Dipahehe
Jahowa Do Hita Asa Unang Mandate
Hesekiel
37 : 1 – 14
A.
Patujolo
Si
Hesekiel i ma sahalak malim jala pinompar ni malim Busi na dipabangkit Debata
gabe panurirang di habuangan Babel. Dohot do ibana diboan raja Nebukadnezar
tarbuang tu huta Babel rap dohot lobi hurang sampulu ribu halak Juda na asing
uju i sian Jerusalem di tingki ni raja Zedekia, andorang so dilengsehon do pe huta Jerusalem dohot Bagas joro na disi taon 587 a.K. ( 2 Raja 24: 8-16; Jer.24:1; Dan.1: 1-4). Panurirang
Hesekiel rap dohot panurirang Daniel tarbuang tu Babel. Habuangan tu Babel on
ma sada uhuman na pinamasa ni Jahowa tu bangso Juda siala mardebata sileban
nasida.
Goar ni si Hesekiel marharoroan sian
Hata Heber : “Hazak” : Hagogoon, El;
Debata, jadi Hesekiel marlapatan; Debata Hagogoonku. Lapatan ni
goarna i tarida do i sian hatajomon ni pamingkirionna dohot panurirangonna na
mansai bagas taringot tu angka na naeng masa tu bangsona Israel. Ianggo bangso
i maringanan di inganan martopihon batang aek Heber. Alai laos diinganan on do
panurirang Hesekiel dapotan pangungkapon sian Jahowa na pataridahon
hamuliaonNa. Di turpukta on dipatorang do taringot tu pangungkapon na niida ni
si Hesekiel na boi mulak mangolu holiholi ni angka naung mate, bahen tudosan tu
haheheon ni Israel di ari sogot.
B.
Hatorangan
1.
Ayat 1 – 2; Dibagasan pangungkapon na ro tu si
Hesekiel dihilala do hagogoon ni tangan ni Jahowa na manogihon ibana haruar
marhitehite Tondi ni Jahowa, mamboan ibana tu sada rura. Rura on gok marisi
angka holiholi naung mate, ai marrarahan do disi di atas sisik ni rura i, pola
nunga masak situtu tarida (nunga mahhiang).
Gombaran na masa on pataridahon hajorbuton ni inganan i, na
mambahen panurirang i longang jala mabiar. Ndang hea dibereng ibana inganan na
songon i, na mansai jorbut, mansai songit jala bau do inganan on, pola do sogo
roha ni si Hesekiel diboan tu inganan i. Alai tangan ni Jahowa do na mamaksa ibana
ingkon marnida angka holiholi ni jolma naung mate i. Ndang denggan ditanom
angka na mate i, gabe songon i nama marrarahan angka holiholi i tarida, hira
jambar ni angka na mate di parporangan do nasida.
2.
Ayat 3 – 4 : Ro do Debata Jahowa mandok tu si
Hesekiel: “Ale anak ni jolma”! atehe tagamon tarpangolu dope angka holiholi on?
Sada sungkunsungkun na so mungkin do nian na nidokNa, alai ro do alus ni panurirang i: ale Tuhan Jahowa, Ho do
umbotosa!
Alus na ro sian tondi do alus ni panurirang on. Ndang gabe dialo
ibana na nidok ni Jahowa. Ala ni i, ro
ma hata ni Jahowa tu i bana mandok: manurirangi ma ho taringot tu angka
holiholi on, jala dohononmu ma tu nasida: ale holiholi naung masak i, tangihon
hamu ma hata ni Jahowa!
Disuru Debata do si
Hesekiel asa boi nasida umbege hata ni Jahowa, lapatanna; ndada holan tu angka
na mangolu boi didok jamita i. Nang tu angka naung mate pe porlu adong pandohan
na uli na boi pangoluhon nasida. Ai halak na so adong be harapan do nasida,
iingkon boi do angka holiholi i muse mulak mangolu. Holiholi ni jolma naung
mate i, ingkon boi mulak mangolu, songon na pinangido ni Jahowa.
3.
Ayat 5-6; Hata ni Jahowa tu angka holiholi i,
paboa dilehon do tondi i tubagasan nasida asa boi mangolu muse. Mangalehon
angka uraturat dohot patubuhon sibuk di nasida, mambahen hulinghuling dohot
mangalehon tondi tu bagasan nasida, asa ditanda nasida Jahowa Debara!
Sada hagogoon na gok halonganagan do na naeng bahenon ni
Debata tu angka holiholi i, na so boi be ninna roha ni jolma tarpangolu. Alai
marhitehite hata ni Jahowa ndang adong na so tarpatupa. Ingkon adong sada
haimbaruon dipamasa Debata, asa boi ditanda nasida ise do Jahowa Debata na
sasintongna!
4.
Ayat 7-8; Nuaeng ro ma panurirang Hesekiel laho
manurirangi songon na tinonahon ni Jahowa tu ibana. Laos dii tingki na
manurirangi i panurirang Hesekiel, ro ma sada soara na marngongos, gabe
masitopotan ma angka boliboli i ganup tu donganna. Gabe boi ma maruraturat
nasida, jala tubu sibuk, leap hulinghuling di atas nasida; alai ndang adong
dope tondi (hosa) dibagasan nasida. Songon i ma parjadina mulak mangolu jolma
na tardok holiholi i, gabe boi muse hot pangoluonnasida, nang pe so adong dope
hosa (nafas) di bagasan dirinasida.
5.
Ayat 9-10; Ro do muse Jahowa Debata mandok
hataNa; panurirang Hesekiel, asa manurirangi ibana tu tondi i. Songon anak ni
jolma ingkon manurirangi ibana dohot roha na marsitutu tu tondi i, mandok: ro
ma ho ale tondi sian desa na opat i jala mangullus ma ho tu bagsan halak na
binunuon, asa mangolu nasida. Sada halongangan do na masa on. Boi manurirangi
si Hesekiel tu tondi sian desa na opat i, lapatanna didok hatana tu haroroan ni
alogo sian timur, selatan, barat dohot utara. Ndang dung hea masa na songon i
di portibi on. Si Hesekiel manurirangi dohot roha na tutu uju di ngoluna i,
ndang alang so alang rohana na marjamita i, ai gabe manghorhon tu haluaon do
panurirangonna i. Manurirangi do panurirang i songon na tinonahon ni Jahowa tu
ibana. Gabe ro ma tondi i tu bagasan angka holiholi naung masak i, jala mangolu
nasida, laos diojakhon nasida, parduaan parangan apala na bolon sahali tarida
di tingki i ( hira sada pasukan na siap perang). Inganan rura na gok holiholi
na mate, saonnari gabe inganan ni torop olma na so habilangan godangna. Pola
tarsonggot jala longang rohana marnida
angka na masa i.
6.
Ayat 11-12: Alai di ulakhon Debata Jahowa do
muse laho mandok tu si Hesekiel taringot tu angka holiholi na adong di rura i.
Ai didok, ia holiholi i, i ma sandok pinompar
ni Israel. Jolma na tardok holiholi nasida naung tung masak, naung pesan
aroparop ni rohanasida, naung pidom. Hape, boi mulak songon jolma na somal. Na
gabe tudosan do didok Jahowa uju i, ai doshon angka naung mate hian do bangso
Israel na tangkang i, hira nunga dibahen tu tanoman; alai ro ma Debata Jahowa
laho mangkehei nasida angka naung mate i. Sada hal na so mungkin do pahehe ni sadasada jolma naung
mate di hasiangan on, alai na patuduhon boi masa do i molo Jahowa Debata mandok
! Gombaran patuduhon hamumulak ni bangso i muse tu huta Jerusalem, songon na
dihasiholi nasida hian.
7.
Ayat 13-14: Aha do lapatan ni pangungkapon na ro
tu bangso i ? I ma asa ditanda bangso Israel i Jahowa, naung mangungkap
tanomannasida naung mamboan nangkok bangso i sian tanomannasida. Songon
gombaran ni bangso Israel i naung digosagosa saleleng di habuangan Babel i
saleleng on, nang so adong be hirimon paluahon dirinasida sian inganan i. Hape,
ro do Debata pataridahon diriNa tu bangsoNa na tarbuang tu Babel, tano
sipelebegu i. Dilehon Debata Jahowa do Tondi tu bagasan diri ni bangso Israel,
asa boi mangolu jala marhasonangan, muse mulak tu Jerusalem, huta haborhatan
nasida hian. Sian angka na masa i ma, boi tandaon ni Israel ise do Debata
Jahowa na sasintongna! Ndada Debata na marlea di adopan ni bangsobangso
sipelebegu, alai Debata na sangap di sude inganan , na so boi dibatasi portibi
on panggulmitonNa i.
C.
Sipahusorhusoron
ü
Umumna sude jolma do manghasiholi ngolu na
mardalan dohot denggan jala gok las ni roha. Alai sabalikna sai adong roha na
jotjot manulak angka hasusaan nang panaritaan dohot arsak dibagasan ngoluna,
siala saluhutna i parohon gogo na soada dohot ganggu ni pingkiran. Na deba
jolma ndang margogo mangadopi hamatean i, talu do nasida binahen ni panaritaan
i. Jala boi do i masa hasusaan i di ganup jolma nang pe marasing be do
sitaononna ganup marsadasada. Hasusaan i boi masa tu manang ise pe, natumua-
naposo, baoa-parompuan, namora-napogos, namarpangkat-na so marpangkat dna. Sai
jotjot do ro arsak i so panagam ni roha. Jala sada kejadian na boi masa di
angka na porsea. Ndada na mandok gabe kebal sian parmaraan i. Persoalanna, boha
do hita boi hehe sian panaritaan i dohot sian arsak, jala boha do hita
marpasirangguthon panaritaan nang arsak i gabe vitamin ni rohanta na mamboan
hita gabe halak na lam tang huhut margogo.
ü
Di hita nagka siihuthon Kristus, dilehon do tu hita Tondi hagogoon ndada tondi hatahuton
didok di 2 Timotius 1 : 7 “Ai dilehon Debata do tu hita tondi hagogoon,
tondi haholongon, tondi pangarajaion diri, ndada tondi hatahuton”. Tondi ni
Debata na pahehehon semangatta jala dilehon tu hita ditingki taadopi angka
hasusaan nang hamaolon. Alai parsualonna nuaeng; boha do hita manghilalahon
huaso haheheon ni Debata? Ala ni i adong piga-piga pingkiran boi siputihonta:
Naparjolo, naeng do ungkap rohanta manjalo keadaan na masa dibagasan ngolunta
jala adong haoloon laho hehe. Mansai ringkot do i siala godang do jolma na
manulak na masa dijolona, arsak, paet ni ngolu nang pandelean, hape sai ro do
angka parsualon i, sai songon galumbang ni aek laut i do i, sipata metmet
galumbang, jala sipatang balga. Hape lam tatulak jala ndang tarjalo rohanta
paruslon i, lam hansit ma rohanang panghilalaanta disi. Songon halak na mabiar
tu jarum ni suntik, hape ingkon suntikon do nasida, ala biar ni rohana lam
leleng, lam ro ma hodokna,, jala togang do panghilalaanna disi, jala lam hansit
ma tinaonna disi. Hape molo laos olo ibana mangalehon dirina disuntik, ndang
apala umanssit sian na ditingki ditulak ibana. Lapatanna tudos tu ngolunta do i
nuaeng; molo adong persoalan na borat, ndada di parsualon i, alai rohanta i do
na manulak parsualon i, jotjot do ndang bulus rohanta manjalo na masa i di
ngolunta.
ü
Halak na malo hea do mandok “We can not direct the wind, but we can
adjust the sail”. Ndada boi hita manontuhon dompak dia do haroro ni
alogo, alai na boi do pe hita pauba layar ni parao asa boi hita tongtong
mardalan. Memang ndang boi hita manontuhon mata ni angin na mangollus do sian
utara manang sian Barat. Tudos tusi do ngolunta on, tung so boi do hita
manontuhon angka persoalannta, hamaolon dohot angka mara na sahat tu hita
manang ndang. Alai molo sahat pe tu hita parsualon nang hamaolon, na boi do
buatonta sikap: talu do hita binahen ni persoalan i, manang hehe sian parsualon
i jala gabe halak na margogo. Songon pidong rajawali i do i, ditingki habang
ibana di na timbo, sai jotjot do ro alogo na mansai gogo. Malua manang ndang
ibana ditontuhon habongna i do. Molo dipahusor adop tu toru, boi do gabe lam
maol adopanna jala madabu dung imate. Sabalikna molo dipaadop do habongna
dompak ginjang, boi ma ibana mangatasi dohot lalu sian alogo na doras i ala lam
tu ginjang do jala tu inganan partimbo ibana gabe malua sian i. Laos songon i
do hita mangadopi galumbang ni ngolunta, disi ro parsualon i, naeng ma gabe
pengalaman di bagasan ngolunta, malua manang ndang ditontuhon sikapta
mangadopisa. Tudia do tapaadop ngolunta, tu toru do ima huasop ni sibolis (portibi)
manang tu ginjang tu huaso dohot gogo ni Tondi Debata Ama i ? Ia di Rom 8 :
9 didok “Alai anggo hamu, ndang be di bagasan daging i, di bagasan Tondi do,
molo tung tutu Tondi ni Debata maringanan di bagasan hamu. Alai molo so Tondi
ni Kristus di jolma, ndang Kristus nampuna ibana.” Lapatanna naeng ma bagas
pangantusion ni haporseaonta taringot tu Jesus Kristus i, naung manaluhon sorop
ni sibolis dohot hamatean i. Nunga hehe Kristus sian na mate, jala ido umbahen
tadok Ibana Tuhan Jesus Kristus na margogo laho pahehehon tondinta sian
hamatean, nang dingolunta on TondiNa Tondi Parbadia i do na pahehehon
semangatta asa unang lomos rohanta jala mandate, alai naeng ma taluhononta i
marhitehite hagogoon Tondi Parbadia i. Songon topik ni minggunta: “Dipahehe Jahowa do hita asa unang mandate”
ü
Angka anak ni Debata na mangolu dibagasan Tondi
naeng do mamereng sude parungkilon, parmaraan nang hasusaan i sian sudut
positif na mangalatih hita laho marsiajar taringot tu ngolu on. Asa marhite
sitaonon i laho mangajari hita asa lam benget, jala martoruk ni roha, laos
pasahathon diri tu Tuhan Jesus. Boi do marhite sitaonon i mangajari hita laho
manghalashon haburjuon ni angka dongan jolma jala mangajari hita taringot tu
angka nauli na denggan. Na malo mandok : “Bad
weather makes good timber”; Iklim yang tidak baik justru menghasilkan kayu
yang baik. Pengalaman sulit dalam kaca mata positif justru menjadi vitamin bagi
jiwa. Goar ni minggunta ima Minggu Judika, na marlapatan “Luluhon Ahu Ale Jahowa (Psalmen 43: 1a): Berilah keadilan kepadaku ya
Allah.” Amen.
