Gabe
Parmahan na Denggan
Hesekiel
34 : 11 -16
A.
Patujolo
Digombarhon do di turpuk on hadirion ni Debata
Jahowa songon Parmahan na denggan, na gok asi dohot holong ni rohana di angka
na pinarmahanna. Songon Parmahan na denggan Ibana, diparmahan do bangsona i
marhite na manarihon, marmudumudu, manogunogu, mangaramoti, mangondihon,
mandaoni sahat ro di na mangarahon tu inganan parmianan na sonang. Alai ulaon parmahanion i dipasahat Debata Jahowa do tu angka
pamimpin ni bangso i, ima tu angka raja manang panggomgomi, tu angka malim ro
di angka panurirang. Tu nasida ma dipasahat Debata Jahowa tanggungjawab
marmahani bangsona. Alai jotjot do ndang diulahon nasida ulaon i dibagasan
tanggung-jawab, ai gabe holan dirinasida di parmahani, ndada birubiru na sahat
tu nasida. Ala ni gabe mampar ma bangso i songon na masa tu Israel Utara (10
marga) na ditaban halak Assur taon taon 722 sM, dungi harajaon Juda (Israel
selatan si 2 marga) ditaban harajaon Babel taon 597 sM.
Mamereng partinaonan ni bangso i, ro ma panurirang
disuru Debata laho manorui angka pemimpin i songon angka parmahan pangansi
manang pamangus na so bertanggungjawab. Mansai posi do hata ni angka panurirang
tu nasida, songon na dapot di Jeremia 23 : 1 d.u. Didok disi: “Marjea ma angka
parmahan na mangago dohot paserakhon angka birubiru na pinasahat ni Jahowa tu
nasida, jala ingkon luluhonon ni Jahowa do tu nasida hinajahat ni
pambahenannasida i. Saut do i masa, ai gabe do sude angka raja ni bangso i,
paima disuru Debata muse sada raja na tigor, sada tumbur sian pinompar ni si
Daud na pajongjonghon uhum dohot hatigoran di sandok tano on (Jer.23:5).
Umposi do pe muse lumbalumba ni panurirang
Hesekiel. Sahalak malim do ibana na dohot tartaban tu huta Babel dung malekse
huta Jerusalem dohot bagas joro na disi. Dungi di pabangkit Debata ma ibana di
habuangan i gabe panurirang sipatolhas hata ni Debata tu bangso i. Mansai koras
situtu do hatana tu angka pamimpin ni bangso i, ai alana nasida do umbahen susa
jala manaon na porsuk bangso i. Hajahaton ni angka parmahan, ndada holan ala so
diparmahan bangso i, baliksa tahe diseati nasida do angka birubiru ibahen
panganonna, dipuputi imbuluna bahen pahean nasida. Sandok tahe mokmohan nasida
jala mamora. Hape dipasombu do nasida songon i, ndang disarihon panjampalan
nasida, angka na gale ndang dipargogoi, na marsahit ndang didaoni, na mabugang
ndang dililiti, na tardempar ndang diboan mulak, jala na mago ndang dilului.
Sandok mansai koras jala podsi tahe pangarajai nasida di bangso i. Ala ni i
ingkon marjea ma nasida manjalo uhum sian Debata (Hes.34:1-10). Alai ala gok
asi ni roha do Jahowa ni bangsona, dipasahat do hata apulapul tu bangso i
marhite panurirang Hesekiel. Dilehon do tu nasida panghirimon asa unang mandele
nasida di habuangan i, ai paluaon ni Jahowa do nasida sian tano na leban i tu
tano bagabaga ni Debata. Debata sandiri ma na gabe parmahan di nasida,
patuduhon parmahanion ni Jahowa songon parmahan na tutu na gok asi dohot holong
ni roha di na pinarmahanna.
B.
Hatorangan
1) Ayat
11; Jahowa sandiri ma na turun manangani punguan ni birubiru i, ima bangsona.
Ndang adong be figur ni jolma na tau gabe sipadomu Jahowa tu bangsona. Ibana ma
gabe parmahan na sintong paujunghon nasa parmahanion na sala. Ibana ma na mangaradoti
sandok parngoluon ni bangsona marhite uhum hasintongan dohot hatigoran. Debata
sandiri ma na “usouso” di bangsona naung marserak i, jala “lulululu” di
bangsona naung mago i. Hata “usousoi”
dohot “lulululu” ima manggombarhon ulaon ni parmahan na sasintongna. Ingkon sai
tongtong do usouso sahalak parmahan di na pinarmahanna. Usouso marlapatan do i
manangkasi na pinarmahanna ganup marsadasada, manang na sonang jala tongtong do
disi nasida saluhutna, betak tung adong na lilu asa dilului, manang na tardempar
asa diusahahon mamboan mulak.
2) Ayat
12-13. Ndang lomo roha ni Jahowa adong na sian tongatonga ni bangsoNa i na mago
manang tardempar. Jadi songon pangalului ni sahalak parmahan na denggan na so
manghalomohon sada pe sian birubiruna mago, songon i do pangalului ni Jahowa di
bangsoNa. Ala ni i, di na tarbuang bangso i tu huta Babel, didapothon Jahowa do
nasida tusi, jala dijanjihon do ingkon paluaonna nasida sian habuangan i.
Tingki parserahan ni bnangso i tu habuangan digoari do i di turpuk on, “uju di ari ombun dohot haholomon
marimpotimpot”. Di Hes.30:3, digoari do nang ari ni Jahowa “Ari na habot” (hari
dengan awan gelap), na hira dos lapatanna dohot na nidokna di turpukta on. Jala
dio bindu 13:5, digoari do ari ni Jahowa, ima ari helelekse ni huta Jerusalem
dohot hadadabu ni harajaon Juda, sahat ro di na marserak bangso i siala naung
agoan angka parmahanna.
Dibagasan
parmahanionna i, laos Jahowa sandiri do na manogihon jala papunguhon nasida
ruar sian angka inganan parserahanna i, ima sian tongatonga ni angka bangso,
sian angka luat, tu sada inganan haluaon na imbaru manang eksodus na imbaru,
marhitehite hagogoon ni tanganna. Pandohan na songon i jotjot do dihatahon
Jahowa tu bangso i marhite panurirang Hesekiel songon na tarida di bindu 20:34
dohot 41. Na marlapatan doi holan ala ni hagogoon manang huaso ni Jahowa
sambing na ma asa tarbahen nasida malua, ndada ala ni hagogoon nasida sandiri.
Mulak ma nasida manjampal di jampalan na pnarade ni Jahowa, ima di angka dolok
ni Israel jala minum di angka batang aek na adong disi, jala mian di bagasan
huta angka na diparade di luat i.
3) Ayat
14-15. Dung dipapungu Jahowa nasida sian desa na ualu, diparmahani ma nasida di
jampalan na lomak, jala diondihon maradophon angka musu. Di si ma nasida muse
mamungka parngoluon na imbaru jala berkembang . Diparade do nang pangulonan
nasida di ‘parudaman’ na denggan.Parudaman ima inganan parbornginan di ladang
na pinarade ni parmahan tu angka na pinarmahanna. Sandok singkop do disarihon
jala diparade Jahowa na ringkot di parngoluon ni bangsona. Jadi tung suharsuhar
ni na binahen ni angka parmahan pangansi (songon na tarida di ay.1-10). Ido na
binahen ni Jahowa tu bangso i. Molo tu angka parmahan pangansi i dilumbahon do
uhuman na posi, alai ianggo saonnari dilumbahon do tu bangsona i haluaon.
4) Ayat
16. Diulahon panurirang i do muse manghatahon ulaon parmahanion ni Jahowa, ima
suharsuhar ni na binahen angka parmahan pangansi na holan marmahan dirina
sandiri, jala na holan mangalului na tabo dohot paruntungan tu diri sian bangso
i, songon naung dihatahon di ayat 1 – 10, lumobi na diayat 4. Molo di ayat i,
dipataridahon hageduhon ni parmahan pangansi i, alai anggo na di ayat 16
denggan do digombarhon ulaon ni parmahan i. Unsurunsur ni siulaon i tutu hira
dos do, holan i, di ayat 14 dipajolo sikap maradophon angka na gale dohot na
marsahit, alai di ayat 16 dipajolo ulaon mangalului angka na mago dohot na
tardempar. Jadi ulaon parmahanion ni parmahan na denggan ima; mangalului na
mago, mamboan mulak na tardempar, mangaliliti na mabugang, mampargogoi manang
mandaoni na marsahit. Taringot tu sikap maradophon na mokmok dohot na gogo
adong parasingan ni terjemahan hata Batak dohot terjemahan ni hata Indonesia,
na manghorhon pangantusion na marasing. Dihata Batak didok (siaphononku), alai ianggo
dihata Indonesia didok “akan kulindungi”. Disura roha, diterjemahan hata Batak
i, hata “mokmok dohot na gogo” i martudutudu tu angka parmahan pangansi i do na
sai pamokmokhon dirina marhite na mangasahon gogo manggosagosa dohot mangonsop
mudar ni angka na pinarmahanna. Alai anggo terjemahan hata Indonesia i,
martudutudu tu sude angka birubiru na [inarmahan i do, na rap sarupa saluhutna
dapotan pangondianon (perlindungan) sian parmahan na denggan i. Jadi saluhutna
do bangso i, na lilu, na tardempar, na gale, na marsahit, na mokmok, na gogo,
rap dibagasan pangondianon ni Debata marhite uhum na sintong.
C.
Sipahusorhusoron
v Ia
goar ni minggunta ima Minggu Misericordias Domini, na marlapatan : “Gok asi ni
roha ni Jahowa do tano on”, na marojahan tu Psalm 33: 5b. Asi ni roha ni Jahowa
patar do i dibagasan parmahanionna di bangsona, namanarihon, marmudumudu,
paluahon, manogunogu, mangondihon di sandok parngoluonna. Ulaon na songon i
patar do tarida di sejarah ni bangso i. Alai usaha niJahowa laho pajongjonghon
sada bangso na bolon, jotjot do tarambat marhite kegagalan ni jolma, lumobi
angka pamimpin na pinabangkit ni Debata manguluhon nasida. Alai songon na
tarida di turpuk on, ndang sude bangso i hona uhum manang ditulak, holan angka
pemimpin na so bertanggungjawab na mambahen hasesega ni bangso i do. Ala ni i
ndang boi sundat manang gagal sangkap hatuaon ni Debata. Aha naung
sinangkapanna sian mulana ingkon mardalan doi jala marhasil. Gariada
penghianatan ni jolma laho manundati sangkap i, lam papatarhon kesetiaan dohot
asi ni rohaNa do tu bangso i dohot tu sude hajolmaon. Ala ni i do umbahen na
Ibana sandiri turun tangan laho papunguhon angka pasipasi na mangae ala ni
penindasan ni angka pamimpin na mangasahon gogo dohot huasona, dohot paluahon
angka naung marserak ala ni pungkulan na koras dohot linsinglinsing na posi.
v Pangaramotion
ni Debata laho marmahani bangso dohot sude hajolmaon patar ma i marhitehite
Jesus Kristus AnakNa i. Ibana do Parmahan na Denggan, songon na
hinatindanghonna di Johannes 10 i. Jala ndang holan hatahata panindangionna i,
ai tangkas do i dipatuduhon dipangulaonna di portibi on na mangalului angka na
mago, mangurupi angka na susa, mangalehon manang angka na male, mangalehon
minum angka na mauas, mangapuli angka na
marsak, mandaoni angka na marsahit, pangoluhon na mate, paluahon angka na hona
rante ni sibolis, ro diangka na hona gosagosa ni hagogoon portibi on. Jala laho
mangulahon i saluhutna rade do Ibana manaon, sahat ro di na maneahon hosana.
v Alai
songon ipe dipatupa Debata, diigil do sian haradeon mangihuthon parmahanionna.
Saluhut do angka na tarjou gabe bangso ni Debata naung gabe sada parsaoran di
huria i, angka na porsea di Jesus Kristus, laos tarjou gabe angka parmahan
maradophon sandok birubiru ni Debata. Adong do i na tarjou secara khusus gabe
angka parmahan, isara ni angka pimpinan ni huria, pimpinan ni masyarakat,
pimpinan ni bangso manang negara. Ala ni i ingkon pangkeon nasida nasa potensi
na asong di nasida, dihuaso, hapistrana, sinadongan, dohot angka na asing laho
marmahani angka na sahat tu nasida na gabe tanggungjawabna. Ala nang pe so sude
hita pemimpin secara formal ditongatonga ni huria dohot ditongatonga ni
masyarakat, songon halak Kristen hita, na porsea jala mangihuthon Jesus
Kristus, ingkon hangoluhononta parmahanion ni Jesus Kristus, marhite na adong
kepdulian tu angka na lilu di dalanna, na so dapot mangan, angka na pogos,
angka na gale, angka na marsahit, ro di saluhut tahe angka na dibagasan
hasusaan, marhitehite angka potensi manang silehonlehon na adong di hita. Sada
ancaman nuaeng tu ngolu parsaoran, ditongatonga huria nang ditongatonga ni
masyarakat, ima naung lam manipis jala lam mago panghilalaan na parduli tu
angka donganna na humaliang, ala naung dirajai roha laho mamingkirhon dirina
sandiri. Domu tusi lam torop halak na mangalului pangomoan manang paruntungan
tu dirina sian dalan na so sintong, atik parulaonna i gabe manegai parsaoran
nang donganna jolma. Tarlumobi angka na targoar pimpinan secara formal. Ala ni
i unang ma madabu hita angka halak Kristen i tu hahisapon ni huaso, Alai tatiru
ma songon Jesus Siparmahan na dengan i.Amen.
