Tongtong
Satia Tu Debata
Pangungkapon 1 : 4 – 8
- Na tarbuang do si Johannes tu pulo Patmos di tingki ni Kesar
Domitianus. Di ombasi dilehon Jesus tu ibana pangungkapon, taringot tu angka na naeng masa sogot. I
ma disurathon jala ditongos tu pitu huria, asa adong sipeopon na patoguhon roha
dohot haporseaon di Kristus Jesus (huria Epesus, Smirna, Pergamos, Tiatira,
Sardes, Philadelphia dohot Laodikea). Bilangan pitu i ma simbol ni kesempurnaan. Huria na pitu on ma simbol
ni sude huria na adong diportibion sepanjang zaman.
- Sasaran utama ni surat on, i ma : Patoguhon roha ni huria na
marungkil, na dipasiaksiak jala deba dibunu ala haporseaon di Jesus Kristus,
asa torus nasida satia sahat tu ujungna (Pang 2 : 10; 3 – 11). Diungkap Debata
do hamuliaon ni banuaginjang dohot hangoluan sisalelenglelengna i tu si
Johannes, jala dipaboa si Johannes i tu huria na mangadopi parungkilon asa gabe
adong sihirimon, unang mandele huria i; alai asa torus martahan paima ro
Tuhan Jesus paduahalihon.
- Di bonai do turpuhon marhite hata pasupasu; Asi ni roha ma di hamu
dohot dame sian Debata na mangolu i, naung mangolu hian jala na naeng ro. On do
paposhon rohanta jala mangalehon di hita kepastian keselamatan, paboa di angka
na porsea nunga adong asi ni roha dohot dame. Nunga dipadame Debata hita tu
diri-Na dohot tu dongan jolma, ala naung disesa sude dosanta jala sian asi
ni roha-Na do i (gratis – Sola Gratia), ndada ala ni ulaonta. Na mangalehon
i i ma Debata na tutu, naung adong sian mula ni mulana, jala na na naeng ro
muse di ari parpudi, i ma Debata na Alpa jala Omega, na so marmula jala na so
marujung, na mengontrol sude pardalanan ni sejarah. Alani martua ma na hot mian
dibagasan Kristus sahat ro diujung, atik pe mangadopi hapaeton – parungkilon
ala haporseaon di Kristus.
- Dipatupa Debata do i dibagasan Anak haholongan ni rohaNa, i ma
Tuhan Jesus naung mate jala naung hehe sian na mate. Torang do dipabotohon
dison hadirion ni Tuhan Jesus (ha-Iseon-Na).
1)
Sitindangi haposan. Lapatanna, Tuhan Jesus do saksi na parjolo jala na tangkas umboto
jala mananda Debata. Haroro ni Jesus tu portibi on mamboan panindangion
taringot tu hasintongan ni Debata jala
na rade martyr/mate laho manghatindanghon hasintongan ni Debata. Hita halak
Kristen tama maniru Tuhan Jesus gabe sitindangi na setia jala olo mate martyr
laho manghatindanghon hasintongan ni Tuhan Jesus.
2)
Na parjolo tubu sian angka na
mate. Ibana do Tuhan ni angka na mangolu dohot angka na mate. Jesus
naung hehe na manaluhon hamateani, i do Tuhan na paheheon hita muse angka na porsea
di Ibana. Molo marungkil pe hita nuaeng ala ni goar-Na, nunga diparade sada
sihirimon na sumalin di hita, i ma haheheon ni angka na mate laho manjalo
hangoluan na manongtong.
3)
Sigomgom angka raja ni tano on. Di na laho manaek Tuhan Jesus tu banuaginjang, didok do : Nunga
sahat tu Ahu nasa huaso na di banuaginjang dohot na di tano on (Matius 28 : 18)
jala di na ro Ibana paduahalihon, patar ma Ibana bahenon ni na Martua i, Pargogo
sasadasa, Raja ni angka raja, Tuhan ni angka tuan (1 Tim 6 : 15; 1 Pet 3 : 22;
Pang 17 : 14). I ma patoguhon rohanta, songon halak Kristen na parjolo i.
- Di ayat 7 didok; Ida ma, i ma joujou asa sude rohanta
tapasada/tapahibul tu haroro-Na paduahalihon i. I do na menentukan ngolunta. Ai
disi ma tangkas patuduhononna hadirion-Na na tinaringotan ni turpuhon, jala
disi ma ida on ni sandok bangso na di tano on.
a)
Ro do Ibana dibagasan ombun
(Daniel 7 : 13). I ma simbol ni hamuliaon (Mat 17 : 5). Ibana nanileaan ni
Saduse, Parise, Sibotosurat dohot soldadui na jolo, naung ro dibagasan hamuliaon
na sumalin, gabe sude na marsomba tu Ibana (Pil 2 : 5 – 11).
b)
Laos ombun do jotjot simbol ni
panguhuman (Psalm 97 : 2; Sepania 1 : 15). Na ro do Tuhan Jesus laho manguhum.
Ibana do Panguhum disi, ndang pribadi na asing.
c)
Disi ma idaon ni sude halak masa
pamutarbalikan keadaan. Molo najolo, Parise, Saduse, Sibotosurat, si Latus
dohot paranganna bersekongkol laho manullang, manikam, pamatehon Tuhan Jesus,
songon i dohot angka halak na marusaha manesa goar ni Tuhan Jesus sian
portibion marhite pangaleleon, alai diharoroNa paduahalihon i, gabe manguhum na
nasida. Boasa? Ai ternyata, na tiniham nasida i, i do Anak ni Debata na
manguhumi nasida, jala hamatean salelenglelengna jambarna.
Alai angka na manahan marhaporseaon di Tuhan Jesus, nang pe
mamolus ragam ni haporsuhon dohot pangaleleon, rap ma dohot Tuhan Jesus di
hamuliaonNa na manontong i. I ma tutu, Amen. Tutu situtu do i masa.
