Mangolophon
Debata
Psalmen
66 : 1 – 7
A. Patujolo
Dibagasan turpuk on ditaringoti do asa ganup bangso
mamuji Debata siala pambahenanNa, i ma pangaramotion dohot pandonganionNa, di
sejarah parngoluon ni bangso i. Bangso Israel ima bangso ni Debata na ‘memiliki
pengalaman khusus’ dung mulai haruar sian Misir, di parhorsihan, sahat tu Tano
Kanaan. Hea nasida tarbuang, alai ro Debata paluahon nasida sian habuangan,
mamboan mulak tu tano naung pinarbagaNa tu ompunasida, i ma Tano Kanaan. Jadi,
joujou asa mamuji Debata ala ni pambahenanNa di pardalanan ni ngolu ni bangso
i.
Dibagasan kesadaran manang panandaon na songon i do
raja David manurathon buku psalmen on, khususna turpuk on: dibuhai ma i sian
perenungan pribadi taringot nasa sangkap hatuaon ni Debata na sai balga di tano
Misir.
B.
Hatorangan
1)
Ayat 1 – 4. Parpsalmen on bagas mangarimangi ia
tung mansai ringkot do jolma marolopolop mamuji Debata. Gariada tahe tung
saluhut tano on, diigil parpesalmen on laho patuduhon las ni rohana
manghalashon denggan basaNa. Memang pengalaman khusus ni bangso ni Debata do
haborhatan ni panandaon ni parpsalmen on di haluaon na pinatupNa. Alai tung pe
songon i ndada marlapatan pengalaman ni Israel
dohot pangaramotion ni Debata di bangsoNa, gabe pintu masuk tu semangat
eksklusif alai justru marhite pengalaman ni bangso ni Debata, tangkas do
marbungaran jala mangerbang tu saluhut jolma tahitahi ni na laho manomba tu
Debata Jahowa.
Asa ndada holan bangso Israel ditahi
Debata gabe bangsoNa huhut rade marsomba tu Ibana; tarida do i di pandohan ni
parpsalmen di ay.3-4 i. Sada hal na so mura ulahonon ditongatonga ni hajolmaon
i ma dapotan pujian manang hata na denggan sian musunta sandiri. Gari
sahundulan pe maol do dohot musu, lam pasadahon pingkiran dohot mangigil na
denggan ma sian musu ndada sada hal na so mungkin do i? Tontu molo
ditaringothon istilah “musu” pintor mura do antusanta, ima na so manghaholongi
dalan ni Debata, manang na maralo tu lomo ni roha ni Debata. Dihatindanghon
parpsalmen i, sai na adong do musu i tongtong. Alai di jolo ni Debata na “omni
Potensia” ndang adong na margogo marmusu dompak Ibana (bnd.Psalmen 68: 34;
74:13). Hinorhon ni hagogoon ni Debata,
laos saluhutna do ro marsomba tu joloNa, mangokuhon hataluon nasida. (Pslam
81:6). Jala na menarik di tradisi ni Timur Tengah Kuno, angka musu na talu i
ingkon olo mampartuan na monang i. I do na diondolhon ni ay.3 i; ingkon olo musu i marsomba tu Debata,
ndada sian na terpaksa alai didasori kesadaran na bagas di hagogoon ni Debata
(Psalm.139:14). Debata na mangaramoti saluhut. Ala ni hasongkalon dohot
hagogoonNa i ingkon marsomba ma nasa ulu ni tot dibagasan haserepon ni roha. Ai
lobi sian na boi bahenon ni jolma, boi dibahen Ibana. Ai gari jolma parjahat
diboto mambahen na denggan tu angka anakhonna, lam so lehonon ni Ama i ma sian
banua ginjang Tondi Parbadia tu angka na mangido sian Ibana? (Luk.11:13).
2)
Ala ni i, mamuji Debata ndang sae holan ala olo
hita mangokui dosanta, dohot hajahatonta, alai halak na mamuji Debata ima halak
na manghatindanghon habalgaon ni Debata. Ala ni do didok sada halak na porsea i
di si Jerome: “Confession of sin is parise of God” (pengakuan dosa ima mamuji
Debata). Ala ni i unang ma tabuat hasangapon nang pujipujian di Debata ai gabe
sisoada do i. Unang ma tagulut hasangapon nang pujipujian alai di Debata ma i
saluhutna.
Alai ndang sae na holan mamujumuji
Debata, alai sude do sandok na adong di hasiangan on, mangendehon Debata dohot
manjou Goar ni Tuhan i. Pangajarion ni Debata ndang terbatas holan tu
hajolmaon, alai saluhut na tinompaNa. Domu tu Hata ni Jesus mandok di Markus 16
: 15 “....Jamitahon hamu ma barita na
uli i tu nasa na tinompa.”
3)
Ayat 5 – 7: Domu tu habalgaon ni pambahenan ni
Debata na mangatur saluhut na adong di portibi on do umbahen di pardalanan ni
bangso Israel diloas nang nasida na boi Debata manguba laut gabe tano na
mahiang, jala gabe boi bangso Israel manaripari batang aek i, marlas ni roha
uju i. Ala ni i do pesta parolopolopon ni bangso Israel torus do i marojahan di
na masa na uju i. Ala ni i dibagasan parsombaon tu Debata, dipatubegehon
parpsalmen on do ende pujipujian on, laos mangarahon bangso ni Debata marnida
halongangan na pinatupa ni Debata. Ibana patupa panonggoti di portibi on
(bnd.Pslm.46:9). Ibana patudu hasongkalonNa (65:5), hamuliaonNa (Jes.6:3;
40:5). Pangaramotion ni Debata (providentia) ndang holan tu jolma dohot nasa na
tinompa i, alai dohot do secara khusus nang tu angka bangso (pluralis). Turpuk
on naeng mangondolhon asa nasa bangso unang gabe bangso panggunturi, unang gabe
bangso sialo Debata. Pandohan on, ndang idaonta holan tu angka bangso na asing,
alai dohot do nang tu bangso Israel asa hot dipanjouon mamujimuji Debata
dibagasan hamuliaon. Dison adong hata jamak, saluhut jolma (men). Debata
manguba angka na so martuhan, jala mambahen nasida gabe bangso na mauas di
hasintongan. Ibana do mangarajai, jala mangaranapi do mataNa marnida pangalaho
ni saluhut bangso. Asa sian i ndang dihalomohon Debata angka jolma na
manggosagosa donganna jolma na asing; sai diurupi Debata do angka na tertindas
i.
C.
Sipahusorhusoron
v Saluhut
do jolma manghalomohon las ni roha dibagasan ngoluna, alai porlu pamanatonta:
las ni roha na songon dia do sihirimonta nuaeng di ngolunta ? Tontu halalas ni
rohanta mian dibagasan Debata do laho mangolophon denggan basaNa. Molo na sian
portibi on las ni roha parsatongkinan do jala na boi manjehehon jolma i
marhite: narkoba, hedonisme, konsumerisme, kebebasan seksualitas (free sex).
Alai di hita na porsea dibagasan Jesus Kristus holan dibagasan Tuha i do
jumpang hita las ni roha. Ido umbahen didok Apostel Paulus di Pilippi 4:4 Marlas ni roha ma hamu tongtong di bagasan
Tuhan i! Huulaki ma mandok: Marlas ni roha ma hamu!
v Sada
las ni roha na umbalga ima marhite naung pinatupa ni Debata haluaonta dibagasan
Jesus Kristus; asa gabe malua hita sian parhatobanon ni sibolis jala dapotan
hangoluan salelengnilelengna hita (Joh.3:16). Dijou do hita paboahon haluaon
nang patupahonsa tu angka donganta na metmet, naginosagosa portibi on. Mangula
do Debata marhite hita laho pasauthon dohot patulus sangkap ni Debata di
portibi on, ima patuduhon hadameon dohot las ni roha ditongatonga saluhut
bangso asa tarida haluaon na sian Debata i. Jala tarajumi hita jolma na
niasianNa do, asa marolopolop hita, olo ma hita mangulahon hatani Tuhan i,
mamboan Barita Nauli, hadameon, keadilan tu saluhut jolma. Asa saluhut portibi
on taruli las ni roha na sian Debata jala saluhtna mamujimuji jala marolopolop.
v Goar
ni minggunta ima Minggu Jubilate : Marolopolop tu Debata sandok tano on
(Pslm.66:1). Halak na marjubilate; na marolopolop, ima halak na marnida bidang
ni pamujion i (holistik), molo dohot diida haulion ni saluhut na tinompa ni
Debata. Beha do hita songon halak na porsea marnida paboa nang suansuanan, nasa
gulokgulok dohot nasa na manggulmit i marsomba, marolopolop tu Debata. Dohot
nang saluhut i marnida na songkal Debata jala na marmulia dibagasan ngolunta.
Ujung ni ngolunta ima las ni roha do marhite Jesus Kristus naung manghophop
hita asa panean hita di HarajaonNa na gok las ni roha nang olopolop. Amen.
