Tahatindanghon Ma Kristus i
By. Pdt.Eben Ezer Munthe,S.Th
Ev. : Ulaon Apostel 18: 1-5 Ep. : 1 Timoteus 6 : 2b – 10
1. Patujolo
Sada pangalaho na somal na niula ni apostel Paulus i ma mamaritahon barita na uli na sian Tuhan Jesus Kristus, sian huta tu huta, sian luat tu luat. Ndang marnamontok ibana mandalani angka luat asa harusahat nina barita na uli i tu torop halak, jala asa godang halak na porsea na marsaulihon panobusion ni Tuhan Jesus Kristus. Marhite angka pardalanan na pinatupana i ma jumpang angka ragam na masa. Torop do manjanghon ibana jala manjalo barita na uli. Torop do na tamba bilangan ni na porsea sian pamaritahononna i. Alai adong do nang na manjua, na so olo manjangkon barita na uli na sian Tuhan Jesus Kristus marhite sian na pinatubegehon ni apostel Paulus (Ul. 17: 1-9).
Tontu godang do na marsitutu jala barani mangihuthon Jesus Kristus. Godang do na marungkil jala marsitaonon ala ni panghaporseaionna tu Kristus i. Nang pe masa insakinsak, reherehe dohot ragam ni parungkilon ala ni Kristus, alai hot do nasida manghaporseai tu tuhan i, alai diboto nasida martua do angka na manaon haporsuhon ala ni haporseaonna tu Tuhan Jesus Kristus (1 Ptr.4:12-19).
2. Hatorangan
a) Pasahatma Barita Nauli i. Korintus i ma sada inganan na mansai ribur: ribur di perdagangan, na mansai mangerbang, khususna industri keramik (tembikar). Diuju i nunga leleng masa hasomalan na manomba debata baal (dewi Afrodite). Siala haporseaon na lilu mampanghorhon pangalaho na so maradat. Nunga mansai leleng masa di Korintus na so manghalomohon hapantunon dohot parulaon na denggan. Di deba luat tung hira dihasiholi nasida do haroro ni Apostel Paulus laho mamboan Barita na uli i. Dung dipillit, dipabangkit ibana gabe naposona sai torus do ibana manontong mian jala manghangoluhon hata ni Debata. Hirim do roha ni si Paulus marnida huta Korintus, ala di bege ibana nasailaon barita ni huta Korintus mian jala mangolu dibagasan hata ni Tuhan i. Didok ibana mauliate tu Tuhan i ala panjanghonon nasida di hata ni Debata. Alai di pudian ni ari di bege si Paulus ma barita ni halak Korintus naung mian dibagasan halumlamon (Bdn. 1 Kor 2:2-3). Hinorhon ni i ma di patuduhon si Paulus holongna tu huria Korintus, naeng nian di parmahan jala di tiroi nasida marhite hata ni Debata. I do ala sai digogohon borhat mangebati huria Korintus. I do umbahen mansai ringkot di roha ni Apostel paulus laho pasahathon barita nauli laho pajongjonghon sada huria laho mandopang pangalaho na so dihalomohon Debata.
b) Sisada Ulaon Ma Hamu. Dung tolhas si Paulus tu luat Korintus so panagamanna jumpang do ibana dohot halak naporsea Tu Jesus Kristus i ma si Akwila dohot si Priskila na sian huta Pontus. Ditinggalhon nasida huta Roma i ma siala parenta Kaesar Kaludius (94 M) na mandok sude halak Jahudi ingkon bungkas sian huta Rom. Parentaon di suarahon Kaisar ala adong gangguan di huta Rom taringot tu halak Kristen. Dibagasan ulaon nasida i tarida do parbuena na, lam tamba angka jolma na porsea siihuthon Kristus( 1 Kor. 1:14). Ndang sai tongtong boi denggan mardalan ulaon marbarita nauli i, alai baliksa sai adong do na mangambati ulaon i sian angka halak Jahudi na so manghalomohon Barita Nauil i sahat. Boi masa do sisongon i nang dipartingkianta di hasiangan on, godang tantangan siadopan di na laho marbarita nauli. Didok halak Jahudi non-Kristen do ibana na mangulahon propaganda di luat i dohot na mambahen hagunturon. Adong ma pihak kelompok Yahudi Kristen dohot na Yahudi non-Kristen na maralo hatiha i. I do sibonsirina umbahen ingkon dibungkas sude halak Jahudi sian huta Rom marhite parenta Raja Klaudius. Ra, boi do dohonon sarupa na masa on songon na masa di bangsonta di taon 1998 uju masa reformasi. Torop halak mandok asa sude bangso na asing bungkas sian Indonesia, isarani halak China asa holan angka penduduk asli mangingani bangso on. Marhitehite parjumpaan ni nasida i, gabe sisada tahi nasida laho pararathon barita na uli i tu halak Jahudi dohot Junani. Molo sisada urdot, sisada ulaon nasida marhite parange nang panghation tontu sahali lam godang ma bilangan ni jolma di na laho tumangihon huhut mangulahon hata ni Debata. Sai di ganup tingki dohot inganan do di baritahon nasida hata ni Debata tu angka na torop i. Tung dihaposi nasida do molo sada nasida laho marbarita na uli lam tu ampitna, murana do hata ni Debata tarjalo ni na torop i. Jala molo nunga adong asa dua halak tontu sahali laho mambahen pabagahon taringot tu barita na uli i nunga ummura. Molo nunga mian dibagasan hasadaon jala tubu roha na marsipaleanan tontu sahali nunga boi be marsagi di angka ulaon, songon na pinatupa ni Si Paulus, si Silas dohot si Timoteus. Ala boi do nasida marsiaturan, marsagi tugas tontu sahali lam godang ma bilangan ni jolma mananda dohot mangihuthon Kristus i. Ulaon na borat situtu do marbarita na uli. Alani didok si Paulus: "Marsiurupan ma hamu mamorsan angka na dokdok i; i ma dalan mangaradoti patik ni Kristus" (Galatia 6:2). Jadi sian on tabereng ingkon marsiraingraingan do angka naposo ni Debata di ulaon pabarita na ulion i. Molo so adong kerja sama ni parhalado di tongatonga ni Huria i gabe maol do berkembang sada Huria. Alani tapadao ma angka roha na marsihosoman, na masiboan leheng na di ngolu ni angka parhalado, alai mian ma hita dibagasan hasadaon huhut masipaleanan roha asa tulus barita na uli i tu liat portibion jala las roha ni Tuhanta mida hita. Antong, marsiurupan ma hamu laho mambaritahon Hata ni Tuhan i
c) Hatindanghon Hata ni Tuhan sian ulaonmu. Ditonga parngoluan ni halak Jahudi sai arga do di nasida mula ulaon. Na so mangajari ianakhonna sada keterampilan na marlapatan do i na mangajarhon inakhonna manangko. Didok nasida do “mamparsiajari patik dohot keterampilan kerja mansai denggan do i, siala duansa padaohon roha sian parulaon na sala. Alai mangantusi angka patik alai ndang mangantusi ulaon tong mangkhorhon sala. Laos godang do angka apostel na mangulahon ulaonna asa ndang na gabe boban di donganna jolma. Apostel Paulus sai diusahahon ibana do laho manopot, patolhas barita na uli i tu ganup jolma. Ai tangkas do di parhatopot ibana utang na do i tu Debata molo ndang dibaritahon barita na uli i. Diparhaseang ibana ganup tingki laho marbarita na uli. Ndada holan marhite hata sambing alai dohot do marhite parulanna ima na martonun ibana dohot keluarga ni si Akuwila. Sian i taida ndada holan marhite hata marbarita na uli parulaon. Parulaon i do sada panindangion paboa na mian do hata ni Debata di bagasan hadirion na. Ai pangalaho i do gabe jamita, jamita i do pangalaho i. Molo didok sisada ulaon ma hamu, namarlapatan do i: ingkon rap marhobas, mangaradoti, marsiurupan manarihon angka na ringkot di hasasaor ni barita na uli i tu liat portibion. Diusahon si Paulus dohot si Akwila do tongtong di tongatonga ni ulaonna songon laho patotahon tu halak Jahudi dohot Junani paboa Jesus i do Kristus.
3. Panimpuli
Di na laho manggulahon na denggan sai mangihut do angka sangkkap na roa, ro hasusaan, hagunturon dohot galumbang di na laho mambaritahon nauli. Pargogoan ni Debata do hita di na laho pararathon barita nauli nang mangula na sa ulaonta. Unang ma hita mabiar ai bohalanna do hita dohot hagogoon ni Tondi Parbadia laho patupahon na denggan jala di dongani laho maralohon na sa na jat (2 Tim.1:7)
Angka na porsea patuduhononna do tiruan na denggan tu humaliangna nang marhite pambahenan nang ulaonna. Ndang na gabe boban manang na mambahen masalah tu donganna jolma. “Na so ra mangula unang ma ibana mangan” , marhite na mangula i do dapot hita godang angka pasupasu sian Debata. (2 Tess. 3:10-13)
Gumodangan do dipartingkian sinuaeng on angka jolma na holan manghatindanghon halobionna nang dirina sandiri, manghatindanghon na so tingkos maradophon dongan jolma nang tu Debata. Alai tu angka na porsea sai hatindanghononna do Jesus Kristus Si Palua i nang sian Barita Nauli nang sian ulaona. Tapasahat ma Barita Nauli i tu sandok portibi on, jamitahon ma hata i, hajongjongkon di tingki une nang so une asa marsangap goar ni Debata dibagasan Jesus Kristus. Tahatindanghon ma haluaon na binoan ni Jesus tu sandok na tinompa (Luk. 24: 46-49; Joh.1: 35-49; Mark.16:15; 2 Tim.4:2)
Tidak ada komentar:
Posting Komentar