Asi
Ni Roha
Mateus
9 : 35 – 38
A.
Patujolo
Tuhan Jesus
tongtong patuduhon holong dohot asi niroha-Na tu situan natorop i. Nian di
angka bagian andorang so turpuk on, nunga tangkas tarida holong ni roha dohot
asi ni roha ni Tuhan Jesus tu angka jolma, lumobi tu angka na gale, na
marsitaonon dohot na marsahit, alai di turpuk on dipatangkas ma asi ni rohaNa i
marhite “instruksi” tu angka siseanNa, asa dohot nasida berbuat sesuatu na
denggan tu angka na patut siurupan di pardagingon dohot di partondion, di masa
depan.
B.
Hatorangan
1) Ayat
35; sada sifat manang pangalaho ni Tuhan Jesus na boi patut sitiruon ni hita
halak Kristen di ngolunta, ima: haringgason mangula dohot mamangke tingki
sdenggan-dengganna. Di turpuk on torang do dipatuduhon haringgason ni Tuhan
Jesus mangaliati tano i, huta dohot sosor, laho manjumpanghon jolma, asa
ajaran-Na di angka parguruan naung adong hian, dungi marhite i, “manariashon”
Barita Nauli (pat.Mark.16:15),na manaringoti taringot “Harajaon ni Debata”
manang :Harajaon Banua Ginjang”, laos songon i laho mangubati dohot pamalumhon
angka na marsahit dohot angka na martihas. Nang di tingki on tarmasuk do ciri
khas ni angka halak na porsea do Tuhan Jesus “haringgason” mamangke tingki laho
mangula angka ulaon na sahat tu ganup nasida be. Haringgason on nunga dihamham
i manajemen na teratur, bersih dohot na bertanggung-jawab, tarida ma i sian
pembagian kerja (pendelegasian) dohot di perencanaan na trasnparan jala
martanggung-jawab.
2) Ayat
36; Dinasa ulaon ni Tuhan Jesus, sai diondolhon do panarihon-Na di situan
natorop, na satia mangihuthon Ibana. Jadi haringgason mangaliati huta dohot
sosor ndang tarsirang i sian kemanusiaan dohot parasinirohaon (diakoni).
Marhite turpuk on tangkas diondolhon, na parasi roha situtu do Tuhanta i di
jolma. Asi ni roha ni Tuhan Jesus ndnag tarsirang i sian roha na maheu
(marsitutu) marnida angka jolma na marparniahapan manang marsitaonon dohot
angka na marhinamago hinorhon ni manang aha pe i. Ai angka jolma sisongon on,
tudos do i tu angka birubiru na so marparmahan, na marserak jala na diancam ni
mara sian angka babiat panoro, na sai maotaot mangalului sipolgahonna. Ala ni i
nunga laos diondolhon turpuk on muse, na Tuhan Jesus do “Parmahan” na tutu
(pat.Joh.10:11-14)Pslm.23:1 djb), na manarihon ngolu ni angka na pinarmahanNa
arian dohot borngin, jala na olo maneahon diri-Na humophop angka birubiruNa.
3) Ayat
37; Dipatuduhon Jesus do bidang ni siulaon ni angka siseanNa tu tingki na ro.
Dung diida Jesus natorop i, na satia mangihuthon Ibana, dihatahon Jesus ma na
marpardomuan tu tingki na naeng ro, siulahon ni angka sisean-Na i. Songon godang
ni natorop mangihuthon Ibana i, nunga dibereng Tuhan Jesus dao nang tu jolo,
paboa na godang situtu nama na mangihuthon jala na porsea di Ibana marhite
Huria-Na i, hape anggo na marmahani nasida mansai otik do. Sada statement
(penegasan) do on, jala sekaligus panurirangon tu jolo, paboa angka ruas ni
Huria-Na i lam tu balgana do, alai na tutu siparmahan manang pangula na
tongtong marpanarihon, sai tong do otik.
4) Ayat
38: Ala ni i dilehon do instruksi tu angka sisean-Na i, asa unang mansadi
nasida”mangelekelek” nampuna sisabion i, asa dipaborhat angka pangula na burju
tu sisabion i. Marhite pandohan i nunga tangkas be ulaon ni angka na porsea
dohot angka na tarjou gabe sisean-Na, i ma mangaradoti hubungan na denggan
dohot Debata, jala ndang marnaloja mangido dohot mangelekelek marhite tangiang
(Mat.7:7), asa sai dipaborhat Ibana angka oangulka tu sisabion i. Dohot
pandohan i diondolhon do; paboa na Debata do nampuna sisabion i “Subjek” ,
dohot nampuna hak manontuhon dohot paborhathon angka pangula tu “porlak
anggur-na” i. Nunga dibereng Tuuhan Jesus Huria masa depan marhite pandohan-Na
on, paboa ndada jolma na manjou dohot mamillit na gabe “parhalado-Na” di
huria-Na i, alai Debata sandiri do.
C.
Sipahusorhusoron
v
Haringgashon ma mamaritahon Barita na Uli i;
Haringgason mangula dohot mamangke tingki do sada hal na songon identitas
manang hadirion ni halak Kristen sasintongna, na ingkon tiruonta sian Tuhan
Jesus, Raja ni Huria i. Tung so dihalomohon Tuhanta i do angka jolma si losok
dohot sigurbak ulu, i ma angka jolma na so parduli di arga ni tingki. Tarmasuk
do tusi si losok dohot sigurbaj ulu angka jolma na pasudasuda tingkina di
lapolapo sian manogot sahat tu borngin, holan ala ni marpollung tubu
boti,manang ala ni na mamingkirmingkiri nomor-nomor ni toto gelap, songon i
na minumminum tuak manang miras sahat tu
na olo mabukmabuk. Panghorhon ni pangalaho na losok marhite na pasudasuda
tingki na songon on, mangihut do tusi angka ulaon na maralo tu Patik dohot Hata
ni Debata, isarana: mura ma muruk muruk manang emosi, nang tu anggota keluarga
di jabuna be, laos songon i tu donganna. Ndada holan i, mura do halak na songon
on nang marhata baraksi manang marhata kasar tu pardihutana manang tu
ianangkonna, jala molo dung terlalu hamubahonna i, boi do sahat ro di tu na
menyakiti dohot mambunu. Dia do dalananna, asa unang madabu hita tu pangalaho
na songon i ? Naeng ma nian hita ringgas gabe “Parbarita na Uli”. Didok di
Markus 16:15 ; “Jadi ninna Tuhan Jesus mandok nasida: “Laho ma hamu tu liat
portibi on; jamitahon hamu ma Barita na Uli i tu nasa na tinompa”. Marhite
pandohan i, boi dohonon, na sude do angka sisean ni Tuhan Jesus gabe Parbarita
na Uli kontemporer (masa kini), so pola gabe Pandita, Guru Huria, Bibelvrouw
dohot Diakones manang Sintua rupani. Songon dia ma pangalaho ni i? Parbarita
nauli ma jolo hita jumolo ditongatonga ni jabunta dohot keluarganta. Nunga gabe
Parbarita na Uli Ama dohot Ina tu angka ianakhonna, molo orang tua (natoras) i
tongtong panutan manang sitiruon di sude panggulmiton ni ngolu i tu
ianangkhonna: sitiruon di haringgason mangula, di haiason, di kejujuran, di
holong ni roha, di asi ni roha, di panghataion, di sikap tingkah-laku na denggan
dohot di angka pambahenan na tarpuji. Nunga gabe Parbarita na Uli nang angka
ianakhon, molo sai tong masiantusan, masiurupan di angka ulaon, molo sioloi
ajar, molo sai sopan di panghataion, molo dihasabamhon na adong, na pinarade ni
natorasna, molo so olo murukmuruk mangalo natorasna. Taboto ma, jotjot jala
tompu do sipata ama manang ina di keluarga gabe stroke manang lumpuh, ala ni
arsak ni rohana marnida angka pangalaho ni anakhon nasida, namanimbil sian
angka podana, na so marojahan tu Hata ni Debata. Torus do masa angka na songon
on sahat tu tingkinta on. Asa boi hhita gabe Parbarita na Uli”kontemporer” tu
na humaliang hita di tingki on, ingkon jumolo do hita dohot dirinta/
keluarganta i ringgas mar-Hata ni Debata, di tingki rap marsipanganon. Molo tung
so boi tolu hali sadari nanggo apala sahali sadari, jala molo tung so boi
sahali sadari, nanggo apala sahali saminggu. Ima haringgason na marojahan tu
Hata ni Debata, na pinaboa ni jamita sadarion. Laos singotsingot ma on tu angka
Parhalado, lumobi Pandita, Guru Huria dohot pangula na gok tingki na asing, asa
diharinggasson panopotion (penggembalaan) tu angka ruas ni Huria, nang na hipas
dohot na marsahit, paradongan dohot angka na pogos. Naeng diboto angka Pandita
mangatur tingkina jala manontuhon na “prioritas” siulaonna di Huria i.
v
Lehon roham manatap angka na maheu ditongatonga
ni Huria i; Jotjot do hita halak Batak Kristen holan paboaboa pardangolan,
parungkilon dohot sitaononna sandiri, sai hira hitanama bna umparir di portibi
on. Jamita on naeng paingothon hita; paboa tung mansai torop dope jolma na
lumobi parungkilonna dohot sitaononna sian hita. Memang adong do sada bangko
dohot pangalaho ni hita Batak paturetureonta dohot sitingkathononta dope, ima
roha diri jala materialistis/konsmeristis, na sai mangahut tu diri, ai molo
adong taboto paruntungan, pintor tadok do, paling saotik dibagasan roha: “Aha
di ahu....”, ndang tardok rupani: “Aha do na boi lehononku tu halak an, tu
donganku...” Nunga tibu disarihon Hurianta HKBP manatap angka na maheu dohot na
marungkil marhite ulaon Diakonia-Sosial, asa marhite i rap hita manarihon angka
na patut sisarihononta, songon tu Panti Asuhan Elim, Hephata dohot angka
pangula na suda gogo. Molo tung so tarlehon hita pangurupion materi na godang,
pinomat naeng sai taingot, dung i tatangianghon. Taingot Hata ni Tuhan Jesus na
di Mateus 25: 40 i: “Nasa na binahenmuna tu sada sian angging-Ku angka na
metmet on, na tu Ahu do i dibahen hamu”.
v
Sai tu Debata sitolusada i pasahat
pangidoanmuna: Nang [e naung martaontaon hita Kristen jala sai tadok do : “Tuhan
i do haroroan ni saluhut na adong di ahu/hami.....” alai sadar manang so sadar
boi do diela sibolis i hita, asa tapasahat pangidoanta tu hagogoon na asing,
isara tu datu, pangarunding, paranormal, dohot tu angka inaganan na dianggap “keramat”,
songon Gunung Kidul, Dolok Tolong dohot angka parsombaon na asing, ia so i tu
kuburan ni omppungna. Ia so i olo dope torop halak Kristen maniop ragam ni “bulebule”,
dohot angka na ginoaran “pitonggam” ni daging. Marhite i nunga taulahon na
maralo tu Patik ni Debata na parjolo sahat tu na patoluhon i, na mandok : “Ahu
do Jahowa Debatam, ndang jadi marangkup Ahu Jahowa Debatam....” Ala ni i, holan
tu Debata Sitolusada i do hita marhaposan dohot marhuraja sian nasa roha (Psalm
37:5 “Pasahat ma dalanmu tu Jahowa jala haposi Ibana, asa Ibana paturehon”).
Unang ganggu hita disi, unang songon na maniop ri alangalang gomos, alangalang
lumbang gabe di seat tangan i maon. Unang songon aek na “dangoldangol sisilon”
(Pangk.3:15), ndang tabo inumon, alai sahali hita porsea di Debata Sitolusada
i, torus ma hita hot porsea disi, manang aha pe na masa, ai tongtong do satia
Ibana mangalehon na ringkot di ngolu pardagingon dohot partondion. Ala ni i
girgir jalamanongtong ma hita mangido dohot mandok mauliate di tangiangta na
taatur tu Debata Sitolusada i ganup ari. Amen.
