Dipintori Marhite Haporseaon
Psalmen 121: 1 – 8
A. Patujolo
Didok parpslamen; Sai mangaranapi
do matangku dompak angka dolok laho mangalului pangurupion. Molo dipaujung
panurat on dohot sada kesimpulan, ia Debata do na manjaga uju haruar dohot
bongotmu sian sadari on sahat ro di saleleng ni lelengna. On pe ingkon gabe
siingoton di haporseaonta na mangolu. Na gabe sungkun sungkun, songon dia do
haporseaon na mangolu i ? Hita halak na porsea sai digoari do na marhaporseaon
tu Debata. Boni ni haporseaon na disuanhon Tuhan Debata dibagasan dirinta naeng
martumbur jala magodang laho mamparbuehon parbue na tama. Alai mansai ringkot
do pamanthon atik na marpengpeng do haprseaonta i manang tongtong mangolu? Ia
turpukta Psalmen 121 on ma na manogunogu hita laho amngalusi sungkunsungkun i.
B. Hatorangan
Ia Psalmen mangalehon teanteanan na uli ima hasintongan.
Molo taparrohahon turpuk on boi ma buatonta opat siingoton na mardomu tu
haporseaon na mangolu, ima:
1. Na mangolu do haporseaon i molo
sai mangalului jala mandapot. Ia parpsalemn on mandok na mangaranapi do matana
dompak angka dolok laho mangalului pangurupion. Molo dihalak Israel sada
inganan hajongjongan ni Debata ima di dolok Sion. Ditodo Debata do dolok Sion
laho papatarhon diriNa. Ganup bangso hatiha i sai mamereng dompak dolok songon
inganan hajongjongan ni debata nasida. Dolok manggombarhon pangondingan,
hatimboon, hagogoon dohot hademakon. Diboto panurat psalmen on do ia dolok i na
gabe inganan na mansai penting di partondion ni Israel hatiha i. Dipangke
parpsalmen do hata angka dolok patuduhon naeng mangalului pilian na asing asa
boi mandapothon mual ni pangurupionna na asing. Diboto halak do hatiha i holan
Debata do mual ni pangurupion. Dilului parpsalmen do mual ni pangurupion na
asing ala boi do na so pas di rohana. Sian pardalanan tur nasida sian Misir tu
tano Kanaan, mansai bahat do na mamborati rohana, mansai godang do na so puas
di panguluhonon ni si Musa di pardalanan i. Jala hea do nasida mandok tu si
Musa na mambahen nasida manarita di pardalanan i, asa dipaulak ma nian nasida
tu Misir nang pe gabe hatoban, asa boi nasida manganhon lompan na tabo
mangallang juhut dohot manginum aek na tabo. Alai ndang dipaloas si Musa
pangidoan nasida i, alai dipatikhon do tu nasida asa torus mardalan. Ala na so
puas dirohana na mambahen parpsalmen on mangalului mual pangurupion na asing
alai ndang dapotsa. Holan dolok Sion i ma pangurupi na sintong di nasida.
Hita nahinaholongan, ia taboto do
haporseaon i mangolu molo sai torus mangalului dohot mandapotsa. Uju talului
ndada na marlapatan haporseaonta i na sala. Alai haporseaon i naeng torus sahat
tu tingkat na tumimbo muse. Disada tingkat na tertentu adong do pengalamanta
raphon Tuhan Debata na papuashon rohanta, alai ingkon manat do hita asa ndang
puas be rohanta di tingkat haporseaon na tumimbo muse. Jala gabe luluanta ma
muse sahat tu na dapot hita Ibana, ima tingakatan na imbaru sidapothononta.
Hatop manang leleng inghkon tahilalahon do muse na so puas muse hita, laos
songon i do mulakulak masa di parngoluonta. Alai ndang pasombuon ni Debata sai
dibagasan posisi na torus statis. Sai urupanna do hita laho mandapothon dimensi
na asing sian hajongjonganNa dohot pangurupionNa di dimensai na asing
sidapothononta. Uju disi na so di rohanta, nda tung tadinghononta Tuhan Debata
dungi mangalului debata na asing manang debata sileban, ima sada proses na sai
mangalului jala dapothonta torus sahat diujungna. Dibagasan proses i adong na
mansai ringkot ima hinaringkot dohot pangurupion ni Debata. Hamubaon ni roha
sian na puas tu na so puas di roha ditandai marhite na ringkto do di hita
pangurupion i. Sian on boi ma berengonta angka sikap ni jolma i:
a) Jolma na tau ia mual ni
pangurupion i ima sian Ddebata alai ndang diboto manjalo pangurupion i.
b) Jolma na mananda dirina
mangharingkothon pangurupion alai ginjang do rohana laho manjalosa.
c) Jolma na so sadar ibana mansai
ringkot niurupan.
Sian tolu horong i masuk di
horong dia ma hita ? Sai dibuhai do haporseaon i sian kondisi na soada manang
na so marpangkirimon. Sian kondisi i ma botoonta mansai ringkot do di hita pangurupion
na sian Debata. On ma sada proses mangalului jala torus dapothononna.
2) Na mangolu do
haporseaon i uju idaonta impolana ia Debatanta ima Debata na jumadihon langit
dohot tano on. Ai didok parpsalmen on do: pangurupionku ima sian Tuhan Debata
na manompa langit dohot tano. Ima mual ni pangurupion na parpudi. Pos do
rohanta nunga lelang botoon ni parpsalmen on taringot tu haporseaon i. Panindangion
haporseaon na pinasahatna i songon naniulakhon ibana do i. Asa ndang boi
marasing panindangionna i sian na uju i, ia Debatangku ima Debata sitompa
langit dohot tano; on ma impolana. Sian impolna i asa botoonta mambuat dalan
mandapothonsa. Dalan i ma na torus terarah jala terpimpin tu sada impola. Ia
haporseaon na adong do Debata patimbulhon masalah, jala masalah i ndada di
haporseaon i alai di Debata sandiri do. Lapatanna uju martangiang hita tu
sangkap ni rohanta alai sangkap dohot lomo ni roha ni Debata do na saut, laos
disi ma botoonta na taadopi masalah na imbaru. Mansai jotjot do maralo sangkap
ni rohanta sian sangkap ni Debata. Ala ni i molo talului Debata ingkon
mangarade ma hita mangadopi masalah na imbaru.
Ai didok parpsalmen on do na telluk
patna (ima ala pardalanan tur tu tano Kanaan i). Marhite si Musa pos do rohana
ia Debata na mangaramoti pardalanan nasida. Dihaposi nasida i, alai uju pajumpang
dohot Debata, adopan nasida ma angka masalah na imbaru asa holan laho mananda
Debata ma jinumpangan nasida i.
Na ro do Debata laho pasahathon
sangkapNa, hajongjongan ni Debata songon alus ni tangiang nasida na mangido
pangurupion laho paluahon nasida sian Misir. Na maringan do nasida di
halongonan i na gabe alus ni tangiang nasida, alai ro ma muse angka na bernit,
mardalan alai telluktelluk pat nasida. Api
dohot ombun na marsijongjong mandongani dohot manguluhon nasida mardalan sai
hira so adong be partingkian so na soada mamboto keadaan nasida na naung loja
situtu. Sai hira marrimas Tuhan i tu nasida.
Dihita nahinaholongan panindangion haporsaonta i ndada
langsung boti gabe haporseaon na naung naung tang. Parbinotoan taringot tu
Debata dibagasan pikiranta nadada otomatis mambahen hita marhaporseaon. Alai
Bibel i mandok : Rom 10:17 Asa sian na tumangihon do ro haporseaon; ia panangihon i,
sian hata ni Kristus do.
3). Haporseaon na
mangolu tubu sian pambahenan siganup ari. Haporseaon i ndada na tubu sian
halongangan alai sian parulaon, pangalaho siganup ari. Sai tatapon ni Debata do
angka parulaonta i siganup ari. Asa didok parpsalmenn do sian pengalaman na na
ro siganup ari: Pslm.121:3 Ndang tagamon loasonna tarsulandit patmu, ndang tagamon nok
mata ni Sijaga ho.
Siala pardalanan
nasida patar do jala gok mara nang hamaolon. Manghaholongi dohot mangasii Tuhan
i mansai godang do resikona, nang ambatambat nang hamaolon. Alai dipardalanan
ni ngolunta sai torus do diuji haporsaonta asa lam tajom sahat pola ro
dipusupusunta sain holong ni roha ni Debata.
Haporseaon na mangoly ima
haporseaon na mandapothon hademakhon dibagasan na so martontu keadaan nang
ngolu on. Papsalmen mandok Pslm. 121:8 Sai jagaon ni Jahowa do ho laho
ruar dohot laho bongot, olat ni on ro di salelenglelengna. Dimasa
mandapot rade do i di humaliangta nuaeng
on jala dimasa mangalului rade do i inganan na manongtong i. Ido umbahen Buku
Heber 11: 1 mandok: 11:1 Alai anggo haporseaon i, pos ni roha do i di angka
sihirimon, jala pamotoan na tontu taringot tu na so niida. Dia na taparsinta i
sai jumpanganta do i, alai pangkirimon na so tarida i rade do i di na
manongtong i. Amen.
