Marsomba Sian Nasa Roha Tu Debata
Johannes 4: 20 – 26
A. Patujolo
Evangelium Johannes bindu 4 mamaritahon dialog ni Jesus
dohot sahalak boru Samaria di topi ni Sumur Jakob. Adong do angka pangalaosion
na niulahon nasida na dua: na parjolo, sahalak baoa na manghatahatai paduadua
dohot sahalak parompuan. Napaduahon, halak Jahudi na manghatahatai dohot halak
Samaria sian naung diaturhon asa ndang marsiantoan. Jala na umborat disi ima
‘sahalak gru’ na manghatahatai dohot ‘sahalak sibabijalang’; lima hali muli,
jala hatiha i na marroharoha do parompuan i dohot sahalak baoa na so hamulianna.
Alai marhasil do mentransformasi parngoluon ni parompuan i, molo sian tradisi huria
Ortodoks, na margoar Photini. Huria Ortodoks manodo nasida dohot lima na
marhahamaranggi dohot dua ianakhonna gabe parhobas na ginoaran santo/santa na
marbarita na uli di Asia na metmet pola sahat torop halak na porsea tu Tuhan.
Jala goarna i do dibahen manggoari inganan parjumpanganna dohot Jesus: “St.
Photini Church at Bir Ya’qub”.
Dibereng Jesus do parompuan n amargoar Pothini na bulus
marroha jala so pola siuhumonnNa. Baliksa di transformasi Jesus do dirina asa
gabe sahalak parbarita na uli na tangkas pangulaonna naung tarida sahat tu
tingki on. Nang sejarah ni Bibelta i pe manhatindanghon angka na mabalu i
songon tiruan, isarana si Rahab na targoar sahalak parompuan sibabijalang alai targoar
do di silsilah ni Jesus (Mat.1:5), suang songon i si Rut, nang Ina Sarfat na
mabalu i, dna. Ala ni ima berengonta angka na mabalu di parulaonna so pola
uhumanta nasida, siala Jesus pe ndang manguhumuhumi Pothini.
B. Hatorangan
1) Pandohan ni Jesus na mansai koras
i mangungkap identitasna na sasintongna dohot dosana ndanda mambahen paromuan
Samaria na margoar Pothini gabe tersinggung manang gabe muruk. Alai pandohan ni
Jesus i mambahen ungkap rohana jala dame. Dihaposi ibana do na sopola luluan ni
Jesus angka hasalaanna manang dosana asa uhumonna. Alai pandohan ni Jesus i patuduhon
hadirion ni Jesus na sasintongna. Ima na manggora roha ni parompuan i, na las
do rohana, jala longang asa tarjolm ma ibana laho manghatindanghon diadopanna
sandiri na dipapatar Jesus do diri ni parompuan i na gok dosa, na so pola
hosomanna Jesus. Mansai las do roha, nang kebanggan ni parompuan i marnida
Jesus huhut sombaonna. Ala naung ditomu ibana alus ni godang sungkunsungkun ni
torop jolma halak Jahudi nang di Israel na mangalului taringot tu Mesias i. Nunga
jongjong paadop bohi ibana dohot Mesias i. Asa laos porsea ma parompuan Samaria
i jala hehe marbarita taringot tu Jesus Kristus dohot hasintonganna. Marhite i
ma lam torop jolma na porsea dohot na mangihuthon Jesus. Asa lam martamba ma
bilangan ni sisean ni Jesus.
2)
Ingan Sumur ni si Jakob i gabe inganan parsombaon tu Debata marsundut
sundut. Ala uju didapot si Jakob inganan i sian Sikhem (Sikhar), dipajongjong
ibana ma disi langgatan na digoari Debata Israel i ma Debata. Alai didok Jesus
ia ianganan parsombaon nasida ndada be holan disi, manang di Jerusalem dohot di
Gerizim, alai di sude inganan dia pe. Ala na manontuhon parsombaon na sintong
ndada ala ni inganan alai di substansina
ima na manomba dibagasan Tondi dohot hasintongan.
3)
Didok Jesus, halak Samaria manomba na so tinanda nasida. Siala Debata na
sintong ima Debata na disomba halak Jahudi. Sia ala ni i, holan Debata Jahowa i
do na patut si sombaon jala dipasangap marhite Tondi dohot hasintongan. Ala
Debat do Tondi i, asa ruasNa i pe manomba Ibana dibagasan Tondi dohot
hasintongan. Lapatanna asa sombaonta Ibana dibagasan ngolu na marhabadiaon. Ingkon
marhamubaon ni roha ma hita asa boi ro manomba Ibana dibagasan bulus ni roha
nang pasahathon diri saluhutna di Ibana. Siala Ibana do Debata na mansai burju
na olo manesa sude dosanta jala mangalehon tanganNa na gogo i jala na marhuaso
i laho manogunogu dohot paluahon hita sian mara, uhum na manongtong i sian
dosanta. Asa molo marhamubaon ni roha hita jala gabe porsea, asa roha nang
pingkiranta pe fokus holan tu Debata.
4)
Sai ro ma hita marsomba tu adopanNa dibagasan Tondi dohot hasintonganNa.
Mangolu dibagasan Ibana, tasomba ma Ibana dinasa inganan, partingkian, nang
dinasa masa aha pe dibagasan Tondi dohot hasintonganNa ima na dihalaomohon
Debata. Dipaingot Jesus Jesus do Photini laos mangajarhon ia sude halak na
porsea di Ibana ima angka siihuthon Jesus asa manomba Debata dibagasan Tondi
dohot hasintonganNa. Taringot tu parsombaon ndada ditontuhon inganan, alai na
rumingkot ima tujuan ni parsombaon dohot caranta manomba ima holan tu Ibana
sambing. Dibagsan parsombaon tujuan dohot fokus ni rohanta ima holan tu Tuhan
i. Dipaingot Tuhanta Jesus do ia pelean parsombaon na sintong nada songon nauju
i be marhite mamelehon anga binatang, juhut, dohot lan na asing, jala ndada di
inganan na tertentu. Siala na rumingkot ima mamelehon pamatang nang dirinta
sandiri. Tapelehon dirinta, disi ma parange, pangalaho, lapatanna asa saurdot
ma dohot Hata ni Debata. Asa saluhut na taulahon dohot na tapatupa tongtong ma
hombar tu lomo ni roha ni Kristus, tapauduhon ngolu ni biar mi Debata. Ima
parsombaon na sintong, mamelehon pamatang, tondi nang rohanta marhite na
mangulahon hasintongan ni Debata. Ndang meret sian hatigoran i tu hambirang
manang tu siamun alai hot tongtong tu hamuliaon ni Tuhan i. Saluhut na tapatupa
holan laho pasonanghon roha ni Tuhan i huhut pasangaphon Ibana. Jadi na
rumingkot ima parulaon nang parngoluonta i na hombar tu lomo ni roha ni Tuhan
i. Peleanta ima pelean pambahenan na tama di adopan ni Tuhan i, mangolu hombar
tu lomo ni roha ni Kristus jala hormat holan laho tu hasangaponNa i.
C. Sipahusorhusoron
1) Hasintongan ndang adong di jolma,
hasintongan holan milik ni Tuhan i do. Torop do jolma mangalului hasintonganna
na hombar tu pikiran, perasaan, tradisi, hasomalan ni portibi on. Alai di hita
angka na porsea hasintongan nang hatigoran i holan dibagasan Tuhan i do. Boi do
sahalak pandita marjamita dohot sintong, alai ngoluna belum tentu dibagasan
hasintongan. Mananng sabalikna sahalak pandita na mangolu dibagasan hasintongan
alai jamitana nang ajaranna ndang sintong. Ala hasintongan di rohana sambing do
ndang margantung tu pambahenan ni halak na paboahonsa. Molo sintong do
hasintongan i ndang pola adong dukungan sian manang aha pe, ala nunga disi
hasintonganna. Hata ni Debata sintong, ndada ala ni pandohan ni angka jolma i
sintong. Lapatanna ndada ala pengakuanta gabe sintong ma Hata ni Debata i. Ala
nunga hasintongan Hata ni Debata i. Ala ni i unang pola ragu be hita di Hata ni
Debata, ndang pola godang sungkunsungkun di Hata ni Debata. Olo do sipata
pagodanghu sungkunsungkun ni ruas di Hata ni Debata sai hira meragukan
hasintongan ni Hata ni Tuhan i.
2) Goar ni minggunta ima Minggu
Okuli lapatanna; sai mangaranapi do matangku dompak Jahowa – Pslm.25:15a. Asa
dompak Debata ma berengon nang tataponta asa mangolu hita dibagasan hasintongan
marhitehite Tuhanta Jesus Kristus i. Ai so adong hasintonganta ia so holan
marhite Ibana na pasintonghon hita marhite mudar ni Jesus i. Molo sian dirinta,
ai gok dosa pangalaosion do hita. Unang sai tatap di toru, nanag di portibi on,
asa unang loas di palindaklindak portibi on hita dohot sibolis i maon gabe mara
di hita. Alai sai tatapaonta, jala berengonta dompak Jesus i na gok hamuliaon,
hasongkalon, hasangapon, nang haluaon dohot las ni rohanta.(Ptds. Joh.14:8).
Tasomba ma Ibana sian nasa rohanta. Amen.
