Manahan
Manon Pangunjunan
Jakobus
1 : 12 – 18
I.
Patujolo
a) Adong
do 3 halak na margoar Jakobus di Padan na Imbaru;
Ø
Jakobus na tumua; ima anak ni si Sebedeus-Salome
(Pariban ni si Maria, ina ni Tuhan Jesus) na sian Betsaida, haha ni si Johannes
sisean haholongan i. Mate martir di tingki ni si Herodes agrippa i, taon 44 M
(Mrk.15:40; Mat.4:21; 27:56; Ul.12:2)
Ø
Jakobus na umposo, anak ni si Alpeus, Apostel i
(Mat.10:3; Mrk.3:18; Ul.1:13).
Ø
Jakobus na ummetmet, anak ni si Maria, anggia ni
Tuhan Jesus, na mate martir di Jerusalem taon 62 M, ala hasutan ni malim
Ananose II. Jakobus on ma namanongos surat Jakobus on tu sandok halak Kristen
(Mat.13:55; Mrk.15:40; Joh.19:25; Ul. 12:17; I Kor.15:7; Gal 1:19). Jala Ibana
ma Bishop ni Kristen na parjolo. Angka ama ni huria na parjolo i mandok surat
Jakobus on, ima surat hatopan (Surat Katholik) na parjolo tu sandok huria
(Jak.2:24; Rom.3:28).
II.
Hatorangan
1.
Ayat 12-15. Ndada sian Debata haroro ni
pangunjunan, ai ndang diunjuni Debata manang ise. Mangihuthon Jakobus, ia
pangunjunan i ro sian bagasan roha ni jolma i sandiri, i do manaiti jala
mangalele jolma i. Ima sangkapsangkap ni roha na maralo tu lomo ni roha ni
Debata na manghorhon dosa jala marujung tu hamatean. Ala ni i, martua do halak
na manaon di pangunjunan i. Ai dung tau ibana, jaloonna ma tumpal hangoluan naung diparbaga Debata tu nasida.
2.
Ayat 16-18. Unang ma lilu roha dohot
pingkiranta, ai roha dohot pingkiran na sala i do na gabe manghorhon pangalaho
dohot pambahenan na sala. Roha dohot pingkiran na sintong i, ima roha dohot
pingkiran na marisi konsep na hombar tu hata ni Debata, ima: “Debata do
haroroan ni saluhut silehonlehon na denggan dohot nasa ulibasa na mauliutus,
sian Ibana do hatiuron, Ibana do Tuhan na so olo muba, na so umboto agia halinu
ni hamimimbar. Sai konsisten do Debata di bagasan holong, habadiaon dohot
hasintongan, ala ni ndada hea Debata mangunjuni jolma. Gariada marhite hata
hasintongan nunga ditubuhon hita paduahalihon asa gabe patumonaan sian angka na
tinompaNa i hita (pat. 4 Musa 18:12), asa gabe di hita parmulaan ni ngolu na
mansai denggan jala uliihuthonon ni angka na tinompana i. Asa angka na porsea
ima na gabe tiruan (model) di humaliangna na manghorhon lam tamba sisabion di
portibi on.
III.
Sipahusorhusoron
a.
Ngolu ni jolma mansai dipengaruhi carana
marpingkir. Pingkiran na negatif olo do gabe manghorhon hal na negatif di
ngoluna, sabalikna pingkiran na positif tontu manghorhon hal na positif ma di
ngoluna. DI halak na porsea, pingkiran na positif ima; ndada holan pingkiran na
marojahan tu fakta na manghorhon hal na positif tu humaliangna, alai na
tarlumobi ima pingkiran na marojahan tu Hata ni Debata.
b.
Ndada sian Debata haroro ni pangunjunan, (Songon
i nang molo masa kegelapan manang hamaolon, ndada Debata na patupahon i ).
Tardok 2 do sumber ni pangunjunan:
Ø
Ima sian luar na masuk tu dirinta marhite
pancaindera, isarana na niida marhite simalolong, na binege marhite sipareon.
Ø
Sian bagasan diri, ima marhite sangkapsangkap ni
roha na roa, na gabe mangelaela jolma i.
Sialoon do
pangunjunan na songon i marhite hata ni Debata, dohot marhite cara berpikir na
positif.
c.
Nasa keberhasilanta, unang ma taanggap holan ala
ni gogonta sambing manang ala ni faktor kebetulan. Alai parsidohot do Debata di angka keberhasilanna. Ai sian
Debata do haroroan ni nasa na denggan di ngolu on, termasuk angka tingki (ganup
ari do ari ni Tuhan i), angka dongan, angka suansuannan dohot lan na asing.
d.
Molo monang hita dipagunjunan, dapot hita ma
ngolu na dumenggan, jala molo monang hita di sude angka pangunjunan na di
portibi on, lehonon ni Debata ma tu hita tumpal hangoluan.
Ala ni i, unang pola mabiar molo ro
pangunjunan. Positif thingking, jala Debata do donganta! Ai ndada sai
manghorhon na negatif angka pangunjunan, sabalikna justru boi do manghorhon hal
na positif pangunjunan i tu ngolunta, tarlumobi ma boi gabe lam patoguhon
haporseaonta. Amen.
