Manongtong
Do Tuhan di PadanNa
1 Musa 15 : 1 – 6
a. Patujolo
Ia turpuk
diminggunta on ima taringot tu padan na niuarihon ni Debata Jahowa tu si
Abraham. Debata marpadan laho mangalehon pinompar tu si Abraham. Ia pangidoan
taringot tu pinompar do na rumingkot sian pangidoan angka arta nang pe nunga
diuraihon tu si Abraham (7-21). Ai pinompar do na rumingkot di angka paisolat,
dungkon torop pinomparna ipe asa boi nasida masiurupan laho manjalahi
ngolungolu. Alai tu angka partani tung
rumingkot do tano dinasida, ai tano do mual ni ngolungolu nasida. Ia molo tu
angka raja nang panggomgomi di Bangso Israel
ringkot ma na dua i; pinompar dohot tano.
b.
Hatorangan
1.
Ayat 1, Dung salpu angka jamita ondeng ro ma
hata ni Jahowa tu si Abram; tung mansai marmulia do haroro ni Hata ni Debata tu
si Abraham (bnd.12:1). Tarida ma inisiatif ni Debata do pasahathon padanNa,
sangkapNa tu si Abraham. Disonma tarida na so marmeammeam Debata di PadanNa.
Jala ndang napinangido si Abraham i jala disangkapi ibana i, holan sian asi ni
roha ni Debata sambing do i. Disonma tarida pangungkapon ni Debata tu si
Abraham marhite padanNa i.
Unang mabiar; on ma pandohan ni Debata
na gabe sada jaminan disi Abraham laho manjalo padanNa i. Hata ni Debata do
jaminan disi Abraham, ndang adong ianggo na asing. Molo di jolma ingkon adong
do jaminan ni janjina,asa dihaporseai jala haposan. Mansai balga do upa na
mangihuthon Debata dibagasan ngolunta asalma porsea hita dipanjouonNa i.
Panjouon ni Debata paluahon jolma sian ragam hasusaan. Angka halak na mangalusi
panjouon ni Debata dapotan haluaon. Sada jaminan ni si Abraham laho mangulahon
panjouon i ima ala ulubalang; ima Debata Jahowa sandiri na mangalinggomi
ibana.Namarlapatan ndang hahuahan ni manang ise si Abraham.
Alai marhite hata ni Debata “Unang
Mabiar” namarlapatan; Debata sandiri nabertanggung-jawab dingolu ni si Abraham
laho mangaramoti ngoluna jala mangalehon upa ni hapintoranna di haporseaon. Dungi
didok Debata;”Upam mansai balga”, pandohan on na marlapatan mangihuthon Debata
ndang adong rugi, alai sabalikna angka paruntungan do, ai so adong na pinagido
Debata songon pangidoan ni jolma ia so holan haporseaon tu Ibana sambing. Upa
na mansai balga i sai na mangihutihut ngolu ni si Abraham jala manongtong do
sahat tu hita marhite haporseaon na songon si Abraham dibagasan Jesus Kristus.
2.
Ayata 2 – 3, Alai ninna si Abram ma: Oe ale Tuhan Jahowa,
aha ma lehononmu di ahu ? Dibege si Abraham do hata ni Debata asa unang mabiar,
alai ndang apala tangkas siantusi ibana nang dijalo ibana hata i. Sian pandohan
on tutu taridama keraguraguan ni si Abaraham. Diboto si Abaraham do ia Debata
do na manjagai ibana di Misir (masa parporangan opat raja mangalo lima raja);
dungi dilehon Debata do angka arta di ibana. Marhitehite ima boi dohonon nunga
dijalo si Musa godang pasupasu ni Debata. Alai dao lobi sian artai na rumingkot
dihasiholi si Abraham ima pinompar, asa gabe sada jaminan doi di si Abraham. Ai
marisuang do angka pasupasu di arta i, ia so adong pinompar na manjalosa, hape
padan ni Debata ia si Abraham dohot
pinomparna asa gabe pasupasu tu saluhut bangso, ndada marlangku be i, alai
gagal siala punu na ma ibana. Na mangapuli rohana ima hasosorang ni sada anak
ditonga ni keluargana. Asa unang tu hatobanna si elieser sian Damsyik arta
teanteanna i molo dung monding ibana. Ala hatiha i, molo so adong pinomparna,
manang gellengna, ingkon tu hatobanna do arta teanteanna i (Poda 17:2). Eliezer
lapatanna : Debatangku pangurupingku (bnd.2 Musa 18:4), ibana anak na tubu
dibagasan jabuna na gabe sitean ibana molo so adong pinomparna.
3.
Ayat 4-5 : Dungi ro ma Hata ni Debata mangalusi
ibana; ndada si Elieser na manean ibana alai ingkon na tubu sian butuhana do.
Ndada anak hatoban, alai anak naung pinarbagabaga hian tu ibana ima anak tubuna
sandiri. I ma Hata ni Debata na patoguhon roha ni si Abraham, na mandopang
hatahuton ni si Abraham. Laos ido nang tu angka na siihuthon Jesus, holan
marhite Hata ni Debata do na palumbanghon rohanta, ateatennta, marnida godang
na i na mambahen marsak hita di ngolu on. Dungi dipatuduhon Debata ma muse tu
si Musa angka bintang na di langit toropna so habilangan, laos songon i ma
bilangan ni torop pinompar ni si Abraham, ima patuduhon balga ni holong ni
Debata tu si Abraham. Marhite i dipasupasu Debata si Abraham marhite torop
pinomparna. So habiloangan dengan basa ni Debata, jala ndang tarpajojor hita i
dibagasan ngolunta. Asa na holan manjalo pasupasu i do si Abraham nang hita pe
siihuthon Jesus, asal ma sai tongtong hita porsea di panjouonNa i.
4.
Ayat 6; Dungi porsea ma si Abraham tu Debata.
Ndang ditulak si Abraham padan ni Debata, dijalo ibana doi jala dihaporseai;
ima hapintoranna. Ndada si Eliezer be na manean ibana alai anak sian butuhana
sandiri do (anak kandung) na ingkon sipaimaonna. Dison ma adong haporseaon di
si Abraham; porsea saurdot do sian hata Heber; “aman” jala tadok do jotjot di
namanutup tangiangta gabe “Amen”, namarlapatan: manongtong, gogo, ndang muba,
satia. Jala Hata Aman/amen, patuduhon sada alus manolopi pandohan ni sasahalak,
dohot manjalo dibagasan bulus ni roha. “gabe hatigoranna do i dietong Jahowa”;
Hata on gabe luar-biasa, siala dibuat Ap.Paulus do on pola sahat tolu hali di
Surat Rom jala sahali dipangke di surat Galatia. Jala na boi gabe hatigoran di
Debata siala na ungkap do roha ni si Abraham manjanghon Hata ni Debata. Gabe
hatigoran di hata Heber; tsadiqim; tsedaqah; di hata Indonesia sedekah, derma.
Dijalo Debata hatigoran ni si Abraham, ndada sian parsaoranna dohot Debata, ndada
ala ulaonna, nadada ala peleanna, alai ala ni rohana i do na ungkap tu Hata ni
Debata, asa sadalan dohot sangkap ni Debata. Nang dingolunta pe sude tangiangta
nada patuduhon asa pangidoanta i na saut, alai asa martangiang pe hita; disi ma
asa sadalan pangidoanta dohot pangidoan ni Debata, dungi dohononta ma: sai
sautma lomo ni rohaM. Ai ndang adong na so tarpatupa Debata (Luk1:37).
c.
Sipahusorhusoron
i.
Taingot ma Padan Na Robi Dohot Padan na Imbaru,
disada Bibel namarisihon Hata ni Debata. Disi ma patuduhonon ni Debata padanna tu hita na porsea. Jala ndang
tadingkonon ni Debata hita asal ma porsea hita paimahon padanNa i. Buku Ende 766
Padan na uli; Padan na uli “Ho ndang
hulupahon”, Ndang pola mabiar au di ngolungki, Nang pe holom do dalan
siboluson, Ro do hatiuron sian langit i. “Ho tung so huhalupahon Audo manogihon
Au do mangondihon. Ho tung so huhalupahon, Au do margogoihon pos ma rohami”.
Taingot ma na marpadan do hita tu Debata ditingki: tardidi ianakkonta asa
natoras mangarahon ianangkonna tu gareja. Ditingki Marguru malua, ditingki
marbagas tarpasupasu. Taingot ma padanta i, nang pe jotjot hita lupa jala ndang
satia, alai Debata sai tongtong do marningot padanNa i jala satia di padanNa.
ii.
Sian turpuk on sai jaloon do haporseaon na bulus sian hita songon
haporseaon ni si Abraham, adong ungkap ni roha di Padan ni Debata, ima dietong
Debata gabe hatigoran. Nang hita pe na porsea dibagasan Jesus Kristus,
tapadtuduhon ma haporseaonta marhite na olo
hita mangungkap rohanta di Hata ni Debata. (Heber 11:1 Alai anggo
haporseaon i, pos ni roha do i di angka sihirimon, jala pamotoan na tontu
taringot tu na so niida. Galatia 3:9
Onpe, angka na sian haporseaon i do
dipasupasu rap dohot si Abraham na porsea i. Lukas 18:8 Hudok ma di hamu:
Magira ma pintoranna nasida! Alai tagamon jumpang Anak ni jolma i ma haporseaon
di tano on di harorona i?).
i.
Minggu
Reminiscere (Sai ingot ma denggan ni
basaM), ido goar ni minggunta di minggu on, laos tapahombar ma muse tu Tema
ni turpukta na mandok : “Manongtong do
Tuhan i di PadanNa”. Nunga digohi Debata padanNa i tu hita jolma pardosa
marhite Jesus Kristus na mamorsan angka dosanta nang pangalaosionta. Molo Debata
donganta, gabe taruli nasa pasupasu ma hita, dipargogoi nang tondinta mamolus
angka tingki nang ari ni ngolunta. Jala naeng ringkot botoonta ia dalan ni
Debata tung andul do sian dalan ni jolma, Jesaya 55:8 Ai ndada pingkiranku pingkiranmuna i, jala ndada dalanmuna angka
dalanku, ninna Jahowa. Asa dalan ni Debata do na ingkon jalahanta asa
martua hita hinorhon ni i. Efesus 3:12 Marhitehite
Ibana dapot hita hiras ni roha dohot dalan masuk, di bagasan roha na pos, na
mangkaporseai Ibana. Amen.
