Rap
Dohot Kristus Di Paradeiso
Psalmen
22: 2-12
1.
Sian mamungka hajajadi ni langit dohot tano on,
sian si Adam jolma na parjolo i sahat ro disadari on, ndang dung dope nanggo
apala sangkidop mata ditabunihon Debata bohiNa sian hajolmaon, na atik pe didok
panurirang Jesaya (54:7-8), satangkir isap sambing do ditadingkon Debata bangso
na hinaholonganNa i, jala diparpiar ni murukNa do hamamasa i, alai jalo do
papungupunguonNa jala asianNa nasida. Ia na nidok ni panurirang i, songon on
do; Dibagasan pangantoion dohot perencanaan ni Debata do na niae ni bangsoNa i,
dibagasan pangajarion ni Ibana do na masa i, jala satangkir isap do ombasna.
Asa ndada na mulak ditadingkon Debata nasida.
2.
Panghilalaan sai songon na tinadingkon ni Debata
do panghilalaan ni si Daud di bagasan turpuk on. Nunga sungkot dihilala ibana
hansitna so ala ni timbona, ponjot dohot so ala bolonna. Songon i ma
pangontakna dihilala ibana. Anggukanggukna do dipabotohon, jala laos
anggukanggukna i do na gabe alualuna tu Debata. Sandok, ndada Debata sandiri na
mandok naung manadinghon si Daud. Jala sungkunsungkun na nionjar ni
panghilalaan parbagasan do hatana na mandok, ale Debatangku, Debatangku! Boasa
tung tadinghononMu ahu? Pos ni rohana di pangurupion ni Debata do na pinatubegehonsa,
ai Debata sambing do dibahen hasahatan ni panghilalaanna i.
3.
Laos dihatindanghon si Daud do ise dirina di
jolo ni Debata, jala aha do sibingkasi ni alualuna i. Didok ibana (7), gea
sambing do dirina, jala ripe sieleson (cela) dohot parlibean (hina) ni situan
natorop. Ndang adong argana, ndang adong gogona, ndang adong sipangasahononna,
bahkan ndang adong uhum na manjamin hak azasi ni ibana di ngolu on. Asa tung
orbuk sambing do dirina di jolo ni natorop, jala lomolomo nasida mangalaluhon tindakan
tu ibana. Ndada holan status hukum, alai dohot do nang tindakan ni natorop
mencela dohot menghina ibana, jala sungkot ni haleaon ni jolma nunga dihonahon
nasida maradophon ibana, ai ndang adong be hata, pambahenan na paleahon, na
mangalesengi na so dihonahon tu ibana. Diparengkeli, dipangangang halak do
babana be huhut dipangupirupirhon uluna mangalelei ibana. On do ungkapan
perilaku na sabalga ni balgana laho paleahon sasahalak . Songon i ma
panghilalaan ni si David atike pe ulubalang di hamusuon jala raja ibana (8).
4.
Ndang adong be aleale, pihak manang hagogoon na
asing na tau gabe pangalualuanna jala pangondionna so ganda holan Debata sambing. Tung sian sandok haporseaonna do
dihasiholi pangurupion ni Debata mamungka sian ompuna na robi. Ndada tradisi
sambing na pinatujolona, alai tindakan ni Debata di pardalanan ni ngolu ni
ompuna dohot ngoluna sandiri do na pinangasahon ni ibana, i do alana didok,
Jahowa do na badia jala na marhabangsa di atas ni pujipujian ni Israel. AI
tongtong do Ibana manangihon angka na mangasahon Ibana sian nasa rohana, so
pola marlaok, jala dioloi do pangidoan ni angka si songon i. I do alana umbahen
na gok pujipujian habangsaNa i.
5.
Tumangkas muse do dihatindanghon si David
pardalaan ni ngolu ni ompunasida, jala mangasahon pambahenan ni Debata tu
ompunasida i do, ibana manganggukhon alualuna. Didok ibana, ai marhaposan tu Ho
do nasida, jadi dipalua Ho do nasida, alani ndang be tarurak nasida. Jotjot do
pengalaman manang pardalanan ni ngolunta songon pengalaman dohot pardalan ni
ngolu ni so David on, pola sahat ro di na tubu sungkunsungkun di bagasan
rohanta mandok, ai na so holong be roha ni Debata di ahu, di hami, jala na so
ditangihon alualunami ? Ndada apala sungkunsungkun ni na so porsea si songon
on, bahkan bahagian ni haporseaon do sungkunsungkun si songon on, ai nionjar ni
uas dohot sihol asa humatop dipapatar Debata alusNa. Alai torang do ianggo
partingkian mangalusi di tangan ni
Debata do i, jala manigor tongosonNa do hombar tu tingki na binuhulNa. Na
ringkot, naeng ma sian sandok rohanta manghilala na soada hita, jala nunga suda
gogonta, i pe asa hatop dialusi Debata. Ai pengalaman si songon i do dibolus
Apostel Paulus di na nidokna, ai dibagasan hagaleon do sun timbul hagogoon ( 2
Kor. 10:9). Ingkon sahat do tu panindangion na songon i. Amen.
