Bangso
Naung Dipalua Debata sian Parhatobanon
5
Musa 6 : 10- 19
a.
Patujolo
Ia turpuk on, ima sipaingot ni
si Musa tu bangso Israel di na laho taripar nasida mamsuhi tano na
pinarbagabaga ni Debata, ima tano Kanaan, na gok situak ni loba dohot susu.
Tano i do na pinarbagabaga ni Debata tu ompunasida ima si Abraham, Isak dohot
Jakob.
Dihaporseai si Musa do na satia
Debata di padanNa. Ala ni i, tung tangkas do dipaingot Musa bangso i, asa hot
nasida satia tu Debata, ala Ibana do naung paluahon nasida sian parhatobanan na
di Misir. Borat do diae bangso i di na diparhatobanon nasida uju di Misir.
Ndang bebas nasida mangula ulaonna. Aijotjot nasida mangulahon kerja paksa
dibahen raja Pharao, asa mardangol bangso i. Alai ditingkina dipalua Debata do
nasida sian parhatobanon i, asa bebas marsomba mamuji pasangap Debata. Ido
umbahen nidok judul ni turpuk on: Bangso naung dipalua Debata sian
Parhatobanon.
b.
Hatorangan
1) Ayat 10-12 : Unang halupahon Jahowa, sai
urupanNa do hamu. Mansai gomos do dipopai si Musa bangso i, asa unang lupa
nasida di Debata ia dung masuk nasida tu tano bagabaga i. Ai olo do sipata ala
ni tabona gabe lupa halak di Debata na mangalehon godang pangurupion di ibana.
Musa mangondolhon paboa laos tambaan ni Debata dope pasupasuNa, ia dung
masuknasida tu tano bagabaga i. Suksuk dope tambahononNa tu bangso i, ima
songon na boi jahaonta di ay.10-11; mangalehon huta na bolon jala denggan na so
pinungkanasida; bagas angka na denggan isina na so niisinasida, sumur na so
hinali nasida, porlak anggur dohot jetun na so sinuanna pola bosurannasida
mangan sian i. Sandok sude do diparade Debata di bangso i ia dung masuk nasida
tu tano bagabaga i. Tung suksuk do pasupasu ni Debata jala sude i angka na
denggan, songon i do nang tu hita di ngolu on, cukup do jala suksuk do tahe
pasupasu ni Debata daionta molo so lupa hita di Ibana na paluahon hita sian
parhatobanon ni dosa nang sian uhum hamatean ala ni pangalaosionta. Sai na
lehonon ni Debata do nang na ringkot di portibi on di angka na hot
marhaporseaon tu Debata. Tuhan Jesus mandok : “Sai jumolo ma lului hamu
harajaon ni Debata dohot hatigoranna, dungi tambahononna do sude angka ondeng
tu hamuna”. (Mat.6:33). Tontu termasuk do haluaon na manongtong pasahatonNa tu
na marsihohot marhaporseaon di Kristus i; ai didok : “Sai burju ma hor rasirasa
mate, dungi lehononku ma tu ho tumpal hangoluan i:. (Pang.2:10b).Lehonon ni
Debata do i di hita marhite Kristus Jesus naung manobus hita. Ala ni i unang
halupahon Ibana!
2) Ayat 13-14 : Tongtong ma unduk jala mabiar
mangoloi Ibana. Hataridaan ni haunduhon jala mabiar mangoloi Debata, ima
marhite na mangulahon patikNa dohot hataNa. Paboa roha mauliate ni rohanta di
pasupasu di pangaramotion ni Debata di hita, ingkon tangkas do haunduhonta tu
Debata. Unang gabe unduk tu debata sileban. Sandok ingkon umbiar jala humolong
jala umposan do rohanta tu Debata asa mida nasa na adong. Memang jotjot do masa
dung salpu na hansit na dangol, jala nunga dilehon tu hita pasupasu na suksuk,
sadar manang na so sadar gabe na asing na ma di habiari, dioloi, gabe lupa ma
di ulibasa ni Debata. Ido umbahen didok Ap.Paulus: “Mardongan biar dohot lomos
ni roha ulahon hamu ma haluaonmuna”. (Pil.2:12b)
3) Ayat 15-16; “Unang unjuni Ibana so tung
dirimasi ho”. Ndada holan di angka na tabo secara portibi on gabe unduk
jala mabiar hita tu Debata. Alai nang di na hansit manang di na borat ingkon
tongtong do marhaunduhon hita tu Debata. Nda tung molo porsea gabe so masa be
tuhita na borat, na hansit i, na borat i, ingkon tong do hita marhaunduhon jala
hot satia porsea tu Ibana. Ido umbahen sai diendehon Huria: “Manang aha pe na
masa Las ni roha arsak pe , tioponku Ho na basa Na marholong roha pe, tung
saleleng au mangolu Nang dung suda bohalhon, Ingkon Ho, o Sipangolu Pujionku
sai tongtong.” (BE. No.149:3). Unang songon na terjadi di Massa di unjuk rasa
ni bangso i tu si Musa ala hurangan aek nasida di pardalanan di parhorsihan i.
Tutu idaon, tu si Musa do nasida na muruk i, alai ndang sadar nasida na muruk
tu Debata do nasida disi, Debata do na niunjuknasida, ai Debata do na marsuru
si Musa mamboan bangso i haruar sian parhatobanon Misir.Pola adong sian bangsoi
mangunjuni, mandok: “Ditongatonga do
ulaning Debata manang ndang ?” (2 Musa 17:2,7 ; 4 Musa 20:7-13). Sandok uang
madabu hita tu pangalaho na mangunjuni Debata. Sada pangalaho na mangunjuni
Debata, ima ngolu parmungutmunguton. Ido dipaingot di BE. No.503, mandok : “So
ho ungutungutmi paso, so ho ungutungutmi paso, hohom ma ho paso saritami” Ai
taboto do; molo so porsea bangso i jala marmungutmungut di parhorsihan didalan
manuju tano bagabaga i, jotjot do hona rimas ni Debata nasida. Ingot ulok
tulung api na mamarguti bangso i, gabe torop marmatean sian nasida
diparhorsihan i. Sandok unang unjuni Tuhan Debata dipardalanan ni ngolum. Ai
ngolu sibolis do ngolu na mangunjuni. Ingot sibolis i, pangunjuni i, gabe didok
Tuhan Jesus tu ibana: “Dung i ninna Jesus ma mandok ibana: Dohot do on didok
Surat i: "Ndang jadi unjunanmu Tuhan Debatam!"(Mat. 4:7).
4) Ayat 17-19; Marhasonangan do na mangulahon
na denggann diadopanNa. Ala naung dipalua Debata bangso i sian parhatobanon
na di Misir, jal ahita angka na porsea dipalua sian parhatobanon ni dosa dohot
hamatean, ima marhite panghophopon ni Kristus di dolok Golgata, tama do hita
mandok mauliate tu Ibana disandok pardalanan ni ngolunta, ima marhitehite na
mangulahon na denggan, songon na tarsurat di ay.17=19, ima: burju mangaradoti
tona ni Jahowa Debatanta i. Ro di panindangion dohot aturanna; ujungna gabe
margogo hita mangulahon na tigor dohot na denggan diadopan ni Debata. Jala
marhasonangan ma hita masuk manean inganan na pinarade ni Tuhanta di hita,
ndada Kanaan na di tano Palestina sinuaeng, alai masuk manean Kanaan na imbaru
na pinarade ni Debata marhite Kristus Jesus Tuhanta i, “Sai burju ho rasirasa
mate; dungi lehononku ma tuho tumpal hangoluan i! Amen .
