Benget
Manaon Sahat ro di Ujungna Sogot
Jesaya
50 : 4 – 9a
A.
Patujolo
Na
mangula do Panurirang Jesaya anak ni si Amos di Jerusalem ditingki opat
harajaon na manggomgomi Jehuda: Uzia, Jotam, Ahas, dohot Hizkia (Jes.1:1).
Marujung ngolu do Raja Uzia taon 740 A.K( 1 Sam.6:1) dohot Raja Hizkia di taon
687 A.K. Jadi Panghobasion Panurirang Jesaya lobi satonga Abad sejarah ni
Jehuda. Molo sian tradisi ni Jahudi, na mate syahid do si Jesaya di gergaji
tanganna dua ( ptds. Heb.11:37) marhite Raja Manasye Anak ni si Hizkia na jahat
i ( 680 A.K). Panurirang Jesaya marharoroan sian keluarga na tarbaritadi
Jerusalem; parsiajar do ibana na malo manurat angka ende jala na boi
manurirangi, ditanda ibana do keluarga ni raja jala mangalehon angka sipaingot
nang poda tu keluarga raja taringot tu
politik ni Jehuda. Marhasohotan do ibana dohot sahalak parompuan na mangula
songon panurirang, jala dua ma baoa ianakhon nasida. Jala turpukta on masuk do
tu horong Deutro Jesaya (Jesaya na paduahon).
B.
Hatorangan
1.
Ayat 4-5a: Naung dijou do si Jesaya, ditopa,
jala ditiop jala dilehon do Tondi ni Debata, asa diajar gabe sisean ni Debata.
Molo hata : “Sisean : Limudin” sian kata kerja “Lamad” na marlapatan mangajari,
pasomalhon; ndang songon na diparsingkolaan alai taringot tu pangalaho dohot
hapistaran. Dilehon Debata do di ibana dila ni sisean na mangungkap sipareonna;
marhite on ma ditontuhon Debata ma sikap ni siseanNa. Ganup tingki nang ganup
ari di pahisar Ibana pinggol ni siseanNa, asa lam tumajom parbinegeanna jala
margogoihon ibana marsiajar. Ganup manogot do disi dungo hita asa martangiang
(ptds.Pslm.5:4); disi ma diajari Debata jolma i asa lam pasomal diri mambege
soaraNa. Ganup ari do diajari; na so hea marnatammat alai asa sai tongtong mian
di bagasan “Guruna i” na mambuhai sipareonna i asa lam diantusi HataNa i.
Songon sisean ni Tuhan na niajaran, laos songonn i do Tuhan
i mangalehon pangajarion nang hagogoon tu angka na loja jala na sorat,
manorushon semangat naung jinalonasida be. Marhite dilana i songon podang na
tajom (49:2) na margogoihon ibana manghatai, malo mandok hatana, asa dibege
halak hatana songon Hata ni Debata na manhehei angka jolma na loja jala na
sorat. Asa jolma na tarlalap i na so parduli i ala sai hira soada ma
pangkirimon gabe hinsat sian i jala disi ma adong revolusi.
2.
Ayat 5b-6; Alai disi do tong jumpang paraloan
nang tantangan. Angka sisean na mangadopi i dipatorang di ayat on. Pangalaho na manarehon tanggurung,
namangalinsingi, (mangumpat janggut; dihata indonesia; dihata batak didok
mamastap hurumhu) ima tanda ni angka pangalaho baoa di Timur tengah (ptds.
Neh.13:25)-manijuri bohi (ptds.5 Musa 25:9; 4 Musa.12:14), na marlapatan
manguhumi, mangaleai. Angka na hona uhuman sisongon i, nunga maila situtu,
ndang dipardulihon be, jala di rehei , jala dianggap do naung ditadingkon
Debata ibana. Dison ma na ibana sadar “Ai
humongkop Ho do ahu tumaon insahinsak, dihungkupi hailaon bohingku”(Pslm.69:8).
Rade do rohana laho mananggung saluhutna i na so hea masa dipangalaho ni halak
na asing.
3. Ayat 7; angka bogas na i (na gok parengeihon
nang sitaonon) ndang na gabe pailahon, siala angka bogas i ndang boi manirang
sahalak sisean i sian Debata (Pslm.25:3); diangka na so mangantusi na masa i
jala na mangarehei sahalak sisean i, dibahen sisean i do bohi na koras songon
batu ping (batu kerikil). Tudoshon si Jeremia 1: 8 “Alai anggo ahu, ida ma, bahenonku ma ho
sadarion gabe huta na ganting, dohot gabe tiang bosi, dohot gabe parik haksa
dompak sandok tano i, dompak angka raja ni Juda” (ptds.Jer.15:20), dungi tudoshon
tu si Hesekiel 3:9 “Nunga hupapir pardompahanmu, songon mata intan, umpir sian
batu hian tahe; unang ho mabiar mida nasida, jala unang tahuton ho maradophon
bohinasida, ai pinompar na tangkang do nasida.” Laos songon i do naposo manang
sisean ni Debata na mangadopi angka alona nanag musuna, pos do rohana
dipangaramotion ni Debata nanag pe manarita ibana. Hatoguon ni roha sisean ni
Debata patuduhon panindangion tu sude jolma, na jongjong do ibana dilambung ni
Debata na gabe partanobatoanna.
4. Ayat 8 – 9 : Ndang na sae holan siseani na
umboto hasintonganna diadopan ni Debata; ringkot do dihatindanghon dijoloni
jolma na mamereng haleaonna i gabe sada bukti na diuhum Debata do ibana, doshon
naung dibereng torop jolma di tingki i (songon si Job). Parsaoran dohot Debata
tung so boi do ginotaphon angka pandelean nang sitaonon dohot pangunjunan na
sahat tu sisean i, alai disi ro angka hamaolon i, laos gabe sada dalan ni Debata doi laho patuduhon hasangapon nang
habalgaonna asal ma sisean i sai marsihohot mangasahon Debata.
Asa dijou ma sisean ditonga ni rapot godang songon na somal
diulahon na sian Tuhan i maralohon angka dewa ni torop bangso (ptds.41:1-5,
21-24 dst); alona i barani mangalo, dungi manjonohi sisean i asa patubu parkaro
tu ibana, ingkon sanggup mambuktihon hasalaan ni sisean i. Alai molo haputusan
ni hakim tudoshon songon sifat ni sisean i (na sintong i dipintori Debata) Ima
Panguhum na tumimbo. Halak na gogo gabe so marlapatan be; “Ida ma, sude do nasida matua songon ulos,
ngitngit manganhon nasida”, na marlapatantudoshon tu jolma na diportibion do i,
na laho salpu do sude na diportibi on dohot jolma i
C.
Sipahusorhusoron
ü Ndang
adong hasatiaon molo soada panghophon; molo tabereng di dalan kota,godang
do angka lampu lalulintas. Molo disi galak lampu na rara, nunga taantusi sigop
ma sude kendaraan so, boasa ? molo ndang so,
boi do hona tilang polisi hita; ima ra pingkiranta (alai pangoloion na
semu do i), unduk jala taoloi so siala mabiar sotung hona tilang manang uhuman
hita. Alai diangka na merasa ‘marhuaso’ manang na kebal hukum manang manuhor
uhum, ndang habiaranna angka aturan i, bolus dilaosi do uhumum i. Molo tajaha
do turpuk on manungguli roha nang haporseaonta asa unduk dohot sipangoloi ala
holong ni rohanta i do na manghuling, ima manghaholongi Debata naung mangalehon
dalan pardamean di hita dohot Ibana marhitehite Jesus Kristus AnakNa na Sasada
i. (ptds.Pil.2:5-11; Mark.14:32-50). Ala ni i mansai ringkot do na
ginoaranna hasatiaon laho mangihuthon
Tuhan Jesus Kristus i. Jala porlu do adong panandaon di diri maradophon Debata;
ima mananda diri jolma pardosa do hita diadopanNa. Panandaon diri on songon na
binaritahon di Pilipi 2:6 “Atik pe rupa ni Debata di Ibana, ndada songon na
nidobo dirajumi rohana tudosna i tu Debata”. Lapatanna ia Jesus sandiri pe tau
diri do Ibana; ise do Ibana maradophon Debata Ama i. Jala ala ni holongNa i,
rela do Ibana mananggali Ha-Debataon-Na
i gabe rupa ni jolma di Ibana. Dipatandahaon Ibana diri-Na asa gabe dalan ni
jolma i laho manjalo Ibana. Ala ni i dijou do hita asa tau manand diri dohot na
menempatkan diri di situasi yang tepat.
ü Mansoadahon
Diri: Di sadari Jesus do asa boi malua jolma i ndada dalan na mura i (ptds
tu Markus 14: 33 “Jala ditogihon ma si
Petrus, Jakobus dohot Johannes. Dung i biahaton ma Ibana jala bobonosan ” Alai
nang pe adong biar di Ibana , dialo Ibana do biarni roha i marhite na
mansoadahon diri biar i marhite na nidokna muse di Markus 14: 36 “On do hatana:
Ale Amang, saluhutna do tarpatupa Ho! Salpuhon ma siinumon on sian Ahu! Alai
ndada guru lomo ni rohangku, roham do” Mampu do Jesus mangalo hadirionNa i,
tongtong do Ibana martahan satia jala mangoloi sangkap ni Debata. Mansoadahon
diri na marlapatan mangalo hadirion: ginjang ni roha, losok ni roha, na
mangaisi i diri sandiri jala biar ni roha
ü Tulus
ni roha; Ndang adong na mansoadahon hagogoon ni Jesus, na boi do Ibana
malua sian haberniton i hau pinarsilang i, alai ala ni holongNa tu manisia,
sipangoloi do Ibana patutoru diri sahat tu hau pinarsilang i (Pil.2:8), adong
tulus ni roha na so adong roha marpambuat na mangahut tu diri. Jadi turpukta
sian Jesaya on martudutudu tu panindangion na bernit na tinaon ni Jesus
Kristus, na tongtong do Ibana olo ro mangadopi i (Joh.3:16). Ala ni i nunga
dipatuduhon Jesus sian BaritaNa, ndang adong haunduhon molo soada panghophopon.
Ala ni i di hita siihuthon Kristus, boi do ra dohononta maol mangihuthon Jesus
i, toho do nian i maol, alai naeng ma tandap tubagasan rohanta nang
haporseaonta ido diigil Debata sian hita, ai nunga jumolo Jesus manaon na
umbernita sian sitaononta di portibi on, asa tudos ma songon naung disosoi
Apostel Paulus di Rom 8 : 18 “Ai hurajumi angka sitaonon di hasiangan on,
hira na so adong do martimbangkon hasangapon sipapataron tu hita sogot”.
Suraon do adopanta nang aeonta angka na bernit di hasiangan on, unang ma pintor
mandele manang mandate rohanta, alai sai tongtong ma marsihohot manjalo gogo
sian Debata, asa margogo hita mangadopi i saluhutna ja sahat tu ujung ni
ngolunta, ido asa didok di Jakobus 1: 12 “Martua do halak na manaon di
pangunjunan i: Ai dung tau ibana, jaloonna ma tumpal hangoluan, naung
diparbagabaga tu angka na holong roha di Ibana”. Dungi jahaonta na tarsurat
di Pangungkapon 2: 10 “Unang habiarhon angka haporsuhon na naeng ro! Dabuon
ni sibolis ma deba sian hamu tubagasan hurungan, asa tarunjun hamu, gabe
tarsosak ma hamu sampulu ari lelengna. Sai burju ma ho rasirasa mate; dung i
lehononku ma tu ho tumpal hangoluan i!”. Songon Jesus Kristus i, na sai
burju do Ibana saleleng ngoluna dihajolmaon sahat tu ujung di Hau pinarsilang
i, asa dipahehe Debata Ibana sahat tu lambungNa di HarajaonNa i, laos songon i
ma angka siihuthon Kristus, asa marlas ni roha nang marhamonangan diujungna. Amen
