Dipintori Ala ni Haporseaon
Dibenarkan Karena Iman
Rom 4: 1 – 5 , 13
– 17
A. Patujolo
Halak Kristen na mian di Huta Rom
ima angka halak na marharoroan sian ragam bangso. Halak Kristen ima ala tubu sian latar belakang
na manghangoluhon haporseaon dohot
hasomalanna najolo. Adong na tubu marhite ajaran laho mamelehon tu angka debata
sileban. Adong do muse halak Jahudi na tutbu marhite ajaran na sai
mangharingkothon ruhutruhut nang patik na mansai ketat. Marhite i diondolhon do
tu pambahenan ni jolma i mansai balga. Marparulaon jolma i asa dipintori
diadopan ni Debata. Disituasi pangalaho sisongon i, Apostel Paulus naeng
manguba pamikiron ni halak Kristen di Rom hatiha i. Naung leleng sian
pangantusion ruas di Rom, ia si Abraham dipintori siala pambahenanna. Alai
Ap.Paulus mangondolhon ia Abraham dipintori marhite haporseaonna tu Debata.
Pamintoron disi Abraham ndada ala ni gogona na patupa siulaonna, alai
haporseaonna tu Debata. Haunduhon nang pangoloionna di patik nang padan ni
Debata ima na mansai ringkot diingot jala manotophon Abraham gabe ama ni nasa
bangso na porsea.
B. Hatorangan
1) Ay.1-5: dison dipeakhon do dasor
na gabe bukti ni si Paulus, ia Bibel i do na manghatindanghon hapintoron na
sian haporseaon i, na marharoroan sian pengalaman ni si Abraham.
2) Ay.2 : manggombarhon penafsiran
somal sian halak Jahudi taringot tu si Abraham songon pandohan nasida; na tama
do si Abraham mananggulhon dibagasan Debata ala pangoloionna di uhumNa. Alai
ditulak si Paulus do pangantusion sisongon i “diadopan ni Debata. Dipasahat
ibana ma pandapot ni Debata di 1 Musa 15: 6 - Jadi porsea ma si Abram di Jahowa, gabe hatigoranna do i dietong
Jahowa.
2)Dijangkon Debata do si Abraham
songon halak na dipintori ala naung porsea ibana di padan ni Debata dina
lehononNa pinompar na torop nang pe na haol do si Sara pardihutana dohot na so
adong dope hasosorang ni dakdanak dibagasna. Pangkat na gabe halak na pintor i sada
silehonlehon na luarbiasa situtu.
3) Ayat 4, dipaingot Ap.Paulus do
taringot tu dua ragam silehonlehon: upa dohot hadiah. Molo upa sian parkarejoan
ima songon hak ni sasahaak na boi sajo do ditanggulhon nasida. Alai haporseaon
i nadada na mangula. Dibagasan Kristus ditawarhon Debata do status ni halak na
dipintori songon silehonlehon. Silehoonlehon i dipasahat tu angka parjahat
(songon halak na so sian Jahudi), jala ndang gabe dasorna laho manengahon diri.
Haporseaon tu Kristus lapatanna mamposisihon diri songon halak pardosa.
4) Dung dipatorang ia si Abraham
dipintori andorang disunat, dipatorang si Paulus di ay.13 padan ni Debata tu si
Abraham. Ia padan i: ibana tumean (mewarisi dunia) ptds. 1 Musa 12:1, 7; 15:7.
Di Hata Heber ‘arets’ na marlapatan tano, negeri, ima tano Kanaan, alai
dibereng Paulus do tujuan ni Debata ima tu sandok portibi on. Sangkap na adong
di padan ni Debata sian mulana asa saluhut jolma di portibi on dipasupasu
dibagasan Abraham (1 Musa 12:3), jala timbul do i tangkas di angka panurirang.
Hasongkalon ni padan i do na gabe dasor asa hapintoron i mansai ringkot.
Diparrohahon si Paulus do padan i na niulangkon tu si Abraham uju haporseaonna
i dietong songon hapintoran, dao sian masa parsunaton.
5) Dung i (ay.14-15), dipartongtanghon
si paulus do Patik dohot padan i. Ia patik i na gabe milik ni halak Jahudi alai
holan na boi papatarhon hadosaon nasida uju dilaosi asa hona rimasan ni Debata
nasida jala ndang taruli di padan i. Na diharingkothon cara na so marhite sian
patik asa ndang adong be pangalaosion na manggotaphon hita manjalo padan i. Ido
na dimungkinkan ni haporseaon marhite asi ni roha i, asa padan i dilehon songon
silehonlehon nang tu angka pardosa.
6) Ay.16-17 : Marhite i, padan na tu
si Abraham ndang batal siala pardagingon ni halak Israel, alai ungkap do i tu
halak na so sian Jahudi na marhaporseaon songon si Abraham (ay.16-17a). Na
dihaporseai ima Debata na margogo paubahon na so adong manang na mate gabe
mangolu (17b). Na hol do si Sara na gabe tubuan anak jala hamamate ni Jesus na naung
dipahehe sian na mate gabe hapataran ni ganup hita nang si Abraham.
C. Sipahusorhusoron
1. Mansai doras do usaho ni si Paulus laho patoranghon tu
halak Jahudi asa unang gabe mangasahon patik gabe dalan hapintoranna. Isarana
marhite piga piga turpuk sian Bibelta i:
Ø Galatia 2:16 Alai on do huboto
hami: Sian haporseaon di Jesus Kristus sambing do dapotan hapintoron jolma,
ndada sian ulaon patik. Dibahen i, nang hami gabe porsea di Kristus Jesus i,
asa dipintori hami, sian haporseaon di Kristus i, ndada sian ulaon patik: Ai
ndang dapotan hapintoron nasa na mardaging, anggo sian ulaon patik.
Ø Galatia 2:21 Ndang hubolongkon
asi ni roha ni Debata; ai aut adong hatigoran marhite sian patik i, magopo ma
hamamate ni Kristus i.
Ø Efesus 2:8-9; Ai sian asi ni roha
do, umbahen na malua hamu, dalan haporseaon; jala ndada binahenmuna,
silehonlehon ni Debata do. Nda tung sian
parulaon i, asa unang adong na mamuji diri.
Ø Rom 3:28 Asa on do dijujur
rohanta: Haporseaon i do mamintori jolma, ndada na mangulahon patik.
Ø Galatia 3:11 Alai tandap do, na so adong dapotan
hatigoran di jolo ni Debata, bahenon ni patik i; ai "na mangolu ma
partigor i sian haporseaon!"
Ø
Di haposi jala dihaporseai Ap.paulus do ia haporseaonta
na tu Jesus Kristus i, Anak ni Debata Ama i ido na gabe hinsu ni panobusion
dohot hasesaan ni dosa nang hajahaton ni jolma. Ala ni i sian haporseaonta tu
Ibana i asa dipintori hita.
2. Alai molo tabandingkon
pandohan ni si paulus on dohot na dipatorang surat Jakobus. Songon na
bertentangan manang paradoks. Tangkas ma ingkon botoonta tujuan ni si Paulus
ima ia parulaon na denggan i (patik) ndang marlapatan molo soada asi ni roha ni
Debata dibagasan Jesus Kristus najinalona. Molo si Jakobus menekankan ia
parulaon na denggan ima na gabe sada parbue na naung dipalua Debata hita sian
dosanta manang tanda ni halak na naung manjanghon Kristus Jesus dibagasan
ngoluna.
3. Sai tapingkiri ma na
pinatorang ni Ap.Paulus on uju didok ibana pandohan ‘dipintori’ sai hira na
dibagasan persidangan. Lapatanna, halak na marsala do hita, pardosa na godang,
alai ala ni haporseaonnta i gabe dipintori hita, ndang dietong be hasalaannta.
Haporseaonta i ima dibagasan Jesus Kristus. Haporseaonta i mambuha dalan
haroroan ni asi ni roha, na mamintori hita sian halak pardosa, on ma balga ni
asi ni roha ni Debata tu hita. Angka halak naung manjali asi ni roha ni Debata
mandapot hapintoran manghorhon panjouon tu dirina laho asa lam malo mamangke
ngolungolu siganup ari tu parange nang pangalaho na imbaru na hombar tu
haporseaon na paluahon ibana sian gomgoman ni dosa i. Ala ni i ndung dipintori
hita, laos udut ma tu na mamparjuanghon haimbaruon i.Mansai rahis jala maol do
nian. Songon Buku Endenta : BE 242 RAHIS JALA MAOL
v Rahis jala maol tutu, dalan tu banuaginjang
Na martua situtu, angka na disi mardalan
Mangihuthon Jesus i, sahat tu ujungna i.
v Upa na sumurung i, dapot na burju marroha
Maralohon dosa i, dohot hisap ni dagingna
Na tongtong mangkirim, di sanggul hamonangan i
Ala maol do dalan i, pola do digombarhon si Paulus ‘panaritaan’.
Ndada na marlapatan halak Kristen manomba ‘panaritaan’ i, alai boha do halak
Kristen i boi, mampu jala barani mangadopi, mengelola angka sitaonon,
hinabernit, nang panaritaan i marhitehite haporseaon tu Debata Ama dibagasan
Jesus Kristus asa marurat na togu huhut marparbuehon pasupasu. Diondolhon
Ap.Paulus do, ia uju pardosa hita naung dibasabasahon do asi ni rohaNa, lam ma
hita angka naung dipintori, sai na rade do asi ni roha na marbualbual sian
Debata Jahowa dibagasan Jesus Kristus. Amen.
No. 183: 1 – 3 “Na Jumpang Au” BL.No. 105
v Na jumpang au na asi roha; Di au naung mago i hian
Tuhan Jesus parasi roha; Di au
na lilu nahinan
Nuaeng hutanda Tuhanki; Parasi roha
bolon i; Parasi roha bolon i
v Dibahen godang ni dosangku; Tung hona uhum au tama
Hape ro Jesus dipadomu; Au muse
dohot Debata
MudarNa na badia i; Pajongjong pardomuan i; Pajongjong pardomuan i
v On pe holan asi ni roha; Sipangasahononhon i
Sipujionku do Jahowa; Dung ro na
pamanathon i
Unduk huhut las rohangki; Mamuji
asiroha i; Mamuji asiroha i
