JAMITA MINGGU XII DUNG TRINITATIS, 30 Agustus 2009

GABE PARHITEAN NI DEBATA
Ev.: 1 Musa 17: 15-27
By: Pdt.Eben Ezer Munthe, S.Th
I. Patujolo
Parsunaton ima sada hasomalan na masa tu halak Jahudi. Nunga mansai leleng on dipamasa ditongatonga bangso Israel. (2 Musa 4:24-26; Jos.5:2-8); alai di tingki jala dung habuangan Israel tu Babel, gabe sada tanda ma parsunaton i tu angka halak Jahudi, na gabe partinandaan di keanggotaan di Bangso Israel. Angka malim Israel di hatiha i (tingki dohot dung habuangan) naeng manotophon dohot pahothon aturan-parsunaton gabe sada patik ni Debata na nilehonNa tu si Abraham, ama nasida. Bindu 17 on nisagi gabe opat bagian:
1. Kewajiban ni Debata di bagasan ni padan i (ay.1-8)- pajongjonghon (pahothon) dohot patauhon padan i.
2. Kewajiban ni si Abraham dibagasan ni Padan i (ay.9-14) – Manotophon parsunaton.
3. Padan i ma pamiliton (ishak) sian Debata mangalusi Abraham na so porsea (ay.3-22).
4. Pangoloion ni si Abraham marhite na mangulahon parsunaton.


II. Hatorangan
a. Sara sian mulana digoari do Sarai (שָׂרַי / שָׂרָי "Putriku", hata heber standar Saray, hata heber Tiberias Śāray / Śārāy) na rap nasida dohot baoana na di tingki i margoar Abram (אברם) di kota Haran. Ditingki diparenta Debata Abram laho manadinghon tano hatubuanna tuat tu sada huta na so binotona ( dungkon naparpudi di sulingkiti angka parteologi i ma tano Kanaan), dohot ma jolmana si Sarai. Sarai, jolma ni si Abraham, manjalo goar na imbaru: songon na pinamasa ni Debata tu si Abram gabe Abraham , laos songon i do si Sarai gabe jolma na imbaru ndang holan di goar na maruba gabe si sara. Songon si Abraham na masuk tu Padan ni Debata gabe jolma na imbaru, laos songon i ma si Sara ingkon gabe jolma na imbaru, andorang tubuanna sada anak na gabe ahli-waris padan ni Debata, andorang so gabe ina ni nasa bangso haluaon i (Joh.3: 6 “Daging do na tubu sian daging, tondi do na tubu sian Tondi”). Sara gabe ina ni nasa bangso gabe parhitean ni Debata tu angka pinomparna muse na gabe tubuan angka na berwatak raja dohot uluan. Pasupasu ni Debata tu si Abraham gabe ama ni nasa bangso sahat taruli pasupasu nang tu si Sara gabe sahalak ina nasa bangso. Pasupasu ni Debata tu si Abraham dohot si Sara mabaor sahat tu angka pinomparna siala padan na pinasahat na i.
b. Padan na pinasahat ni Debata ingkon saut do. Alai mengkel do si Abraham di na marningot umur nunga godang na so mungkin be masa tubuan anak ditonga jabu nasida. Si Abraham ndang marnida hagogoon dohot haboion ni Debata alai marnida hahuranganna dohot kelemahanna sandiri do si Abraham dohot si Sara disi: mati haid (mandul)- mati pucuk (Heb.11:11-12). Si Abraham marumur saratus taon, jala si Sara marumur siapulu taon sian godang ni umur i do na sai mengkel si Abraham dibagasan rohana. Ishak do goaron anak di si Abraham dohot si Sara, na mamboan jaminan ( 1Musa 21:1-7), ia Debata mengkel di parngoluan ni si Abraham; Ishak ima na mamboan engkel tu natorasna na mamboan las ni roha tu humaliangna. ( 1 Musa 17:17 dohot 18:12,15; 21:6). Si Abraham ndang porsea dibagabaga ni Debata siala mamangke hadirionna do si Abraham dohot si Sara laho manjalo padan ni Debata. Ndang loason ni Debata sangkap ni si Abraham laho pasauthon anak na si Ismael gabe hasahatan padanNai alai ingkon saut do sian natinubuhon ni na tarpillit i ma sian si Sara na ingkon goaran anakna i si Ishak. Pangidoan dohot tangiang ni si Abraham asa si Ismael ma na manean padan ni Debata ala ndang pos rohana di anak na sinangkapan ni Debata (Ishak). Alai ndang loason ni Debata na pinangido ni si Abraham. Jolma na tinubuhon sian daging ima daging; ndang tarbahen sibuk dohot mudar manean harajaon ni Debata (1 Kor.15:50). Holan na tubu sian tondi do tondi (Joh.3:6), ai na manabur tu dagingna, manggotil do sian dagingna hamagoan; alai na manabur tu tondi, manggotil do sian tondi i hangoluan salelenglelengna (Gal.6:8). Angka nasida do na ginoaran anak ni Debata, ima angka na so tubu sian mudar, manang sian sangkap ni daging, manang sian sangkap ni baoa, tung sian Debata do (Joh.1:13). Ai ndang sangkap ni si Abraham na gabe saut dalan ni padan ni Debata, alai bagabaga na sian Padan natinontuhon ni Debata sambing do: Ishak do na gabe manean dohot na maniop padan ni Debata.
c. Ismael na marlapatan: Ibana tumangihon, Debata na tumangihon ( 1 Musa 16:11; 21:17). Nang pe sangkap ni si Abraham asa gabe ama ni saluhut bangso marhite si Ismael ndang ditolopi, alai sai tongtong do ditangihon Debata pangidoan ni si Abraham saleleng sangkap ni Debata sandiri ndang targanggu. Nang pe dos dohot na naeng sipasahatonNa tu si Ishak alai ndang pangkeon ni Debata pinompar ni Ismael gabe hasahatan pasupasu tu bangso na humaliang. Holan marhite sian pinompar ni si Ishak do pasauthon ni Debata hasahatan dohot habaoran pasupasu tu angka bangso. Nunga ditotophon Debata hatutubu ni si Ishak jala na manean padan ni Debata. Nang pe secara kedagingan ingkon si Ismael do na jumolo na berhak manean songon buhabaju ni si Abraham. Hape ingkon pilliton ni Debata do siampudan ni si Abraham .
d. Dung salpu Debata sian adopanna, dipatuduhon si Abraham do haunduhonna dipadan ni Debata marhite pangungkapon (theophani) dina laho patupahon parsunaton tu ibana sandiir dohot Ismael dohot tu sude na tinuhor ni hepengna nang sude baoa pangisi jabu ni si Abraham. Parsunaton songon tanda sumpah-setia yang kekal (pengikatan diri yang kekal). Manean padan ni Debata i ma sada haputusan na marlangku tu dirina sandiri. Sunat menjadi tanda dari karya kasih karunia dimana Allah memilih dan menandai orang-orang milikNya. Parsunaton na pinamasa si Abraham gabe hasomalan ni halak Jahudi do sahat tu partingkian on. Alai andul do lapatan ni parsunaton Israel sian angka bangso na asing na dihumaliangna na holan patuduhon ‘berjenjang dewasa’ dan hanya bersifat sosial. Parsunaton di Israel ima na patuduhon hadirionna diadopan ni Debata, jala asi ni rohaNa na manjoloani ulaon ni jolma (Jer.4:4; Rm.2:25-29; bnd. Ul.Ap.15:5; Gal.5:3). Parsunaton patuduhon haunduhon ni si Abraham tu Debata.
III. Hahonaan tu Jamita
 Ai ndang adong na so tarpatupa diadopan ni Debata (Luk.1:37), Ngolu ni halak na porsea ndang na mangasahon gogo dohot pingkiranna, alai pangasahaononna do asi ni roha ni Debata.
 Sasahalak na sorang di sada negara ndang boi manguba kewarganegaraanna marhite lomona sandiri alai ingkon hot do. Laos songon i do na tubu sian padan ni Debata na so boi sumurut sian i. Padan ni Debata sahat tu angka na porsea marhite panghophopon ni AnakNa Jesus Kristus (Joh.3: 16), Angka jolma na manjalo Padan ni Debata dibagasan Jesus Kristus tarida ma sian dua sakramen marhite Pandidion Nabadia dohot Ulaon Nabadia (Baptisan Kudus dan Perjamuan Kudus), tanda na nunga disahaphon hita gabe anak ni Debata.
 Padan na sahat tu hita natinotophon marhite mudar ni Kristus laho manobus hita jolma ingkon taargahon ma i marhite pambahenanta; ndang marhite parsunaton be ( manang holan tanda-tanda lahiriah) (Rom.2:25-29; 1 Kor.7:18-19; Gal.6:15). Ndang sae holan na mangauhon di roha alai tarida ma pangoloion di hata ni Debata marhite pambahenanta, adong komitment tu padan ni Debata di parulaon siganup ari.
 Angka na manean haluaon na sian Jesus Kristus ima angka na mangulahon parsuruonNa dibagasan pos ni roha dohot serep ni roha asa gabe parhitean haluaon dohot pasupasu tu humaliang.Asa na mangulahonsa nunga malua sian parhatobanan ni si bolis dohot haportibion, asa na mandapot haluaon tubu dibagasan ngolu na imbaru dipaimbaru Debata jala marpahean na imbaru jala tumundalhon na robi. (Jer.4:4; Gal.4:7,22-28,30; Rom. 4:11-12; Jak.2:5) Amen.