Debata do Lombulombungku Psalm 28: 6-9
I. PatujoloIa turpuk jamita on, ima sada tangiang par-pesalm na margoar si Daud na mangido pangurupion tu Debata. Sian bindu 28 on di sagi ma gabe tolu bagian: a) Ayat 1-2 Joujou mangido pangurupion b) Ayat 3-5 Pangidoan asa unang lohaonna dohot angka parjahat c) Ayat 6-9 Pujipujian, panghatindanghonon na porsea dohot tangiang pangondianon Dipangke do bindu on gabe sada tangiang dibagas joro (ay.2) i ma sahalak na dibagasan parmaraan, dohot na dibagasan hasusaan, boi do ala ni sahit, parungkilon di na mangadopi musu dohot lan na asing. Diboto parpsalm on do angka pangalaho na maralo dohot na so dihalomohon ni Debata, angka jolma na mangulahon sisongon i ingkon gabe tarbuang dao sian adopan ni Debata. Jala pangidoan ni parpsalm ima alus sian Debata marhite hata ni angka malim dohot panurirang manang marhite angka tanda na asing. Molo nunga maralus angka tangiang pangidoan i, lam tamba ma pamujion nasida gabe hamauliateon dohot pasahat tangiang pangondianon di siala sahalak na miniahan (Mesiasna i). Hape na niadopan ni parpsalm ima Debata na sai sip (ay.1 “unang sai sip Ho....”/ Do not turn a deaf ear to me”). Dibagasan hasusaanna i ma parpsalm mangarop alus sian Debata, sai joujou do ibana tu Debata na di rohana Debata na sai sip (The Silence of God). Ndang na mandok na so mangantusi parpsalm di hagogoon ni Debata, alai sabalikna do, i ma siala diboto parpsalm on do huaso ni Debata na tuk paluahon ibana sian parmaraan i. Laos gabe maralus do tangiang dohot pangidoanna tu Debata, i ma na ingkon na niuhal sian turpuk jamita minggu on. II. Hatorangan 1) Ayat 6-7, Tangkas do taida parpsalm on mamujimuji Debata siala ditangihon Debata do pangidoanna, jala mangalehon pasupasu na godang tu ibana. Marhite pasupasu najinalona i, diparhatopot parpsalm on do asa sude angka jolma ingkon pasahat ngoluna tu Debata Jahowa asa malua sian parmaraan jala pasahat ngoluna hibul tu adopan ni Jahowa. Debata do na mangalehon hagogoon tu angka na pos rohana di Ibana, jala lombulombu na mangondingi bangsona. ( 5 Musa 33: 39; ptds. Pslm.115:9-11). Boi do taida na masa tu si Abraham, tu angka raja dung i angka jolma na porsea jala na marhaposan tu Ibana. (Psalm 3-4; 7:11; 28:7; 84:12; 119:114, Poda 2:4; 30:5). Marhite pangurupion ni Debata, marlas ni roha parpsalm jala marhamonangan ( 2 Sam.1:20) manang songon las ni roha di pesta (Jer.15:17) jala mangihut ma las ni rohana marhite ende-ende las ni roha dohot pujipujian (ptds. Psalm 22: 23). 2) Ayat 8-9 Pangurupion na ni hinilalahon ni parpsalm i ma sada bagian pangurupion na nialaman ni bangsoNa ; sada bangso na pinalua ni Debata Jahowa; parpsalm marsiajar laho martangiang; songon sahalak na malua, jala manghamauliatehon i ditongatonga ni bangso, asa sude angka donganna sabangso pasidohot mangihuthon naniulahonna jala marlas ni roha. Sialani i do panghatindanghonon ni sasahalak gabe sahat ma panghorhonna tu panghatindanghonon ni saluhut jolma: siala Debata do hagogoon ni bangsoNa (ay.7a), partanobatoanna ni angka raja na miniahanNa, (ptds. Psalm 2:3). Di siala tangiangna ditangihon Debata, parpsalm mangidohon asa dipamasa haluaon dohot pasupasu sisongon i tu bangsona, (psalm 16:5). Ibana do parmahan na denggan sahat ro disalelengnilelengna (psalm 23:1). III. Sipahusorhusoron 1. Ngolu na Mamuji Debata. Ngolu ni angka na porsea i ma ngolu na mamangke sude na di ibana laho mamuji Debata. (Psalm.63:4-5). Jotjot do masa angka na maol dohot songgop angka parmaraan dibagasan parngoluon ni manisia. Na deba dilului do inganan pangalualuanna tu angka pangalaho na marlaok dosa dohot pangalaosion. Gabe di dok rohana : “Aha salanghu...” dungi gabe diparsala ma Debata siala ndang dapotna alus. Dungi gabe ditundalhon ma Debata. Alai di hita na porsea laos di bagasan parmaraan i do ingkon sai joujou hita tu Ibana jala mamuji goarNa. Gumodangan do angka jolma mamuji Debata holan di tingki las rohana. Alai di tingki ro ma arsak ni roha i, gabe bangkol rohana mamuji Debata, sundat ma tu gareja, sundat ma laho partangiangan, jala ndang olo be marsaor dohot dongan sahaporseaon. 2. Ngolu na marpangkirimon. Ala ni i na gabe sungkunsungkun tu hita; Bosa ingkon mamuji Debata hita ? alusna siala nunga dilehon Debata tu hita haluaon sian dosa dohot hamatean marhite panghophopon ni mudar ni AnakNa Jesus Kristus.(ptds. Joh.3:16; 14: 6; 16: 33; Pil.4:4). Ala ni i di tingki susa manang sonang pe rohanta sai pujionta do goarNa. Disi ma angka na porsea i sai manghirim di pambahenan ni Debata di ngoluna. Haporseaon na tutu, molo sai mangkirim hita di pangaramotion ni Debata laos huhut mula ulaonta (1 Tim. 1: 1; 4:10; Heb.6: 19; 1 Ptr.1:21). 3. Ngolu na martangiang. Dijou parpsalm on do Debata dibagasan tangiangna, laos ido na ingkon dihangoluhon angka na porsea. Ndang tarpasupasu ulaon nang pambahenanta molo so Debata na manumpahi. Marisuang do nglunta dohot pambahenanta molo so Debata na mamasumasu. Ala ni ngolu ni angka na porsea i ma ngolu na sai marpangusandean tu Debata, i ma marhite tangiangna i do pasahathonna parsorionna. Asa ngolu na martangiang do ngolu ni na porsea. Johanes 15:5b “ ....AI ndang tarula hamu agia aha, anggo so mardongan Ahu”. Ai jolma na gale do hita, jala na sai marhahurangan molo so Debata na mandongani hita. Tapangido ma pandonganion ni Debata dibagasan tangiangta asa diurupi hita laho mangula ulaonta. 4. Ngolu na marpangurupi. Molo nunga diurupi Debata hita asa malua sian parmaraan, laos songon i ma hita maniru pambahenan ni Debata laho mangurupi angka dongan jolma na di hasiangan on, tung mansai godang dope dongan jolma na madabu tu bagasan parmaraan dohot hamaolon. Ala ni i lehon ma ngolum di pangke Debata laho: mampangkulingi, mandongani, manangiangkon, manarihon, jala mangurupi dongan jolma asa taruli pasupasu na sian Debata nasida marhite holongNa. (Rom 11: 36; 12:1). 5. Ngolu Na marpanindangion. Ngolunta ndang boi manghatindanghon habalgaon ni Debata molo ia so jumolo hita manghilalahon pambahenan ni Debata songon parpsalm on. Alani i sai jumolo ma denggan parsaoran dohot panghilalaanta dohot Debata asa tung boi hita manghatindanghon habalgaonNa dohot pangurupionNa. Ngolu ni na porsea ndang holan na manghatindanghon dibagas joro ni Debata alai laos huhut do tarida ma di hatindahkon dibagasan parngoluonna siganup ari.( 2 Musa 23:1; Jes.43:10; Pangk.1:5; 2:13). 6. Ngolu na mananda Debata. Boi do nunga marpahompu sahalak ruas, jalanunga leleng gabe Kristen alai ndang mananda Debata. Boi do nunga mansai leleng gabe pangula ni huria alai ndang mananda Debata. Boasa ? siala ndang ditanda Debata dibagasan ngoluna, ai holan na mamboto Debata do na sai laon. Sahalak Teolog mandok: Lebih baik mengenal daripada mengetahui Allah. Boi do godang parbinotoanna tu Bibel alai gabe lilu jala ndang diboto be hasintongan, siala ndang denggan parsaoranna dohot Debata. Ala ni di domu tu Parningotan hatutubu ni HKBP di tgl. 7 Oktober sian taon 1861 di Rapot opat pandita di Sipirok marsagi ulaon di Tapanuli, i ma Pdt. Heine, Pdt. Klammer, Pdt.Betz, dohot Pdt. Van Asselt. Nunga 148 taon disarihon Debata HKBP, tontu nunga lam matoras ma di panandaon di habalgaon ni Debata. Tapamanat ma angka sipaotooto, dohot angka panurirang pargapgap na laho manegai hurianta HKBP dohot laho paliluhon haporseaon ni angka na porsea. Tingkos ma hita mananda Debata dibagasan ngolunta marhite parsaoran na denggan dohot Debata jala mangulahon hataNa na badia i. Asa gabe huria na balga rohana marpanarihon tu angka na di humaliangna. Amen (EM)
Tidak ada komentar:
Posting Komentar