Mananda
Debata Marhitehite Tangiang
Matius
7 : 7 – 10
A. Patujolo
Ia turpuk on ima bahagian ni
jamita dolok (Bindu 5-7), napinasahat ni Jesus tu angka siseanNa dohot na
torop, marrumanghon poda dohot pangajaran na mendasar jala marsaor tu tuntutan
etis (ruhut ni parange) na ingkon sibotoon, siingoton dohot sihangoluhononhon
halak Kristen. Mansai hona jala ampit do turpuk on di ganup ombas, sepanjang
zaman. Hinorhon ni isina na mansai uli
jala bagas, mansai torop do halak
Kristen manang so Kristen manguhal huhut mambahen poda jamita dolok i gabe poda
jala ojahan di ngoluna. Tontu sahali ala ni ulina dohot argana ma i dihilala,
na mansai marguna tu dirina, tu masyarakat dohot bangsona. I do umbahen digoari
angka pande bisuk dohot sidiori hata ni Debata Jamita Dolok i pangibulan
(pangarimpunan) ni poda taringot tu Harajaon Banuaginjang. Manang “gombaran”
bolon ni Harajaon Banuaginjang. Ala ni i do molo tauji manangkasi taringot tu
isi ni turpuk on, idaonta ma songon dia Tuhanta Jesus patorangkon taringot tu
ngolu ni halak Kristen na sintong di banuatonga on hombar tu rumang ni Harajaon
Banuaginjang.
Impola ni turpuk on ima : Martangiang. Didok Apostel Jakobus “Na martangiang do hamu nian, alai ndang manjalo, ala sala
tangiangmuna, ai naeng pansuasaehonmuna do i dibagasan hahisaponmuna” (Jak.4:3).
Jala sintong do Hata ni Tuhan Jesus mandok: “Manang aha pe dipangido hamu di tangiangmuna marhite GoarHu, asal
porsea hamu, ingkon jaloonmuna do” (Mat.11:24; Joh.14:14; 16:23). Ala ni i
do dijolo ni turpuk on dipatorang Tuhan Jesus lapatan ni na martangiang manang ngolu ni partangiangon
i, asa unang holan songon na pajojorhon nasida di hata ni tangiang i, alai asa
tutu dihangoluhon partangiangon i dibagasan sude aktivitas kehidupan. Diajari
Tuhan Jesus do hita mangido na ringkot tu harajaon ni Debata, asa ro harajaonNa
manggomgomi hita dohot huriaNa di portibi on. Asa lomo ni roha ni Debata ma na
manggomgomi rohanta dohot ngolunta. Jala diajari do hita mangido nasa na hasea
di ngolu siganup ari on, jala nunga dihamham pangidoan na pitu di “Tangiang Ale
Amanami” i sude nasa na ringkot di hita di pardagingon nang dohot di partondion
pe. Jala i ma sipapataron ni turpuk on tu hita di Minggu Rogate on.
B.
Hatorangan
1) Molo
tajaha ayat 7 on, adong do tabereng tolu dalan na niajarhon ni Tuhan Jesus laho martangiang, i ma
marhitehite pandohan “pangido hamu ma”, “lului hamu ma”, dohot “tuktukhi hamu
ma”. Molo tadapothon Debata huhut mangido pangurupion, tangiang do i. Molo
talului pangurupion sian nasa roha tu Debata, tangiang do i. Molo tatuktuk
pintu ni banuaginjang i asa dialusi Debata hita, tangiang do i. Saluhutna i
joujou manang kunci rahasia dohot hasintongan ni pangajarion/parenta ni Tuhan
Jesus (imperativus Dei), asa martangiang. Disosoi si partangiang i asa
bersemangat sian nasa roha, ndang holan menunjuk aspek emosional semata, alai
sikap dohot roha na marsitutu. Tung sura pe adong sabatsabat manang ambatambat dohot
kesulitan-kesulitan ingkon berusaha do ibana manaluhonsa. Ndang marguna
halosohon, ndang marguna halembaon, ndang denggan na marsanggasangga.
Partangiangon na manongtong ndang sahalisahali, i ma suruhan manang dasdas na
wajar ingkon ulahonon ni angka na mangihuthon Tuhan Jesus. Angka sisean, sude
halak Kristen ingkon do mangido
manongtong, mangalului manongtong, manuktuhi manongtong, ala jotjot do hita sai
manghaporluhon, jala porlu do hita mangido pangurupion sian Amanta na di
banuaginjang i. Jadi naeng ma gabe identitas manang jatidiri ni halak Kristen
i, jala sian nasa roha, ndang asalasalan (mampar roha), manang unang ma holan
mode sambing (songon halak Parise) dohot Sibotosurat, Luk.18:11) partangiangon
i. Debata Ama na di banuaginjang i do hasahatan dohot tujuan ni tangiang, Ibana
do na tuk mangalusi dohot mangungkap pintu ni harajaonNa.
2) Angka
tangiang na marpardomuan laho pasangaphon Debata dohot pahothon haporseaon, na
so marsanggasangga manang di tingki na tarsosak sambing hita martangiang, angka
pangidoan sisongon i do dioloi Debata. Tangiang i do dalan mambuka pintu
parsaoran na imbaru dohot Debata, mangido sipangidonta, panghubung di hita tu
Debata. Martangiang i ma pasahathon petisi (petition padanan kata “prayer”:
himbauan, usul atau permohonan), dohot aspirasinta i ma dambaan, pandapot dohot
sude panghilalaanta na denggan manang na so denggan dohot sude unekunek ni
rohanta. Aha pe isi ni aspirasi dohot petisi na tadok, ditangihon Debata do.
Dilehon do jaminan/kepastian taringot tu hasil ni tangiangta, i ma sai na
lehononaNa, sai na jumpangan, sai na ungkaponNa do. Ala ni i do umbahen na
didok angka ama ni Huria na parjolo i : Na margogo situtu do tangiang ni si
partangiang (partigor), molo dihaburjuhon. Dihorhon tangiang i do satonga ni
ulaon. Tangiang i do songon pelean uapna hushus di adopan ni Debata. Tangiang i
do dimensi keempat ni angka na porsea, noi manghatai dohot Debata na badia i.
3) Dipatudos
Tuhan Jesus do hajongjongan ni na mangido tu hasahatan ni pangidoanta, i ma
songon ama maradophon anakna. Songon i
ma gombaran hasolhoton ni parsaoranta tu Debata paboahaon na Amanta situtu
Ibana, jala anakna sistutu hita. Songon pos ni roha ni dakdanak tu amana songon
i ma pos ni rohanta mangido tu Ibana. Didok Tuhan Jesus: “Ise sian hamu jolma, na mangalehon batu tu anakna, molo indahan
dipangido, jala mangalehon ulok molo dengke dipangido?”. Ndang hea ama na
di portibi on mangalehon na sala tu ianakhonna, na jorbut/berbahaya, na
mematikan. Alai mangalehon sipanganon na pangoluhon do, i ma na mangalehon
indahan singkat ni batu dohot dengke singkat ni ulok. Dipatangkas Tuhan Jesus
marhite pandohan : “Gari hamu angka
parjahat umboto mangalehon basabasa na denggan tu anakhonmuna” (Parjahat di
hata Gorik: “paneros” lapatanna : sibolis manang na sibolison), boi do
pangantusion on songon na alo, suhar tu rohanta. Alai na naeng dohononna molo
gari hamu angka jolma manang angka ama na di portibi on (pardosa), na olo
sibolison, na so boi manongtong mangarajai dirina, terbatas do gogona,
sipatupaonna, jala na marpangansi manang marpangea pambahenanna, mangalehon
angka na uli tu anakhonna, jala angka nauli do dijalo anakna i sian amana.
4) Marhite
tudosan na mansai torang i, naeng patuduhon keakraban dohot hajojonok ni
pardomuan ni Debata na songon Ama tu hita angka AnakNa. Naung gabe anak ni
Debata do saluhut angka na porsea di Tuhan Jesus Kristus, jala ndang dibagasan
hubungan biologis. Ndang pe di pangke pandohan hata “teknos” dohot “pater” boi
marpardomuan tu kekeluargaan manang hubungan anak dohot ama dalam garis
keturunan. Lapatanna, naung gabe anak ni Debata do hita ndang ala garis
keturuna Israel , alai ala panobusionNa do. Dung ditobus gabe masuk ma na
porsea i tu sada parsaoran keluarga rap dohot Tuhanta Jesus na manjou Ama. Alai
manang ise na barani mangokui naung gabe anak ibana di adopan ni Debata ingkon
martanggungjawab ma ibana di angka pangalaho dohot ulaonna, i ma mangulahon
lomo ni roha ni Amana. Asa molo dung tadok Amang tu Debata, adong ma garis
manang hatontuan ni Ama i na ingkon dihangoluhon, i ma tangkas umboto dohot
manghatindanghon naung gabe tajalo tondi haanahon. Andul sumurung do Ama Debata
na di banuaginjang i sian ama na di portibi on. Ndang adong hasusaan di Ibana
molo martangiang hita tu Ibana. Gok asi dohot holong ni roha do Amanta na di
banuaginjang i maradophon hita, jala dibagabagahon do na tangihonon jala
alusanNa do tangiangta i. Ai Debata na jonok do Ibana na boi jouon jala jumpangan
di sude gerak kehidupan. Ala ni i ingkon pos situtu do rohanta di Ama i, na
mangalehon na dumenggan di ngolunta di portibi on, nang na marpardomuan tu
ngolu sogot sisalelengnilelengna. Tarida do i marhite pandohan di ujung ni ayat
11, didok: “lam Amamuna na dibanuaginjang
i ma so lehononna arta na denggan....”. Lehononna arta na denggan,
lehononNa tu hita Tondi Parbadia, i ma silehonlehon partondion na tumimbo jala na
umbalga. Marhite Tondi Parbadia i nunga di hita saluhut angka silehonlehon na
binagabagahon ni Tuhan Jesus tu hita dohot angka na naeng lehonon ni Ama i tu
hita.
C.
Sipahusorhusoron
Ø Rogate
lapatanna martangiang. Tangiang do ngolu ni halak Kristen manang na porsea.
Ulaon na manongtong do tangiang i dingolu ni na porsea. Ulaon na so
marpansandian i di ngolu ni jolma dohot Debata. Marhite tangiang i do jolma
manjou Debata na hinaposan ni rohana. Jala Debata na manangihon tangiang i,
lehononna do alus tu angka na manghaburjuhon i di tingki haheheonna be. Ala ni
i do ndang pola diaturhon tingki dohot
inganan sadihari/ didia hita martangiang. Zamanta nuaeng digoari zaman
informasi komunikasi na tarida sian kecanggihan alat komunikasi dohot
informasi, na mambahen potibi on hira sada kota na balga nama, ai sude
informasi sian sandok portibi on dapot hita holan marhite internet. Alai
satingkosna, jumago dope alat komunikasi ni halak Kristen. Nunga sian najolo
adong alat on, tanpa operator, ndang marbayar, tanpa pulsa, terbuka 24 jam,
tanpa veronica, tanpa tulalit, tanpa diluar jangkauan. Jala jarakna, ndang
tanggungtanggung. Sian banuatonga ssahat tu banuaginjang. Aha ma i? I ma
TANGIANG, ima alat komunikasi dua arah (timbal – balik) ni jolma dohot Debata.
Ø Martangiang
i ma pos ni rohanta di Debata na songon Ama di hita, ai ndang di bagasan
pangantusion paramaon na di portibi on sambing parsaoranta tu Debata, alai tung
sumurung sian i do. Na dumenggan, na umuli, na mauliutus do dilehon Debata alus
ni angka na rade sai mangido, mangulului, manuktuhi, di angka na martangiang
dibagasan tondi dohot hasintongan (Joh.4:24). Molo di dok dibagasan Tondi dohot
hasintongan na marlapatan doi; tangiang i diuduti marhite pangalaho na sai
mangoloi jala mangulahon parsuruon ni Debata dibagasan ngoluna siganup ari,
unang marpangalensem, mangulahon hatigoran. Lukas 6 : 46 “Boasa antong goaronmu
Ahu Tuhan, Tuhan, hape ndang diula hamu na Hudok ? Di na martangiang i naeng
patuduhononta ngolu na so holan mangido tu Debata alai huhut do niulahon
pangidoanNa marhite na mangolu dibagasan hasintongan ni Debata marhite HataNa
nan patikNa. Songon Raja Hiskia na barani do ibana manjalo hahipason ala ni
parsahitonna sian Debata. Dipaingot Ibana do Debata diangka parulaonna nang
ngoluna dibagasan hasintongan do. Dungi dilehon Debata ma hahipason nang ganjang
ni umur sahat tu 15 taon. Songoni nang ap.Paulus dohot si Silas nang dihurungan
pe nasida sai diingot do martangiang huhut mamuji Debata; nasida mandapot
haluaon sian hurungan i, na sotinagam hian (Ul.Ap.16: 19-34). Jak.5:16b “Na margogo situtu do tangiang ni angka
partigor, molo dihaburjuhon”. Taingot ma angka naposo ni Debata nang songon
si Jona, si Daniel, Elia dna. Ala ni i hita dina laho martangiang i ndada holan na mangido sian
Debata alai ingkon huhut do niulahon aha na pinangido Debata dibagasan ngolunta. Horas mar-Rogate ma dihita saluhtna.
Amen.
Ø Ende
BE. No. 487; BE.536; BE.632:2
; BE.636; BE.814;
