,
              Tung tuk Ho patupahon I, umbaen tu Ho au ro.
              Sai jangkon ma au, on, na ramun diringkon,
              Tung pos do rohangki di Ho, dijangkon Ho au on.
L    : Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala n i Tuhan Jesus Kristus. Anak haholongan ni RohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on! Amen
      -----  (Tangiang na hohom, diiringi musik BE.421 BL.281 sa-ayat, angonangon music)-----
      L    : Songon on do Hata ni Jahowa: Unang ho mabiar, ai Ahu do Siluluhon ho; nunga pola hujou goarmu, Ahu nampuna ho. (Jes. 43, 1). Hasangapon ma di Debata na di ginjang !
      Sude: AMEN                         --------- Hundul --------

08.  Marende sian BE No.441: 1 – 2  “Di au Tuhan Jesus”   BL. 297
Ø  Di au Tuhan Jesus, na salpu do sudena, na dok dok, nang uhum tu au.
             Ringkot do rohangku mar ha to pothon, Jesus ku, Tuhanku, di tobus Ho au,
             Disesa Tuhanku, do angka dosang-ku. Nang ho, ale dongan, di tobus nang ho.

Ø  Di au do damena, na sonang do rohangku. Mangolu, nang mate, di Jesus au on.
             Di ribur ni tano, nang las ni roha, Ndang dapot damena, rumur rohangku.
             Disesa.............

09. Manjaha Epistel : Psalmen 47 : 2 – 10
L      :  Turpuk Epistel di Pesta Parningotan Hananaek ni Tuhan Jesus, tarsurat di Psalmen 47: 2 – 10 , tajaha ma marsorinsorin : Martopaptopap tangan ma sude hamu angka bangso! Puji hamu ma Debata mardongan soara olopolop!
R       : Ai Jahowa do na tumimbul, na songkal, Raja bolon do Ibana gumomgom liat portibi on.
L       : Papatuonna do angka bangso tu hita dohot angka marga tu toru ni patta.
R       :  Ibana do mamillit di hita pargolatanta, hatimbulon ni si Jakkob, na hinaholonganna i. Sela.
L       :  Manaek do Debata mardongan parolopolopon, Jahowa mardongan soara ni sarune.
R       :  Sai endehon hamu ma Debata! Sai endehon hamu ma Rajanta i! Endehon ma tutu!
L       :  Ai Debata do Raja ni liat portibi on, endehon hamu ma ende sipodaon.
R       :  Debata do mangarajai angka parbegu, hundul do Debata di atas habangsa habadiaonna i.
L       :  Marpungu do angka na sangap ni angka bangso tu bangso ni Debata ni si Abraham, ai Debata do nampuna angka lombulombu raja ni tano on, timbul situtu Ibana.
I ma sahatna. Martua ma na tumangihon Hata ni Debata jala na umpeopsa.
Sude    : AMEN

10. Marende sian BE No.99 : 1 – 2   “O TONDI PARBADIA BONGOTI”      BL. 206
Ø  O ulubalang na gogo Songon sadari on do Ho manaek tu hasangapon
             Naung sidung do ulaonMi Na ringkot patupaonMi Humophop hajolmaon
             Sabam, tongam do Ho muli tu na uli Marhabangsa Disiamun ni Jahowa.
                                         --------- Jongjong ---------
Ø  Marloksaloksa Serapim Marriburibu Kerubim Mamuji Ho na monang
             Dibaen naung pinadomuMi Saluhut manisia i Tu Debata di ginjang
             Puji, puji Jesus Kristus naung patulus saluhutna Tinonahon ni AmaNa. 

11. Manghatindanghon Haporseaon:
Liturgis :   Rap dohot donganta sahaporseaon di sandok portibi on, tahatindanghon ma HataHaporseaonta i. Rap ma hita mandok :
Sude    :  Ahu porsea di Debata Jahowa……….

12. Sunggulsunggul :
13.  Marende sian BE No.97 : 1 ---  “PATIMBUL BE MA SANGAP”      BL. 129   (P.Pelean)
Ø   Ingoton ma sadari on Panaek ni Tuhan Jesus
              Tu habangsaNa na tongtong Na so tarbaen be meret
              Tasomba ma Tuhanta i Naung mulak tu Amana i Tapuji ma Ibana
Ø  Ai nunga mungkap dalan i Di angka na porsea
              Lao mamongoti surgo i Malua sian jea
              Naung mangonai tu sasude Na mangulahon dosa i Pinuji ma Tuhanta.
                        ------- Musik -------
Ø  Ianggo las roham tutu Di Jesus i Tuhanta
             Pauba ma roham burju Ihuthon ma Ibana Oloi hataNa sasude
             Sai tiru pambaenanNa pe saleleng ho mangolu
Ø  Ai mulak do Tuhanta i Di ari paruhuman
             Sai dabuonNa do disi Sude parhajahaton
             Tu api na so mintop i Alai haholonganNa i Tu surgo bahenonNa.
                        ------- Musik --------
Ø  Jesus, Tuhannami on Asi rohaM di hami.
             Sai tatap hami na dison Di paraloannami
             Patogu hami sasude Tumpahi hami monang be Ro di ujungna sogot

14. J a m I t  a : Efesus 1 : 15 – 23

15.  Marende sian BE No. 636 : 1 ----  “Jesus do Raja bolon I”      
(P.Pelean Tu PengMasy)
Ø  Jesus do Raja bolon i. Sigomgom nasa na adong
             Hot do harajaonna I, Nang pe marujung tano on.
Ø  Tangiang nang pujian I manaek tu habangsaNa I
              Mansai hushus goarNa I binahen ni pelean I
                           -------- Musik --------
Ø  Saluhut manisia I mian do di holongNa I
             Soara ni dakdanak I maghatindanghon sangap nii.
Ø  Gok do asi ni roha I diharajaonNa na hot.
             Malua na tarhurung I malua sian rante i.
                              ------ Musik ------
Ø  Na tinompa hehe ma pasangap ma Rajanta I
             Suruan pe marende ma baen sangap di na monang i

16. Parsuruon tu ngolu na imbaru:
L      :  Hamuna angka dongan! Nunga tahalashon hananaek ni Tuhan Jesus tu banua ginjang! Ndang berengonta i sian parsirangan ni jolma dohot Ibana. Alai hananaek ni Tuhan Jesus tu banua ginjang, i ma mula ni sada tingki na imbaru, ai nunga diparade Tuhan Jesus inganan di hita di banua ginjang i. Ndang na magopo hita tinggal di portibi on, dilehon Tuhan Jesus do na tau siulahononta: Borhat mamaritahon Barita nauli tu saluhut na tinompa. Taulahon ma i dibagasan las ni roha situtu tanda ni na tasomba Ibana di pardalanan ni ngolunta. 
R        :  I do tutu! Nunga dohot hita partohap di tugas na imbaru na nilehon ni Tuhan Jesus, asa tung margogo hita mamaritahon Barita Nauli hangoluan i, tamulai ma sian dirinta sandiri, keluarganta nang di parsaoran siganup ari di tonga-tonga ni masyarakat pe.
S         :  Mangendehon: No. 672: 1 + 3 “Tung godang situtu ulaonmu”
Ø  Tung godang situtu ulaonmu antong dipasahat Tuhanta tu ho.
Ndang adong be tingkim marnalemba tahe ngolumi bahen tiruan tongtong. Reff :  Sai patupama i ala ni Tuhan i so manghirim balosna tu ho.
            Debata do marnida na niulami manang na adong parbue ni i.
Ø  Ala ni boan ma sondang na tiur i, boan ma Hata ni Tuhan i.
Sai urupi na pogos na mardangol i, asa ro tu Jesus Tuhanta i. Sai patupa..........

17.   Tangiang: Pelean – Parningotan di Hananaek ni Tuhan Jesus – Pasupasu –   Amen 3X diendehon
















Senin, 27 Juli 2015

Bahan Jamita Epistel Minggu VIII Dung Trinitatis, 26 Juli 2015

Porsea Jala Marpos NI Roha Di Hagogoon ni Jahowa
Johannes 6 : 1 – 21
a.       Nunga jotjot hita mambege turpuk jamita on, ala i mansai menarik do pembahasan di turpuk on di angka na porsea di Jesus Kristus. Turpukta on songon lanjutan ni turpuk evangelium (Markus 6: 30-34, 53-56) na di minggu na salpu, na si roha ni Jesus mamereng natorop i. Jala Jesus mangajari na torop i marhitehite holongNa i. Jala mansai ampit dope unok ni jamita turpuk evangelium minggu na salpu, Jesus Parmahan na denggan, napatuduhhon kepedulianNa tu torop halak na mangihuthon Ibana. Ndada holan mangajari Jesus dohot do disarihon angka na mauas di partondion nang di pardagingon.Dipatuduhon do di bagasan turpuk on dua hal na masa, ima:
Ø  Halongangan do na pinatupa ni Jesus on mangalehon 5000 halak (lima ribu orang laki-laki banyaknya) sodohot dope di etong, ina, boru, dohot dakdanak. Pasti lobi sian lima ribu halak torop na dilehon mangan. Jala dibaritahon do i di evangelium na asing di Mateus 14: 13-21; Markus 6: 32-44; dohot di Lukas 9: 10-17). Ndang adong kemungkinan be boi mangan na torop i ala soada dalan, dia ma dalanna ? Jumolo do Jesus mandok sungkunsungkunna tu si Pillipus: “Sian dia ma tuhoronta roti asa mangan angka on?” Boasa pola unjunan sisean i ate ? memang ringkot do i laho mamboto sadia bagas ma pos ni roha nang haporseaon ni angka siseanNa tarmasuk si Pilippus di naung jotjot rampak nasida di pelayanan. Ai Jesus siboto roha do, di dodo do roha nang pangkilalaan ni si Pillipus. Jala dialusi si Pillipus do “Ndang sae roti arga dua ratus hupang, asa dijalo ganup nasida sasaotik”. Lapatanna dipangasahon si Pilippus do hapogosonna, na adong di pingkiranna etongetongan matematika (memang 1 hupang ima 1 dinar, molo 1 dinar dos do i tu balanjo buruh kasar 1 ari). Laos songon i do nang alus si Andreas sahalak siseanNa na asing, dibereng ma aha do bohal ni natorop i: “Adong do dison sada dakdanak na umpeop lima roti dohot dua dengke, alai sadia ma i tu na sai torop ?” dison pe jumpang hita do halihali ni si Andreas na mangasahon utokutok nang pingkiranna. Alai nang pe sisotik i na adong ima dihalashon Jesus na mandok mauliate di tangiangna di sipanganon na adong i. Sian i boi idaonta: Naparjolo, Tung so boi do pangasahonota pingkiranta nang gogonta laho melayani manang marhobas, alai naeng ma molo marhobas pasahat ngolu tu Debata dibagasan tangiang songon Jesus na sai tongtong martangiang. Napaduahon, Tung saotik nang godang pe naeng ma hita sidok mauliate tu Tuhan i. Unang ma ala naung marlobi lobi manang naung godang tajalo manang naung dapot paruntungan nang parlabaan hita asa mandok mauliate. Na otik pe tong do tadok mauliate. Asa haposan di na otik haposan nang di na godang (Luk.16: 10a “Ia haposan halak di na otik, haposan ma ibana nang di na godang”). Martangiang do Jesus mandok mauliate, dungi diparlehon ma tu na torop i. Napatoluhon, Pola do lobi 12 ampang asing ni ndang di etong dope angka dengke, jala ipe dipapungu do ndang diambolongkon. Lapatanna, unang ma molo marlobian hita gabe marlomo lomo di ugasanta, naeng ma jamot hita di naung dipasahat Debata tu hita, asa taparhaseang i saluhutna (intermezzo; songon halak batak istilah: sipanganon na lobi “dipalas” alias dipamasuk tu kantong palastik, tarhilala, unang bolong). Napaopathon; sangkap ni natorop i dung mamereng halongangan na pinatupa ni Jesus i, ima asa manjalo Jesus jongjong gabe Raja ni Bangso Israel, diboto Jesus do sangkap nasida i, ido umbahen maporus Jesus sasadasa tu dolok. Ala haroro ni Jesus ndada gabe raja holan tu sada bangso alai saluhut bangso nang Raja portibi on do, jala ndada raja politisir ni halak Jahudi alai Raja na Paluahon saluhut manisia do di tingkiNa muse.
Ø  Na mardalan Jesus di atas ni aek laho pasohon pangullus ni habahaba na gogo, pola do mabiar angka siseanNa i. On ma kejadian na mangihut; di na manaripari tao i angka siseanNa marsolu dompak Kapernaum, ndang rap Jesus nasida, ro do habahaba na gogo mangullus parao i. Mansai mabiar do angka siseanNa i, hape nian andorang so gabe siseanNa i nasida angka panjala dengke do nian naung berpengalaman nasida, pola ma mabiar nasida di na masa i ? dia do lapatan ni  na masa on ? Naparjolo, Dipardalanan ni ngolunta di portibi on songon solu manang parau i do di tonga ni(simbol soikumene ima solu) laut, aek tao manggombarhon maut, hasusaan, haholomon, nang sibolis, godang angka tantangan nang hamaolon nang ambatambat di ngolunta. Napaduahon, tung so boi do hita aman mangalangka sidalanannta ia so mardonganthon Jesus. Jesus mardalan diatas aek, lapatanna, Jesus do na patundukhon huaso haholomon, nang sibolis i di toru ni patNa. Holan Jesus do na pasonanghon rohanta, jala Ibana do na pademakhon habahaba i. Napatoluhon, dung bongot Jesus tu parau i, pintor sahat ma tu luat sitondongonnasida, lapatanna Jesus do donganta asa sahat hita tu tujuan ni ngolunta ima Surgo hasonangan i, Jesus do na mandongan i hita di pardalanan ni ngolunta, asal ma porsea hita.
b.      Ala ni i songon topik ni minggunta: “Porsea Jala Marpos Ni Roha Dihagogoon NI Jahowa”, dipangido do sian hita angka siihuthon Kristus, sahat didia do pos ni roha nang haporseaonta tu Jahowa uju ro angka hamaolon, nang habahaba di pardalanan ni ngolunta ? Hape jotjot do hita manghatindanghon haporseaonta di Debata Jahowa, Jesus Kristus, dohot Tondi Parbadia di ganup parmingguonta. Ala ni i marhite turpuk on, ndada gagnggu be rohanta mandalani ari ari ni ngolunta, alai marsihohot marhaporseaon dohot marpos ni roha tu Debata Jahowa, naung dipamonang do hita marhitehite Mudar ni Jesus di Hau pinarsilang i, asa talu hamatean, nang sibolis, pasaehon angka dosanta, asa marlas ni roha hita, jala tasomba ma Ibana. Ala ni i nuaeng dijou do hita angka siihuthon Kristus: Boha do asa adong pos ni roha ni torop jolma dohot porsea di panghataionta, pambahenanta, nang pangalahonta ? tarlumobi ma tu angka na so sahaporseaon dohot hita, asa tapatuduhon ma kepercayaan orang banyak bagi kita, sehingga mereka juga yakin dan percaya akan Tuhan yang kita sembah dalam Yesus Kristus. Amen.

Bahan Jamita Evangelium Minggu VII Dung Trinitatis, 19 Juli 2015

Gabe Asi Ma RohaNa Mida Nasida
Markus 6: 30-34 + 53-56
a.       Tarbarita do sude ulaon ni Jesus na pasonanghon torop pangkilalaan ni jolma, nang pe di sisi na asing adong kecemburuan sian angka na tersaingi ulaonna isara ni sian angka sintua ni halak parise dohot saduse nang siboto surat. Nang pe songon i sai adong sian horong na manghosomi Jesus na manghalomohon dohot na manghasiholi Jesus isara ni si: Jairus, si Nikodemus. Dibagasan turpuk on dibaritahon do mansai torop halak na mangihuthon Jesus dohot angka siseanNa. Torop do halak na marlao ro tu nasida; gari mangan, gari so sadihari. Lapatanna; ala ni torop jolma i, ndang sanga nasida mangulon. Alai diantusi Jesus do halojaon ni angka apostel i laho mangajari dohot mangulahon na niajarhon ni Jesus. Pola Jesus mandok tu nasida asa pahosahon saotik (istirahat sejenak). Lapatanna ringkot do mangulon ima mangalehon tingki tu dirinta sandiri asa merenungkon naung niulahon i. Molo adong na marpangkurangi manang naung denggan niulahon panghobasion, boi ditingkathon manang lam dipadasip panghobasion i. Jala di na mangulon i pe boi do i gabe tingki marsiajar dohot mangalap gogo, asa margogo muse mulaulaon, Jadi Jesus pe diantusi do keterbatasan gogo ni angka siseanNa i. Jesus do na memahami kemampuanta, hagogoonta, hagaleonta, dilehon do dalan tu angka siseanna asa margogo muse.
b.      Nang pe naung marparau tu inganan na suhi nasida tongtong do ditanda halak, umbahen na torop mangihuthon mardalan tur nasida jumolo sahat. Mamereng punguan na bolon i, gabe asi ma roha ni Jesus. Ai songon birubiru na so marparmahan. Hamuna angka dongan, molo adong punguan birubiru na so marparmahan tabayangkon ma jolo boha ma parjadina ? tontu gabe marserak do, jala mauas nang haraparon, dung i molo ro babiat manang binatang buas, mura do pargutonna ala naung marserak. Laos songon i ma gombaran ni angka jolma na torop i diida Jesus; gabe asi ma rohaNa mida nasida. Molo asi do roha ni Jesus napatuduhon holong na sian nasa roha nang ateate marnidasa, ndang loasonNa punguan i marserak so marparmahan. Diajari Jesus ma natorop i dohot godang pangajarion. Dison ma dipatuduhon gombaran ni birubiru na mananda parmahanna ima Jesus, pola do torop na mamereng Jesus jala mananda asa diihuthon mardalan tu na dao. Ndang pasombuon ni Jesus halak na torop i songon i boti ndang marparmahan.
c.       Jesus do parmahan na denggan, na marroha do Ibana laho patureturehon halak na torop i. Mansai godang do angka na marsahit pamatang nang roha pe dipamalum Jesus. Alai hamalumonna i torop do i ala holan manjama ulos ni Jesus, boasa ndang tangan di na masijalangan, boasa ndang dais pamatang ni Jesus tu na marsahit ? boi dapot roha do i na masa i umbahen na songoni, ala molo tajaha di bindu na di jolo ni turpuk on( Markus 5 : 21-43 epistel Minggu IV Dung Trinitatis). Hea do dipamalum Jesus sahalak ina na marsahit bulan (pendarahan), holan manjama ulos ni Jesus i do sahalak ina i gabe malum, ra tar sar do barita taringot tu hamalumon ni ina na marsahit bulan i tu torop jolma, asa di haporseai ma asal ma dijama ulosNa i gabe malum. Tutu ma masa tu angka na torop i hamalumon holan ala manjam ulos ni Jesus i. Lapatanna mansai uli  do molo angka ulaon na metmet pe manang hal-hal sederhana boi tarpatupa hita gabe hahisaron nang las ni roha dohot hahipason tu torop jolma; isarana rupani; na masitabian di angka na pajumpang, masijalangan, hahormaton, hata horas-horas di angka na masihaholongan, mansai ringkot do i di angka na porsea. Asa marhite i ma hita angka na porsea masitoguan, masihaposan, jala masihaholongan. Apalagi molo tapatupa ulaon asi ni roha na pasonangkon roha ni dongan jolma; isara ni bantuan, materil dohot moril.
d.      Ala ni i naeng ma huria ni Tuhanta nang angka ruas ni huria boi gabe parhitean ni Debata laho pahisarhon angka na marsahit, angka na mabugang, angka na pogos, angka na gale, na so mardihadiha. Jala tarjou do hita angka naung pinillitNa tu Hangoluan Na saleleng ni lelengna dibagasan Kristus Jesus i laho patupahon ulaon asi ni roha i. Molo Jesus do  parmahan na denggan di hita angka na porsea naeng ma tarida panghorhonna tu ngolunta na olo marmahani angka jolma na dibagasan hahurangan, na gale, dohot na nidok di ginjang. Songon topik ni minggunta: “Gabe Asi Ma Rohana Mida Nasida” asa angka na porsea i pe hita nang ruas marasi ni roha mida angka torop jolma di persoalan ni ngoluna. Naeng ma hurianta HKBP gabe sibolan las ni roha, siboan hahipason, siboan pasupasu, jala na pangoluhon roha na arga di dongan jolma manang “Hospitality” (keramah tamahan). Molo mamereng jaman nuaeng on, mansai tamba do bilangan ni halan na sombong dohot egois, ala ni i huria nang ruas tarjou papatarhon Harajaon Ni Debata na marasi ni roha. Amen.