Dipasuang
Jahowa Hinadenggan Ni Ngolu Ni Jolma i
Pilippi
1: 21-30
a)
Nunga
dipatorang Ap.Paulus taringot tu na asa tu dirina; ima na tongon tarhurung ala
ni Barita na uli i. Alai dihatindanghon si Paulus do ndada gabe pangambati na
masa tu dirina i di pardalan ni Barita na uli i. Baliksa tahe gabe mansai
godang do panumpakna. Ai najolo marhite na tarhurung ibana lam sar do barita ni
Kristus i paling saotik tu pangisi ni hurungan i dohot na humaliangna. Jala
angkup ni i, lam tamba do pos ni roha ni halak Kristen na disi laho manghatahon
Hata ni Debata dohot manghatindanghon haporseaonna.
b)
Adong do
hinaarga ni hamatean di angka na mangihuthon Kristus songon si Paulus.
Hinaarganai ma laba do hamatean i. Alai hamatean na gabe laba i ala ni Kristus
do. I do alana ndang mandele si Paulus tarhurung ala ni Kristus, ndang mansohot
nang pe godang mangalatei. Kristus do na manopa pangantusion paboa na uli do
lapatan ni hamatean ni angka na porsea. Nunga jumolo si Paulus manghangoluhon
aha na nidok ni si Johannes taringot tu Jesus; “..... na mangolu do na porsea
di Ahu atik pe mate ibana.....na so tupa mate ibana salelenglelengna”
(Joh.11:25-26). Resiko ni pardagingon di na mamaritahon Kristus i na mate
manang mangolu. Ai molo mate pe, “dumenggan situtu do i”, alai mangolu pe, “rumingkot
do”. Asa mangolu manang mate adong do nilai ni i duansa di angka na porsea.
c)
Dipaingothon
si Paulus do asa tongtong parngoluon ni halak Kristen i hombar tu soara Barita
na uli na saat tu nasida, jala i diihuthon nasida tongtong di parsaoran
nasiada. Marhite Barita na uli i tarhou do nasida gabe warga ni Harajaon ni
Debata. Ala ni i do naeng ma hombar parngoluan nasida tu status nasisda songon
warga ni harajaon ni Debata i. Songon angka partohap di sude arta na di bagasan
Harajaon ni Debata i tarjou do sude halak Kristen i laho patuduhon harajaon i,
nang pe ingkon manaon ragam ni angka haporsuhon dohot penderitaan nasida siala
ni i.
d)
Managadopi
ragam ni angka haporsuhon, sitaonon dohot di sude tahe parngoluan nasida
siganup ari, dipaingot AP.Paulus asa hot nasida dibagasan hasadaan ni tondi
jala rap marungkil marsada ni roha manghaporseai barita na uli”. Halak Kristen
na tutu ima marsihohot dibagasan hasadaon dohot haporseaon. Na tarrahut do
halak Kristen dibagasan sada tondi, songon hasadaan nina marhahaanggi. Tung pe
pangisi ni portibi on masialoan, jala naasing asing pikiran dohot hagiotna,
alai anggo halak Kristen ingkon sada do. Hasadaan i do songon hagogoon di halak
Kristen laho mangadopi portibi on. Ia so adong hasadaon i, tung so tarbahen
huria i do hot jongjong mandalanhon parjuanganna manghamonanghon Barita na uli
i. Ndang hea mansohot paraloon haporseaon ni haklak Kristen di portibion.
e)
Alai laho
mangadopi ragam ni angka musu ndang jadi mabiar halak Kristen. Nang pe
dibagasan paraloan i berengon hira so tartaluhon musu i, jala hira so mungkin
halak Kristen laho mamorangi angka dosa
ni portibi on. Alai halak Kristen ndang jadi putus asa, jala ndang jadi
mansohot berjuang. Unang olo dipabiarbiari angka alo nni haporseaon, manang
songn dia rumang ni i, na manghasogohon huria dohot Barita na uli ni Kristus i.
Songon halak Kristen ingkon barani do hita mangalo angka musu ni Tuhan i, angka
na mansegai huria i, angka sipaotooto na holan mangalului hasangapon dohot
pangomoan tu dirina. Hamagoon do tanda na mangonai tu angka musu ni Tuhan i ima
na manulak Barita na Uli, na mansegai ulaon ni huria jala na manggugai
haporseaon hi halak Kristen. Alai hamonangan dohot haluaon do tohap ni angka na
porsea jala na marsihohot marsitiopan tu Barita na Uli ni Tuhan i.
f)
Manghaporseai
Kristus i, ndada ulaon na mura i, ai ndada holan pamangan mandok na porsea hita
di Jesus Kristus i, ingkon tarida do di pangulaon jala ndada ulaon ni jolma
mambahen hita porsea di Kristus. Silehon lehon ni Debata do i. Tung so tarbahen
hita do porsea tu Debata dohot tu Jesus Kristus, anggo sian dirinta sandiri. Na
dilehon Debata do i tu hita, jala di
tubuhon tu bagasan rohanta marhite TondiNa. Alai molo rade hita manjalo
haporseao tu Jesus Kristus ingkon rade do hita manaon humophop ibana. Rade
manaon ala ni Kristus laos tong do silehonlehon i, ai ndang sude halak tau
manaon na songon i. Sitaonon ni laho manghophop Barita na Uli Kristus do na
masa tu si Paulus, jala nunga dibereng halak Kristen na di Pilippi inon i uju
di haroro ni Paulus parjolo tu luat i. Dibereng nasida do ibana ditangkup jala
dihurunghon parhuaso na di huta Pilippi. Jala diboto nasida do aha na masa tu
si Paulus di tingki manongos surat na on. Nanidok ni si Paulus marhite i ndada
na naeng manonjolhon dirina. Alai naeng pahothon haporseaon ni halak Kristen i
do, asa unang mandele jumpa masa sitaonon manang haporsuhon dibagasan paraloan
haporseaon nasida.
g)
Adong
pihapiga hal sipahusohusoronta sian turpuk on:
1.
Gabe halak
Kristen, siihuthon Kristus ndang marlapatan, sandok tiur sude di dalan
sidalananna. HakRistenon ndang gabe tabas na menjamin “kemulusan” ni sude
ulaon. Sai pajumpang do hita jotjot dohot ragam ni hamaolon. Alai unang ma
hamaolon i na patundukhon halak Kristen, na laho paturehon hamaolon i do tahe
dipaojak huria di portibi on. Ditongatonga ni angka pergolakan pribadi,
keluarga, masyarakat dohot bangso ingkon ‘tampil’ do halak Kristen mangalehon “kontribusi”
na denggan.
2.
Panghobasion
ni siula barita na uli, ima laho pasangaphon Kristus. Ala ni i usaha ni halak
Kristen ima mambahen manang mangarahon jolma sude asa dihatindanghon Kristus
nang pe godang na maol disi. Namangihut; manogunogu jolma i (membina) asa gabe
tutu rohangkonan (padanan) ni Kristus na binaritahon i. Tumangkas do hapataran
ni hamuliaon ni Kristus i di angka na burju marroha.
3.
Topik ni minggunta
mandok : Dipasuang Jahowa Hinadenggan Ni Ngolu Ni Jolma i (Tuhan memulihkan
Kehidupan umatNya). Halak na gabe siihuthon Kristus, tongtong do ibana satia
jala marsihohot, ndang mubauba roha nang pendirianna. Dihatahon do Hata ni
Debata, dibaritahon marhite parngoluonna gabe uli ma barita ni angka halak na
porsea i.Hot jongjong dibagasan hasadaon ni tondi, jala olo menerobos, manea,
menanggung konsekuensi ni ulaon i. Ndang mabiar bahenon ni hagogoon ni manang aha pe namengancam ngoluna, alai
dihilala na porsea i do i songon asi ni roha ni Debata na mangalehon hatuaon di
ibana, marsitaonon manghophop barita na uli i. Ndada holan manghaporseai Kristus i, alai tung dohot
do marsitaonon ala pambaritahonon di Barita na uli ni Kristus i, ala sai
dipasuang Jahowa hinadenggan ni ngolu ni jolma i dibagasan Kristus Jesus. Amen.
