Malua Do Na Marhaposan Tu Jahowa
Sepania 3 : 9 – 13
I. Patujolo
Namangula do panurirang Sepanya di tingki ni Raja Josia (639-609 SM) sahalak raja na daulat na patupahon pembaharuan/reformasi di ngolu parugamoon bangso Jehuda naung sega ala ni dosa ni bangso i na marbalik sian Debata marhite mamele debata sileban (Milkom). Di jolo ni turpuk on, dipaandar panurirang i do angka dosa na jorbut na niulahon ni bangso Juda dohot pangisi ni Jerusalem i ma pemeleon tu Baal, pangarundingon, marsomba tu angka parangan ni langit, halak na marmangmang tu Jahowa alai laos huhut marmangmang nang tu Milkom (sinkritisme; Milkom adalah nama dewa utama sembahan bangsa Amon, artinya: "Raja". 1 Raja-raja 11:5, 1 Raja-raja 11:33, 2 Raja-raja 23:13), halak naung marbalik sian Jahowa, na so mangalului Debata Jahowa na so marpanungkun be tu Jahowa. Angka dosa on ma na mansai dihasogirhon roha ni Debata Jahowa niulahon ni bangso i na manghorhon uhumon ni Debata ma nasida. Luluhon ni Debata ma nasida jala paiasonNa bangso i asa gabe marhabadiaon di adopanNa. Dipaingot jala dilumbahon Debata do tu bangso i marhite panurirang Sepanya asa mulak bangso i manadingkon angka dosa hajahatonnasida i alai ndang ditangihon nasida, ndang ditangihon bangso i soara dipaingot, pangajaran ni Jahowa jala ndang marhaposan jala ndang jumonok be nasida tu Debata (ida 1 : 4-13; 3 :1-7). Uhumon ni Debata do bangsoNa i na digombarhon dibagasan pandohan “Ari Ni Tuhan” manang “Ari nasasadai” ima tingki panguhumon ni Debata di dosa ni bangso i alai angka na satia jala tongtong marhaporseaon tu Jahowa i ma angka pasipasi angka na serep marroha (3 : 9-13); ima ebaeba manang pasipasi ni Israel angka halak na so mangulahon hageduhon, na so manghatahon gabus, na so jumpang sipaotooto di pangannasida.
II. Hatorangan
Bagabaga taringot tu hamubaon na sian Jahowa. Sian turpuk on tangkas dipatuduhon masa eskatologis; haradeonni bangso na naeng manjalo bagabaga ni Debata marhite hamubaon nanaeng patuduhonon ni bangso i dibagasan parngoluonna, i ma :
a. Dila na pita (ay.9); sada tanda na parjolo dipatuduhon angka jolma na rade manjalo bagabaga ni Debata i ma parhataan na polin jala sintong diadopan ni Debata. Didok di Yesaya 6:5 “Dung i hudok ma: Marjea ma ahu! Nunga mago ahu, ai jolma parbibir na ramun do ahu, jala di tongatonga ni bangso parbibir na ramun ahu maringan, ai nunga diida angka matangku Raja Jahowa Zebaot” (Poda 18 : 21). Jolma na manjou Goar ni Jahowa dijaga do dilana asa unang ramun. Marjea ma jolma na so mangorom bibirna dohot dilana laho manghatai; hape ndang marimpola jala holan laho pasombu tagasna do. Halak Batak mandok: Jumolo nidilat bibir asa manghatai. Na marlapatan unang ma asal manghatai hita, apalagi manghatai na so binoto tangkas hasintongan nang hasalaanna. Asa unang madabu hita songon pangalaho ni bangso Israel, ingkon jumolo piningkiran aha nanaeng sidohonon dohot sihatahon asa unang asal manghatai. Di dok do di Matius 15:18-20 "Alai angka na ruar sian pamangan, sian roha do i hehe, laos i do mangaramuni jolma i. Ai sian roha do hehe angka pingkiran na jahat, pamunuon, pangalangkupon, harorangon, panangkoon, hata gapgap dohot panginsahion. Angka i do na mangaramuni jolma; alai ndada ramun jolma, anggo mangan so marburi.” Ditompa Debata pamatangta on pasidohot dila nang bibirta laho pangkeon pasangaphon Debata do, i ma marhitehite na mamuji Debata na marboni sian roha na ias. Mat. 12: 36-37 “Alai hudok ma tu hamuna: Ingkon maralus do jolma sogot di ari uhum i taringot tu nasa hata na so gabeak na hinatahonna i. Ai marguru tu angka hatami do ho pintoranna manang uhumonna sogot.”
b. Marpungu pasadahon roha mamuji Debata (ay.10). Sian ayat 10 on tangkas do panghorhon hasangapon nang habadiaon ni Debata tu Bangsona na marserak i. Ndada holan na marharoroan sian habuangan alai pola do ro sian bariba ni angka batang aek Kus (bhs. Indonesia: Etiopia). Dipaima Debata do hamumulak ni angka parjahat (pardosa) i asa tumadingkon dalanna, mulak tu dalan hatigoran dohot hasintongan ni Debata. Ingkon sude do tumangihon HataNa nang baritaNa asa porsea saluhut nasida jala mardame dibagasan hasadaon na rap marsomba tu adopan ni Debata (Plippi 2:10 asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano)
c. Marserep ni roha (ay.11-12).Godang do angka na tarbuang i gabe madabu tu hapogoson, alai angka na mora i sai mian dope di habuangan i. Jadi angka na pogos i mangalualu ma tu Debata jala porsea asa Ibana na manogunogu nasida tu haluaon. (Mat.11:28). Jolma na marserep ni roha ido na gabe inganan parmianan ni Debata na patauhon hamuliaonNa. Jala Debata namangusehon pasupasuNa tu nasida. Angka na marserep ni roha; dihangoluhon do dibagasan dirina ulaon asi ni roha jala gabe ulaula ni Debata; haunduhon na martoruk ni roha. Patuduhonon na porsea i do haunduhonna tu Debata marhite pangalahona na tama; ndang adong ginjang ni roha manang patimbo diri didolok habadiaon ni Debata. Di partingkian nuaeng; bagas joro ni Debata (gareja) do inganan habadiaon ni Debata asing ni pamatang ni jolma i ( 1 Korint 6:19 “Ndang diboto hamu: Dagingmuna do joro ni Tondi Parbadia, na di bagasan hamu, naung jinalomuna sian Debata; ndada hamu nampuna dirimuna”). Ai ndang marlapatan ginjang ni roha i dohot na patimbohon diri ditonga huria ni Debata, ai na mangaleai Debata do ibana disi. Holan Debata do sipatimboonta ndada dirinta.(Mat. 23: 12; Luk. 14 : 11; 2 Kor. 12: 7)
d. Diparmahani Debata. Ebaeba ni Israel dungkon habuangan i, di parbadiai do muse. Ndang be marsomba nasida tu angka debata sileban (ptds. Mi. 4 : 7; Jes. 48: 17; Pslm. 81: 14-15). Heber 13 : 5b "Sandok na so tadingkononku do ho; sandok na so pasombuonku do ho!". Marhasonangan do angka jolma na marhaposan tu Jahowa; dipatuduhon angka na marhaposan tu Jahowa do pangalaho na magigi mida dosa. Diparmahani Debata do nasida asa marhasonangan jala marpangulonan dang adong ganggu jala biar ni roha. Dalan ni Debata ima dalan hangoluan dohot dalan hasonangan asal ma pos rohanta. II Timotius 1:7 Ai dilehon Debata do tu hita tondi hagogoon, tondi haholongon, tondi pangarajaion diri, ndada tondi hatahuton.
III. Sipahusorhusoron
1. Sian turpuk diigil do sian hita hamubaon ni roha. Ai nunga tarbuang hita binahen ni dosa dohot pangalaosionta, gabe dao do tahilalhon Debata sian tongatonga ni ngolunta. Hape molo tarimangrimangi dibagasan pos ni roha jala marhaporseaon tu Debata, ndada dao Ibana alai jonok do. Ala ni i rohanta i do na ingkon muba sian na robi tu haimbaruon ni roha, asa timbul ma pangalaho na tangkas maringan dibagasan Kristus Jesus Tuhanta Sipalua i. Unang ma tapajogal rohanta molo nunga ro Hasintongan i dibagasan ngolunta marhite Barita nauli i.
2. Pambahenan na sintong. Dungkon marhusori haporseaon na tutu jala polin di adopan ni Debata, dihirim do angka pambahenan na tama. Ndang sae holan na manghaporseai alai huhut do diulahon asa tangkas panindangion haporseaon di Debata ditongatonga ni parngoluon siganup ari. Marhite i ma marbungaran angka na denggan di parngoluanta dipartingkian nuaeng na lam mansai jorbut pangalaho ni jolma i.
3. Topik di Minggu Advent IV; Malua do na marhaposan tu Jahowa. Asa dipanagamanta di Minggu Advent na parpudi on laho paposhon rohanta di gogo dohot basabasa ni Debata. Palua ma dirim sian roha na jungkat, roha na ganggu, sian hageduhon, asa tau hamu manjalo tumpal hangoluan i sian Debata marhite hamonangan dibagasan Jesus Kristus. Angka na tarjou do hita asa marhamongan laos mangihut ma hasonangan na manontong. Ala nii malua do angka jolma na marhaposan tu Debata Jahowa sian gomgoman ni sibolis tu gomgoman huaso ni Debata. Amen.
