Tangiang
Dibagasan Haholongan
Roma
12 : 9 – 12
A.
Patujolo
Ia buku Rom on
digurithon di Korint (15:32) jala masuk do sada sian surat ni ap.Paulus
(Pauline) na asli na disurathon dipudi ni pardalananna na patoluhon (15:25).
Ndada si Paulus na pajongjonghon huria na di Rom jala nadada hea ibana manopot
huria i sian mulana, ala ni do marasing do buku na on sian na asing. Ia holan
buku Rom on do na marisihon thologia ni si paulus na mansai sistematis. Jala
digurithon do inti pokok ni buku Rom on di Rom 1: 18; 11: 36, ima taringot
hasadaan halak Jahudi dohot na so Jahudi di hasintongan marhite haporseaon
dibagasan Jesus Kristus. Ala ni Kristus angka halak Jahudi dohot na so Jahudi
rup gabe ruas ni Debata na binasabasahon Tondi ni Debata. Tanda angka na bongot
tu si ima angka naung tardidi. Ido alana mansai bagas do diuhal ap.Paulus buku
Rom on taringot tu haporseaon, hapintoran, Patik dohot lan na asing marhite na
patoranghon padomuhon Padan Na Robi dohot Padan Na Imbaru.
Turpuk di minggunta on
ima naeng manogunogu halak Kristen asa
sintong manghangoluhon holong ni roha songon hataridaan ni hakristenon na
sintong hombar tu suhatsuhat na tinotophon ni Tuhan Jesus (Joh.13: 34-35). Jala
dison ma tarida poda na bersifat praktis, songon na nidok ni apostel Jakobus,
unang holan teori haporseaon i, alai naeng ma patar parulaon ni halak Kristen
hombar tu haporseaon na sintong (Jak.2:14-20). Boha do taringot haholongan i
didok Debata ? Hombar tu turpuk on adong ma opat rumang ni haholongan i :
B.
Hatorangan
1)
Ayat 9 ; Unang ma marpangansi holong ni roha i.
Holong na so marpangansi ima holong na marpangulaon, na patar di parsaoran
siganup ari. Sandok panggulmit ni ngolu ni halak Kristen naeng ma tongtong
dirahuti holong ni roha. Roha holong mambahen sada halak girgir patupahon ulaon
na denggan. Alai boi do marhite nba sai tasangkapi na denggan dompak dongan,
gabe tubu holong ni roha dompak dongan i. Marhitehite na pasomalsomal dirinta
pasiding na jahat, boi do gabe tubu holong ni roha di dongan. Sabalikna, molo
taloas masuk angka pingkiran na roa taringot tu dongan na hinaholongan,
pinasiat tu roha angka tuhastuhas na so tangkas dompak nasida, bgoi do runsur
jala peut holong ni rohanta di nasida. I do umbahen ingkon pareahon (pilliton)
na denggan, unang na jahat, asa magodang holong ni roha di bagasan hita (ay.9).
Ingkon manat do hita di angka parjahat na late roha mida angka na
masihaholongan, na girgir mamolamola, asa masihosoman angka na maraleale didok
rohana.
2)
Ayat 10; Ingot
hamu ma holong ni roha sama dongan Kristen! Masijolojoloanan ma hamu
masipasangapan! Lapatanna asa parsaoran ni angka na porsea songon keluarga
na masihaholongan di na marhaha-anggi (songon na pasangaphon natorasna/natumua,
sisolhotna, oppungna, tulang/nantulangna, uda/inangudana, angkangna nang
anggina). Ala ni ima ringkot do ingkon patuduhon parsaoran ni keluarga na
masihaholongan. Asa keluarga i do na gabe mambuhai sikap nang pangalaho
anggotana keluargana asa masihaholongan. Laos mangerbang ma tu tonga ni huria
nang masyarakat pe. Ai ganup halak dibagasan huria i manjalo silehonlehon
saguru tu ragam ni asi ni roha na tinurpukhon ni Debata marhitehite Tondi
Parbadia (Rom 12 :6; 1 Kor.12:11). Ndada holan i, alai diigil do asa
masijoloanan na marlapatan; Asa songon hapataran ni pamatang ni Kristus, huria
i di portibi on, naeng tangkas huria i masitumpahan dibagasan holong. I do
umbahen ringkot tangkas radotanta parsaoran ni Huria songon sada sistem sosial,
asa sandok ruas ni Huria i masitumpahan hombar tu asiasi na di ganup halak.
Sangkap dohot tujuan ni aturan dohot paraturan ni huria na sasintongna i ma
naeng mangaturhon songon dia do ragam ni asiasi na adong di ganup ruas ni huria
i, boi nian tangkas masitumpahan, asa tarbahen Huria i renta di parsaoran, di
panindangion dohot panghobasionna di tongatonga
ni portibi on.
3)
Ayat 11; “Unang sumurut ringgas ni rohamuna....”
angka na mangulahon lomo ni roha ni Debata, ima angka jolma naung pinauba
hadirionna, ala ni ndang sumurut be haringgasonna mangulahon angka ulaon asi ni
roha. Ai girgir do tondina ala marhhite Tondi Porbadia na margogoihon ibana laho
mangoloi (melayani) Tuhan. Diigil sian hita asa huria partondi na girgir, i ma
huria na so mura mandele atik pe tarsosak dibahen portibi on; tongtong
manghirim di parbue na tonggi atik pe mansai manggogo halisungusng manghutur
bunga dohot mutik ni hau na denggan i. Mangoloi = melayani (sian hata “δουλευω/ douleuo” merupakan
satu kelompok dengan istilah “δουλος/ doulos” yang diartikan “Budak,” maka
dalam ayat ini juga bisa diartikan sebagai “jadilah budak daipada Tuhan”)
dipatuduhon ma haholonganna marhite na mangoloi parsuruon ni Kristus mamaritahon Barita Nauli, ima
Barita Haholongan. Naeng ma tangkas huria mangaturhon angka ulaon panghobasion
na ampit tu parngoluon ni ruas, masyarakat dohot negara. Ala singkat ni Kristus
do halak Kristen di portibi on manguduti panghobasion naung pinungka ni Kristus,
ingkon tangkas do huria mangarangrangi ulaon panghobasion na manait roha ni
sude ruas girgir mangoloi panjouon ni Tuhan i (ay.11). Ala ni mansai ringkot do
sada sistem na boi memberdayakan ganup ruas ni Huria patupahon ragam ni
panghobasion hombar tu silehonlehon na sian
Tondi Parbadia.
4)
Ayat 12; Ala sai jugul do huria i di ngolu
partangiangon, mangido gogo dohot habisuhon sian Debata nampuna ulaon i. Nunga
godang angka buku digurithon taringot tu na laho mangatasi angka parungkilon ni
ngolu. Adong ma tolu dapot hita sian ayat on asa marhamonangan hita
mangadopisa: Naparjolo, Marlas ni roha mangkirim; las ni roha nanidokna ndada las ni roha na somal,
alai las ni roha dibagasan pangkirimon. Sude angka naung dipadanhon Debata
ingkon saut do i di tingkina, tapeopma padanNa i dibagasan rohanta, ala ni i
manongtong ma hita dibagasan las ni roha. Songon pandok ni BE.766 : 1-3 Padan
na uli “Ho ndang hulupahon”....; Napaduahon, Marbenget ni roha ma di haporsuhon.
Sai hira mansai borat do na paduahon on di angka na dibagasan haporsuhon. Boha
do hita mangadopi parsualon na so marnaujung i? Sungkunsungkun sisongon i do na
mansai manonggopi godang angka halak Kristen. Tung mangkirim dohita molo ro
parsualon asa gira marujung asa unang marganjangganjang. Alai jotjot do diajari
Tuhan i hita marhite haporsuhon asa marhatauon hita (tahan uji). Asa
dipatuduhon marhite hatauon i, kwalitas tinggi ni haporseaonna ido asa didok
Debata marhabengeton. Didok di Rom 5:4 Jala dihorhon habengeton ni roha i do
hatauon, jala hatauon i do mangkorhon pangkirimon. Ima solusi na margogoihon
hita laho mangadopi i. Napatoluhon, Jugulhon hamu ma tangiang! Molo so
tahaporsai gogo ni tangiang, gabe sai holan hasomalan di parmingguon do i
tahilala. Alai sasintongna tangiang ima dalanta manghatahatai dohot Debata.
Songon istilah sinuaeng on mar-handphone; ima dalanta laho manghatai dohot
halak na di luat na dao. Alai parasinganna, molo handphone boi do pinangke molo
adong sinyal, alai molo tangiang i boi do manang didia pe (didolok, ditombak,
dilaut, manang dibagasan butuha ni dekke songon si Jona pe boi do). Ala
dinamartangiang i hita ingkon dibagasan tondi do, jala na sai dijugulhon
(bertekun, tidak jemu-jemu; Lukas 18:1). Asa ndada holan pintor hatop alus ni
tangiang i alai olo do lumeleng. Saluhutna
alus ni tangia i saguru di Tuhan i do (sai saut ma lomo ni rohaM) ala ni i
ndada lomo ni rohanta di bagasan tangiang i. Tangiang i asa laho mangantusi dia
do sagkap dohot lomo ni roha ni Debata. Boi do diuji kesabaranta marhite na
paimahon alus ni tangiangta i, alai na sintong do ianggo padan nang sangkap ni
Debata. Asa dibagasan tangiang huhut tarida ulaon na denggan na hinalomohon ni
Debata. Heber 10:23 “Momos ma tatiop pangkirimon na taparhatopot i, ai haposan
do na marbagabagahonsa!”
C.
Sipahusorhusoron
Ø Godang
do jolma mandok nunga diulahon ibana haholongan i, jala mian dibagasn ngoluna,
doloht lan na asing. Jotjot do ra tabege sahalak na mora na mangalehon sembako
tu angka na pogos manang masayarakat tertentu, asa didok ibana na manghaholongi
dongan jolma. Manang sian sisi na asing didok ibana dihatoropan jolma na
dihaholongi ibana do Debata sian nasa rohana, hape dihosomi donganna jolma. Ai
ndada songon i rumang ni haholongon i. Rumang ni haholongon i naeng ma tarida
di ngolu siganup ari na olo marparsaoran
dohot dongan jolma nang musu pe. Hapataran ni haholongon i tarida ma dibagasan
ngolu saiganup ari na pinatujolo manghaholongi Debata marhite tangiang.
Ø Marhite
turpuk on naeng do dipatuduhon ap.Paulus boha do sasintongna sikap nang
pangalaho halak Kristen. Asa tarida ma sikap na patuduhon hapataran ni Kristus
na solider tu angka donganna jolma tarlumobi na sahaporseaon. Asa tarida ma
ruas na manghangoluhon tohonan hamalimon,; ima mangaradoti hasadaon, mamodahon
hasintongan na sian hata ni Debata jala tongtong mamasumasu. Sada tantangan na
umbalga si huria, na boi manegai hasadaon, jala manghorhon hagaleon di
parsaoran nang di kerjasama, i ma sikap maradophon angka paburuburu huria i .
Tarjou do huria sa sai tongtong ma masumasu manang na ise pe taho, baik secara
pribadi manang horong dohot huria marsadasada. Suhatsuhat ni solidaritas sosial
na pinangke ni ap.Paulus di turpuk on, ima molo boi halak Kristen di sandok
potibi on sapanghilalaan di arsak dohot di las ni roha. Ingkon sisada arsak
dohot lungun ni roha do sude halak Kristen molo adong sian Huria i na marmara
binahen ni portibi on; laos ingkon sisada las ni roha dohot olopolop di angka
na jumpang di parsaoran, panindangion dohot panghobasionna be.
Ø Goar
ni minggunta ima Rogate, na marlapatan Martangiang. Asa ngolu ni jolma na
dibagsan tangiang do mian haholongon ni Debata na marrumang ulaon asi ni roha
dibagsan ngoluna. Jolma na porsea na manghangoluhon ngolu partangiangon i ma na
manghahngoluhon ngolu haholongon na sian
Debata. Mampu ibana patuduhon ngolu si partangiang na tudos tu ngolu i
siparholong roha. Nang Jesus pe martangiang do laho manangianghon hita, asa
malua hita jolma pardosa on, jala diparmahani manang diramoti. Asa na gok
holong tontu tangianghononna do donganna nang musuna pe tu Debata asa
dipasupasu Debata ibana. Horas mar-Rogate. Amen.
