Rap
Dohot Kristus di Paradeiso
Lukas
23 : 33 – 43
Sadari
on ma parningotan di hamamate ni Tuhanta Tuhan Jesus na di dolok Golgata.
Parningotan nama na di hita nuaeng. Alai nang pe parningotan goarna, hot do
argana di hita, ai parningotan na manungguli rohanta do i marningot na tinaon ni
Jesus sian angka musuNa, suruan ni sibolis i, laho paluahon hita sian dosa dohot
sian gomgoman ni hamatean i. Di hau pinarsilang i do dipaujung Ibana sude
ulaonNa na tinurpukhon ni AmaNa i tu Ibana.
I.
Poda ni hamamate ni Tuhan Jesus tu hita na gabe
sihangoluhononta marhite sian jamita on
Ø
Silang uhum hamagoan ala ni hajahaton. Adong do
manang na piga ragam taringot tu silang i naeng botoonta, i ma:
1.
Silang gantungan tu parjahat ( 1 Musa 40: 19,
22) naposo ni raja Parao nanaeng mangarasun raja i. 5 Musa 21 : 22 =Halak
pardosa na ingkon uhum mate, ingkon gantunghonon Ibana tu hau asa mate. SI
Haman na naeng mangarasip halak Jahudi, hona uhum do digantung tu tiang na pola
5 meter timbona. Ester 7:9-10.
2.
Silang tu halak na talu porang. Raja ni huta Ai,
na talu porang ni bangso Israel niuluhon ni si Josua (Jos.8:26), songon i dohot
na lima raja ni Kanaan na tinaluhon ni si Josua (Jos.10:26)
3.
Silang paombun rimas ni Debata, siala na
mardebata sileban bangso Israel rap dohot halak parbegu i, rap nasida marsomba
tu Bal-Peor. Didokhon Debata tu si Musa asa ditangkup angka induk ni bangso i
jala digantungkon tu hau, paombun rimas ni Debata maradophon bangso i ( 4 Musa
25: 4).
4.
Silang sapata ni mudar ( 2 Samuel 21: 1-9)
5.
Silang bura. Na hona bura do ganup na targantung
di hau ( 5 Musa 21: 23; Galatia 3: 13)
Molo
tagombarhon angka i sude tu pamerenganta, suang songon i halak parjahat na rap
tarsilang na dua halak i, di Golgata i, tama ingkon mangindorat rohanta, ai
hita hian do na ingkon dohot tarsilang ala ni dosanta na godang i. Hape tongon
do angka sahitta diusung Ibana, jala angka pardangolanta diporsan; alai ianggo
rohanta mandok: Debata do maminsang, mamungkul dohot pasipal Ibana. Hape ala ni
pangalaosionta Ibana tartullang,, binahen ni hajahatonta Ibana mabugang. Ampe
tu Ibana pinsangpinsang parhitean ni hasonanganta, jala binahen ni bugangna
malum itahilala. Dibahen i, ingkon sian nasa rohanta do mangalo dosa i, asa
unang diparhatoban hita, jala unang mangonai tu hita na jumorbut sian i dope.
Ø
Alai taparrohahon, ianggo silang hangoluan i, i
ma silang ni Tuhanta i. Na hinatindangkon ni si Jesaya i (Jes.53:4-5), i ma
silang pardamean. Ai haotoon do taringot tu silang i di roha ni angka na laho
mago, alai hagogoon ni Debata do i di hita na dapotan haluaon. 1 Kor.1:18, Ala ni i tabereng ma induk ni
haporseaon i, jala na paujunghonsa, i ma Jesus na manonhon parsilangon, singkat
ni las ni roha tohapna i hian so dietong i hailaon, gabe hundul di siamun ni
Debata (Heb.12:2). Silang pardengganan, pardamean tu Debata Ama i do ianggo
silang ni Tuhanta i. Didok si Johannes do di 1 Joh.2:1-2. Molo tung adong na
mardosa, adong do pangondianta tu Ama i, i ma Jesus Kristus partigor i. Ibana
do pardengganan pasaehon angka dosanta, alai ndada holan dosanta, tung dohot do
dosa ni sandok portibi on. Tu saluhut bangso do pasahatonna hangoluan i. Laos
marhite sian Ibana. Kol.1:20 “Ala ni i molo taparrohahon silang ni hangoluan i,
auhononta ma i tu ngolunta. Tapausungusung ma dibagasan dagingta tanda ni
bugang ni Kristus, mandok asa sai tongtong ma hita mangolu dibagasan Ibana jala
mate dibagasan Ibana, asa ai mate manang mangolu, mate jala mangolu di Tuhan i
ma hita.
II.
Soara na tarbege sian Silang Hangoluan i
Ø
Nunga tarsilang Tuhanta, alai tarbege dope sian
silang i soara Holong ni roha na soada tudosanna. Tarbege ma soara ni Jesus
mangondihon musuna, didok ma: “Ale Amang, marpamuati ma rohaM mida nasida, ai
ndang diboto nasida na binahen nasida i. Songon i pe tangiang ni Jesus,
mangondihon nasida, ndang dipardulihon nasida i, sai patungosngosan pe iponna
huhut manginsahi Jesus na tarsilang i.
Ia na asing dipalua, ua diriNa ma nian dipalua molo na tutu do Kristus Anak ni Debata, na
pinillit i Ibana. Soldadu pe dohot manginsahi, dibagi do ulosna jala tondung
dibahen taringot tu sampesampe. Didok ma: Anggo raja ni Jahudi do Ho, palua
diriM antong. DIUpadonok ma mamboan na asom tu Ibana. Sahalak sian parjahat
sian parjahat na di sihambirang ni Jesus pe dohot do mangaleai, Ai ndada
Kristus i Ho. Palua ma diriM nang hami antong.
Alai tuani ma
dipinsang na di siamun ni Tuhanta i na tarsilang dohot Jesus i didok
ibana ma tu donganna i: Ndang dihabiari ho hape Debata, atik pe rap hona uhum
hita? Uhum na tigor do na tu hita, ai tajalo do upa ni pambahenanta, alai
ianggo Ibana, ndang adong diula na so ture. Laos didok ma: “O Jesus, ingot ahu,
ia dung sahat Ho tu HarajaonMi”.
Tarbege do muse roha holong ni Tuhanta na so hadodoan i,
atik naung tolping ngoluNa di tano on, laos songon i halak na tarsilang di
siamun ni Tuhanta i, diboto ibana do naung talpe ibana tu hamatean i alai
disorohon hatana mangido asi ni roha ni Tuhanta. Olo tutu, balga ni
haporseaonna na Raja do Jesus i tutu, na so di tano on HarajaonNa, umbahen
dipangido asa diingot Jesus ibana dung sahat tu HarajaonNa na di surgo i.
Tingki na singgip i tangkas do pangalusi ni Jesus parroha
Asi dohot Holong i, ai didok ma: “Situtu do hatangkon tu ho, sadari on do ho
rap dohot Ahu di Paradeiso!” Beha holan na mambege hata ni Tuhan i ma hita
songon na mambege siara ni radio sambing, so taparrohahon, so tarsunggul
rohanta manopoti dosanta? Sai
pasangahononta dope hatigoranta, pabalionta dope tu halak na asing dosa
i, si anu do na sala, ala ni si anu do umbahen songon on ahu. Na so diaorai
Debata do sibolis i manggunturi, aut na pintor ditangkup Debata sibolis i ndang
boi be ibana manggaori hita. Tole ma, Debata do umboto manang na songon dia
rohanta, manang tingkos manang na sala. Holan asi ni roha dohot holong ni roha
ni Tuhanta i do na boi mamintori hita, alai sai dohot ma hita manjouhon,
mangido tu Tuhanta: “O Jesus, sai ingot ahu, ai naung sahat do Ho tu
harajaonMi! HapushononNa do sude dosanta i.
Ø
Adong do nian 7 hali marsoara Jesus sian silang
i, alai ndang sude disurat si Lukas,
holan 3 do sian na 7 i. Disurathon si Johannes adong do na 3 i, i ma hata na
pasahathon inana si Maria tu si Johannes, asa ibana na sumarihon inaNa i, didok
ma: Ndi ma inang anakmi. Dungi didok ma tu si Johannes; Indi ma inangmi. Jadi
olat ni i ma dijangkon si Johannes si Maria i tu Jabuna.(Joh.19:26-27),
disarihon do ngolu ni inaNa i.
Di ayat 28
didok Jesus dope; “Mauas Ahu, Nunga patut mauas Ibana, so mangan so minum dung
na laho nasida tu Getsemane, laos tartangkup disi, tole do mus, nunga godang
durus mudarNa sian bugangNa i, tole do muse dompak mata ni ari na maringoringor
i do diadophon bohi ni Tuhanta. Alai ianggo apala na hinapuashonNa, I ma dosa
na di portibi on, diampehon tu Ibana asa diporsan Ibana tu hau pinarsilang i
(BE.No.80:3).
Sada nari
dipaboa si Johannes do; Nunga marujung ! Nunga dipaujung Tuhanta sude ulaonNa
di tano on, songon jolma Ibana. Di hau pinarsilang i do dipaujung parbadaanNa
dohot ulok/sibolis i. Napinaboa ni 1 Musa 3: 15, Si Mateus dohot si Markus
manurathon holan sada hata do i ma: “Eli, Eli, Lama sabachtani”, mandok: “Ale
Debatangku, Ale Debatangku, Boasa tung tadingkohononMu Ahu? (Mat.27: 46);
Mark.15:34). Dihilala Jesus, songon na ditadingkon Ama i Ibana. Jala sintong do
i di ombas i. Ai aut sura unangmasa i, ndang adong huaso/ gogo ni Jahudi
manangkup dohot mamparsilangkon Ibana, songon na nidok ni Jesus tu si Latus: “Ndang
huasom, aut unang na dipasahat Damang Ahu tu ho. Na parpudi sahali didok Ibana
ma marhite soara na gogo, ditingki pangholom ni mata ni ari i, di tingki ujung
ni huaso ni na holom i : “Amang! Tubagasan tanganMu ma Hupasahat tondingKu,”
Dung i tos ma hosaNa. Ndang boi huaso ni haholomon i ianggo taringot tu
tondiNa. Songon na nidok ni Debata tu sibolis na mangido mangunjuni si Job; “Jadi
do ianggo jamaonmu dagingna, alai ianggo tondiNa ndang jadi jamaonmu. Jadi
mulak ma Tondina tu AmaNa Debata, paima hehe Ibana sian hamatean jala manaek
muse tu banuaginjang pasadahon diriNa tu Ama i.
Jadi soara,
hata ni Jesus na sian Silang i, tung tangkas do soara holong, panghophoponNa do
i di hita mangondihon hita tu Ama i, asa dijalo hita muse gabe ianakhonNa. Alai
asa sahat i, pangokuonta ala ni dosangku do mate Tuhanki, Ala ni i olo ma ahu
ro tu Ibana manopoti dosangku dohot mangido asi ni rohaNa, asa dijalo
tangiangki.
III. Na masa di Golgata asing sian silang i, Naeng
Berengonta jala parrohahononta
Ø Maribak
hirehire na di bagasjoro i. Adong do hirehire manang tenda di bagasjoro, i ma
tenda parholangan ni bilut na badia dohot bilut na badia situtu. Holan sintua
ni malim do na boi tusi. Alai marhite sian hamamate ni Jesus na maribak
hirehire i, na marlapatan: Nunga dipadomu hamamateNa i hita dohot Debata. Mudar
pardamean naung use di hamamateNa i ma na gabe pardameanta tu Ama i (Heber 9 :
1 – 28).
Ø Marnida
na masa i, letnan na manjaga na mamarsilanghon Tuhanta i, dipuji ma Debata,
ninna ma: “Tutu do, halak na tigor roha do on! Didok surat ni si Mateus do di
Mateus 27:24 “Alai dung diida induk ni soldadu i rap dohot angka donganna, na
jumaga Jesus, lalo i ro di angka na masa i, mabiar situtu ma nasida ninna ma: “Tutu
do on Anak ni Debata”, asa nunga tumingkos panandaon ni sipelebegu i di Jesus
sian angka Jahudi dohot angka pangituai dohot angka parhalado ni halak Jahudi. Asa
tutu do gabe “Silang Hangoluan do silang
ni Jesus i di angka na marnida dohot marrohahonsa dohot mangauhonsa”.
Ø Jadi
sude natorop i, na marluhut mainondur, masitompak andorana, marnida na masa i,
laos mulak ma nasida. Tagamon do adong penyesalan di natorop i. Ai tingkos do
na nidok ni Jesus di tangiangNa i: “Ai ndang diboto nasida na binahenna i. Boi
do masa na songoni, di sadasada peristiwa, ndang apala sai binoto manang aha na
niula, alai paidaida dongan, ala na mabiar di hasutanhasutan ni na marhuaso,
atik beha hona tindak molo si hiihuthon. Alai sian cara ni halak on, boi do
adong harapan, na olo dope nasida mulak tu Jesus. Tagamon do dohot halak on na
umbege jamita ni si Petrus di ari Pentakosta i, gabe tardidi 3000 halak torop
na. Sai olo ma hita manompuk andoranta manopoti dosanta, ia dung taida na masa
di Golgata i jala dung tabege soara ni Tuhanta na sian silang i.
Ø Didok
si Lukas dison: “Asa mandaodao do jongjong saluhut angka na mananda Ibana
marnidasa. Alai didok si Johannes saksi mata, na tangka marnida jala na umbege
hata ni Jesus, didok do di Joh.19:25-26. Dung i jongjong ma di lambung ni Jesus
na di ha pinarsilang i inaNa dohot paribanNa dohot si Maria ni si Keleopas
dohot si Maria Magdalena. Anggo Jesus dung diida disi inaNa dohot sisean
haholongan ni rohaNa (Johannes) di lambungNa, didok ma tu inaNa: “Ndi ma inang
anakmi”. Dung i didok ma tu sisean i: “Ndi ma inang mi. Sidohonon taringot
tuson: Mungkin adong dope angka boruboru na sian Galilea asing sian halak si
Maria on, ai so dipaboa si Lukas manang na ise boruboru i. Huhut muse barita na
pinapungupunguna do i sian Apostel Paulus dohot sian angka halak na sanga
umbege barita ni Jesus. Ala ni ndang polsa diselidiki ibana manang ise angka
boruboru i. Alai ia si Johannes, tangkas do saksi mata, na marnida dohot
hasahatan ni hata ni Jesus. Didok ibana di Johannes 19 : 35: “Na marnidasa i do
na manghatindanghon i, jala sintong do panindangionNa i”. Ibana do umboto
sintong ni na nidokna i, asa anggiat dohot hamu porsea. (Ndang apala olo si Johannes
manggoari dirina disurat on, holan sae
do didok: Sisean haholongan ni Jesus, sisean na sadanari, sisean na mangunsande
tu andora ni Jesus, dna. Serep ni rohaNa do i na so olo patujolohon dirina).
Didok si Johannes nangkin: “Asa anggiat dohot hamu porsea!” Laos on do nuaeng
naeng ondolhonon di jamita on tu hita: “Dung tabereng na masa di silang ni
Tuhanta i”, jala dung taparrohahon sude na masa disi na tinaringotan ni jamita
sadari on: Sai dohot ma hita porsea asa mardame hita laho mulak tu bagasta be.
Amen.
