Mangoloi
Debata
Ulaon Apostel
5 : 27 – 32
A. Patujolo
Tangkas do dipatorang
andorang turpukta on, diorai do si Petrus dohot si Johannes laho mangajari
dibagasan goar ni Jesus Kristus. Alai ala pangoloionna tu sangkap ni Debata
dohot na tarjou ibana gabe sitindangi ni Kristus, jala dihilala ibana na Tondi
Parbadia ido na manogihon ibana laho mangulahon i, torus do nasida hehe laho
mangajarhon taringot tu Jesus naung hehe i. Siala ni i ma dibagasan turpukta
on, dipaingot angka sintua ni malim (sanhedrin) i do muse nasida. Alai mansai
benget do na dua apostel i laho mangadopi, laos gomos do hajongjongan nasida
dipanjouon ni Debata. Laos didok nasida; Jesus naung dibunu nasida marhite na
marparsilangkon Ibana nunga dipabangkit Debata. Dipangolu gabe Mesias (raja na miniahan ni Debata). Na gabe
sitindangi na masa i, dibereng jala dihilalahon apostel na dua i do panghorhon
ni hamamate dohot haheheon ni Jesus i. Siala ni i, ndnag mungkin be ndang
mamaritahon hasintongan na masa i tu saluhut jolma. Jala tung mansai godang do
angka halongangan pinamasa nasida ditingki mamaritahon Barita Nauli i, jala
panghorhonna mansai godangma na mangihuthon apostel i laos porsea dibagasan
Jesus (5:14). Siala ni i, gabe patubuhon kecemburuan di angka sintua ni malim
laos ditangkup nasida ma nadua apostel i jala dihurung. Alai dibornginna i dibagasan
hurungan i, sada surusuruan ni Debata mamuha pintu ni hurungan i jala mamboan
nasida haruar. Jala marhite parenta ni Debata asa mambaritahon Barita Nauli di
Bagas joro ni Debata.
B. Hatorangan
1) Ayat
27-28. Dung dibege angka sintua ni malim i na malua angka apostel i sian
hurungan jala maringan di Bagas joro ni Debata. Borhat do nasida laho manangkup
angka apostel i, alai ndad gogo dibahen laho manangkup nasida, sotung gabe
preseden buruk dinasida laos didangguri natorop i nasida siala ni i. Dungi
dipajongjong ma nasida di rapot godang di jolo ni angka sintua ni malim
(sanhedrin). Adong do huaso ni Angka sintua ni malim (sanhedrin) di bidang
administratif jala marhuaso do nasida laho manangkup jala mamenjarahon angka
pejabat di huasona. Molo parsualon na niadopan ni angka apostel on (Petrus
dohot Johannes) ima tuduhan ajaran sesat na melanggar uhum Jahhudi, nunga
diorai nasida laho mamaritahon taringot Jesus tu halak Jahudi (4:17-18). Nuaeng
angka sintua ni malim paingothon oraora nasdia i tu angka apostel i. Diorai do
nasida siala nunga sahat tu sude halak di Jerusalem pangajarionnasida. Namasa di
hau pinarsilang, dihaheheon ni Jesus dohot angka pangajarionNa na pinaboahon ni
angka apostel i gabe sihataan di Bagas Joro ni Debata di halak Jahudi. Najolo
angka sintua ni malim i do na manguhum Jesus marhite si Pilatus (cuci tangan). Diberneg
nasida do angka apsotel i naeng pasangaphon mudar ni Jesus diadopan ni angka sintua ni malim.
2) Ayat 29.
Dialusi si Petrus do tu nasida na ingkon oloan do Debata asa jolma. Lapatanna,
aha naung diulahon nasida i, ima sada bentuk haoloan nasida tu Debata. Debata
do na marsuru nasida asa mamaritahon Barita nauli i. Nang pe godang angka
ancaman sian sintua ni malim i dohot sian angka halak Jahudi, ndada manginsurut
nasida laho mamaritahonsa. Dipataridahon nasida do haunduhonna tu Debata na
marsuru nasida. Nang pe ro angka ancaman, ndada manghohom nasida alai torus do
bersemangat nasida laho mamaritahon Barita Nauli. Disonma tarida hamumuba na
mansai tandi; sian na mabiar hian siseani gabe barani nasida mamaritahon Barita
Nauli dungkon songgop Tondi Parbadia lam margogo nasida tung pe godang angka
ancaman tu nasida holan ala na mangoloi parsuruon ni Debata.
3) Ayat 30 –
31. Dibagasan turpuk on dibahen angka apostel i do sada kesempatan nasida laho
mamaritahon barita nauli dibagasan rapot godang i. Dipatorang nasida do ia
Debata ni ompunasida ido naung paheheon Jesus sian na mate. Sian pandohan on
patuduhon dua impola:
v
Laho patangkashon i, ia angka apostel i tongtong do
mangokui Debata ni ompunasida Israel ima : Abraham, Ishak dohot Jakob
Debatanasida. Manghaporseai Jesus ndada na paoruhon sikap nasida maradophon
Debata ni ompunasida i. Nang pe Debata sandiri do na pahehehon Jesus i. Debata
na sinomba ni bangso Jahudi sian najolo ima Debata na patupahon ulaon dibagasan
Jesus i sandiri.
v
Laho mangadopi barita gapgap na pinatubuhon ni angka
sintua ni malim, na mandok ia Jesus na hehe i, ndada na tutu hehe, alai na ditangko
siseanNa i do bangkeNa
(bnd.Mat.28:11-15). Dungi dipatorang angka apostel i ma ia Jesus napinatimbo
ima Raja Israel jala Sipalua i, alai ndang dibagasan pangantusion huaso secara
politis. Panggomgomion ni Jesus dohot haluaonNa ima laho margogoihon partondion
ni jolma, asa sude jolma termasuk halak Israel marhamubaon ni roha jala manjalo
haesesaan ni dosa. Saleleng na i jotjot do diantusi nasida ia Jesus laho holan
paluahon nasida sian panggomgomion ni bangso Rom jala bermuatan politis, alai
Mesias naginoaran Jesus i sasintongna ima holan na laho mamboan haluaon sian
huaso ni dosa dohot sibolis.
4) Ayat 32;
di ayat on dihatindanghon angka apostel i do nasida ima angka sitindangi ni
Kristus jala laos mamaritahonsa. Lapatan ni sitindangi boi doi adong dua: Naparjolo; na martudu tu angka na marnidasa
langsung dohot na umbege, jala laos manghilalahon angka na masa di ngolu ni Jesus.
Napaduahon; namartudutudu tu ulaon pamaritahonon na niula nasida. Alai ndada
holan nasida sambing na gabe sitindangi saluhtna i, alai dohot do Tondi
Parbadia na diilehon ni Debata tu angka na hinalomohonNa. Lapatanna;
dihaporseai angka apostel i do ia Tondi Parbadia na mangula di ulaon
panghatindanghonon taringot tu Jesus na
hehe i (bnd.Joh.15:26) jala na mangajarhon saluht taringot jamita ni Jesus tu angka siseanNa (Joh.14:26)
C. Sipahusorhusoron
v Jotjot do ro angka ambatambat laho mamaritahon Barita Nauli, ndada masa i
holan tu angka apostel i, nang di pardalan tingki pe sahat tu saonnari on tung
mansai godang do tantangan. Boi do masa sian bagasan huria i, nang sian luar ni
huria i, isarana : parbadabadaan ditonga huria na mangambati hasintongan barita
nauli i, dungi sian luar godang ma angka na manghasogohon jongjong bagas joro
manang angka gareja, jala na parpudi godang angka gareja ditutupmanang
dibongkar paksa pamarenta ala soa dong izin. Laos songon i angka halak
intoleran na manghasogohon jongjong gareja di lingkunganna. Ala ni i naeng ma
hita saluhtna angka parbarita nauli marbisuk mangadopi tantangan i. Unang gabe
mabiar hita, ingkon sioloi Debata do hita asa jolma. Di dok di Matius 10:28
Unang pola mabiar hamu mida angka na mambunu daging, angka na so tuk mambunu
tondi; alai na marhuaso mangagohon daging dohot tondi tu na roko, i do
sihabiaranmuna.
v
v Angka na porsea di Jesus Kristus; Hita do angka sitindangi Kristus i.
Nang pe ndang tabereng langsung taringot tu ngoluni Jesus dohot jamitaNa, dohot
na mamereng langsung hamatean dohot haheheonNa, alai las ma rohanta songon na
didok Jesus i : “Martua ma angka na porsea, atik pe so diida!” (Joh.20:29).
Pandohan on mangalehon pos ni roha dihita laho mamaritahon barita na uli. Jala
pasauthon Ibana do Hatana tu hita na mandok di Epistelta Pangkungkapon 1 :4-8,
mamereng sogot Jesus, na jumolo hehe
sian na mate, jala marhuaso mangtasi angka saluhut raja, marharoroan dibagasan
hamuliaon. Jala sude do hita ingkon satia laho mandopang angka parhata geduk
taringot tu barita haheheonNa i.
v Goar ni minggunta ima Minggu Quasimodogeniti : “Songon posoposo na imbaru
tubu, nuasan ma hamu di susu na tama, na so marlaok, asa lam magodang hamu,
horhonon ni i, bahen haluaon (1 Petrus 2:2). Marhite turpuk on naeng mangajari
hita laho manjaga habadion ni ngolunta dungkon panobusion na tajalo sian
Kristus Jesus. Jala dipatogu nang haporseaonta asa tongtong manahan dibagasan
haporseaon na mangolu nang pe godang angka tantangan na taadopi. Ulaonta naung
pinarbadiaan ni Kristus ima mamaritahon Barita Nauli na so marlaok jala tingkos
binaritahon tu saluht jolma. Amen
