Dipahehe
Jahowa Do Hita Asa Unang Mandate
Rom
8 : 6 – 11
A.
Patujolo
Molo
tapamanat adong do asing ni surat ni si Paulus na tu huria Rom on, sian angka
suratna na asing. Ianggo angka suratna na asing umumna dipatolhas do i tu angka
huria naung hea niebatanna, manang angka huria naung tinandana. Alai anggo
surat tu huria Rom on, ditongos do tu huria manang tu punguan ni halak Kristen
na so tinandana dope. Ndang ibana na pajongjong huria i, alai diboto ibana do
baritana. Ditongos ibana surat i, holan laho mangalehon poda pangajarion
taringot tu haporseaon ro tu ruhutruhut siulaon dohot sihangoluhonon ni halak
Kristen do. Jala dihirim marhite pangajarion i roha dohot denggan basa ni
Debata na pinatupana marhite Jesus Kristus. Molo nunga mananda nasida disi,
tontu lam mangantusi ma nasida di angka ruhutruhut siulaon nasida, dohot
tanggung-jawab na parsidohot nasida martanggung-jawab laho mambaritahon barita
na uli songon naung niulahon ni apostel Paulus dohot angka apostel na asing.
Poda
haporseaon na niajarhon Apostel Paulus di turpuk on tu huria Rom; ima tarinfot
tu ngolu ni halak Kristen naung niinganan ni Tondi ni Debata manang Tondi
Parbadia,, ima ngolu na so mangihuthon bangkobangko na laho buruk i, na laho
sega i, manang na leleng naung madabu dibagasan dosa i; ima angka hagiot ni
daging. Alai angka na mangihuthon Kristus nunga dibagasan hatiuron, marpangalaho
na imbaru na marguru tu ni halomohon ni Kristus marhitehite Tondi Parbadia na
manogu angka siihuthon Kristus i.
B.
Hatorangan
1.
Ayat 6 – 8: Dipatorang si Paulus do rumang
ni pangalaho ni halak Kristen na
mangihuthon Tondi na maralo tu pangalaho
pardagingon na mangihot hagiothagiot ni daging. Digombarhon do paraloan ni pangalaho
na dua i marhite manang piga tudosan; parhatobanon dohot haluaon (kebebasan),
hamatean dohot hangoluan, dohot angka naasing. Marhite i dipatuduhon do, angka
na mangihuthon dagingna i ma na pinarhatoban ni dosa, alai angka na mangihut
Tondi i, ima angka naung malua sian parhatobanon i. Angkup ni i didok do,
hamatean do jambar ni angka na mangihuthon
daging, alai hangoluan do jambar ni angka na mangihut Tondi.
2.
Ayat 9 : Di ayat on dipatorang si Paulus do,
anggo halak Kristen ndang mangolu be di bagasan daging alai dibagasan Tondi do, molo dung tutu Tondi ni Debata maringanan di bagasan ibana. Jadi tanda ni ngolu na imbaru i ma mangolu dibagasan Tondi. Tondi ima songon
hagogoon na ro sian ginjang laho patauhon halak Kristen manjalo asi ni roha ni
Debata jala mangulahon ragam ni angka ulaon na denggan. Jala angka halak
Kristen na so niinganan ni Tondi ni Debata dope, ndang tutu dope i halak
Kristen na sintong, ai ndnag sintong dope i nampuna ni Kristus. Marganti ganti
panggoari ni Tondi i dibahen si Paulus di ayat on, sipata Tondi ni Debata,
sipata Tondi ni Kristus. Alai sarupa do pangantusion ni i, i ma Tondi na sasada
i, na marharoroan sian Debata dohot sian Jesus Kristus. Jala sada do na tolu i,
i ma Ama, Anak dohot Tondi Parbadia. Ama i do
mual haroroan ni asi ni roha, Anak ima na pabaorhon, jala Tondi i ma na
mangulahon di ngolu ni angka na porsea. Jadi Tondi i ma na gabe hagogoon ni
halak Kristen patuduhon dirina songon Kristen na tutu, jala na manogunogu ibana
tu panghirimon di ngolu sogot.
3.
Ayat 10 : Di ayat on marganti do muse pandohan
na dipangke si Paulus taringot tu ngolu ni halak Kristen i. Dia ayat 9 pandohan
na dipangke ibana i ma “Tondi ni Debata”, manang “Tondi ni Kristus na mian
dibagasan ngolu ni halak Kristen. Alai ndang adong pandohan i be nuaeng
dipangke di ayat on, alai “Kristus dibagasan hamu” na ma. Sarupa do
pangantusion ni pandohan na tolu i, i ma Tondi ni Debata, Tondi ni Kristus
manang Kristus dibagasan hamu. Kristus i do hapataran ni Debata, jala sude
ngolu dohot hadirion ni Jesus, ptar dibagasan pangulaon ni Tondi ni Debata
manang na digoari muse Tondi Parbadia. Didok si Paulus, molo Kristus dibagasan
hamu, mangolu do tondi ala ni hatigoran”, nang pe mate pamatang ala ni dosa i”.
Tar maol do antusan pangalaho on, ai seolaholah disirang ibana tondi sian
pamatang songon pangantusion ni halak Gorik. Di pangantusion ni halak Gorik;
tondi i do na hot ro di saleleng ni lelengna, alaipamatang na marrumang materi
i jala na gok hajahaton mate do. Alai si Paulus dison ndang na naeng
mempertentangkan pamatang dohot tondi songon pangantusion ni halak Gorik i. Na
naeng dohonon ni si Paulus on do: adong parasingan ni ngolu na niinganan ni
Tondi ni Debata sian ngolu na so ni inganan ni Tondi Parbadia. Dohot pandohan
na asing adong parasingan ni ngolu na mian di bagasan Kristus dohot na so mian
di bagasan Kristus. Di bagasan Kristus mangolu do tondi ni angka na porsea i
nang pe mate pamatangna ala ni dosa i. Jala hamatean na nialaman ni angka na
porsea, ndada hamatean na salelengnilelengna, alai hamatean na paluahon ibana
sian gomgoman ni dosa, laho bongot tu hangoluan na saleleng ni lelengna marhite
haheheon i do. Debata do na patupahon i
dibagasan Jesus Kristus.
4.
Ayat 11: On ma sada poda ni halak Kristen
taringot tu ngolu sogot, songon na dapot di 1 Korint 15. Na masa do haheheon
sogot di angka na porsea songon haheheon na masa tu diri ni Jesus. Ndang adong
poda ni si Paulus taringot tu tondi na manongtong na di sada tingki habang manang
malua sian hurungan ni pamatang. Alai na adong i ma poda taringot tu haheheon
ni pamatang sian hamatean, songon haheheon ni Jesus. Jala di bagasan
pangantusion ni si Paulus, ia jolma i ima sada pamatang, pamatang na olo mate.
Alai ala ni pambahenan ni Debata di bagasan Kristus, gabe dapotsa ma
silehonlehon ni Tondi i, i ma hangoluan. Marhite silehonlehon ni Tondi i gabe
partohap ma ibana di hamonangan ni Kristus. Ala ni molo mian Tondi Parbadia i
dibagasan diri ni angka na porsea, gabe sahaphonon ni Tondi i ma nang haheheon
ni Jesus di angka na porsea di Ibana.
C.
Sipahusorhusoron
ü
Hamatean do ujung ni parmusuon dompak Debata.
Ndang tarhalomohon Debata molo jolma i sai marguru tu daging. On do jotjot
hamaolon nang di hita halak Kristen.
Sasintongna songon halak Kristen, ingkon lomo ni roha ni Debata siulahononhon.
Alai jotjot do gabe lomolomonta sandiri na taulahon di ngolunta on. Jotjot tahilala
nampunanta do dirinta nang ngolunta on jala marhite i gabe tabatasi manang gabe
tatulak campur tangan ni Debata di ngolunta. Tangkas do, ndang tarhalomohon
Debata ngolunta di si. Tangkas do digombarhon Apostel Paulus taringot tu angka
parulaon ni daging ima di Galatia 5 : 19 – 21 “Alai tandap do parulaon ni
daging, i ma parmainanon, hahodaron, pargadombuson, hasipelebeguon, hadatuon,
parmusumusuon, parbadabadaon, pangiburuon, rimasrimas, pargutugutuon,
parsalisian, partahitahion, bunubunu, parmabuhon, haormuson jala angka na suman
tusi. Naung hupaboa najolo tu hamu, songon i do nang nuaeng: Ndang teanon ni
angka na mangulahon sisongon i harajaon ni Debata.” Sabalikna sian i ma ngolu
na mangihuthon Tondi. Tondi do diparrohahon, hangoluan jala hadameon do dieahi.
Hangoluan dohot hadameon do lomo ni roha
ni Debata. Asa jolma na mangihuthon Tondi, i do na hinalomohon ni Debata
(Gal.5:22) na patauduhon tu hita angka rumang ni ngolu siparbuehonon ni angka
na niinganan ni Tondi ni Debata.
ü
Nampuna ni Kristus do hita. Ngolu na dibagasan Tondi ni Debata marlapatan
gabe nampuna ni Kristus. Molo nampuna ni Kristus hita marlapatan Ibana do
na mangarajai ngolunta, bagas joro ni
Tondi Parbadia do hita jala dibahen i ingkon pasangapon do Debata marhitehite
daging dohot marhitehite tondi ( 1 Korint 6:19-20). Songon nampuna ni Kristus,
dituntut do sian halak Kristen pangalaho nang bangkobangko na pataridahon
habadiaon na pasangap Debata. Molo dung Tondi ni Kristus namian dihita, ndang
adong be huaso na boi manirang hita sian Ibana. Nang hamatean ni pamatang ndang
margogo mangihoti angka na porsea gabe sirang sian Kristus. Nang pe mangolu
hita nuaeng dibagasan hagaleon ni pamatang (daging) alai ndang i be na
mangarajai hita. Tondi ni Kristus do patuduhon tu hita dalan tu ngolu na
imbaru. Mangolu di bagasan Tondi mangungkap dalan tu pangkirimon di hangoluan
na manongtong dohot panghirimon di haheheon ni Debata nang angka na manjalo
Tondi i. Ala ni i na olo ma hita pinahehe
ni Tuhan i asa marhagogoon hita mandopang angka sumbia ni portibi on
dohot sibolis i. Songon topik ni minggunta : “Dipahehe Jahowa do hita asa unang
mandate”. Ala ni asa unang mandate, naeng ma tangkas pangihuthononta di Kristus
i, nang pe portibi on menawarhon pilihan na bebas dingolunta. Songon si Musa (
5 Musa 30:15-20) jala na ditiru si Josua ( Josaua 24: 1-15) na disuru bangso i
mamillit debata sileban do oloannasida, manang Debata na mangolu i na paluahon
nasida sian parhatobanon Misir. Laos songon i do nuaeng antusanta joujou ni
turpuk on tu hita ditingki ni ngolunta on, manjouhon tu Hurianta laho mamillit
rumang harohaon ni daging do, manang rumang harohaon ni Tondi ? Alai ngolunta
naung tinobus ni Kristus naeng ma mian dibagasan TondiNa asa unang mandate hita,
ido soso soso ni Apostel Paulus, asa mamillit pangalaho na mangihuthon dohot
mangoloi panogunoguon jala pangajaran na sian Tondi Parbadia hita sudena, olat
ni on ro di saleleng nilelengna. Amen !
