Pasangap
Ma Debata
Ulaon
Apostel 11 : 15 – 18
A. Patujolo
Angka halak Jahudi di tingki ngolu ni Jesus adong
do naung mangihuthon jala porsea tu Jesus alai godang do na so apala tangkas
mananda Jesus umbahen adong pigapiga halak sian nasida gabe muba rohana
marbalik mangalo angka siihuthon Jesus, ima ala sai margogo dope dirohana
“Patik ni Si Musa”. Molo dipingkiran nasida ia Patik si Musa i doshon doi dohot
Patik na sian Debata. Dilehon Debata do patikNa asa diulahon jolma i, alai na
so mangulahon patik i, ima na mangalaosi patik ni Debata (ptds, 1 Joh.3:4
“Pangalaosi do ganup na mardosa, ai pangalaosion do dosa i”). Adong patik dohot
uhum, jala uhum nanilehonNa i manghuphupi hita tu ulaon na ingkon sipatupaon.
Na gabe dilegalisasihon do uhum i laho mangukur haholongan dohot hatigoran ni
Debata. Isarana didok uhum i: “Unang ho mamunu”. Nunga 2500 taon umur ni uhum
on digurithon Debata di sada batu lei. Dilehon tu Bangso Israel marhitehite naposoNa si Musa. Alai ingkon
botoonta do, dilehon pe batu lei i ndada gabe sada jaminan tu bangso i asa
malua sian angka pamunu. Alai paradoksal do sifatna; hape godang do angka jolma
sian luar ni bangso Israel na manghasubangkon pamunuon, tung pe ndada hea
nasida umbege taringot patik nasampulu i. Molo sian panghilalaan do sasintongna
nasida do na tangkas boi parbagahon gabe dongan sahundulan asa halak Israel na
umboto patik alai sai neang tanganna laho mamunu. Manang dihata na asing boi ma
nidok : tumagon do iba mardongan dohot na so saugamo dohot iba asa dongan angka
Kristen digoari dirina hape sibolis do.
Nuaeng lam tapabagas ma: tama dope dohonon bangso
ni Debata holan ala namangulahon patik i ? Mangulahon angka uhum dohot patik ni
Debata naeng patuduhon haboion na boi panangkokhon haulion ni pangalaho na boi
boanon sahat tu ari sogot, jala na manghirim di asi ni roha ni Debata asa
partohap di Harajaon-Na. Denggan do nian i, alai umbalga sian i nunga adong
marhite Jesus Kristus na mangalehon ngoluNa tu hita. Ala ni unang ma
tahilalahon parulaonta di patik dohot uhum ni Debata na umbalga alai ala asi ni
roha ni Debata do dibagasan Jesus Kristus na umbalga. Kemampuanta ndang dos
dohot Debata molo sai dihandangi dibagasan uhum ni ugamo.
Dijolo ni turpuk on dibaritahon do paboa; dibege
angka apostel dohot angka dongan sahaporseaon di Judea, ia angka bangso
sipelebegu manjangkhon Barita nauli. Dung sahat ap.Petrus tu Jerusalem, marsual
ma ibana dohot angka na porsea sian Jahudi (na pamanat pasunaton). Didok
rohanasida ia haluaon i holan tu angka na mangulahon parsunaton do. Memang sian
mula ni angka siihuthon Kristus uju i, ima na berlatar belakang angka na
marsunat manang digoari halak Jahudi. Memang dihatiha i nunga lam torop angka
siihuthon Kristus sian 3000 halak sahat tu 5000 halak (ipe holan baoa do i
etongon ni halak Jahudi, molo dipamasuk angka parompuan dohot angka ianakhonna
nunga hirahira 15.000 halak Kristen) di luat Jerusalem nang dihumaliangna. Alai
sahat do haKristenon i tu Sidon, Samaria dohot angka huta diluar Jehuda. Jala
adong do na berlatar belakang Junani. Alai na gabe parsualan ima; ia halak
Jahudi adong do hasomalan manang adat-istiadatna suang songon i do nang halak
Junani (Gorik). Jadi nadua horong on marnampunahon idealismena sandiri. Alai halak Jahudi merasa nasida ma natumimbo
sian bangso naasing, jala adat-istiadat nasida ma na gabe patokan siihuthon
Kristus. Boi ma dohononta mansai sompit do pangantusion haholongon i di roha ni
angka halak Kristen na parjolo uju i.
Alai andorang masa parsalisian i nunga dipabotohon
Tondi ni Debata laho mangalusi parsalisian i, ima marhite: “sada inganan na
maropat suhi tartantan sian ginjang
dijolo ni si Petrus”. Pola nunga tolu hali dipamasa Debata i dijolona asa ingot
si Petrus; ia jolma jotjotan do manguhumuhumi donganna jolma jala manghilala
dirina na tigor. Na marlapatan nunga diungkap Debata taringot tu haluaon i
ndada holan tu sada bangso, alai tu saluhut bangso do di portibi on termasuk tu
halak Junani.
B. Hatorangan
Pandidion dibagasan Tondi saguru di hamubaon ni
sasahalak; digohi las ni roha, angka parhataan naginohan ni Tondi Parbadia jala
margogo laho marpanindangiaon (Ul.Ap.2:4; 4:31; 8:15-19). Ido umbahen, ditingki
Ap.Petrus paboahon tu angka apostel dohot angka dongan na di Jerusalem taringot
si Kornelius dohot donganna sabagas manghatahon di hata na asing dohot mamuji
Debata.(bd. Ul.Ap.10:45-46), porsea do nasida Debata na mangalehon haluaon
tu angka jolma na so Jahudi (ay.18). Pandidion dibagasan Tondi unang ma
dilapati masa ditingki on molo so diihuthon marhite angka pangalaho na
marrumang partondion (manang songon marhata sileban). Molo di Buku Ulaon ni
Apostel ndada hea diantusi pandidion dibagasan Tondi holan pemahaman haporseaon.
Alai tarida doi dibagasan pandidion marhite aek, songon na pinatupa si Johannes
Pandidi. Ia pandidion i ndang tarsirang i sian haporseaon di Jesus dohot sian
hasasaor Tondi Parbadia. Pandidion ima sada simbol na tardidi dibagasan tondi
na marrumang aek. Ima asa diingot ap.Petrus pandidion i na masa tu si Kornelius
(10:47; 11:16). Molo nunga tangkas dibereng nasida na masa i, tung boha ma
nasida manghatindanghon na so tutu taringot tu tondi i ? Sisongon on masa di ditingki ap.Paulus
mangula di Efesus, ia godang do pe nasida na so umboto taringot tu pandidion
dibagasan Tondi (19:3). Jala tangkas ma na dua apostel on ima Petrus dohot
Paulus padomuhon na dua ragam pandidion on (Pandidion marhite Aek dohot
Pandidion marhite Tondi Parbadia). Molo pandidion marhite aek manggombarhon
pandidion marhite Tondi Parbadia, ala ni ima sude prinsip na adong dibagasan
Tondi Parbadia ingkon adong ma i dibagasan pandidion marhite aek. Ala ni ingkon
ingotonta do; ianggo na melambangkan ndang boi bertentangan i dohot na
dilambangkan. Namarlapatan; aha na tarida dibagasan Pandidion marhite Tondi
Parbadia ingkon tarida dibagasan Pandidion marhite aek. Ala ni i ndang margogo
ap.Paulus laho mangambati na masa i. Ai diboto apostel i do i na sian Debata do
hagogoon i marhitehite Tondi Parbadia.
Mansai maol do Panjaloon ni angka halak Kristen
Jahudi di Jerusalem , siala ni i ma sada alus na mansai uli sian ayat 18 : “Dung
dibege nasida hata i, hohom be ma, gabe dipuji ma Debata, angka ninna ma: Asa
dohot do hape tu halak sipelebegu dilehon Debata hamubaon ni roha asa mangolu”.
Mansai ringkot do turpuk on, ala patuduhon maol ni roha halak Jahudi manjalo haluaon na sian Jesus
Kristus, siala pangantusion na so tigor taringot tu Patik ni Debata na
pinadalan nasida dibagasan Uhum ni si Musa. Asa mangalo pangantusion na sala i
do umbahen ap.Paulus manurathon Rom 14:17 “Ai ndada sipanganon manang siinumon
harajaon ni Debata; hatigoran do dohot hadameon dohot las ni roha di bagasan
Tondi Parbadia” . Asa dipaingot nasida songon angka naung porsea unang merasa
diri eksklusif jala mamereng jolma na asing gabe musu na ingkon sipasidingon.
Molo nunga dibasabasahon Debata tu hita haluaon, laos dos do Basabasa ni Debata
tu sude jolma. Rom 10:12-13 “Ai ndang adong imbar ni Jahudi manang Junani; ai
Sada do Tuhan ni saluhutna, naung marbasabasahon sian hamoraonna tu saluhut
angka na manjou Ibana. Manang ise pe na manjou goar ni Tuhan sai paluaonNa do”. Molo didok pe manang ise tontu marlangku do
tu sude jolma ndang mardia imbar (bnd.Rom.10:14). On ma na ingkon bagas
rimanganta, tung tarpatupa hita do laho mamaritahon Barita Nauli molo sai
marroha eksklusif hita? Adong do na gabe siihuthon Kristus molo so adong na
mamaritahonsa ? On ma na gabe tugasta, ima hita angka na tarjou mangulahon
parsuruonNa i. Molo sai tapangke do roha na manghilala na tama sian na asing na
marlapatan nunga patuduhon holong na marpengpeng. Molo taulahon on, tarida ma
disi pangalahonta na so mangulahon parsuruonNa i ima haholongan i.
C. Sipahusorhusoron
Ø Boi
do ra tasulingkiti rohanta; betak sai ganggu dope rohanta molo marpungu hita
ditongatonga ni halak na so tatanda dope ? Molo ganggu dope rohanta, tontu
ndada hita sandiri na manghilalahon sisongon i. Ala memang somalna pasti songon
i do sude hita jolma manghilala sisongon i molo ditongatonga si torop jolma na
so tatanda. Isarana molo masa parpestaan; godang na so tatanda ditonga
parpestaan i, tontu talului do inganan na tenang haruar sian torop ni jolma i.
Boi do marhite na mamulik tu suhisuhi sopo i, manang mamaereng handphone manang
sai tausahahon do laho patupa kesibukanta sandiri. Tung maol do jumpangan jolma
pintor olo sigop menak marsaor tu hatoropan jolma na baru pe tinandana. Mansai
tandi do i, molo ditongatonga ni angka naung tatanda hian, angka dongan, nang
keluarga. Jadi molo songon i do rumang ni hasomalanta tontu mansai sompit do pe
pangantusion haholongon i dibagasan haporseaonta ganup.
Ø Didok
Jesus ndada angka na porsea i na dapotan asi ni roha ni Debata, alai angka
parjahat i pe ndang dao sian panatapan ni Debata, “Asa tung gabe anak ni
Amamuna na di banua ginjang i hamu: Ai dipabinsar do mata ni arina tu angka
parroha na jahat nang tu na bonar, diparo do udan tu parroha na tigor nang tu
na geduk” Mat.5:45, 46-47. Asa gabe sipaingot do on tu hita angka na porsea asa
unang ma merasa eksklusif hita di na mangolu on dohot na egois, mementingkan
diri sendiri. Asa pangantusion holong i songon holong ni Debata do dibagasan
Jesus Kristus (bnd.Joh.3:16), asa sude malua, jala sifat haluaonNa i universal
do. Asa laos songon i ma haholonganta tu sandok dongan jolma. Molo so hita be,
ise ma ? Molo na pasahathon holong on tu angka dongan jolma mansai ringkot do,
“Halak na so marholong ni roha, i do na so tumanda Debata, ai haholongon do
Debata” (1 Joh.4:8)Ø
Ø Goar
ni Minggunta ima Kantate na marlapatan “Endehon hamu ma di Jahowa Ende na
Imbaru” (Psalm 98:1). Ende na Imbaru marlapatan doi angka haimbaruon na tarida
dibagasan sikap hidup siganup ari, ima sai tongtong mananggalhon hadosaon na
lohot di roha i tu hamubaon ni roha siganup tingki nang siganup ari. Ala ni
mansai ringkot di angka na porsea i
manjalo hasesaan ni dosa ganup ari sian
Debata dibagasan ngolunta. I do umbahen diganup parmingguonta sai masa do
liturgi hasesaan ni dosa. Asa marhite i ma tung gok las ni rohanta ala sesa
dosanta jala tau hita mangendehon ende na imbaru dibagasan las ni roha. Angka
na porsea na mangendehon ende na imbaru patuduhononna do sikap-sikap na marsaor,
na mangurampakkon roha na marbolatbolat, dohot na pasisi dirina sian jolma. Asa
dipatuduhon ma dirina gabe hatiuron, laho patiurhon na dihumaliangna marhite
parsaoran dohot lingkungan dohot na so sabangso, dohot na so sa ugamo ndang
mardia imbar na mora manang na pogos pe. Asa bagas ma tanom dibagasan rohanta
taringot ni impola ni haluaon na binoan ni Debata dibagasan Jesus Kristus, asa
haluaon i ndada holan di hita, alai naeng ma taruli angka na asing marhite
pambahenanta mangurupi nasida dibagasan hatiuron na sian Debata. Jala hita ma
ulaula ni Debata laho pasahathon Bari Nauli i tu sandok portibi on marhite
parulaanta. Sadia godang ma na tuk tarpatupa hita laho mangarahon dongan jolma
na dibagasan haholomon dope, asa taruli hatiuron nasian Debata nasida jala tung
boi nasida marolopolop, marendeende mamuji pasangap Debata siala haluaon na
jinalo nasida i. Horas Mar-Kantate ! Amen.
