Bahan Jamita Evangelium Minggu Okuli, 8 Maret 2015

Manghaholongi Jahowa, Jala mangaradoti Patikna

2 Musa 20 : 1 – 17

       a.       Hirahira 3300 taon na salpu dipasahat Debata Jahowa sampulu patikNa tu bangso Israel. Di dolok Sinai do na masa i. Andorang dipasahat patik i, naung leleng do halak Israel di parhatoban di tano Misir hurang lobi 430 taon. Alai ujungna dipalua Debata do bangsoNa i jala diparudumudu do haruar sian parhatobanon Misir tu tano Kanaan naung niuarihon tu nasida. Digoari do tano tano bagabaga, disi ma ingkon sorang Anak ni jolma i 1300 taon nari muse. Saleleng 40 taon, na mardalani do bangso Israel di halongonan i paimahon padan ni Debata laho mamasuhi tano bagabaga i. Boasa ? siala Debata naeng mangajari bangsoNa andorang bongot nasida tu tano i.

    b.  Hata Heber dekalog ima aseret had d’barim. Dekalog marharoroan sian hata Gorik ‘Deka’ (sampulu) dohot ‘log-logos’ (pati-Hata ni Debata). Jadi ‘dekalog na marlapatan sampulu patik, sampulu Hata ni Debata. Sampulu patik on na tarsurat di  2 Musa 20 : 1 – 7 dohot di 5 Musa 5 : 1 – 21. Mansai ringkot do laho manunglingkiti dekalog sian angka aspek, siala molo naung denggan pangantusion taringot tu dekalog asa sahat tu na lam bagas manaringoti dekalog sian roha na ias. Dipatorang do dijolo ni turpuk on na sampulu patik i dipasahat Debata Jahowa tu Bangso Israel di Dolok Sinai marhite dua bagian batu le (2 Musa 19:1-13; 20; 31: 18; 32:15-16). Dekalog na marisihon sampulu patik ni Debata ima butir butir ni patik ni Tuhan i na so boi sirangon na sada tu na asing. Sasude na i rup masirainrainan do i. Molo dilaosi sada sian patik i lapatann ni i mangalaosi sude patik i. Tudos songon na tarsurat di Jakobus 2: 10 Ai aut sura diradoti jolma saluhut patik i, alai tinggang di na sada, nunga gabe parsala ibana di saluhutna. Angka ahli teolog mansagi dekalog gabe dua bahagian, hombar tu na nidok ni Tuhan Jesus taringot tu patik i, patik dia do na umbalga di Mateus 22: 37-39 “Jadi didok Jesus ma: Sihaholonganmu do Tuhan Debatam sian nasa ateatem, sian nasa hosam dohot sian nasa roham! I do patik raja jala parjolo. Alai dos do arga ni na paduahon on: Sihaholonganmu do donganmi doshon dirim!” hatoranganna: Patik 1 – 4 ( 2 Musa 20:2-11) ima patik na mangatur parsaoran dohot Debata. Patik 5 – 10 ( 2 Musa 20: 12-17) ima patik na mangatur parsaoran dohot dongan jolma.

    c.       Mansai ringot do di hita laho marparsiajari patik na sampulu i laho paingothon aha do na gabe standar hasintongan di adopan ni Debata. Boasa ? siala mansai marasing situtu do standard ni jolma nang portibi on sian hasintongan dohot nilai nilai moralitas. Hasintongan dihasiangan on nunga gabe selera jala moralitas nunga gabe ukuran bebas ganup jolma. Naung dipaingot Apostel Paulus do hita taringot tu na masa nuaeng on di 2 Timoteus 3 : 1 – 8. Molo taparohahon di portibi on di hasiangan on, di negaranta, ni lingkunganta, di hurianta nang di keluarganta dohot pribadinta ganup. Nunga mansai godang na so tigor, na so tingkos jala dao sian patik ni Debata. Alani i mansai ringkot do hita marparsiajari, mangantusi patik i laos diulahon songon standar ni ngolu, tarlumobi angka na porsea dibagasan Jesus Kristus. Asa marhite i ndang na gabe rumar hita sian standar ni portibi on, alai marsihohot dibagasan standar naung niuarihon ni Debata tu hita.

     d.      Molo taparhatutu pe marparsiajari patik i ima martujuan: laho padaohon kesalahpahaman lapatanni patik i. Isarana molo didok “parenta” sai songon na berkonotasi negatif do dibege jolma, na dilapati do i patik jala gabe boban na borat situhukon jala nioloan. Contohna di 5 Musa 10: 12-13 “Nuaeng pe, ale Israel, aha do na pinangido ni Jahowa, Debatam sian ho, nda asal marhabiaran ho tu Jahowa, Debatam, jala marparange ho di saluhut dalanna, huhut marroha haholongon mida Ibana dohot mangoloi Jahowa, Debatam sian nasa roham dohot sian nasa ateatem! Huhut asa radotanmu angka tona ni Jahowa dohot aturanna, angka na hutonahon tu ho sadarion mambahen hasonanganmu”. Hata na parpudi na mandok “mambahen hasonanganmu” napatuduhon Holong ni Debata ndada na gabe dokdok i songon parenta ni atasan tu bawahan. Tarlumobi molo tajaha di Jeremia 29 : 11 “Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.” Jala dipahot Jesus Kristus muse impolaNa taringot tu patik i marhite hata na mandok: “Haholongima....” i ma na patuduhon pangjarionNa ia Debata ima Debata Parholong, ala Debata Parholong do Ibana naeng hita saluhtna na porsea i wajib laho manghaholongi Ibana. Taperbandingkon ma, haholongon ni Debata i laho paluahon bangso Israel sian parhatobanon Misir, asa dilehon pati i laho pataruuhon nasida tu Tano Parpadanan i, ndada sabalikna dilehon patik asa dipalua bangsoNa. Maksud ni Debata mangalehon Patik i  ima laho mangaramoti bangsoNa asa unang lupa tu Debata, asa unang ginjang roha nasida. Laos ihut ma marlangku do tu hita angka na porsea patik i laho mangaramoti hita sian angka dosa nang pangalaosion, mangalinggomi hita asa lam solhot tu Debata. Marhite pangantusion i, ia patik manang dekalog ndada gabe parenta be, alai gabe sada  “tanda holong” na sian Debata Sitompa nasa na adong tu hita jolma na tinompaNa.

      e.      Dung talapati jala taantusi patik i songon tanda holong ni Debata naeng ma tarida i dipardalanan ni ngolunta songon bangso ni Debata hita ditonga ni portibi on. Hita bangso ni Debata naung malua sian parhatobanon sibolis asa bongotanta huta na Dame i, ima Paradeiso i, inganan na saleleng ni lelengna i, naeng do bohalan ni Debata ngolunta songon anak hatiuron naung niuarihon Surgo i marhite Patik ni Debata. Ima tanda Holong ni Debata tu hita, asa patik i do na gabe mangaramoti hita. Sikap ni ngolu ni bangso ni Debata ima na marpanindangion tu saluhut jolma. Naeng ma tarida sikap ni ngolu na porman jala toman tu Debata dibagasan ngoluna maradophon dongan jolma sian pangalaho, panghataion, pambahenan pe. Molo sian panghataion; ndang loason be dirinta nang simangkudapta i mandok na so hasea, manang langgus ni roha mandok hata, jala mandok sumpah marhite goar ni Debata, ndang siulahonon ni halak na porsea i, manang na margabus pe rohana mamangke goar ni Debata tu donganna jolma asa dapotan arta ibana manang na dirohana i, ndang sitoloponta pangalaho si songon i naung maralo tu patik ni Debata. Molo tahormati goar ni Debata Jahowa sian pangkataionta, naeng ma tarida pangoloionta laho pabadiahon goarNa sian parsaoranta dohot dongan sahaporseaon nang di dia pe hita maringanan. Tarlumobi molo jumpa ari minggu laho marsomba di bagas joro ni Debata, sidok mauliate do hita di denggan ni basaNa tu hita. Pabadiahon ari minggu gabe sada panjouon tu angka na porsea siala naung mate jala hehe Kristus i laho paluahon hita jolma pardosa asa marhamonangan jala marhasonangan hita diujungna. Onom ari lelengna dilehon Debata hita tingki laho mangula angka siulaonta; marusaha, mangula, mandodo angka sintasinta ni roha; pajongjong angka sangkap ni ngolu jala sada ari dilehon Debata tu hita laho marningot Ibana, mamuji goarNa jala mandok mauliate, manjalo hasesaan ni dosa dohot asi ni rohaNa. Laos jaloonta ma bohal ni haporseaon nang ngolunta ima Hata ni Debata raphon dongan sahaporseaon mamuji dibagasan ende pujian, manghatindangkon haporseaon huhut rup martangiang ima parmingguanta di ari minggu i. Mansai terbatas do gogonta nang kemampuanta, naeng do ringkot di “revisi” torus manorus ngolunta nang haporseaonta di ari minggu i asa “equal” manang seimbang gogo nang haporseaonta, jala marhite parmingguon i do dapot hita pangapulion, hagogoon dohot haporseaon na lam togu ala marsaor hita dohot Debata nang dohot dongan sahaporseaon. Ai Jesus sandiri pe mandok do di Mateus 11 : 28  “Ro ma hamu tu Ahu, hamu angka na loja jala na sorat, asa hupasonang hamu!”.

    f. Kita diselamatkan hanya oleh kasih karunia. Berarti melakukan Hukum Taurat bukan supaya diselamatkan tetapi sebagai tanda kita sudah diselamatkan. Kasihi Tuhan dan manusia adalah kesimpulan Hukum Taurat dan kedua hal ini tidak bisa berjalan sendiri, harus dimaknai pada saat bersamaan.  Galatia 3 :24-25 Asa gabe songon siparorot do patik i, mamboan hita tu Kristus, asa sian haporseaon hita dipintori. Alai dung ro haporseaon i, ndang be ginomgoman ni siparorot i hita.  

   Seorang penginjil bernama Fred Brown menggunakan tiga ilustrasi dalam menjelaskan penerapan hukum Taurat yang benar.

Ø  Pertama, ia menyamakan hukum Taurat dengan cermin kecil yang dipakai dokter gigi. Dengan cermin itu ia dapat melihat lubang pada gigi. Namun, dokter tidak mengebor dengan cermin tersebut. Cermin dapat menunjukkan lubang, tetapi tidak dapat dipakai untuk menambal.

Ø  Kedua, Brown membandingkan hukum itu dengan senter. Bila lampu di rumah tiba-tiba padam, Anda akan menggunakan senter untuk menuju ke kotak listrik. Senter membantu Anda melihat sekering yang putus atau sakelar pemutus yang rusak, tetapi Anda tak dapat memasang senter pada tempat sekering atau sakelar tersebut.

Ø  Yang ketiga, Brown menyamakan hukum Taurat dengan tali pengukur. Seorang buruh bangunan menggunakan tali untuk melihat apakah hasil kerjanya sudah lurus terpasang. Jika ada suatu kesalahan, ia tidak akan menggunakan tali pengukur itu untuk memperbaikinya. Ia akan menggunakan palu dan gergaji.

    Rasul Paulus berkata, "Kita tahu bahwa hukum Taurat itu baik kalau tepat digunakan" (1Timotius 1:8). Hukum Taurat Allah dapat mengungkap dosa, tetapi tidak memberikan pemecahannya. Jawabannya terdapat dalam diri Yesus Kristus. Dia telah menanggung kesalahan kita di atas kayu salib dan kini Dia menawarkan kehidupan baru. Tatkala kita beriman kepada-Nya sebagai Juruselamat pribadi, Dia akan mengampuni dan memampukan kita untuk hidup dengan kekuatan yang Dia berikan, serta menyenangkan hati-Nya. Apa yang tak dapat dilakukan hukum Taurat, Kristus sanggup melakukannya.

     g. Mamereng parhusoran tingki nang di hasiangan on godang do na mambahen hita gale, tarunjun jala ndang marbisuk. Godang ro sipaotooto, napaliluhon haporseaon dihumaliangta. Ro sms bohong angka panipu, ro email na so sintong, napaliluhon, angka haramunon, namamunu, narkoba, namanangko, namangalangkup, manghosomi dongan jolma, margabus, harorangon ro do sian desa na ualu manang sian segala arah, bidang pe marhonaan do. Ala ni songon bangso ni Debata hita asa pamanat diri, naeng do patik ni Debata i na paingot ingot dalanta di na mamolus sandok ngoluon. Unang gabe humolongan rohanta tu portibi on asa sian Debata. Marhite patikNa i paingothon hita Debata na manghaholongi hita. Ala ni i marhite topik ni minggunta: naeng ma hita Manghaholongi Jahowa jala mangaradoti patikNa”. Taulahon pe patikna ndada asa malua hita alai sabalikna ala naung jomolo do dilehon tu hita haluaon ni dosanta marhite panghophopon ni Jesus Kristus gabe ingkon sidok mauliate hita. Molo naung dipalua hita jala tajangkon, hita ma na gabe anak hatiuron, jala parjambar di hangoluan sogot i. Ala ni i taargahon ma panghophoponNa i jala tahormati PanobusionNa i marhite na unduk jala serep rohanta mangulahon Hata nang PatikNa i. Angka anak hatiuron dohot parjambar di hangoluan sogot naeng dipasomal somal dirina tu hadaulaton mangulahon lomo ni roha ni Debata jahowa, disi ma dipatuduhon sikap “okuli” (sai tong do mangaranap matangku dompak Jahowa) Amen.

Bahan Jamita Epistel Minggu Okuli, 8 Maret 2015

Manahan Di Haporsuhon Ala ni Tuhan i

2 Korint 1 : 3 – 7

     a.       Surat ni Apostel Paulus na paduahon on tu Korint disurathon ibana di bagasan na mansai sulit ni keadaan ni apostel i sandiri dohot huria i. Rupa adong sian ruas ni huria i na mangalo ibana, manghasogohon apostel i, alai dipatuduhon apostel i do holong ni rohana dohot paminsangonna asa terjadi hamubaon tu halak i, jala marhasil do ulaon ni apostel i, na manghorhon las ni roha ni apostel i. Di hilala apostel i do borat ni siulaon na masa tu ibana sian huria i, alai dipargogoi Debata do ibana sahat tu na mardame muse di huria i, jala tung apala i do dihalashon ibana ( 2 Kor.2: 5-11). Ise do horong na mangalo si Paulus i ? Marhite surat 2 Korint on dapot hita hatorangan; ima na manggoari dirina angka apostel na mamboan surat panindangi (nasida na manodk horong Kefas, 2 Kor.3:1), na mandok nasida halak Heber na tutu ( 2 Kor.11: 22), apostel na bolonan (11: 5; 12: 11). Alai didok si Paulus angka pangago do nasida, mangajarhon Kristus na mimbar ( 11:3, 4), pargapgap na pasumansuman gabe apostel ni Kristus (11: 13-15), pangalahona pe ndang denggan ( 12: 20-21), na mandok (menuduh) apostel na gale jala parbiar do si Paulus ( 10:1, 10; 11:6), silului hasangapon diri (4: 5), parangkal (4: 2; 12: 16) dohot na manegai (10: 8; 13: 10). Jadi sangkap ni surat on dibahen marningot paraloan tu nasida i do dohot patuduhon ha-apostelon ni si Paulus huhut mandok mauliate tu Debata ala naung ture sude dibahen. Pangarajumion ni si Paulus, Debata do na tongtong mangapuli ibana ( 1Kor.1: 3-7).

    b.      Di angka haporsuhon na niae nasida, tubu do apulapul na sian Debata, jala na tangkas boi mangapuli na marsak dohot patoguhon haporseaon tu Kristen. Jala haporsuhon na niae  ni apostel i gabe apulapul nang tu huria i, asa adong di nasida pemahaman, ianggo haporsuhon i na boi alaman (songgop) tu saluhut hajolmaon do i. Alai halak na mar-Tuhan dapotan apulapul do i na boi patubu las ni roha na sian Kristus na mangatasi nasa ragam ni haporsuhon. Ai nunga ditaluhon Kristus nang haporsuhon i jala dihamonangkon, asa parjambar jolma disi. (Yohanes  16:33 Asa mardame hamu di bagasan Ahu, umbahen na huhatahon angka i tu hamu. Haporsuhon do jambarmuna di portibi on; alai pos ma rohamuna: Nunga talu hubahen portibi on). Ala sai pandohan apulapul i mulahulak ditaringoti di turpuk on, ido umbahen dibuhai turpuk on marhite pandohan “Pinuji ma Debata....”, marhite pandohan i manghara dongan do i laho mangoku dohot mamuji Debata.

    c.       Dipaboa apostel i do pengalaman ni ngoluna (haporsuhon na nieana), alai adong do sangkap manang tujuan na dialami nasida haporsuhon i. Di turpuk on didok, ia diae nasida pe haporsuhon i, gabe jamita na mangolu do i laho mangapuli angka na manaon haporsuhon di huria i. Jadi pangapulion na jinalonasida i, i ma ketidak-putus-asaan mangadopi haporsuhon i. Alai na mansai manait tu roha, jala mansai arga sihangoluhononta, i ma pengembangan ni pangapulion na jinalonasida i, didok “asa tarapul hami angka dongan na di bagasan ragam ni haporsuhon”. Dijalo pangapulion i sian Debata, dipangke nasida do i bahen apulapul muse tu dongan jolma. Jadi gabe taruli apulapul nang huria na marsitaonon i. Idaon di pangalaho i, gabe masa na masiapulan antara ni apostel i dohot huria i. Jala dipatubu i ma las ni roha di tongatonga ni huria i. Jadi hagogoon pangapulion i ndada gabe so, alai mangula do marhite nasida na marguna tu dongan jolma.

     d.      Jala songgop pe haporsuhon i ndada ala ni hajahatonnasida, alai tung ala ni na manghophop barita na uli do, ala ni Kristus umbahen na di taon nasida i sude. Jala saurdot tu pandohan ni si Paulus, laos di dok si Petrus do, molo manaon na porsuk ala ni Kristus, martua ma ibana, ala songgop Tondi hasangapon na sian Debata ( 1 Ptr.4:14,16). Alai laos songon i muse, na sumurung apulapul tu nasida  dijalo sian Kristus, jala i ma na manghorhon panghirimon na mangolu di nasida, na so manghorhon tu hamagoan haporsuhon i (siala Kristus), alai taruli apulapul na sumurung nasida, jala pahothon haporseaon na togu tu Kristus. Ndang pasombuon ni Kristus laos monggop haporsuhon i tongtong di ngolunasida, alai singkat do i gabe las ni roha, i ma sipeopon ni huria i tongtong. Lapatanna ndada holan siarsakhonon sambing angka haporsuhon i, godang do disi nang na gabe sihalashonon. I do umbahen na didok Ap.Paulus asa halashonon nang haporsuhon (Rom.5:3-5; ptds. 1 Ptr.3:14). Angkup ni i, na martingki do ianggo haporsuhon na tarida, alai ianggo na saleleng ni lelengna, i ma na so tarida i dope, i ma hangoluan na mannongtong i ( 2 Kor.4: 17-18). Tusi do hita ditogu laho mangantusi angka haporsuhon na songgop tu hita.

    e.      Illustrasi: Tarbarita do sahalak pandita di Jerman uju di na mangadopi parungkilon bolon halak Kristen siala ni hasogiron ni Adolf Hitler tu na margoar Kristen. Pola do ditangkupi halak Kristen hatiha i, dipasiaksiak jala godang sian nasida sahat tu na mate. Rap dohot nasida na tartangkup i, tarbairta do sahalak pandita na margoar Martin Nimoeller. Siala dirajumi sarombang dohot halak Kristen na maralo tu Hitler hatiha i, ditangkup do ibana jala dipamasuk tu penjara bawah tanah. Leleng ni tolu satonga taon ibana di hurungan i. Saleleng di hurungan i ibana tontu do holan anggukangguk do dipabegebege jala angka bangke pe marserahan humaliang nasida. Hinorhon ni haporsuhon na mansai sange i, somalna hatiha i holan dua do sundungna molo nunga masuk tu penjara i. Parjolo, gabe bangke manang mate siala ndang manahan di haporsuhon i. Paduahon, molo ndang mate, gabe gila. Alai na gabe halongangan hatiha i, i ma; haruar do Martin Nimoeller sian hurungan i dibagasan hahipason, hipas do pamatang, roha nang tondina. Dipangalaho sisongon i, disungkun na manungkun ma ibana: “Boasa boi ho manahan di hurungan i leleng ni tolu satonga taon jala haruar sian i dibagasan hahipason na singkop?” Dialusi ibana ma: “Ahhu pe sasintongna ndang huboto boi au manahan. Na boi hatindanghononku, i ma saleleng tolu satonga taon ahu di hurungan i, ulaonku holan marende mamuji Debata dohot martangiang  do. Jala ingkon hatindanghononku do, di ngolu sisongon i, dapot hita gogo na mardapotdapot, lobi sian na tahirim. Songon na nidok ni Jesus di Mateus 5: 10-12 “Martua ma na pinaburuburu ni halak ala ni hatigoran, ai di nasida do harajaon banua ginjang i! Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu! Las ma rohamuna jala marolopolop, ai godang do umpamuna di banua ginjang i, ai songon i do dipaburuburu angka panurirang na jumolo sian hamu”.

     f.        Didok di umpasa Melayu “lama berjalan, banyak dilihat, lama hidup banyak dialami”  (ganjang didalan, ganjang rantona, godang niidana, ganjang umurna, godang pengalamanna). Marlapatan, saleleng mangolu halak di portibi on, na marsingkat soluk do ro angka ragam ni pengalaman. Ndang sai tardok holan na tonggi ma daionna di ngoluna on, manang holan na paet, alai songon pergantian siang dan malam, na boi masa do songon i di ngolu ni hajolmaon on. Lapatanna ndang pola kejutan be i molo masa angka ragam na porsuk na manondong ngolunta on. Persoalanna, beha do hita mangadopi angka na masa i songon halak na porsea di Tuhan Jesus ?

     g.       Torop do halak mangae na porsuk, jala marragam do pangalahona umbahen na diae sada halak haporsuhon, isarana: boi do mangae na porsuk sada halak ala  ni haotoonna, kelalaianna, boi do mangae na porsuk sada halak ala ni intimidasi, penjajahan, boi do mangae na porsuk sada halak ala  ni kejahatanna, kena hukuman, boi do mangae na porsuk sada halak nang pe so ala ni dosana, alai adong sangkap ni Debata di bagasanna.

h.      Tarjou do hita na porsea jala siihuthon Kristus: 1). Asa gabe halak na tongtong sipuji Debata disaluhut pardalanan ni ngolunta. Ala ni tama do hita mamuji, pasangap jala mangolophon saluhut pambahenan ni Debata, di tingki arsak nang las ni roha pe hita. Halak na tongtong mamuji Debata, i ma na marnida denggan basa na nilehon ni Debata tu ibana. Tudos songon goar ni Minggunta Minggu Okuli (Sai tongtong do Mangaranap Matangku Dompak Jahowa). 2). Angka na porsea, siihuthon Jesus Kristus naung tardidi i; na mangolu do ibana mamolus songon nabinolus ni Jesus kristus ( 1Joh.2: 6), jala na gabe sangkambona do ibana di hamamate dohot dihaheheonN (Rom 6: 3-5). Ala ni i, naeng ma hita mamparangehon songon na pinarangehon ni Kristus i, ima: manaon di sitaonon, jala marhite i gabe monang maralohon sitaonon i. 3). Naeng ma gabe tiruan ngolu ni na porsea i dihabengeton ni rohana manaon sitaonon. Ai habengeton i, boi mangapuli halak na marsitaonon na asing.Ingkon rajumon do sitaonon i gabe tingki na une laho papitahon haporseaon, marhite na manghaholongi Jahowa, jala mangaradoti patikNa (topik minggu). 4) Asa manongtong hita dibagasan panghirimon. Ianggo na gabe ojahan ni panghirimonta, i ma Jesus Kristus. Ibana do na manaon na porsuk dibagasan benget ni roha sahat tu hamatean laho holan manghophop hita jolma pardosa nang dosa ni portibi on.(ptds.Rom 12:12). (BE. No. 149: 3 “Manang aha pe na masa, las ni roha arsak pe, tioponku Ho na basa Na marholong roha pe. ...”; BE. No. BE.806: 1 “Aha pe masa dingolumon Tuhan manjaga ho!”; BE.No.242: 1 “Rahis Jala Maol Tutu Dalan Tu Banuaginjang”) Amen.

Bahan Jamita Evangelium Minggu Reminiscere, 1 Maret 2015

Mansoadahon Diri Huhut Manuhuk Silang

Markus 8: 31 – 38

    a.       Di Padan na Robi digombarhon do taringot tu Mesias na monang (Jes. 11), jala adong do nang gombaran taringot tu Mesias na menderita (Jes.53). Jala di roha ni halak Jahudi na mengharapkan haroro ni Mesias na politis na gabe raja gumonggom Israel, gabe mago ma lapatan ni Mesias na menderita i. songon i do nang pamingkirion ni sisean i taringot Jesus. Na dohot do nasida manghirim di Jesus Mesias Raja ni halak Jahudi. Ala ni i do umbahen na adong sian sisean i na mangidohon, ia dung marhasangapon Jesus i, asa dibahen nasida gabe staf-na; sada di hambirangna, jala sadanari di siamunna. Alai dipinsang Jesus do nasida ala ndang diboto nasida pangidoanna i. Jesus na marsitaonon godang do Anak ni jolma i. Ndada na naeng merebut kekuasaan Ibana sian panggomgomi Rom na menjajah nasida hatiha i. Ingkon marsitaonon do Ibana asa sahat tu hasangaponNa i. Ia dung mate Ibana na hehe do Ibana muse di ari patoluhon. Jala songon i do nang nasa  na giot mangihuthon Jesus, disoadahon ma dirina, dituhuk ma silang na tu ibana, diihuthon ma Jesus.

     b.      Haputusan ni Debata do mambahen ingkon godang sitaonon ni Jesus. Songon i do dipilliti Debata dalan na dumenggan laho paluahon jolma i sian angka dosana be. Ingkon hosa ni Jesus sandiri do na manobus hosa ni jolma i. Ingkon bolonghonon ni angka sintua dohot malim dohot sibotosurat Ibana, laos pusaonna do; “dungi mulak mangolu di ari patoluhon”. Bons do roha ni sisean i umbege pandohan ni Jesus i na ingkon marsitaonon godang Ibana. Ndang  menarik pandohan i di rohanasida, jala ndang dihalomohon angka sisean i menderita Guru nasida i. Mangihuthon Pamingkirion ni sisean i, keliru do haputusan ni Jesus i. Ai ia dung mate Ibana ise be na gabe bangkit raja gumomgom Israel ? Patar do i di patorang Jesus, alai hata: “Ingkon marsitaonon i do na tartangkup pinggolnasida. Jala mansai sogo do rohanasida di pandohan na saotik i. Gabe malua boti do hata ni Jesus na mandok: “Dung i mulak mangolu di ari patoluhon”. Gabe salpu songon i do hata i tu alogo. Gira do diarahon si Petrus Ibana, jala disolsoli Jesus i. Boasa ingkon songon i tutu haputusan ni Jesus. Adong do panghihrimon nasida na balga situtu di rohanasida be taringot tu Jesus. Jadi boasa muba Jesus sian harapan ni roha ni halak ro di angka sisean i? sude sisean i mendukung Jesus molo bangkit raja Ibana. Jala songon i do na dumenggan di roha nasida. Ai haotoon do mamillit penderitaan, ai hamatean do ujung ni i. Naeng angka sisean i mangatur ruang gerak ni Tuhan Jesus, ai nunga diprogramhon angka sisean i, ai na sahat ma tingkina bangkit raja Ibana gumomgom Israel.

     c.       Alai humusor ma anggo Jesus, dipanotnoti ma angka sisean i, dipinsang ma si Petrus, ninna ma: “Laho ma ne ho bolis, sian lambunghon; ai ndang diparrohahon ho na di Debata, angka na dijolma do. Jadi hajahaton do i mangihuthon Jesus, molo ditogihon Jesus tu sangkap ni hajolmaon. Ai na ro do Jesus tu hasiangan on laho manogihon torop halak laho mangihuthon lomo ni roha ni Debata, ndada laho mangihuthon lomo ni roha ni jolma. Lomo ni roha ni jolma do i molo naeng pabangkitonna Jesus i gabe raja gumomgom Israel. Na pasauthon tahi ni jolma do i. Ingkon dohot do hita humusor naung marningot pangunjunan ni sibolis i tu Jesus di na nidokna: saluhutna i lehononku tu Ho, molo olo Ho marsomba tu ahu (Mat.4: 8). Ndada na naeng pasauthon  lomo ni roha ni sibolis umbahen na ro Jesus, alai nanaeng pasauthon lomo ni roha ni Amana do.  Asa nasa ulu ni tot somba tu Jesus do, jala nasa dila marhatopothon Ibana do Tuhan. Roha ni natorop naeng pasauthon ni si Petrus asa saut tu Jesus, ai ido na dumenggan di rohana. Ndang diboto ibana na dumenggan di Debata do pasautonna tu saluhut hajolmaon, ndada lomo ni roha ni hajolmaon pasautonna di harajaonna i.

     d.      Laos dijou Jesus ma natorop i rap dohot  siseanna, didok ma tu nasida: “Nasa na giot mangihuthon Ahu, disoadahon ma dirina, dituhuk ma silang na tu ibana diihuthon ma Ahu. Maol situtu do i oloan ni hajolmaon, ai na borat do na mansoadahon diri sandiri. Gariada penonjolan di diri sandiri do na jotjot ndang pataridahon Tuhan i. Na maol situtu do melebur keakuan ni jolma i tu bagasan diri ni Jesus laho mangihuthon Ibana. AI na naeng paluahon hosana, mangagohonsa do; alai na agoan hosa ala ni  Ahu dohot ala ni Barita na Uli i, i do paluahonsa. Torop do halak  na so lomo rohana tarbarita ala ni Jesus, alai tarbarita ala ni pinompar do, ala ni jasa – jasa na patriotik dohot premasi di bidang ilmu pengetahuan. Mansai arga do i di Debata nang harajaonna pe molo adong na agoan hosa ala ni Barita na Uli i. AI molo adong na maila ala ni Jesus manang ala ni hataNa, maradophon bangso pangalangkup jala pardosa, laos maila do Anak ni jolma i sogot laho manghatindangkon ibana, di na ro i Ibana dibagasan hasangapon ni Aman rap dohot surusuruan angka na badia. Nunga ditaringoti dison na asong surusuruan angka na badia, i ma suruan ni Debata na ditongos Ibana di angka tingki na lehet be laho mangurupi jolma i di keadaan nasida be.

    e.      Sangkap hatuan ni Debata do na naeng mardalan di sandok portibi on. Ibana do na mangatur saluhutna, ro di angka hukum-hukum alam na berlaku pe. Ndada jolma na naeng mangatur harajaon ni Debata, jala ndada tahi ni hajolmaon na naeng saut di harajaon ni Debata, alai tung ingkon na hinalomohonna sandiri do. Angka halak na sumolhot tu Jesus i do na naeng mengalihkan pamingkirion ni Jesus asa tinggalhononna na hinalomohon ni Amana. Ala ni i do umbahen na dipinsang Ibana si Petrus na holan mamarrohahon angka na dijolma. Nasa na giot mangihuthon Jesus, disoadahon ma dirina, dituhuk ma silang na tu ibana, diihuthon ma Jesus. Diparrohahon angka na mangihuthon Jesus ma angka na hinalomohon ni Debata, jala i ma diloas mardalan di harajaon ni Debata. Marsiajar ma ganup Parhalado nang ruas ni huria pe, asa lomo ni roha ni Debata dipasaut Jesus di ngolunta be. Jala huhut ingkon ingoton ni rohanta pangajaran ni Jesus di tangiang hatopan i : “Sai saut ma lomo ni roham di Banua tonga on songon na di Banuaginjang.”

     f.        Molo angka haputusan tontu adong do konsekuensina marpangontak tu resiko na balga manang na metmet, adong do i na holan sangombas, manang parsatongkinan, adong do na gabe leleng jala adong ma i na gabe manongtong (ndang marhaujungan). Na di portibi on adong do angka konsekuensi nang resiko siadopanta, adong pilihan na bebas di hita; molo dalan na holom jaloonta ma angka hasusaan nang pandelean ima na sai dipangke sibolis laho paliluhon ngolunta, rohanta nang haporseaonta. Alai molo dalan na tiur i sangkap nang tujuan hasonangan, las ni roha dohot hagogoon do na tajalo sian Debata marhitehite Jesus Kristus AnakNa i. Nang pe dikenyataan parngoluon sipata tonggi do na ditawarhon sibolis i mulana, alai ujungna hapariron nang sidangolon do. Molo mangihuthon Jesus i memang rahis jala maol do, dalananta do angka tantangan ima manuhuk silang penderitaan i (Mark.8: 34). Ala ni i ringkot do pembinaan mental laho paradehon diri marhite na mansoadahon dirinta be, ala adong Kristus siihuthononnta. Syaratna manuhuk silang, i ma silang ni Kristus. Silang ni Kristus ringkot dang holan di Debata, alai dohot do tu jolma, na naeng mangihuthon Jesus. Ndang holan tanda songon horunghorung manang di ruangan kamarta, alai dibagasan ngolunta, dirinta nang rohanta, paboahon na tahatindanghon Ibana songon Sipalua, na manobus jolma. Molo disuru hita marhite topik ni minggunta on: “Mansoadahon diri Huhut Manuhuk Silang” naeng ma taparrohahon angka na di Debata; na pinsangonna do angka jogal ni rohanta; jala naeng do diigil sian hita asa pasauthon na hinalomohon ni Debata; jala na asa tahalashon lomo ni roha ni Debata. Manuhuk silang dibuhai marhite na mansoadahon diri, lapatanna mate do hita tu dirintabe jala mangolu tu Jesus Kristus, didok Jesus naeng do rade roha nang dirinta agoan hosa siala ni Tuhan Jesus dohot ala ni Barita Na Uli. Ihut ni i naeng do tarida dibagasan ngolunta angka siihuthon Kristus so pola maila jala margogo manghatindangkon taringot tu Ibana di tingki une manang na so une. Nang pe maol dalan sidalananta alai ujung ni pardalananta i ima las ni roha na manongtong. Dalan ni Kristus ima “Via Dolorosa” : jalan salib ima hangoluan na manongtong jala na badia. Taparade ma roha nang dirinta dibagasan haporseaon tu Jesus Kristus. Amen.

Bahan Jamita Epistel Minggu Reminiscere, 1 Maret 2015

Mansoadahon Diri Huhut Manuhuk Silang

1 Musa 17 : 1 – 7, 15 – 16

     a.       Dipatandahon Debata diriNa tu si Abram dohot tujuan asa ditanda si Abram ise do Debata, i ma Debata na so hatudosan (El Shadai). Tujuanna asa lam margogo haporseaon ni si Abram di na lahoo manjalo bagabaga ni Debata na so tardodo ni roha nang pingkiran ni jolma. Jala naung pigapiga hali dipasahat Debata bagabagaNa i tu ibana jala ndang boi tarjalo pingkiranna i. Nungamansai leleng dipaimaima si Abrama dohot si Sarai bagabaga i jala lam so tuk do tu roha nang pingkiran nasida paimaonsa. Ala ni i ma denggan dipabotohon Debata diriNa Debata na sohatudosan na boi patupahon na so tarpatupa ni jolma jala na so masuk akal pikiran ni manisia.

     b.      Didok Debata do do tu ibana: “....sai marparange di jolongku ma ho, jala daulat roham!” (ay.1b), lapatanna naeng sai ingoton ni ai Abram dibagasan pardalananna ia Debata Jahowa na sai tongtong mangaramoti ibana. Nang hita pe angka na porsea, molo sai tahilalahon do mangolu hita diadopan ni Debata, naeng ma tarida parange nang pangalaho na hombar tu lomo ni roha ni Debata, jala disi ndang barani be hita mangulahon dosa nang mangalaosi patik nang hata ni Debata. Ala ni i diigil do sian hita marparange na denggan songon anak hatiuron diadopan ni jolma tarlumobi diadopan  ni Debata. Magigi mida dosa, sai manjaga habadiaon ni ngolu siganup tingki nang siganup ari ditonga ni portibi on. Ditingki ngolunta na di portibi on do  ringkot ulahononta uhum nang patikNa i, ndada ndung mate, ndada dung salpu portibi on. Sai tongtong do dipaingot Debata padanNa i tu si Abram, na patuduhon hagaleon nijolma di haporseaonna i, boi do lupa jolma i, boi do mandele paimaimahon andigan i saut padanNa i, ima ringkotna sai mulakuak dipaingot Tuhan i hita marhite jamita di angka parpunguan ni halak Kristen, nang secara pribadi pe. Asa disi ma hita halak na porsea i sai martangiang huhut manjaha HataNa i asa hot padanNa i di haporseaonta, jala ndang boi humordit hita sian i, sai pasahathon ni Tuhan i do hombar tu tingkiNa.

    c.       Molo nunga marpadan, manang marjanji, ingkon sipatupaon do i, sada utang do i molo so saut naung dipadanhon i. Jala ndada na margabus Debata tu si Abram molo tung leleng sipaimaon wujud-nyata ni padan ni Debata i tu ibana. Dipadanhon Debata do tu si Abram sada anak, dohot pinomparna na mansai torop, na gabe bangso na bolon di portibi on. Molo sian pardagingon, ia Abram gabe ama ni saluhut bangso Israel, Edom, Arab, dohot angka bangso na sian pinompar ni si Ketura, ima pardihuta na patoluhon ni si Abram ( 1 Musa 15: 1-6). Molo sian partondion, pinompar ni si Abram do sude halak na porsea (Rom 4: 16-17).

    d.      Adong ma pigapiga padan ni Debata na ro muse na so adong hian di padan na parjolo i tu si Abram: “Marroan sian ho angka raja” (ay.6); lehonon ni Debata ma tu ibana sada anak sian si Sarai (ay.16). Saleleng 13 taon na so pamotoan ni rohana anak bagabaga na nidokna i dirimpu ibana si Ismael. Siala naung adong anakna si Ismael i do na so adong be rohana margelleng muse sian si Sarai. Dirimpu si sarai nang Abram sian tahi nasida mandapot pinompar umbahen dilehon si Sarai hataobanna si Hagar asa gabe jolmana, boi do ala ketidak-sabaran nasida paimahon anak. Hape ingkon sian si Sarai do na saut ima hombar tu lomo ni roha ni Debata, jala ima padan ni Debata tu si Abram. Sai hot do holong ni roha ni Debata jala satia do Ibana di angka padanNa. Tung so adong do na boi manegai padanNa i, manang ise pe, jolma manang angka na masa di portibi on ndang adong na boi manundati sangkap ni Debata, tung ala ni dosanta pe i ndang boi manegai sangkap ni Debata. Manang andigan hasasaut ni bagabaga ni Debata di hasosorang anak di nasida saluhutna hombar tu tingki ni Debat do i. Hasasautna i sorang ma si Ishak, goarna i na marlaptan; ibana mengkel, engkel na i ndada ala engkel ni si Sara na tarsurat di 1 Musa 18: 12-15, alai ala engke ni si Abram do, boi jahaonta di ayat 17 “Jadi manungkap ma si Abraham jala mengkel, didok ma di bagasan rohana: Tung tubuan anak ma jolma sisaratus taon jala manubuhon ma tagamon si Sarah, na marumur siapulu taon”?

     e.      Goar na marubah; Jotjot do tabege sasahalak na mangalehon goar tu anakna, luluanna do goar na bermakna positif dohot maksud asa anakhonna i haduan gabe marpangalaho na denggan jala dapotan parsaulian sian goarna i. On ma na gabe mitos na sai masa ditonga ni masyarakat. Hape naung sian najolo do hape masa pemahaman sisongon i, ima sian si Terha ama ni si Abram. Dimulanai sangkap ni si Terah amana i mambahen goar Abram na marlapatan: ‘the high/ exalter father; bapa yang mulia; ama na pinarsangapan, jala sukses, dohot marhasil na niulana, hape kenyataanna naung godang umurna so adong dope pinomparna, mansai dao panggang sian api-mansai dao sian harapan. Ala ni dipaimbaru Debata ma goarna gabe Abraham namarlapatan ‘the father of many/ a multitude; bapa dari banyak orang; ama ni saluhut jolma. Dungi goar Sarai lapatan ni i i ma “my princess”; putriku; dungi dipaimbaru Debata ma goarna i gabe  Sarah; lapatanna boru na marsangap, ina ni saluhut bangso, putri na manubuhon angka raja di angka bangso. Molo pandok ni angka na malo ditambai do di goar ni si Abraham dohot Sarah huruf “H” (huruf abjad heber: H=Hey) na martudutudu tu singkat ni goar ni JHWH. Jadi molo masijouon nasida nadua, laho paingot Jahowa na mamasumasu nasida.

     f.    Hita na hinaholongan dibagasan Jesus Kristus. Molo padan sai na ingkon saut do i, alai dihajolmaon sai olo do na mangose padan, boi do ala ni beberapa faktor nang pengaruh. Di halak Batak mansai ringkot do padan. Didok do umpasa Batak “Togu urat ni uhum, toguan urat ni padang; Togu nidok uhum, toguan nidok padan”. Ido umbahen adong marpadan marga ni halak batak isarana marga parna na so jadi masiolian, dohot angka marga batak na asing. Jala didok muse di umpama Batak “Dengke ni sabulan tu tonggina tu tabona; ise iose padan tu rimpurna tu magona”. I do na taparohahon di turpuk on; Debata marpadan dohot si Abraham. Boi do sipata sai tarpaimaima hasasaut padan ni Debata dibagasan ngolunta songon na nialaman ni si Abraham on. Nang pe ndang masuk tu logika, alai di Debata ndang adong na so tarpatupa Ibana (ptds. Luk.1: 37). Nuaeng na gabe sungkunsungkun; porsea do hita molo naung marpadan Debata dohot hita ?. Naung tajalo do Kristus i laho manghophop dosanta nang dosa ni portibi on. Dipasahat Debata do tu hita PadanNa i ido umbahen digoari Bibelta i tu dua bagian; ima Padan na Robi dohot Padan na Imbaru (the covenant). Angka halongangan jotjot do masa di situasi na so mungkin holan Debata Jahowa do na boi patupahon i, jala tusi do hita diarahon nang dipaingot turpuk on porsea di hagogoon nang huaso ni Debata Jahowa. Persoalanna, sai jotjot do hita sai mangasahon pingkiran nang utokutokta, jala jotjot tapangke standarta sandiri, holan na hombar tu prakiraanta sandiri. Ala ni i diarahon do hita  marhite turpuk on laho manghaporseai sangkap ni Debata, ima sangkap hatuaon, dohot las ni roha (ptds. Jer.29: 11).

    g.       Hita na hinaholongan dibagasan Jesus Kristus marsiajar do hita sian hatoguon ni haporseaon ni si Abraham na paloashon Debata mangula dibagasan ngoluna. Disoadahon ibana do roharoha nang pingkiranna, alai sai hibul rohana manghaporseai Debata Jahowa di angka sangkap nang padan ni Debata tu ibana (ptds. Poda 3: 5-6). Laos songon i do nang hita angka na porsea dibagasan Jesus Kristus, boha hasatiaonta laho mangihuthon Jesus kristus idibagasan haporseaon? Godang do angka hamaolon nang ambatmabta laho paimahon padan ni Debata tu hita, sai dipangke sibolis i do tahitahina laho mangago haporseaonta nang rohanta. Angka na masa di portibo on nang di hasiangan on baoi do mempengaruhi hasatiaonta tu Debata. Olo do ndang sabar hita paimahon, jala godang tantangan. Ala ni i mangihuthon Jesus ndada marhite angkal pikiran sambing alai haporseaon do. Mangihuthon Jesus naeng do diarahon hita laho mamingkiri na ringkot di Di Debata ndang ringkot na di portibi on. (ptds. 1 Kor.2: 16; Pil.2:5). Songon topik diminggunta “Mansoadahon diri huhut manuhuk silang” (Mark.8: 31-38), molo sahalakta do manuhuk silang, tung mansai suhar do i, jala dokdok, ndang tartaon hita manuhuk i; angka dosa nang pangalaosionta maradophon dongan jolma nang maradophon Debata. Disada tingki marsangkap do sahalak ina laho manggadis parbue ni manggana i tu onan, dihunti ibana do karanjangna balga  na marisi mangga i, mamolus dalan tano na rara. Mansai dao do onan i, ditongan dalan mamolus ma parmotor truck, dibereng sopir on ma inanta on mansai borat manghunti karanjang ni manggana i. Burju ni rohana mangalehon tumpangan tu ina i asa dohot nangkok tu motor truck na i, ala tujuan nasida rup tu onan do. Dung diolo inanta i, las ma roha ni si sopir on, dung pigapiga leleng, diparrohahon sopir on ma sian kaca spion ni motorna i, boha do inanta i. Tarsonggot ma si sopir i mamereng inanata i, boasa ? siala sai dipahuntihunti inanti i do karanjang ni manggana i, nang pe naung hundul ibana dibagasan motor truck i. Alani i mangulon ma satongkin si supir i huhut mandok tu inanta i, asa peakhon karanjang ni manggana i tu motor truck i. Hita na hinaholongan jotjot do hita pahuntihunti pergumulan nang persoalanta, ndnag pos rohanat di Tuhan i, jala molo dipasahatpe, ndang hibul rohana pasahathon. Ala ni i boha do carana ? Ima songon Kristus i, disoadahon Ibana do diriNa: martangiang tu Debata Ama mangido pangurupion (Ptds.Mat.6:9-13; 7:7-12; 26: 39; Luk.23;34,46; Joh.17:21-23; Pil.2: 5-10), marhite na pasahathon diri tu Debata umbahen na margogo Jesus i jala dipatimbo, gabe marhasangapon. Loas Jesus pe didok do tu hita: di Mateus 11: 28-30 “Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon.” Antong Minggu Reminiscere on mangarahon hita mandok ditangiangta tu Debata Ama i: “Sai ingot ma angka denggan ni basam”. Taihuthon ma Tuhan i marhite hagogoonNa di ngolunta. Amen.

Bahan Jamita Evangelium Minggu Invocavit, 22 Februari 2015

Dalan ni Jahowa: Asi Ni Roha Dohot Hasintongan

Psalm 25: 1 – 10

     a.       Molo di halak Israel ia buku Psalmen i ma “buku ni Israel tu Debata Jahowa” na marisihon 2 bagian bolon: 1. Pujipujian tu Jahowa (pujian dan penyembahan) = tehhillim (Yhd);  2.Tangiang tu Jahowa (Elekelek mangido haluaon dohot pandonganion ni Jahowa di ngolu siganup ari)= Tefillot (Yhdi). Jala buku ni Debata YHWH tu Israel, i ma : buku pentateukh ( 5 Buku Musa. Sian sude buku Psalemn si 5 buku (jilid): 150 bindu: 2.552 ayat on, na kinarang ni si David ma na gumodang = 73 bindu; 2 Sam.2: 8. Jala  27 bindu na kinarang ni si Asaf, Korah, Musa, Salomo dohot si Heman, jala 50 bindu sian pengarang “sinonim” (na so dipaboa tu hita manang ise goar nasida). Sandok 77 bindu ma na so kinarang ni raja Daud. I do umbahen didok halak Israel na so adong na umbalga sian raja David, angka na sorang di Palestina, musikus, panglima (ulubalang) na terbesar sepanjang sejarah, raja jala panurirang ni Debata Jahowa do ibana dirajumi Israel, Ama jala guru bolon di bangso i. Didok barita, lobi 500 taon buku Psalmen on dipapungu halak Israel, mulai sian si Salomo, Anak ni si Korah, raja Hizkia, Ezra dohot si Nehemia organisator Jahudi na tarbarita i (Neh.2: 1-11; 7: 3).

     b.      Na marende do si David di Psalmen 25 on, alai marrupahon tangiang, na mangido haluaon sian musuna dohot sian dosa. Dua hal on do na mangonjar roha ni si David laho martangiang, i ma musu dohot dosa na sonson di jolona.. Musu i ma angka na manusai ngoluna, na sai marusaha laho manaluhon dirina. Ianggo dosa, i ma pambahenan na paholang dirina sian Debata. Siala ni i, molo na dua on nunga ro jala mangarajai jolma, ndang tarbahen so gale haporseaonta, laos lam tamba susa ma ngolunta i di portibi on! Ala ni i marhite turpuk Psalmen 25 on namarrupahon psalmen akrostik, taida do ungkapan pangidoan na mansai gogo tu Debata asa dipalua ibana sian musuna nang dosana sandiri. Tangiangna i dipasahat ibana dung jolo adong perenungan na bagas, patandahon na dihasiholi tondina pangurupion ni Jahowa di ngoluna. Tangang ni si David on tingkos pataridahon na hibul do dirina dipasahat tu Tuhan i, ala sadar ibana di dosana. Adong pos ni rohana di Debata Parasiroha i, ingkon paluahon dirina sian hasosahan ni daging dohot tondina. Jadi ndang adong be manang ise na tau pasonang rohana i. 

    c.  Lobi hurang sada taon na sai dipaburuburu raja Saul si David, helana i, ala ni  pangiburuon sinonggopan ni tondi na hodar raja ni Israel na parjolo on hira hira taon 1005-1004 sM. Molo tapaihutihut surat ni si Samuel na parjolo di bindu 22 dohot 23 ( 1 Sam.22-23), di nasai manggasa rimas ni raja Saul mangalele si David naeng bunuonna soada salana nian tu si Saul, nda holan ala naung pinillit ni Jahowa i do si David gabe raja mangganti ibana jala nunga dimiahi panurirang Samuel si David di Bethlehem (1 Sam. 16: 1 – 13). Disi tarboto tu si Saul, naung dimiahi si Samuel si David gabe raja, ndada sada sian anakna i hape, tarrimas situtu ma ibana tu si David. Saleleng si sada taon i ( 1005-1004 sM) dipangungsian nama si David dohot soldaduna si 600 halak i. Sian Naiot tu Rama – Nob – Gat – Liang Adulan – Mizpa torus tu tombak Heret, dungi mulak tu Nob. Asa dung mate si Saul bunu diri di dolok Giboa ( 1 Sam 31) maringanan ma si David di Hebron (parpadanan) 1 Musa 23: 2; Jos.15: 13, 54; 4 Musa 13: 22. Diingot ma angka parmaraan naung binolusna, ro di angka dosa di haposoonna, jorbut dipanghorhonna muse tu dirina dohot pinomparna. Alai diida muse ma asi ni roha dohot angka denggan basa ni Debata Jahowa naung paluahon ibana sian musuna dohot hamateanna, i ma na mangonjar tondina dohot pingkiranna mangalualu  tu jolo ni Debata dibagasan roha na magopu marningot pengalamanna naung salpu. Asa tama situtu do pengalamanta naung salpu laho sipareahanta tu jolo on.

     d.      Adong tolu bagian na penting pinataridahon ni raja David tu hita angka na porsea, i ma: adong tujuan manang motivasi; molo martangiang pe si David tu Debata Jahowa adong tujuan manang motivasi na mangonjar rohana ima: las ni roha na ala haluaon na pinatupa ni Debata di ibana. Ndang dipaila manang dipasiaksiak musuna iban, jala diondihon sian hamatean. Tangiangna ima mamuji huhut mangolopolophon denggan basa ni Debata Jahowa tu saluhut  namarhaposan tu Jahowa, mangondihon sian mara ni daging nang tondi ala asi ni rohaNa dohot HolongNa na so hasuhatan (halompoan) i. Tujuanna, ima laho mangarahon saluhut jolma manghalashon denggan basa nang asi ni roha dohot holong ni Jahowa na paluahon angka na porsea sian musu dohot sian rante ni dosa i. Tangiang ni angka na porsea tu Debata Jahowa pasahathon manang mamelehon diri songon hajongjonganna, beha pe ibana nang jorbut ni dosana najolo. Holan marhite tangiang na torus manorus pasahat diri tu tangan ni Debata: na Sun hinagogo i do boi hita jolma malua sian tahi dohot sangkap hajahaton na di portibi on (Pslm.24:4b; 86: 4; 143: 8 mandok; andorang so niula siulaon sai jumolo martangiang). Nasa na martangiang tu Debata, naeng ma dibagasan tondi dohot hasintongan, jala marpos ni roha situtu tu asi ni roha ni Debata, na alusanNa do tangiangta, ala naung tapasahat sude ngolunta dohot masa depanta tu Ibana (Pslm. 24: 6; Joh.4: 24). Ala ni i di angka na porsea i sai benget do ibana paimahon alu s ni Debata di tangiangna, asa unang ma mandele manang agbe mansohot martangiang molo so pintor dioloi Debata na tapangido di tangiangta be (ptds. Mat. 7: 7-8). Ai didodo Debata do roha ni angka jolma, aha do motivasi, tujuan ni ganup tangiangna tu Debata, alusna; “Olo, Ndang, Paima”.

     e.      Tung so tarurak jolma do na tongtong marhaposan tu Debata Jahowa jala na benget paimaimahon denggan basaNa. Songon parjaga napaimaimahon tiur ni ari di ngoluna (psl.130: 7). Songon parkarejo na paimaimahon upana (Job. 7: 2), songon parsaba nang parladang nang pangusaha na paimahon gotilon, nang parlabaan (Jes.5: 4). Alai jolma na mangonggopi hasalaan ni donganna jolma laho pagasiphonsa manang laho pailahonsa, tudos do i songon singa na mangonggopi mangsana. Ia singa, i ma lambang ni sibolis ( 1 Petrus 5 : 8), na sai holan mangonggop dohot mangungkar dosa, hahurangan, hasalaan ni donganna jolma dung i dipatedek tu portibi on asa sude na marnida (umbotosa) dohot na manganggo (umbege barita) i gabe bauan jala pasidingkonsa. Alai na sumogirna, laos dibursikhon. Ala ni jorbut ni dosa dohot utiutian ni sibolis na sai mangonggopi angka na porsea i, di dia tinggang dohot sala asa dipaila nian, i do umbahen ingkon tongtong hita dungo martangiang pasahat diri tu tangan ni Debata Jahowa. Asa diondihon, diurupi, dipargogoi, diparbisuhi jala diondihon hita di dalan sidalananta, di ulaon siulahononta siganup ari dohot di ngolu sihangoluhononta saleleng di portibi on.

     f.        Holan sian Debata Jahowa do dapot hita haluaon sian dosa dohot hamatean ni sandok hajolmaon. Ala ni dengganbasa dohot asi ni roha dohot holong ni roha ni Debata Jahowa di hita tinompaNa, dipaingot do sandok ruas ni huria dohot angka na porsea di Debata dohot Jesus Kristus, asa taarahon sandok portibi on; mamuji denggan basa ni Debata marhite endenta dohot tangiangta na so olo sumurut. Dungi asa sadar sude jolma, manangboha pe situasi ni portibi on alai naeng ma botoonta tangkas na ditongatonga ni ancaman ni dosa, haliluon, hajahaton, hatoison dohot ginjang ni roha dope hita mangolu, mamolus ragam ni pangunjunan. Ala ni i ndang tarbahen so ingkon tongtong dungo hita martangiang jala benget paimaimahon Tuhanta na aneng ro i (ptds. 2 Musa 33: 13; Pslm.27: 11; 16: 11). Diarahon do hita asa tongtong marguru tu lomo ni roha ni Debata Nasun Bisuk i asa diajari hita mangolu di portibi on namaubauba on dohot mandalani dalan hatigoran tu hangoluan na manongtong i (Ptds. Jes. 48: 17; 5 Musa 4: 1,5, 10, 14; Jes.50: 4). Ringkot do ganup tingki hita martangiang, ingkon tongtong hita mangelekelek asin i roha dohot denggan basa ni Debata asa marpangulahi rohaNa mida dosanta, dosa ni keluarganta, dosa ni masyarakatta, nang dosa ni bangsonta, dohot dosa ni hurianta; sian dosa na metmet sahat tu dosa na balga, na buni nang na patar, dosa haposoon (dosa hawa nafsu); dohot dosa dung dewasa (tamak dohot ambisi na berlebihan) dohot dosa dung matua (ganggu ni roha nang pandelean). Asa unang pora jala lapuk haporseaonta nang pangkirimonta lumobi holong ni rohanta tu asi ni roha ni Debata siajloonta nuaeng nang tu jolo on.

      g.       Tangiang ima sada ulaon na tama di angka na porsea, ai marhite partangiangan i tarida na so gotap parsaoran ni jolma dohot Debata. Alai jotjotan do jolma i lupa martangiang molo ro parungkilon tu ngoluna. Molo taida na masa nuaeng, hira so porlu do di jolma i ngolu na marhaporseaon tu Debata. Alani aha do i? alasanna dibahen na so “sipangantoi” di rohana Debat di pardalanan ni ngoluna. Manang didok: “Nunga dao Tuhan i dibagasan saluhut parsorionna”. Doshon parpsalmen on ma hita mangido as dipalua Debata sian angka musu nang dosanta. Molo dibagasan Kristus halak na tinompa na imbaru ma i ( 2 Kor.5: 17). Angka ise ma i ? ima angka naung tardidi tu bagasan goar ni Debata Ama, Anak dohot Tondi  Parbadia, jala na tarjou halak na porsea. Dipatuduhon do ngoluna na sai marsigantung tu Debata, na sai mangalualu jala joujou tu Debata, songon goar ni minggunta Minggu Invocavit  (Jouonna ma Ahu, jadi alusanHu ma ibana; Pslm.91: 15a). Pos do roha ni angka na porsea i disangkap nang dalan ni Debata siala Dalan ni Jahowa ima Asi ni roha dohot Hasintongan. Amen.

Bahan Jamita Epistel Minggu Invocavit, 22 Februari 2015

Dalan Ni Jahowa: Asi Ni Roha Dohot  Hasintongan

Markus 1 : 9 – 15

     a.       Dijolo ni turpuk on dipaboahon si Markus do taringot si Johannes pandidi nadisuru Debata laho patandahon Jesus Kristus, paradehon dalan asa torop jolma mananda dohot mangihuthon Jesus. Sude na marhubungan dohot haroro ni Jesus Kristus na gabe Sipalua ima sangkap hatuaon, ndada na ro sambing. Naung direncanahon Debata do haluaon i dohot denggan, boi jahaonta di Jesaya, jala di angka panurirangon ni panurirang di Padan na Robi. Na ro do si Johannes Pandidi di halongonan jala joujouna di jamitana paboahon: hamubaon ni roha, pandidion, dohot hasesaan ni dosa. Ndang adong sangkapna laho mambuat huaso nang kedudukan na naeng ro i, alai na manindangi do ulaonna tu sude jolma taringot tu Jesus i. Didok ibana, naro ma na gumogo sian ibana, na hurang tama do ibana paunduk ibana mangkarhari tali ni sipatuna. Aek do nididihon si Johannes; alai Tondi Parbadia do didihonon ni Jesus Kristus.

     b.      Naung leleng do dibagabagahon Debata na so siaphonoNa be manisia i, dihalomohon Debata do pardamean tu saluhut jolma. Boi ma botoonta sian na masa aek na sumar i (air bah) di 1 Musa 9 : 8 – 17. Dipaujung do aek i marhite halibutongan di ombun i. Denggan do ingotonta angka na porsea i padan na binabagabagahon Debata. Holan Debata Jahowa do na marhuaso mangatasi saluhutna i, naeng do ro hita mangadop Ibana mangido pangaramotionNa tu hita. PangaramotionNa i tangkas do i begeonta jala jahaonta sian HataNa i di Padan Na Robi dohot di Padan Na Imbaru. Jala tangkas do i disurathon di Psalmen 119. Marhite na manjaha, mangantusi dohot na mamutihi podaNa, sai jalaoonta do panogunoguon na tangkas sian Debata Jahowa. Mansai torop dipartingkian on pangalaho na padaohon ngolunta siann Debata. Berengonta do sian media cetak, nang elektronik, nang dihumaliangta torop do jolma ‘korban hidup instan’, naeng sude jolma marsiadu hatop salose ulaonna. Na deba mangolu holan mangalului hasonganna sambing, naeng do ingotonta ia Debata mangajari hita asa tongtong mangolu dibagasan haserepon ni roha. Diigil sian hita asa tongtong satia mangihuthon Ibana jala boi marparbue mangalehon parbue na denggan, jala markontribusi tu ngolu siganup ari di tonga ni masyarakat (Pslm 25: 1-10). Sian haporseaon i do hita manghatindanghon dohot gogo, ia Barita na Uli na pinasahat Debata dibagasan Kristus mangalehon haluaon. Haluaon i ndada holan naposo ni Debata  naparjolo i namarnampunasa, alai boi do sahat tu hita di partingkian on. Namarhuaso do Kristus di sude angka na mangolu, na mangatasi hamatean, Ibana mangalehon las ni roha di tingki mangolu hita nang pe di tingki mangadopi hamatean. Binsan mangolu hita, naeng do tapangke partingkian di ngolu on. Manjalo dohot manomunomu Kristus na marhuaso dibagasan roha, pingkiran nang parangenta pe.

     c.       Molo Apostel Petrus manggombarhon haluaon na masa tu si Noak sian aek na sumar i gabe simbol ni pandidion. Sada ulaon na badia marhitehite aek. Dibagasan pandidion, dipasada jala dipatomu do hita dohot Jesus Kristus. Ngolu na robi naung lonong, jala ngolu na imbaru ma dilehon. Pandidion i gabe sada padan do i, alai dibagsan ni i adong haporseaonta na marningot hamatean dohot haheheon ni Kristus. Ingot hita hamonangan ni angka na porsea na dibasabasahon Debata. Hamonangan di haporseaon i gabe paluahon. Dibagasan pandidion adong hamubaon diri (Rom 6:3-5; Gal 3:27; Kol 2:12). Uju tapahombar dirinta dohot Kristus marhite pandidion i, dipargogoi do hita asa unang mulak tu hasomalan nang ngolu na robi i. Dipargogoi do hita asa satia nang pe godang angka hamaolon nang ambt ambat. Nuaeng angka na tarididi i mangolu dibagasan pangalaho na imbaru, na boi berengon ni na torop. ( 1 Ptr. 3: 18 – 22).

    d.      Dipasahat Johannes pandidi do pandidion songon tanda tu halak na marhamubaon ni roha sian dosa dosana. Boasa Jesus pasahat diriNa asa dididi si Johannes pandidi ? Songon angka panurirang bolon; Jesaya, Jeremia nang si Hesekiel na mangokui angka dosana. Alai ianggo Jesus ndang mardosa, ndang ringkot di Ibana hasesaan ni dosa. Alai na olo do Ibana dididi di buha ulaon panghobasionNa. Naeng dipatuduhon disi na manolopi ulaon panghobasion ni si Johannes pandidi. Jala dipatuduhon do disi na olo Ibana tudos dohot jolma na mardosa i. Dipatuduhon do disi serep ni roha na boi parsiajaranta songon angka siihuthon Kristus hita. Solidaritas ni Jesus tu angka na mardosa, solidaritas na dibagasan hasusaan. Jala porlu do ingotonta ia pandidion ni si Johannes Pandidi marasing do i sian pandidion ni halak Kristen, siala dibagasan bibel i boi jahaonta ia angka sisean ni si Johannes na manghuthon Apostel Paulus, dididi do muse (Ul.Ap.19: 2 – 5). Ditingki dididi, songgop ma Tondi songon dara pati tu simajunjung ni Jesus. Ro ma soara sian surgo na mandok : “Ho do Anak haholongan ni rohangku; lomo do rohangku di Ho!” Pandohan on ima sada panontophon na tangkas sian Debata si Tolusada i ditonga ni portibi on. Udut ni i, ditadingkon Jesus ma sihatoropan i, laho tu halongonan. Diunjuni sibolis, alai ndang na marshuaso pangunjunan i di Jesus (Mat.4: 1 – 11). Ndanda na so hasea pangunjunan i, na so hasea do pangunjunan i molo gabe gale do hita, hohom sambing jala talu. Halak na tang haporseaonna margogo do ibana laho mangadopi pangunjunann i. Sai na luluanna do sangkap ni Debata sian pangunjunan i. Marhite pangaramotionNa, sai pargogoanNa do ibana asa marhamonangan. Tu angkana porsea, sai donganan ni Kristus do ibana laho mangadopi angka pangunjunan nang hamaolon i. Monang ma ibana sian pangunjunan i, jala laos ihut do ibana laho mangurupi jolma asa monang manaluhon pangunjunan i (Heber 4 : 15).

   e. Nuaeng sahat hita tu turpukta na manguhal topik “Dalan Ni Jahowa: Asi Ni Roha Dohot Hasintongan.” Ala ni i molo naeng malua do hita jala mamasuhi Harajaon ni Debata taparrohahon ma point na mangihut on =

Ø  Diigil do haporseaon na polin tu Jesus Kristus, ima sada alus na mansai uli jala denggan dibagasan ngolunta. Jala molo lam bagas tapahusorhusor laos i do unok ni haporseaon ni halak Kristen. Tingkina naeng jonok nama Harajaon ni Debata, asa marhamubaon ni roha jala manghaporseai Barita na Uli.

Ø  Ia padan ni Debata naung digohi marhite haroro ni Kristus. Marhite ulaon ni Kristus dipatuduhon do huaso ni Debata na manggomgomi songon Raja. Haroro ni Jesus tu angka na maheu, na loja, na sorat, na so marpangkirimon, manogunogu, mangalehon haluaon, hatigoran dohot panghirimon na imbaru. Hita angka na porsea nunga manjalo padanNa i jala dipargogoi laho patulushon ulaon ni Kristus ditongatonga ni portibi on siala naung dipadame do hita dohot Debata.

Ø  Asa gabe anak halomoan ni roha ni Debata hita songon Kristus, naeng ma olo hita pararonNa gabe sitotas dalan tu angka jolma asa marhamubaon ni roha torop halak jala porsea dohot mangihuthon Jesus. Songon Jesus na olo solider di didi laho manean hadosaon ni jolma. Naeng ma olo hita solider manang perduli di hadosaon ni dongan jolma asa ditundalhon dosana. Tapatutoru ma dirinta jala tapaserep asa boi jala mampu hita manogunogu torop halak porsea di Kristus Jesus.

Ø  Minggu Invocavit: Jounonna ma ahu, jadi alusanhu ma Ibana. Angka jolma na sai joujou tu Debata ima na marhamonangan. Angka naung tardidi dibagasan Goar ni Debata Ama, Anak dohot Tondi Parbadia, ndada na gabe malua sian angka hamaolon, pangunjunan, sitaonon dohot angka na bernit. Alai sai na joujou do angka na porsea i tu Debata dibagasan tangiangna asa tartaon ibana saluhutna i, sabam rohana jala benget manaon ihut sai tongtong dijuggulhon mangulaon Hata ni Debata. Songon Jesus i, dung dididi sahat do diboan Tondi i tu halongonan na gok angka tantangan sian cuaca, iklim, situasi ni angka binatang na liar nang sian sibolis pe na mangunjuni ibana. Laos songon i do adopanta dipardalanan ni ngolunta godang angka tantangan sian lingkungan nang pangunjunan sian sibolis i. Asa ndada sangkap na roa nang tu hamatean sangkap ni Debata alai tu hangoluan di siala Dalan ni Jahowa ima Asi ni roha dohot Hasintongan. Tudos songon na tarsurat di Jeremia 29: 11 “Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.”  Dohot di turpuk evangelium minggunta Pslm 25 : 10 0 Asi ni roha dohot hasintongan do sude dalan ni Jahowa di angka na mangaradoti padanna dohot angka panindangionna. Siala ni i molo songgop na bernit i, naeng ma angka naung porsea jala tardidi i sai tongtong manghalungunhon Jahowa (Pslm.25:1) asa dapotononna hamonangan i. Amen.

Bahan Jamita Evangelium Minggu Estomihi, 15 Februari 2015

Pabinsar Parbinotoan Disangap ni Debata

2 Korint 4: 3 – 6

     a.       Ia tujuan ni surat II Korint on ima laho pagomoshon pardamean naung jumpang i do ditonga ruas ni huria Korint, atik pe sai adong saotik ancaman-ancaman kecil. Ala ni i jotjot diantusi ia surat II Korint on songon surat pardamean. Jala dipaboahon do dijolo ni turpuk on taringot tu haparhaladoon ni Apostel Paulus. Dijalo ibana pe tohonan i holan marhite asi ni roha ni Debata do, ai ndang dihalupahon ibana dirina najolo naung sanga mangalelei huria ni Debata (ptds. 1 Kor.15:9-10; I Tim.1: 12-16), ala ni i tung jamot do Apostel Paulus di tohonanna i. Dibagasan hajamoton di hak haparhaladoon na sangap i termasuk do mambahen ibana ndang marnaloja mangulahon ulaonna i nang pe nian ingkon godang diadopi angka hamaolon dohot parungkilon. Ndang adong sangkap na buni di ibana di na mamaritahon barita na uli i. Ndang adong “udang dibalik batu”, songon na binahen ni angka naasing ( 2 Kor.2: 17). Jala dipaingot Apostel Paulus do taringot tu hasintongan ni panghobasion di tohonan i holan marhite panimbangion ni Debata do ( ptds. I Kor.4: 3-4). Asa persetujuan ni natorop dibahen nasida i di jolo ni Debata ndada dijolo ni panimbangi portibi on.

    b.      Maol do antusan boasa dung dihatahon Apostel Paulus taringot tu hapapatar ni hasintongan do ulaon na gabe langsung muse didiskusihon ibana taringot tu na adong sifat ketertutupan barita na uli i. Didok Apostel Paulus: “Jala molo tung tartutup barita na uli i”. Kemungkinan dihatahon ibana on siala Kritik na ro mandok: Boasa godang na manulak barita na uli na binaritahon ni Apostel Paulus i? (ptds.Ul.Ap.13:44-45; 17:5-9; 18:5-6; 12: 31; 19:8-9). Alus ni apostel i: tartutup pe Barita na uli i di manang piga halak ala ni panghorhon ni sikap keadaan ni nasida do i ma: angka na laho mago. Jadi masalah ndada di apostel manang di barita na uli i asa unang tarbahen nasida malua sian panggomgomion ni sibolis i. Dipapitung mata ni pangantusion nasida asa unang tarbahen nasida na adong haluaon jumpang marhite na manjalo barita na uli. AI tujuan ni Kristus marhite baritana uli i, i ma patupahon pangantusion na tangkas taringot tu Debata di pingkiran ni angka jolma, alai tujuan ni sibolis i ma laho mangihoti jolma dibagasan haotoon. On do pengalaman ni Apostel Paulus (Ul.Ap.9:1-19; Gal.1:13-17). Diondolhon Apostel Paulus do (ay.4), ia barita na uli najinamitahonna i, i ma barita taringot tu hasangapon ni Kristus na tardok suman ni Debata. Jumpang hita dison gombaran ni  pangantusion taringot tu panompaon ni jolma ( 1 Musa 1: 26). Khusus na sian sudut on ma Apostel Paulus manghatahon ia Kristus i ma Adam na parpudi na marasing sian Adam na parjolo ( 1 Kor.15: 45-49).

     c.       Didok Apostel Paulus muse : “Ai ndada dirinami.....Kristus Jesus i do. Molo taparrohahon adong dison sifat pembelaan dohot polemik. Sifat pembelaan i ma: mangalusi kritik na mandok dirina sandiri dijamitahon. Sifat polemik i ma: Molo dihonahon ibana tu angka na asing nam anjamitahon dirina be dibagasan jamitana, alai anggo Apostel Paulus, Kristus do dijamitahon. Pandohan i pe tangkas do pabotohon taringot tu isi ni Barita na uli najinamitahon ni apostel i: presentasi (keberatan) ni Kristus dongon Tuhan. Pengakuan “Kristus do Tuhan” i ma na gabe inti ni jamitana. Dijamitahon apostel do KeTuhanan ni Kristus jala dijouhon ibana asa dilehon jolma i hasatiaon tu Kristus. Ai Ibana na gabe pangunsandean ni angka na tarjou i ma sahalak na tarsilang, sahalak naung mate humophop nasida. Pandohan: “Alai naposomuna do hami ala ni Jesus”. Maralo do ide on tu ide naung dihatahon na di ayat na parjolo (ptds. 1: 24), alai ndada antusanta i dibagasan lapatan: natorop i gabe uluan dii ibana. Diboto Apostel Paulus do holan sada do Tuan (Tuhan) jala dibagasan pangoloion tu Ibana do apostel i manghobasi natorop i. Debata do namandokhon marsinondang hatiuron..... . Dipanompaon na parjolo  tangkas didok: “Debata do na manompa hatiuron i marhite hataNa ( 1 Musa 1: 1 – 3). Pangantusion on do na pinangke ni Apostel Paulus di ay. 6. Debata mangungkap hatiuron di rohana asa marhite i boi ditanda ibana hasangapon ni Debata sandiri naung tangkas tarida dibagasan Kristus. Debata manompa hatiuron di tingki panompaon na parjolo i, i do na mangalehon hatiuron di roha ni apostel i asa tarbahen ibana mangantusi paboa dibagasan Kristus patar tarida hasangapon ni Debata.

    d.      Sahat ma hita nuaeng dipanimpuli ni turpuk on, domu tu topik ni Minggunta na mandok : “Pabinsar parbinotoan Disangap ni Debata”, naeng do tangkas botoonta panindangion sian Apostel Paulus on, ima:

Ø  Tohonan haparhaladoon na adong ditongatonga ni huria holan sian Debata do i tajalo. Jala dilehon pe i tu angka partohonan ndada ala ni kemampuan pribadi sandiri alai tung marhite silehonlehon asi ni roha ni Debata do i. Ala sian Debata do i tajalo ingkon tapertanggung jawabhon do i tu Ibana (ptds. Rom 12: 6-8).

Ø  Ganup tohonan haparhaladoon i fungsina, i ma laho papatarhon hasintongan dohot hatigoran ni Debata. Ala ni i ganup ma parhalado mangalehon hasintongan dohot hatigoran di haparhaladoonna dohot hataridaan ni hasatiaon na tu Debata na mangalehon tohonan i.

Ø  Jesus Kristus do hasintongan dohot hatigoran siulahonon dohot sipataridahonnon. Tarlumobi di hita sude angka na porsea di Kristus Jesus, naeng ma tapabinsar parbinotoan di sangap ni Debata marhitehite Kristus i diangka ulaonta be. AI diparar Debata do hita angka na porsea i laho mamparbuehon na denggan na tajalo sian Ibana dibagasan Kristus ndada dirinta. Naeng do torus tapatujolohon parbinotoan disangap ni Debata, tabaritahon dipangalaho na denggan, diparange sitiruon, jala tarida ma na berwibawa na porsea i jala berkharisma najinalona sian Debata. Songon goar ni Minggunta Minggu Estomihi: “Sai Ho magabe partanobatoanhu”. Tabahen ma Debata na gabe partanobatoanta digulmit ni ngomunta asa jumolo marsangap Debat dingolunta jala hita pe taruli hasangaponNa i. (llustrasi: na marhadomuan tu naniuarihon / mewariskan, pengalaman bersama Tuhan). Amen.

Bahan Jamita Epistel Minggu Estomihi, 15 Februari 2015

Pabinsar Parbinotoan Disangap NI Debata

2 Rajaraja 2: 1 – 12

     a.       Elia lapatanna “Jahowa Debatangku”. Pangokuon jala parsihohoton tu Debata do na songon on! Tarida do i marhite ngolu nang ulaon ni si Elia.  Di parsaoran ni si Elia raphon  dohot si Elisa ima sada proses dihamubaon ni roha si Elisa asa dipangke Debata gabe ulaulaNa. Diajari si Elia do si Elisa marhobas songon panurirang ni Debata martaon taon lelengna, dibohali do si Elisa marhite angka pengalaman na nialaman ni si Elia songon panurirang ni Debata. Diuji si Elia do hasatiaon ni si Elisa di naaeng ro tingkina, tolu hali ma didok ibana tu si Elisa: ay.2; Ua tinggal dison ma ho, ai nunga disuru Jahowa ahu laho tu Betel; ay.4, Ua tinggal dison ma ho, ale Elisa, ai nunga disuru Jahowa ahu tu Jeriko; ay.6 Ua tinggal dison ma ho, ai nunga disuru Jahowa ahu tu Jordan. (tu tolu inganan na marasing: sian Betel-Jeriko-Jordan). Pardalanan na mansai dao do i, alai dijugulhon si Elisa do mangihuthon si Elia.

      b.      Jala dipatuduhon si Elisa do hasatiaonna mangihuthon si Elia, nang pe naung diorai si Elia ibana; “Songon sintongna mangolu Jahowa, mangolu dohot hosam, na so tupa tadingkononku ho” Tiga kali Elia berusaha melakukan hal ini, dan tiga kali pula Elisa menolak untuk ditinggalkan (ay 2,4,6). Somal do nian ingkon patuh sahalak pangurupi tu tuanna, alai dipatuduhon dibagasan turpuk on do sikap ni si Elisa, on ma tingki na parpudi di ibana raphon tuanna (ay.3, 5), jala ditulak ibana do laho manadingkon tuanna si Elia i. Naeng do rohana torus raphon si Elia, mansai lungun do begeon sikap ni si Elisa on. Mansai koras do alus ni si Elisa di sungkunsungkun ni sisean na limapulu i, alai na patuduhon ketegangan emosional ni ibana do i di parsirangan na jonok ne nama.  

       c. Molo nunga manghatai na parpudi nama, manang tingki na jempek nari nama, boi do adong pangidoan. Somalna tabege do sian angka na naeng marujung ngolu nama namangido sipangidoanna na parpudi. Alai baliksa sian barita on dilehon si Elia do aha sipangidoon na parpudi sian si Elisa tu ibana; “Haru pangido ma sian ahu manang aha lomo ni roham bahenonku tu ho, tagan so ro dope na mangalap ahu sian lambungmu”.  Alus ni si Elisa di pangidoanna na parpudi tu si Elia: “Ingkon silompit dua nian sian tondim songgop tu ahu!”. Lapatan ni; ingkon dilompit dua sian tondi ni si Elia, martudutudu do on sian 5 Musa 21: 17 tanda ni anak sihahaan ingkon mandapot dua bagian sian saluhut ugasan napineop ni natorasna. Jala si Elisa merasa dirina siahaan sian angka anak didik ni si Elia ima sisean ni panurirang na di Betel i. Elisa meminta semangat yang ada dalam diri Elia, yang membuatnya menjadi nabi terbaik dalam sejarah Yahudi, yaitu semangat yang berasal dari Allah. Kuasa dari Allah yang memberinya kemampuan untuk melakukan mukjizat. Kuasa dari Allah yang memberinya suara untuk berbicara tentang kebenaran kepada penguasa dunia. Kuasa dari Allah yang memberi Elia kebijaksanaan untuk mengetahui apa yang dibutuhkan. Kuasa dari Allahlah yang bekerja melalui Elia, yang membawa gairah dan kasih sayang yang melimpah dalam pelayanannya. Ndang dipangido si Elisa asa dohot manang manompang ibana tu si Elisa, unang pola rundut be pingkiranna paidaida bangso on. “Pinasonang ma diri”, ninna rupani.  Ndang dipastihon si Elia na jaloon ni si Elisa hombar tu pinangidona i, ala diboto ibana tangkas ndada guru di ibana i, tung guru di Debata nampuna hagogoon i do. Asa penyerahan diri do i tu haputusan ni Debata. Ia molo denggan i di roha ni Debata, sai lehononNa do i. Di dok si Elia, “Alai molo diida ho ahu tarboan sian lambungmu, sai na songgop do i tu ho” (Ay.10). Na nidokna disi ima na antusan ni si Elisa do na masa i, ndang adong na mamboto andigan jouon ni Debat si Elia, ndang adong na umbotosa holan saguru di Ama i do. Saut do diida si Elisa tarhinsat si Elia, jala saut do ibana partohap di hagogoon sian Debata. Di udut ni turpuk on (ay.15), dipabotohon na songgop tondi ni si Elia tu si Elisa. Lapatanna, songgop do songon hagogoona di si Elia tu si Elisa, i ma hagogoon na sian Debata. Ai tung taparhatopot na singkop do dilehon Debata “perlengkapan” laho mangulahon pinangidoNa. I do dipatupa Debata najolo, laos tahaposi dipatupa do i nang nuaeng.     

       d.  Diujungna, dung na masa i, didok si Elisa, “O damang, damang.....” (ay.12). Ihut ma tusi dina diribak paheanna, songon hataridaan ni haserepon na so tau ibana nian jongjong di adopan ni Debata. Alai ala ni gogo na sian Debata boi jaloonna sada tugas na imbaru. Masa do nang halongangan di parmulak ni si Elisa. Dibuat ibana sampesampe ni si Elia jala gabe tolak aek i gabe boi ibana muse taripar. Ndang di sampesampe i hagogoon i. Ai na boi do dipapatar Debata huasoNa marhite abit manang tungkot pe (songon na pinatupaNa di haruruar ni halak Israel sian Misir). Dipungka marhite halongangan laho paradehon dirina manjalo hagogoon sian Debata, jala ditogihon Debata ibana mulak marhite halongangan laho manopot bangso ni Debata. 

    e. Dibagasan parsaoran  sai adong do tingki namarsirang (ptds.BE.No.805 “Molo adong tingki pajumpang, adong tingki marsirang”). Sirang si Elia sian angka siihuthon ibana. Tutu tarbatas do parsaoran ni hita jolma tu dongan jolma, alai ndang tarsirang manang aha hita sian Debata. Tudos songon na tarsurat di Rom 8:38 “Ai gomos do ditiop rohangku: Ndang tarbahen sirang hita sian holong ni roha ni Debata......” . Di hananaek ni si Elia, hira tardok na manguduti ulaonna do si Elisa, hombar tu pangalehon ni Debata. Ndang rap be si Elia dohot si Elisa, jala ndada sipaimaon be hamumulak ni si Elia. Alai raphon Debata do si Elisa patulushon ulaonna. Di na manaek si Elia, tamba do tanggung jawab ni si Elisa. Mulak si Elisa sian inganan i, ndang magira so tudia. Sidua sada ihot so tarsirang do panandaion di silehonlehon ni Debata tu parsitutuon patulushon parsuruNa. Ndang apala godang ditaringoti taringot tu “hureta api dohot angka hoda api” na manirang nasida. Songon dia “prosesna” boha rumangna dohot na asing. Ndang apala i “pusat perhatian”, alai Debata sandiri do dohot ulaon sihobasan naung rade paimahon haroro ni si Elisa. Laos i do nang ondolan di hita, asa ndada tu hureta i laho gumodang rohanta, tu Debata ma dohot tu ulaon na pinasahatNa (ptds. Ul.Ap.1:9-11). 

      f. Dia ma partalianna tu topik ni minggunta na mandok : “Pabinsar Parbinotoan Disangap ni Debata”?    Dipatuduhon si Elia do parsaoran na hot dohot Debata tu si Elisa;

Ø  Asa dipabinsar si Elia do parbinotoan di sangap ni Debata tu si Elisa, taringot tu pangidoan ni si Elisa i saguru di Debata do i saluhutna. Jala diudutna tarida ma na pinargogoan ni Tondi ni Debata si Elisa patupa halongangan. Sai adong do halak na mandok, na so adong be halongangan di partingkianta. Hape, ia halongangan sai tongtong do i masa. Sasintongna, naung jotjot do ndang longang rohanta mamereng angka halongangan. Ai halongangan do saluhut ngolunta on. Tutu ndang sai sarupa rumang ni halongangan na taalami songon angka halongangan na parjolo i.

Ø  Ringkot do jumolo tapadimpos pangokuonta, paboa mardalan do huaso dohot hagogoon ni Debata sian na robi sahat ro diombas on. Ai boi do sai solot tu roha ni torop halak sungkunsungkun on: “ai tutu do manaek si Elia?”, jala molo tutu: “Didia ma ibana nuaeng?”, dohot lan sungkunsungkun na asing. Ndada pola sala sungkunhononhon angka i, alai unang ma nian siala gangggu ni rohanta di ulaon ni Debata. Ai tahaporseai do “ndang adong na so tarpatupa Debata”. 

Ø  Molo porsea do hita ndang adong na so tarpatupa Debata; diigil si Elia naeng do porsea si Elisa dohot angka sisean na lima pulu halak nari ia jambar ni angka na satia mangihuthon Debata ima surgo hasonangan i. Ndang taboto andigan dijou Debata hita tu lambungNa, saguru di Ibana do, alai angka na marhaposan tu Ibana sai dapotonna do jambar hasonangan nasalelleng ni lelengna i.

Ø  Dipatuduhon do dibagasan turpuk on tiruan sian dua tokoh si Elia songon Senior panurirang dohot sian si Elisa junior panurirang. Molo sian sudut kesenioran songon si Elia, patut do tiruonta na mampu ibana mewariskan angka na uli na denggan sian Debata. Nang songoon i ma  angka ruas na tumua, na patut do mewariskan nilai-nilai kekristenan tu sundut na umposo, na boi pangoluhon haporseaon ditonga ni keluarga, huria nang di masyarakat pe.  Naeng ma tatadingkon portibi on marhite angka warisan bohal na boi margogoihon generasi penerus ni keluarga, huria, nang masyarakat, bangso dohot negaranta. Tabereng di na parpudi on, godang do angka keluarga, nang sundut na senior na so mewariskan nilai-nilai yang membangun; na deba guru mangulahon na so denggan tu muridna, na targoar tokoh agama pe melecehkan dakdanak siajaranna, angka pejabat na deba korupsi, na asing marganja manang mampargunahon narkoba, na manangko, dna. Sai unang ma tawarishon nahinalomohon ni sibolis, alai aha ma nahinaolomohon ni Debata songon napinatuduhon ni si Elia tu si Elisa, upa ni na satia ima surgo hasonangan i, tudos songon na tarsurat di Pangungkapon 2: 10c “Sai burju ma ho rasirasa mate; dung i lehononku ma tu ho tumpal hangoluan i.” Tumpal hangoluanta ima hangoluan na manongtong i na di Paradeiso i. Napaduahon sian sudut ke-Junioran songon si Elisa; Na olo ibana marsitutu mangihuthon si Elia, ndang manjua ibana, ndang marungutungut ibana, jala ndang holsoan ibana laho mangihuthon si Elia, jala na parpudi di hananaek si Elia tu banuaginjang i diida ibana do na masa i asa dapot ibana alus napinangidona i. Marsiajar hita songon sundut naumposo laho marsitutu marsiajar satia laho mangihuthon poda ni na tumua. Poda na marbona sian Hata ni Debata. Jala marsiajar na junior laho manghaporseai Debata dibagasan Jesus Kristus i marhite na mangihuthon bogas ni Jesus i. Unang ma diihuthon angka pengaruh-pengaruh na manegai angka naposo nuaeng on: narkoba, tawuran, sex bebas, pornografi, pelecehan, begal motor, korupsi, manangko, margabus, dna. Naeng ma tarida sian sikap hidup na gabe teladan, na patut siihuthonon songon pangihuthonon ni si Elisa tu si Elia. Nang hita angka na targoar siihuthon Kristus, taihuthon ma bogasNa i asa gabe tiruan na denggan hita ditonga ni keluarga baik sebagai ruas ni huria nang ditonga ni keluarga mangarahon angka anggota keluarga marsitutu mangihuthon Tuhan Jesus. Nang panindangionta tu angka halak sileban. Amen.

Bahan Jamita Evangelium Minggu Sexagesima, 8 Februari 2015

Jahowa Mangalehon Gogo Tu Na Loja

Jesaya 40 : 21 – 31

     a.       Targoar do bagian paduahon manang Deutro Yesaya buku panurirang Jesaya on ima sian Bindu 40 – 55. Songon evangelium ni Padan na Robi. Ala disoarahon disi Barita na uli taringot tu haluaon ni bangso pardosa, ala nunga disalosehon Debata angka pangalaosion ni bangsoNa marhitehite asi ni rohaNa. Haluaon ni angka pardosa i dibagabagahon naeng jumpang di haroro ni Sipalua i, na ingkon tangkas jangkonon ni saluhut natorop. Boi do goaron bindu 40 – 50 tarmasuk turpuk on laho mangapuli bangso Israel jala dimasa partingkian na dihabuangan Babel 586 sM na gok haholomon di ngolu ni bangso i. Diapuli Debata do bangsona marhite na manongos naposoNa sahalak panurirang ima si Jesaya didok do di Jesaya 40 : 9 “.....Pangiar ma soaram ale Jerusalem parbarita nauli i, sai pangiar ma, unang ho mabiar! Dok ma tu angka huta ni Juda: Ida ma, disi do Debatamuna i.”Jesaya 41: 10, 13, 14 Unang ho mabiar, Jesaya 40: 26 Manaili ma matamuna dompak ginjang, jala ida hamu, tung ise ma na manompa angka i. Jesaya 40: 29,30 Ibana mangalehon gogo tu na loja”. Dibagasan situasi na holom i, dipatuduhon panurirang i do sada dalan na dumenggan tu bangso Israel laho mamparohahon saluhutna i marhite na mulak tu Debata, Debata parasi roha jala pardengganbasa, lambat tarrimas, jala parasi roha dohot parhasintongan godang Pslm.86:15).

      b.      Molo taparrohahon jamot manjaha turpuk on, sai hira na marbadai bangso i dohot Debata, jala boi dapot hita di turpuk on panorangion na tangkas sin Debata Jahowa tu BangsoNa asa mamoto di huaso dohot denggan basaNa. Boi dohonon na lupa do Bangso Israel di denggan basa ni Debata. Tarlumobi disi masa habuangan na tarbuang bangso i tu Babel. Panghilalaan nasida doshon panghilaan ni bangso sileban; molo talu sada bangso di parporangan bangso na asing, na talu ma dohot Debatana, molo tarbuang sada bangso naung tarbuang manang talu ma debatana i. Hape ia Debata Jahowa ndang adong tudosna dohot debata ni bangso sileban, ndada debata na martabuni, na so mamparohahon bangsona, ndada debata na so margogo, ndang. Baliksa Debata Jahowa parasiroha boloon do, molo tung pe tarbuang bangso Israel, i saluhut ala ni dosa nasida do i. Di naung bingkas sian Misir jala maringan dohot marpinompari bangso Israel di tano Kanaan, tarela do roha nasida kompromis laho manomba jala manghaporseai debata bangso sileban na dihumaliangna. Jala naung dipasingot Debata hian do alai, dihuphupi nasida do sipareonna. Ido umbahen ingkon uhumon ni Debata bangsoNa i di habuangan Babel.

    c.       Ido umbahen disungkun Debata ma nasida marhite ayat 21 “Tung so mamoto hamu? Tung so dibege hamu ma i? Tung so pinaboaan tu hamu sian mulamula? Tung so ditimbangi hamu ma angka ojahan ni tano on?”. Naung hasomalan do di bangso Israel, manaringot denggan basa ni Debata mangaramoti ompunasida najolo bungkas sian Misir sahat tu tano Kanaan, marhite Perayaan roti Tidak beragi nang perayaan paskah. Jala ingkon sai dibaritahon sundut natoras do i tu inangkonna pengalaman ompunasida najolo i asa diingot. Ia Debata do na mandongani ompunasida haruar sian Misir so adong bohal parsinjataan nang sipanganon dohot perlengkapan na asing pe, hape lelean ni Raja Parao dohot paranganna do nasida na lengkap dohot parsinjataanna, alai boi nasida malua sian pangaleleon i, saluhutna i holan ala ni gogo ni Debata do i. Dung i di tingki di halongonan dilehon Debata do tiang ombun laho manisoi nasida di arian, dohot tiang api laho manondangi nasida di tingki botarina. Jala ditingki soada sipanganon, di pa ro Debata do sagusagu (manhhu\Manna) dohot angka lote manogotna. Dungi boi taluhonon nasida Huta Jerikho, so pola marporang marhite hagogoon ni podang manang sinjata, alai holan na mangaliati huhut na marsurak do nasida 7 hali boi nasida manghamonanghon i, nang di na sahat nasida tu Kanaan pe, boi nasida mangingani huta ni halak sileban. Sude na i ala ni pangaramotion ni Debata sambing do di bangso i, alai bangso i do na lupa. Songon istilah nuaeng: “Lupa kacang akan kulitnya”.

    d.      Dipatorang Debata do hajongjonganNa, hagogoonNa mangatasi nasa na adong di portibi on. Ndang adong na boi mangambati hagogoonNa, ala ni i tung debata dia ma na boi dipatudos tu Debata Jahowa. Molo sai dipangasahon bangso Israel do gogo ni bangso na leban dohot debata sileban, tung so margogo do i paluahon nasida. Ala ni i unang gabe marbalik disalahon bangso Israel Debata Jahowa i. Di ngolunta pe songon jolma hita nang halak na porsea pe, sai jotjot do hita madabu tu sikap na sala maradophon Debata. Disi ro hamolon, hasusaan, dokdok ni pingkiran; olo do pintor talului ise na sala jala boi do sahat namanalahon Debata, dungi ro ma sungkunsungkun di roha; boasa dibahen songon i tu ahu? Jala didia do Debata ? olo do gabe mandele songon ungutungut pandelean ni bangso i uju di habuangan nasida di ayat 27b : “Buni do dalanku maradophon Jahowa, jala ndang maruli uhum ahu sian Debatangku.” Molo masa hamolon parungkilon dibagasan ngolunta jotjot do hita madabu tu sikap na marungutungut, gabe holan tu parunhkilonta i do terfokus rohanta. Ido umbahen sipata gabe tariluilu ma hita, mandele, marunggutungut, jala na unjorbut gabe mangaleai Debata, marbalik rohana laho manghaporsai utiutian ni sibolis dohot portibi on. Adong ma na manundalhon haporseaonna, adong ma na laho mardatu, adong ma na laho tu hagogoon ni sibolis i. Sasintongna ndang buni dalanta di adopan ni Jahowa, patar do nasida na hona buang di Babel i gabe sada dalan ni Debata laho “mangajari” nasida.

   e.      Ala ni i disungguli Debata sejarah ni ngoluni bangso i marhitena mandok : ay 27a: “Ale Jakkob,....ale Israel...” asa boto nasida disejarah ni ngoluna ndang dao sian pandonganion ni Debata sian pomparan ni si Jakkob do nasida gabe 12 marga jala gabe sada bangso na balga. Debata ni si Jakkob jala hot do Debata ni bangso Israel, holongNa nang asi ni rohaNa tu bangsoNa i. Ndang na gabe muba holong dohot asi ni roha ni Debata, jala marpangulahi do rohana mida bangsoNa i. Kuncina ima di ayat 31 “Alai angka na marhaposan tu Jahowa maruli hagogoon mardapotdapot, gabe marhabong ni  lali laho manaek. Marlojongi nasida ndang olo loja, mardalani nasida ndang olo mandate”. Molo ro na bernit nang hamaolon na taadopi, pintor tudia do hita mangalualu ? nda ingkon marhaposan hita tu Jahowa, nda ingkon na marlojong do hita tu Debata ? Na jotjot do nuaeng godang jolma ndang manahan di sitaonon i, jala naeng didok rohana sigop sae angka hasusaan nang hagogotan i. Ala ni i adong ma na mangasahon pingkiranna, jala jempek pingkiranna laho mamingkiri pardangolanna, ido na deba gabe laho ma marganja manang lari tu narkoba, laho ma rohana na mabuk mabukan, marisap, dohot mangulahon na so hasea, na deba laho mardatu, laho mangido petunjuk tu napistar, laho ma tu utiutian ni portibi on. Alai hita na porsea dibagasan Jesus Kristus dipaingot do hita songon na nidok Poda Raja Salomo 3 : 5 “Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri.” Dilehon Debata do tu hita dalan di ngolunta asa unang tu pandelean nang tu haporsuhon ngolunta alai tu hasonangan na saleleng ni lelengna. Ido umbahen dipasahat Debata AnakNa na sasada i, ima Jesus Kristus laho manobus jala manesa angka dosanta nang dosa ni portibi on asa dapotan haluaon hita sian hamatean na saleleng ni lelengna i tu hangoluan na saleleng ni lelengna. Jala naung didok Jesus do tu hita di Mateus 11: 28-30 “Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon.” Molo songon i ndang adong be kamus di hita na porsea sai mandele, alai naeng do diparar Debata hita gabe ulaulana laho manogunogu halak na loja jala na gale. Amen.