-----Tingki Na Hohom ----
Parjamita: Pdt.Nekson Simanjuntak, M.Th
Paragenda: Pdt.Ebenezer Munthe, M.Th
I. JOUJOU TU
PARSAORAN: (L:Liturgis; R:Ruas)
L : Huria na hinophop ni Tuhanta, di bagasan
unduk dohot serep ni rohanta naeng paihutihutonta barita panaonon ni Tuhan
Jesus andorang so gantung do pe Ibana di hau parsilangi. Di partangiangan
passion on naeng gorga tu bagasan rohanta hinahansit dohot hinabernit na ditaon
Tuhanta i.
R : Nunga
huparade rohangku paihutihut barita ni panaonon ni Tuhanki, anggiat lam
huantusi pambahenan ni Tuhan i di ngolungkon.
L : Bidang pe laut lobi umbidang do holongNa,
bagas pe laut lobi umbagas holongNa, timbo pe langit lobi tumimbo asiniroha ni
Debata. Antong ta tanda ma si tobus nasa dosanta, asa unang marisuang
panghophopNa i.
R : Puji ma Ibana ale tondingku, tung unang
halupahon denggan ni basaNa.
L : Antong
hamuna huriaNa, huarahon ma hita saluhutna paihutihut na masa andorang so
tarpajal Jesus di hau silangi, tapasiding ma angka pingkiran na boi mambahen
dao rohanta paihutihut siak ni bagi na masa tu Jesus, asa anggiat holong roham
tu na manghohop Ho. Marende :
1. Marende
No. 88: 1, 4 “Jesusku Naung Manobus
Ahu”
♫
Jesusku
naung manobus ahu, sai naeng haholonganku Ho.
Tu dolok Golgatha Ho lao nionjar ni holongMu do.
Hupuji nasa asiMi, alai gumodang holongMi.
♫
Bagas
uhirhon tu rohangku, panghophopMi humophop au.
Tusi ma togu pingkiranku, guru di Ho sambing ma au.
Hupuji nasa asiMi, alai gumodang holongMi.
2. Votum-Introitus -Tangiang:
L : Marhitehite
Goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia. Amen.
Tabereng ma induk ni haporseaon i jala na paujunghonsa,
ima Jesus na manaonhon parsilangon i, singkat ni las ni roha tohapna i hian, so
dietong i hailaon, gabe hundul di siamun ni habangsa ni Debata: Paingot-ingot
hamu ma Ibana, na pataon-taon paraloan sisongon i dompak Ibana sian angka
pardosa asa unang marnaloja hamu, unang mandate tondi muna! Haleluya....
Martangiang
ma hita! Ale Tuhan Debata, Amanami na di
Banua Ginjang! Asi ma rohaM di hami halak na gale on. Di ida ho nagogo do musu
nami, sai talu do hami dibahen, ala ni hagaleon nami. Dibahen i hupangido hami
tu Ho: Sai pargogoi jala pamonang ma hami maralohon musu i marhite panaonon ni
Anak haholongan ni rohaM, Tuhan Jesus Kristus. Amen
3. Marende BE No.152 Jesus Na Mamorsa BL. 120
♫
Jesus na
mamorsan dosa ni portibi on, pangolu hami.
Jesus na marmosan dosa ni portibi on,
pangolu hami.
Jesus na mamorsan dosa ni portibi on,
sai pasonang hami, Amen,Amen,Amen.
4. Barita Parjolo: Dibaritahon Jesus
hinarjorbut ni Angka Naeng Masa
L : Alai lam torop do angka si
ihuthon Jesus, ragam do angka tanda-tanda halongangan
na mambehen lam sogo roha ni torop halak parise dohot siboto surat! Marjea ma
hamu sibotosurat dohot Parise, hamu pangansi! Ai suman do hamu tu tanoman na
hinapur, angka na denggan berengon sian duru, hape marisi holiholi ni na mate
do dohot nasa na rotak!
R : Pola
didok hamu: Aut hami uju di ngolu ni angka ompunami, ndang tagamon dohot hami
parsala di mudar ni angka panurirang i! Dibahen i, ida ma, Ahu marsuru tu hamu
angka panurirang dohot parroha na tigor hape: Bunuonmuna jala
parsilang-kononmuna ma deba sian nasida, na deba linsinganmuna do di
parguruanmuna jala leleanmuna sian huta tu huta.
L : Dibunu
ho do angka panurirang jala didangguri ho do angka na sinuru manopot ho. Nunga
piga hali naeng papunguonku do nian angka anakmi, sobokkon pidong na papunguhon
anakna tu toru ni habonghabongna; alai ndang dung olo hamu! Ai hudok ma tu
hamu: Na so idaonmuna be Ahu olat ni on, paima dohononmuna: Pinasupasu ma na ro
marhitehite Goar ni Tuhan i!
R : Jadi
diarahon Jesus ma na sampuludua i jala didok ma tu nasida: nangkok ma hita tu
Jerusalem, jala tulus ma tu Anak ni jolma i sasudena, na tarsurat di buku ni
angka panurirang, na mandok:
L : Ai pasahaton ma Anak ni jolma i
tu angka sintua ni malim dohot tu sibotosurat, gabe insahanna, leaanna jala
tijuranna ma Ibana, ingkon marutang hosa, pola mate Ibana bunuonna, dungi
pangoluonNa do Ibana muse di ari patoluhon.
R : Dung i didapothon ina ni anak ni
si Sebedeus rap dohot angka anakna i ma Ibana, disomba ma, laho pasahathon
pangidoanna. Jadi ninna Jesus ma mandok ibana: Aha dipangido rohamu?
L : Dung
i didok ma tu Ibana: Loas ma hundul sogot anakku na dua on, na sada di
siamunMu, na sada nari di hambirangmu, di harajaonMi!
R : Alai ninna Jesus ma mangalusi:
Ndang diboto hamu na pinangidomuna. Tung tarinum hamu ma siinumon na naeng
inumonKu (jala tarparidi hamu ma paridion siparidionKu)?
L :
Jadi didok nasida ma: Tarbahen hami do! Dung i didok ma tu nasida: Tutu
nian, inumonmuna do siinumonKi; jala paridihononmuna do pandidion
siparidihononKi; alai ndang guru di Ahu na mambahen hundul di siamunKu dohot di
hambirangKu.
R : Damang
i do padirihon i tu angka panahatanna i. Alai ndang diantusi angka sisean i
agia otik na hinatahon ni Tuhan Jesus. Buni do hata i sian rohanasida, ndang
diboto nasida na hinatahonNa i.
L : Jadi bobonosan situtu ma
rohanasida. Dung i diarahan si Petrus ma Ibana, disaritai ma, ninna do: Asi ma
roha ni Debata di Ho Tuhan. Unang ma songgop i tu Ho.
R : Alai humusor ma anggo Ibana
mandok tu si Petrus: Laho ma ne ho bolis. Gasip do Ho di Ahu, ai ndang
diparrohahon ho angka na di Debata, angka na di jolma do. Dung i didok Jesus ma
tu angka siseanNa: Nasa na giot mangihuthon Ahu, disoadahon ma dirina, diporsan
ma silang na tu ibana; diihuthon ma Ahu.
L : Ai na naeng paluahon hosana,
mangagohonsa do; alai na agoan hosa alani Ahu, ido na jumpangan.
R : Ai aha ma antong gunana di
jolma nang liat portibi on diomo, anggo mago do tondina? Aha ma tarlehon jolma
bahen tobus ni tondina? Ai na ro ma sogot Anak ni jolma i di bagasan hasangapon
ni AmaNa rap dohot angka surusuruanNa, dung i balosonNa ma tu ganup, hombar tu
na niulana.
5. Marende, No. 182: 3 “Tu JoloM O Debatangku”
♫ Sai jotjot do hutadingkon, dalanMi na tigor i.
Kristen au hape hutondong, dalan hamagoan i.
6. Barita Paduahon : “Dimiahi si Maria Pat ni
Jesus”
L : Dung i onom ari nari asa dapot pesta Paska i,
sahat ma Jesus tu huta Betania, na
niinganan ni si Lassarus, na sinunggul ni Jesus sian na mate. Jadi dipauli
nasida ma disi panganon ujuan di Ibana: si Marta do manghobasi, si Lassarus ma
sada donganna mangan disi.
R :
Gabe dibuat si Maria ma sahati
miak nardus na arga na so marsaor, dimiahi ma pat ni Jesus, obukna ma dibahen
mangalapu. Jadi digohi uap ni miak i ma bagas i.
L :
Jadi sada sian angka siseanna,
si Judas Iskariot na naeng manjehehon Ibana, mandok: Boasa so ginadis miak na
arga tolu ratus hupang, bahen silehonlehon nian di angka na pogos.
R :
Alai ndada na pogos sinarihonna, umbahen na didok ibana songoni,
panangko do ibana tahe, diusung do asiasi ni halak, ai tu ibana dipasahat puro
i.
L :
Dung i ninna Jesus ma: Pasombu ma Ibana, ai diparade do i hira tu ari
hatatanomHi. Ai tongtong adong na pogos ditongatongamuna jala asal ma olo hamu,
tarpatongon hamu do na denggan tu nasida: Alai anggo Ahu ndang manongtong
dihamuna. Intap na tarbahensa do na niulana i, na manjoloani do ibana mamiahi
pamatangku songon di na mananom.
R : Situtu
do hatangkon tu hamu: manang didia liat portibion dijamitahon muse Barita na
uli on, hatahononna do binahenna i gabe baritana. Dung i torang ni ari na i
dibege halak na torop na ro tu pesta i na naeng ro ma Jesus tu Jerusalem, jadi
dibuat nasida ma angka maremare, lao manomunomu Ibana huhut manjoujouhon: Hosianna! Pinasupasu ma na ro marhitehite
goar ni Tuhan i, Raja ni Israel!
L :
Dungi dapot Jesus ma halode sada, ima dihunduli. Hombar tu na tarsurat:
Unang ho mabiar boru Sion, ida ma rajam do na ro, marsihundul di anak ni
halode, dohot di anak ni halode inaina. Jadi deba sian natorop i mandok: Orai
ma antong angka siseanmi, Guru.
R : Alai
ninna ma mangalusi: Hudok ma di hamu: aut mauhom nasida, manjoujou ma angka
batu. Alai di bongoti si bolis do si Judas na margoar Iskariot, sahalak sian
sampuludua i, gabe laho ma ibana martuptup dohot angka sintua ni malim rap
dohot angka panunggane i manang dia dalanna pasahathon Jesus tu nasida.
R : Jadi
sian las ni roha nasida marpadan ma nasida mengalehon hepeng tu ibana. Di oloi
si Judas ma i, jadi dilului ma tingki na une pasahathon Ibana so sian pamotoan
ni na torop i.
7. Marende No. 711: 3 “Songon Ursa Na Binuru”
♫ TungkiMi Ale tondingku, tung beasa rusak ho ?
Sai haposi Debatamu, ndang tadinghononNa ho.
Pujionku do muse Tuhan Debata dope,
Hatuaon ni
bohingku na tongtong naeng haposanmu.
8. Barita Patoluhon: Jesus Tu Huta Jerusalem
L : Dipansang sintua ni malim dohot
angka Parise ma rapot godang, didok nasida ma: Aha ma bahenonta? Ai lan do
tanda dibahen halak i! Molo itapasombu Ibana, porsea ma halak saluhutna di
Ibana, gabe ro ma halak Rom maon mangarampas tanonta dohot bangsonta.
R : Alai hehe ma sada sian nasida
ima si Kayapas, sintua ni malim di na sataon i, didok ma tu nasida: Na hurang
roha do hamu! Ndang dipingkiri rohamuna, dengganan do mate sada halak humophop
natorop i, unang laho mago sandok bangso i.
L : Alai ndang sian rohana
sandiri dihatahon i, ala sintua ni malim ibana di na sataon i umbahen na di
surirangkon, na naeng mate ma Jesus humophop bangso.
R : Alai tahe, ndada holan
manghophop bangso i, alai naeng papunguonna angka anak ni Debata, angka na
marserak dope, laho pasadahon. Asa olat ni na sadari i martuptup ma nasida laho
mamusa Ibana. Alai didok nasida ma: Unang ma dipesta i, sotung guntur na torop
i!
9. Marende No. 719 : 1 “Hubege Soaram O Jesus”
♫ Hubege soaraM O Jesus, hubege soaraM O Jesus.
Hubege soaraM O Jesus na manjouhon ihuthon ma Au.
Togu au Jesus Tuhanhu, iringiring ma langkangku.
Patuduhon ma dalanMu, asa unang, unang lilu au.
10. Barita Paopathon : Diburi Tuhan Jesus Pat
ni angka SiseanNa
L : Alai
di ari parhobason parjolo ni pesta Paska i didapothon sisean i ma Jesus, angka
ninna ma: Tu dia ma patureonnami di Ho panganon Paska i, dipangido roham?
R :
Gabe didok ma: Laho ma hamu tu huta i manopot si Anu, dok hamu ma tu
ibana: Tona ni Guru i, na dapot ne ma tingkingku, di ho ma ahu sorang laho
mangan Paska i dohot siseanKu. Jadi saut ma disuru Ibana siseanna dua halak
jala didok ma tu nasida: Molo laho hamu tu huta, pajumpang ma hamu disi dohot
sada halak na mangusung aek sahudon, ibana ma ihuthon hamu.
L : Tu
ibana ma dok hamu; Didia do bilut inganan, asa disi dipangan hami Paska i? Jadi
patuduhononna ma tu hamu bilut parginjang sada, na lambas na tipak hinembangan,
disi ma pature hamu di hita. Jadi borhat ma siseanna, dibongoti ma huta i, jadi
jumpang nasida ma tutu songon na nidokNa i, dipature ma Paska i.
R :
Asa dung bot ari, ro ma Jesus dohot na sampuludua i. Asa dung dapot
tingkina, hundul ma Ibana rap dohot angka apostel.
L :
Dung i ninna ma mandok nasida: Mansai masihol rohangku naeng mangan
birubiru paska on rap dohot hamu tagan so songgop dope sitaononki. Ai hudok ma
di hamu “na so tupa panganonku be i; ia so dapot hagogokna i di harajaon ni
Debata”.
R : Jadi
di na mangan nasida, hehe ma Jesus sian na mangan i, ditanggali ma ulosNa,
dibuat ma basahan ditapolhon tu Ibana. Dohot basahanNa na tinapolhonNa i.
L : Dung
i sahat ma Ibana tu si Simon Petrus jadi didok ma mandok Ibana: Tung Ho ma ale
Tuhan, mamuri pathu? Dung i ninna Jesus ma mangalusi ibana; Ndang diantusi ho
pambahenanKu na tu ho anggo nuaeng, muse pe botoonmu i.
R : Dung i didok si Petrus ma tu
Ibana: Matua tano on, ndang burionMu pathu! Dung i ninna Jesus ma mangalusi
Ibana: Molo so burionKu ho, ndang partohap ho di Ahu. Dung i ninna si Simon ma:
Ale Tuhan, unang ma holan pathu, dohot ma tangan dohot ulungku.
L : Gabe didok Jesus ma tu ibana:
Halak naung maridi i, ndang be burion; ai nunga sude ibana ias. Naung ias do
anggo hamu, alai ndang luhut hamu. Ai ditanda do sipasahat Ibana, umbahen na
didok: Ndang saluhut hamu ias. Asa dung diburi Jesus pat nasida, dipangke ma
muse ulosNa, hundul ma Ibana, didok: Ai diantusi hamu do pambaenki tu hamu?
Digoar hamu do Ahu Guru dohot Tuhan, jadi ture do pandokmuna disi, ai i do, Ahu
tutu. Asa molo Ahu Tuhan jala Gurumuna mamuri patmuna, tama ma nang hamu
masiburian pat! Ai sitiruon do hulehon tu hamu, asa dibahen hamu songon na
hubahen i tu hamu!
R : Na tutu situtu do na hudok tu
hamu: Ndang umbalga anaksomang sian indukna, ndang sumurung suruan sian na
marsuru ibana. Molo diboto hamu i, martua ma hamu mangulahonsa!
L : Jadi di na mangan i nasida, ninna Jesus ma:
situtu do na hudok on tu hamu. Sada sian hamu naeng pasahathon Ahu! Dung i
marsak situtu ma nasida, gabe dipandok be ma tu Ibana: Nda tung ahu i Tuhan?
R : Alai
ninna ma mangalusi; Ia i na rap dohot Ahu manurdukhon tanganna tu paringkauan,
ido na pasahathon Ahu! Tong do nian ujung ni Anak ni jolma i! Tagonan unang ma
sanga tubu ibana tu hasiangan on!
11. Marende BE No. 76: 1, 2 “Sada Nama Sangkap”
♫ Sai ingoton ni rohangku, Hansit naung di taon Tuhanku,
Uju i di Golgata.
♫
Na so dung
adong salaNa, Gabe ampe tu Ibana, dosa ni portibi on.
12. Barita Palimahon: Judas manjehehon Jesus
L : Alai adong ma sada sian angka siseanna i, na
hundul jumonok tu Ibana haholongan ni Jesus i. Ima dihilap si Petrus jadi ninna
ma mandok ibana: Sungkun ma, ise na nidokNa i.
R :
Jadi dipajonok ma tu lambung ni Jesus mandok tu Ibana: Tuhan, ise i?
L :
Gabe dialusi Jesus ma: Ia tusi hulehon na santopik na husornophon on,
ima ibana! Jadi disornophon ma santopik, dilehon ma tu si Judas Iskariot, anak
ni si Simon. Jadi dung dibondut i, dibongoti sibolis i ma ibana. Dung i didok
Jesus ma tu ibana: Humatop ma ulahon siulaonmu!
R : Asa dung dijalo si Judas na santopik i,
pintor laho do Ibana tu balian, alai borngin ma uju i.”
L : Jadi
di na mangan i nasida, dihindat Jesus ma roti, dipasupasu ma, diponggoli ma
jala diparlehon ma tu angka siseanna. Huhut ma didok: “Jalo hamu, pangan ma,
dagingKu do on”, na nilehon humophop hamu. Ula hamu ma i bahen parningotanmuna
di Ahu.
R : Dung
sun nasida mangan, dihindat ma panginuman, didok ma mauliate, dilehon ma tu
nasida. Huhut ma didok: Ia panginuman on, padan na imbaru do i marhitehite
mudarHu, na durus humophop hamu.
L : Sude
hamu manginum sian i. Alai hudok ma tu hamu: na so tupa be inumonKu olat ni on
sian parbue ni hau anggur i sahat ro di ari sogot: Disi ma inumonKu na imbaru
rap dohot hamu di harajaon ni Damang.
13. Marende No. 152 : 1 “Jesus
Na Mamorsan”
♫ Jesus na mamorsan dosa ni portibi on pangolu hami.
Jesus na mamorsan dosa ni portibi on pangolu hami.
Jesus na mamorsan dosa ni portibi on, sai pasonang hami.
Amen, Amen, Amen
14. K o o r :
a)
Sektor 1 –
Efesus
b)
Sektor 3 -
Galatia
15. Barita
Paonomhon: Jesus di Getsemane
L : Jadi dung
diendehon nasida endeende pujipujian i, ruar ma nasida tu dolok Jetun. Disi ma
didok Jesus tu nasida: saluhut do hamu naeng targasip mida Ahu di na saborngin
on. Ai na tarsurat do: Lombutanku ma Parmahan i, gabe marserak ma birubiru na
sapunguan i.
R : Alai ninna si
Petrus ma mangalusi Ibana: Agia sude nasida targasip mida Ho, anggo ahu, na so
tupa targasip.
L : Alai ninna Jesus ma mandok Ibana: “O Simon,
Simon nunga dipangido sibolis naeng segeonna hamu songon dahanon. Alai Ahu do
manangiangkon ho, unang mintop haporseaonmi. Jadi dung mulak sogot roham,
pargogoi ma roha ni angka hahaanggim!”
R : Alai ninna si
Petrus ma mandok ibana: “Tuhan, na hobas do ahu mandongani Ho tu hurungan, nang
tu hamatean pe!”
L : Alai ninna Jesus ma: “Hudok ma tu ho, Petrus:
Ndang martahuak manuk saborngin on; so jolo tolu hali soadahononmu na so
tinandam Ahu. Dung i sahat ma Jesus rap dohot nasida tu porlak sada margoar
Getsemane. Jadi didok ma tu angka sisean i: “Hundul ma hamu jolo dison saleleng
disan Ahu martangiang.”
R : Dungi ditogihon
ma si Petrus dohot anak ni si Sebedeus na dua i gabe marsak situtu ma Ibana
jala bobonosan. Jadi didok ma tu nasida: “Mansai marsak situtu do rohangku,
hira na mate do. Dison ma hamu dungo rap dohot Ahu.”
L : Dungi laho ma Ibana saotik tu jolo, dipatungkap
ma bohiNa tu tano martangiang, ninna ma: Ale Amang, namun na tarbahen salpuhon
ma siinumon on sian Ahu! Alai tahe, unang marguru tu rohangKu, rohaM do!
R : Dungi mulak ma
Ibana tu angka siseanNa jala tarpodom do nasida didapot, jadi didok ma tu si
Petrus: “Ndang margogo hamu hape dungo rap dohot Ahu nanggo sangombas? Dungo ma
hamu jala martangiang asa unang hamu bongot tu pangunjunan, ai na girgir do
nian tondi i, alai gale do ia daging.
L : ”Dungi laho
ma Ibana paduahalihon martangiang ninna ma: “Ale Amang, molo na so tarbahen
salpu on, nda ingkon huinum, sai saut ma lomo ni rohaM!”Dung i ro i Ibana,
tarpodom nasida didapot, ai mansai dokdok salibonasida.
R : Jadi
ditadingkon ma laho martangiang patoluhalihon mandok hata ondeng. Dung i
didapothon ma muse angka siseanNa jadi didok ma tu nasida:” Datdatanmuna dope modom dohot maradian?
L : Nunga dapot tingkina nuaeng, sahat ma Anak ni
jolma i tu tangan ni pardosa. Hehe ma hamu, laho ma hita! Ndi! Nunga ro na
pasahathon Ahu!”
16. Marende, No. 249: 1 “Ngot
Ma Ho, O Tondingki”
♫ Ngot ma ho, o tondingki dungo martangiang.
Asa unang musu i, tole so tinagam.
Bisuk ni setan i, do manait tu dosa lan na bonar roha.
17. K o o r :
a)
Sektor 5 –
Tesalonika
b)
Sektor 7 –
Yudea
18. Barita Papituhon: Haroro Ni Angka Soldadu
L :
Alai diboto si Judas siparjehe i
do inganan i, ai jotjot do marpungu Jesus tusi dohot angka siseanNa. Ia si
Judas diarahon ma angka soldadu dohot
angka naposo ni sintua ni malim, didapothon ma tusi mantat sulusulu,
palito dohot sinjata. Diboto Jesus do saluhut na naeng songgop tu Ibana, jala
ruar ma Ibana, didok ma tu nasida: “Ise do na jinalahanmuna i?” Gabe ninna
nasida ma mangalusi Ibana.
R :
Gabe ninna nasida ma mangalusi Ibana: “Jesus halak Nasaret i do!”
L :
Dung i ninna Jesus ma mangalusi nasida: “Ahu do i!” Alai dohot do si
Judas si parjehe i jongjong di lambungnasida. Asa dung didok tu nasida: “Ahu do
i”, sumurut ma nasida, angka martinggangan ma tu tano.
R : Dung
i diulahi ma manungkun nasida: “Ise do na niluluanmuna?” Jadi didok nasida ma: “Jesus,
halak Nasaret i do!”
L :
Dung i didok Jesus ma: “Ahu do i! Asa molo Ahu dilului hamu, loas ma
laho angka on! Ai naeng do jumpang na nidokna i: Ndang adong na mago hubahen
agia sada sian angka na nilehonMi tu Ahu.”
R : Alai
nunga dipabotohon parjehe i hian partinandaan tu nasida, ai didok do, “ia i na
huumma, Ibana ma i, i ma tangkup hamu!” Asa pintor didapothon ma Jesus, didok
ma: “Tabi di Ho, Guru!” Laos diumma.
L :
Alai ninna Jesus ma mandok Ibana: “Marhua ho tuson anggia? O Judas,
pangummaon do hape dibahen ho, pasahathon Anak ni jolma i? “Dungi ro ma nasida,
dilaluhon ma tangan nasida tu Jesus manangkup Ibana.
R : Dung
i, adong ma sada sian nasida angka dongan ni Jesus mangalaluhon tanganna,
disintak ma podangna, ditampulhon ma tu naposo ni sintua ni malim sahalak,
dipisikhon ma pinggolna.
L : Jadi didok Jesus ma tu ibana: “Pasarung podangmi, ai na manintak
podang, mago ma bahenon ni podang! Ai na so tarbahen Ahu do di roham mangido
sian Damang asa dipadiri di Ahu saonari lobi sian sampuludua loksa surusuruan?
R : Alai
songon dia ma disi saut hata ni surat i na mandok “Ingkon masa do songon i? Uju
i ma didok Jesus tu angka na torop i:Hira na dompak panamun do hamu hehe,
marpodang jala marlombutlombut manangkup Ahu.
L : Ariari
do Ahu nian hundul mangajari di bagas joro, so adong ditangkup hamu Ahu. Alai
na masa do sudena on, asa jumpang hata ni angka panurirang i. Dung i
ditadingkon saluhut sisean i ma Ibana laho maporus.
19. K o
o r : Parompuan
20. Marende
BE No.180: 1-2 Ro Tu Jesus Ho Na Loja
BL. 228
♫
Ro tu Jesus
ho na loja Na maheu i
Lam lumbang do di lambungNa Rohami
♫
Bereng di
hau pinarsilang Daon ni sahitmi
Tuhanmi na hona uhum Singkatmi.
21. J a
m i t a
: Pdt.Nekson Simanjuntak, M.Th
(Praeses Dist.28 DEBOSKAB)
22. Marende BE No.82: 1- 3 O Jesusku Tu BugangMu BL. 21
===Pelean===
♫ Jesusku, tu bugangMu, ro marsomba rohangkon.
Sai tarpuji,
sai tarpuji, na pamalum tondingkon.
-----Musik----
♫ Tung di patMu, o Jesusku, solsolanku rohangki.
Tangisanku
na tinaonMu, ala jat ni rohangki.
----Musik----
♫ Tu tanganMu ma tondingku, jumpa hamamatengki.
Tu
lambungMu, o Tuhanku, alap na tinobusMi.
23. Panutup: Tangiang & Pasupasu
