Dihalomohon Jahowa Do Hamumulak ni Parjahat
Hesekiel 33: 7 – 11
1)
Dihita na
hinaholongan Torop do jolma manghalomohon hasosonggop ni sitaonon tu ngolu ni
angka parjahat. Isarana didok: “Haru mate ma nian ibana, ai na roa do
pangalahona”. Jala molo tongon dibagasan sitaonon parjahat i, didok torop jolma
ma muse, “tuani ma i, haru dijalo antong parbue ni na niulana”. Ra betak beha
do nang hita pe jotjot madabu tu panghilalaan na songon i maradophon angka
parjahat. Alai molo tapamanat turpuk on, disuru Debata do panurirang hesekiel
laho pasahathon sipasingot tu sandok pinompar ni Israel. Tutu didok Jahowa, “Ingkon
mate do ho ale parjahat! (ay.8). Ndang na marlapatan ingkon sipamateon ma
parjahat. Alai martudutudu do i tu “pencegahan” (preventif) asa unang adong
sian tongatonga ni jolma i na gabe parjahat jala unang adong nian sian
tongatonga ni parjahat i na mate di bagasan hajahatonna.
2)
Domu tu si ma
parsuruon ni Debata tu panurirang Hesekiel mamaritahon pinsangpinsang ni
Debata. Ndang jadi oloan sangkap ni parjahat nang pe dilehon di hita “parjambaran”
(suap). Gariada ingkon pinsangon do parjahat i di sangkap hajahatonna nang pe
jotjot i parohon parungkilon tu dirinta sandiri.
3)
Na mansai
balga do holong ni roha ni Debata maradophon bangsoNa, paboa na so dihalomohon
Ibana mago sada sian na pinillitNa i. Anggo sian pangalaho ni bangsoNa i tutu
molo tapaihutihut sian sejarah ni parngoluon ni bangso Juda godang do angka
pangalaosion dohot pangulahonon nasida na mansai maralo tu lomo ni roha ni
Debata. Lumobi ma i na sai manghaporseai ganaganaan, nang pe naung tangkas
diboto paboa na niulahon nasida i maralo tu lomo ni roha ni Debata. Alai sai
tong do diulahon, i do hatangkangon ni bangso na pinillitna i. Sandok hira na
so mansohot be nasida laho mangulahon dosa, na mambahen pangarimason Debata.
Asa molo tung pe tarbuang nasida tu Babel ala ni pangalaosion dohot dosa nasida
do i. Jala panguhumion ni Debata do i anggiat tung tangkas diboto jala ditanda
nasida Debata na gok huaso dohot hagogoon laho patupahon lomo ni rohaNa.
4)
Molo disuru
Debata panurirang Hesekiel laho patolhashon pinsangpinsang tu angka parjahat,
tontu ingkon di bagasan hasatiaon ibana mangulahon i. Jaloon ni Debata do “pertanggungjawaban”
sian si Hesekiel. Molo ndang dibaritahon pinsangpinsang i, mate ma parjahat i
alai sian si Hesekiel do tungguon ni Jahowa mudarna. Alai molo dipasahat ibana
do pinsangpinsang nii Debata tu parjahat i hape ndang dioloi, mate ma parjahat
i di bagasan hajahatonna, malua ma ianggo si Hesekiel.
5)
Ndada mamboan
tu hasonangan tutu molo nilaosan tona ni Debata, gariada i do patubuhon ngolu
na so denggan. Songon na niadopan ni bangso Juda na di bagasan parungkilon
dohot hasusaan nasida di habuangan Babel ala pangalaosion na di tona ni Debata.
Marhite na binaritahon ni turpuk on tangkas do tarida songon dia sangkap ni
Debata maradophon bangso Juda, nang maradophon hita jolma paboa na sod
dihalomohon Debata angka parjahat, alai dipangido asa dipauba rohana. AI
marhite hamubaon ni roha gabe malua sian rimas dohot uhuman ni Debata. Tanggung
jawab ni sude angka na porsea i do tutu mangulahon na tinonahon ni Debata
anggiat boi sahat tu sude jolma na so marpos ni roha dohot na so mangoloi
Debata marhite na adong hamubaon ni roha.
6)
Nuaeng hita
nama di suru Debata laho patolhashon pinsangpinsangNa tu halak parjahat di
tingki on. Ala ni i, na parjolo sahali: ingkon tahaholongi do jolma parjahat i,
lapatanna hajahaton i do na ingkon tahasogohon jala tapasiding. Molo dung
songon i, motivasi ma nam angonjar rohanta lao maminsang angka parjahat ima
holong ni roha.
7)
Tahirim do
tutu dipardalanan ni ngolunta boi denggan; asa tatangiangkon ma angka na manguluhon hita ditongatonga ni bangsonta
on asa unang be adong sian nasida na sai mangait paruntungan tu dirina (korupsi),
na sai holan mangulahon lomo ni rohana marhite na soa dong biar maradophon
Debata. Sandok marhamubaon ma angka na mangulahon na so lomo ni roha ni Debata.
Ala ni i dibagasan holong ni roha na sian Tuhanta ma hita pasahathon pinsangpinsang,
anggiat longkang hajahaton i sian parjahat asa malua nasida. Songon haholongon
ni Debata marhitehte Anakna Jesus Kristus i asa malua hita parjahat on sian
dosa nang hamatean. Tahalomohon ma songon hinalomohon ni Debata hamumulak ni
Parjahat i. Amen.
