Dihaholongi Jahowa Do Saluhut Bangso
(Tuhan Mengasihi
Segala Bangsa)
1 Johannes 4: 7 –
12
a)
Huria
ni Tuhanta na hinaholongan dibagasan Jesus Kristus. Ditongos Apostel Johannes do
surat on hirahira di ujung ni abad parjolo
tu sada punguan nihalakk Kristen. Ndang apala tangkas dipaboa alamat ni
surat i. Alai na boi idaon sian isi ni surat i; tongona do halak Kristen na gabe
Alamat ni surat on parpoda haliluon, ima
poda na so mangokui inkarnasi ni Tuhan Jesus. Marrumang jamita do surat
on na godang mangajarhon taringot tu hadirion ni Debata, jala na mangondolhon
songon dia ma parange na denggan siulahonon ni halak Kristen. Adong dua pamingkirion
na menonjol taringot tu hadirion ni Debata dipatuduhon di surat on, i ma: naparjolo,
pamingkirion na mandok : “Panondang do Debata, ndang adong di bagasan Ibana
manang aha na holom” ( 1 Joh.1:5); paduahon, “haholongon
do Debata” ( 4,8,16). Marhite pamingkirion na mandok : “panondang do Debata”
disosohon do asa tongtong mardalan di na tiur manang asa tongtong marparange
hatiuron angka na mangihuthon Ibana. Jala poda na mandok “haholongon do Debata”
disosohon do asa saluhut halak na porsea di Ibana masihaholongan, songon na
tarida di turpuk on.
b)
Ay.7 : “Masihaholongan ma hita, ai sian Debata do
haholongon i”. Holong
na nidok ni si Johannes dison, ndada na somal di tongatonga ni hajolmaon, isara
ni : holong ni na marsaripe, holong n iroha ni natoras tu anakhonna dohot
sabalikna, manang holong parhahamaranggion saiala parmargaon, parbangsoon
manang parmudaron sambaing. Umbagas sian holong na songon i do na nidokna di
turpuk on, ima holong na marharoroan sian Debata. Holong ni na marsaripe,
holong ni natoras tu ianangkonna, dohot holong parhahamaranggion, jotjot do
ndang be holong na manongtong, ala holong na songon i nunga disegai sibolis i.
Jala holong na songon i marojahan di ruhutruhut hajolmaon manang paruntungan
portibi on sambing do. Holong na sian Debata, i ma holong na manongtong, holong
na rade berkorban tu halak na hinaholonganna, manang holong na rade mengampuni
donganna na marsala dompak ibana, songon na binahen ni Tuhan Jesus. Ndang sian
roha ni jolma haroroan ni holong na songon i, alai sian Debata do. Ala ni dosa,
ndang hea be ias roha ni jolma, nunga sai mardangka manang marpambuat.
c)
Ay.8: “haholongon do Debata”, pandohan on do
pangibulan ni Buku na Badia i, dohot pangibulan ni pod ani halak Kristen. Molo
naeng marsiajar hita di holong n iroha na sintong, ingkon sai marsiajar sian
Debata do hita, i ma marhite HataNa, jala tumangkas marhite Jesus Kristus.
Ndang sintong molo tado naung tatanda Debata, hape ndang adong holong n iroha ni
hita. Molo didok: “Haholongon do Debata”. Na mabaor do tongtong holong n iroha sain
Debata, ala hadirion ni Debata do haholongon i. Urat, bona dohot mual ni sude
pangulaon ni Debata, holong ni roha i do. Ditompa Debata hita jolma jala
diparmudumudu, ala ni holong i do. Angka patik dohot uhum na nilehon ni Debata
laho manogunogu jolma i, marojahan di holong n iroha i do.
d)
Ay.9-10; Holong ni roha ni Debata patar di bagasan
diri ni Jesus Kristus. Holong na nidok ni si Johannes di turpukta on, i ma
holong “agape” ndada holong “eros” manang holong “filia”.
Holong na tarida ditongatonga ni jolma, sai holong na marpambuat do. Tatanda
holong na sintong i, ala na dipapatar do tu hita, marhite parsuruNa di Jesus
Kristus. DIdok di Joh.3: 16 “Ai songon on do holong n iroha ni Debata di
portibi on, pola do AnakNa na sasada i dilehon, asa unang mago ganup na porsea
di Ibana, asa hangoluan na saleleng nilelengna di ibana”. Sangkap ni
Debata laho marsuru AnakNa na sasada, i ma laho mamboan hangoluan na
salelengnilelengna. Diulahon Jesus do i, marhite na rade Ibana maneahon hosanna
mate di silang i. Ala ni i, holan di bagasan silang i, i do patar holong n
iroha na sintong, jala disi do boi dapoton ngolu na saleleng nilelengna.
Marhite silang ni Tuhanta i berengonta do : “ndada hita manghaholongi
Debata, Ibana do manghaholongi hita”. Ndang jumpang hita holong n iroha molo
borhat sian hajolmaon manang hadirionta do hita. Molo dung patar di hita holong
ni Debata, ingkon boi ma tangkas berengonta dirinta nag ok dosa. Jala botoonta
do, sialani dosa ingkon hona uhum ni Debata do hita. Alai holong ni Debata,
dipalua do hita sian uhum i, ai ditobus do hita sian utang ni dosanta.
e)
Ay.11-12
“tama ma nang hita masihaholongan”. Molo songon I balga niholong ni Debata di
hita, tama ma hita angka na mangihuthon Ibana masihaholongan. Ojahan ni holong
ni rohanta tu angka donganta, I ma holong ni Debata na patupahon pardengganan
pasaehon dosanta. Molo disesa Debata, ingkon rade do hita manesa dosa ni dongan
na mrdosa tu hita. Molo masihaholongan hita, mian ma holong n iroha ni Debata
di bagasan hita.
f)
Huria
ni Tuhanta na hinaholongan, disuanhon Debata do holong ni roha i tu diri ni
hita joma di bagasan panompaon i, asa tau hita manghaholongi Debata secara vertical
dohot manghaholongi dongan jolma secara horizontal. Alai disegai dosa i do
holong ni roha i, gabe sega ma pardomuan ni hita jolma tu Debata, jala sega
hubungan tu dongan jolma dohot tu sude na humaliang hita (lingkungan: #tutuptplsegera).
Disegai dosa i do nang holong parsaripeon, holong parianakhonon, holong
parnatorason, holong parhahamaranggion, dna.
g)
Huria
ni Tuhanta nahinaholongan dibagasan Jesus Kristus, topik ni minggunta mandok: Dihaholongi
Jahowa Do Saluhut Bangso (Tuhan
Mengasihi Segala Bangsa). Dipapatar
Debata do tu hita holong ni rohaNa i marhite Jesus Kristus. Dibagasan Jesus
Kristus dipadenggan ma pardomuanta tu Debata dohot tu dongan jolma. Tanda ni
panjanghononta di Jesus Kristus, naeng tapataridahon marhite roha na
masihaholongan hita sama hita. Lam magodang do holong ni roha i di ngolunta,
ditongatonga ni na marsaripe, di tongatonga ni keluarga di huria, di masyarakat
dohot bangsonta, molo taloas hata ni Debata na gabe bohal di ngolunta. Holong ni roha ni Debata patar do di bagasan Jesus
Kristus. Molo songon i holong ni roha ni Debata di hita, naeng ma hita
masihaholongan. Amen
