RENUNGAN PARTANGIANGAN / EPISTEL Tu Minggu XIV Dung Trinitatis – 10 September 2023,

Dihalomohon Jahowa Do Hamumulak ni Parjahat

Mateus 18: 15 – 20

 

a)      Jotjot do marsak hita molo tabege huria nas ada marbadai. Huria na asing ponca, na deba laho tu huria an, na deba hot di huria i. Huria na sada nari marbadai, ndang domu parhalado tu pandita; ndang domu parhalado tu parhalado; ndang domu inanta pandita tu pararikamis; di huria na asing dipecat sintua; dihuria na sada nari habis hepeng ni huria dohot resort ala dialangi bendahara. Sude do ra hita marsak molo membege angka i. Molo adong na masa songon i tontu na adong ma na sala. Alai, ndang sai sude halak olo mengakui salana; sai guru sintong do toropan jolma, siguru bonar. Molo so i, tupa tutu do nian adong na sala, diakui do na sala; alai sipata, so tangkas dope na sala, nunga jumolo sar barita naung sala ibana, gabe hansit rohana; naeng olo hian do nian mengaku sala, alai ala naung jumolo sar, gabe ditubui ma bada; ima na olo mambahen angka parbadaan.

b)      Memang, ingkon sadaranta do, ia ngolunta on ndang boi lopas sian na ginoaran masihososan. Manang didia pe sai adong doi; ditonga ni bagas, antara suami-istri, na marhahamaranggi, mariboto, ditonga ni huria, angka punguan marga, organisasi, paguyuban, na marhombar balok. Didok halak Batak i : ‘Bona ni hau na solhot do masiososan”. Didok umpasa Indonesia: “setiap celaka ada gunanya”, tadok ma jolo masiososan on manang gesekan on sada hal celaka. Boi dohonon tuani ma adong gesekan i, ai i do umbahen hita maju; molo so hea hansit dibahen halak, laos so botoonma lungun, laos so botoon maju. Dipatudos do i tu na manduda eme. Molo tarduda eme, gabe malua ma eme i sian kulitna. Aha do mambahen malua i ? tohho do deba ala ni gogo panduda i do; alai ndang apala i na gumodang. Malua kulit ni eme sian eme, gumodang do i ala sian masiososan do eme i tu eme digesek andalu i. I do ala manduda ndang di lante na rata, alai di losung na marlubang do asa himpu, asa boi masigesekan, berbenturan satu sama lain laho masiurupan, asa boi haruar sian kulitna.

c)      Songon i do ngolu on. Songon eme i do hita sai masiososan. Ai marasing be do hita. Alai unang mai laho mambahen hita marbada, alai tapangke ma i laho berkembang, asa malua hita sian kulit-kulit keegoisanta be. Molo tajalo gesekan i secara baik, secara positip, ido mambahen hhita hatop berkembang. Dipatudu Tuhanta do realita, kenyataan siadopanta di huria; sai ingkon adong do gesekan; sai ingkon adong do halak na marsala. Sada do dipangido Tuhanta marhite turpuk on, ima: unang sursar parsaoran, koinonia, huria molo masa angka na hurang masiantusan, manang molo adong na marsala di punguan. Siala ni i adong piga piga hal:

1)      Unang pola pintor songon na roa tahilala molo adong angka na hurang masiantusan. Ai marasingasing be do hita. Parasingan i ma mambahen adong gesekan. Tapangke ma i, unang mambahen hita marsirang, alai justru mambahen hita ma asa saling membantu, saling melengkapi, songon eme na dipandudaan i.

2)      Boha ma i asa saut? Ima napinatudu ni Tuhan Jesus dison; diajari hita, boha do mangadopi, aha do sibahenonta molo adong halak na marsala dihuria, di punguan i, unang mambahen ibana mago, unang mambahen sega punguan i. Di ay.15, didok: Molo adong halak na marsala, parjolo: topot, ajari, holan paduadua. Aha do lapatan ni i ? ima, molo adong na marsala tu hita, manang hansit rohanta dibahen donganta, hatahon, unang pompomi di roham. Molo tapompomi i, ima na mambahen sega dirinta; ai berkembang ma i gabe dendam. Marasar ma i, berkembang, dung i marpahoompu ma, gabe dendam kesumat. Paimaima tingkina ma i, andigan ma asa mambalos. Molo tapompomi i, i ma meracuni sude pikiranta, sude panghilalaanta tu ibana; asal taida ibana, sai mohop ma rohanta, ala sai tapasip. Songon aek na tinambok ma i, lam leleng lam magodang. Sahali pulha, pintor banjir ma, manussai ma. Alai molo tahatahon i, songon aek na mengalir ma i. Puas ma panghilalaanta. Ndang hansitan be hita. Sude halak Kristen secara pribadi bertanggung jawab laho paingothon donganna, asa malua sian angka hasalaan, asa olo mengakui dohot memperbaiki hasalaanna. Di 3 Musa 19: 17 didok do paboa molo sala dongan, ndang jadi hosoman alai ingkon paingoton. Ima gunana molo didok Jesus; molo marsala donganmi topot, jala ajari, holan hamu paduadua.

3)      Patoluhon: molo so ditangihon, ndang olo muba, ianggo i, boan ma donganmu dua manang tolu halak; ndang holan halak boti i, alai dongan na boi paingothon, na boi mempengaruhi asa muba. Somalna, molo adong halak na asing, adong ma suasana na asing; sipaingot ni dua manang tolu halak angka na bijak, angka nahinormatan, ra boi ma i ummura mamuntar roha, ra gumodang ma angka pikiran, gunmodang  ma sipaingot, boi ma i pamurahon dalan tu na denggan. Jala molo binoan dongan dua tu tolu halak, ima gabe saksi, gabe sitindangi taringot tu hasisintong ni persoalan. Panindangion ni dua tu tolu halak ma mambahen boi gabe dijalo halak hasisintong ni persoalan (5 Musa 19:15). Alai molo tong dang olo dope paingothon, boanon ma tu jolo ni huria. Molo didok, boanon ma tu jolo ni huria ndang marlapatan asa dabuon ma uhum. Alai asa sude do huria , ruas dohot parhalado mambahen nasa usaha, boha ma asa muba, mulak parsala i tu dalan na sintong. Ndang boi adong roha ni huria laho mandabu uhum. Alai asa sude huria i martangiang, di huria di punguan nang dibagasna pe manangianghon hamubaonna. Asa sude huria i mangaluluji dalan, mambahen pendekatan asa muba rohana, asa mulak.

4)      Molo tong dang olo muba, di ay.17 didok: “Etong ma ibana songon sijalobeo dohot parbegu”. On ma ayat na maol antusan, ala songon na bertentangan. Jala godang do angka dongan dohot angka huria pintor  mamake ayat on laho mandabu uhum tu na marsala. Hape aha do didok ni Jesus dison ? Taboto do, di Jesus ndang adong batasan, ndang adong batas akhir manang limit ni pengampunan. Dilului jala diparmahani do birubiru na lilu i sahat tu na maneahon hosaNa; dipaima do hamumulak ni parjahat i. (di epistelta i; ndang lomo roha ni Debata mida hamamate ni parjahat i alai hamaumulakna do tumadinghon dalanna). Jala na mangihut ndang hea sogo roha ni Jesu tu sijalobeo dohot pardosa; ndang hea dikucilhon Jesus nasida, alai sabalikna rap mangan minum do Jesus dohot nasida, ido umbahen na sogo roha ni halak parise marnidasa. Lapatanna na pinaboa ni Jesus unang ma uhum parjolo disuanton di huria i, alai ingkon torus do huria i marusaha laho mamboan mulak. SI Mateus olo do muba gabe siseanNa.

5)      Ala ni i sada tantangan do on di huria, ingkon sihamonanghononta do tondi ni ruas na sala, unang pintor manguhumi. Taingot ma, dosa nabinahenna i do sihasogohonta, sialoonta, alai inaggo halakna, na so jadi hasogoonta. Holong na sian Kristus ima na tapatujolo mangulahon i, na bolas mamontar roha batu di ibana, unang ma gabe putus asa hita disi.

6)      Ido ala na di dok di ayat 19-20; paboa mo adong dongan na marsala di huria i, ingkon sude huria i torus martangiang, jala dilehon Jesus jaminan, molo tatangianghon nasida angka na marsala i, pasti do disi Jesus, jala tangihononnNa tangiangta i. Ala ni i, molo adong dongan na hona uhum ni huria, hona RPP (Ruhut Parmahanion Paminsangon), sotung adong halak na marlomo ni roha disi, apalagi sotung adong na martilla. Didok di RPP-ta i; utang ni huria i do i. Sotung adong na nok simalolongna modom, so jolo taingot manangianghon i asa muba.

7)      Hita na hinaholongan; on ma singotsingot di hita asa sude huria, keluarga, punguan, na metmet nang na balga’ ingkon torus do luluanta dalan laho pauliulihon persekutuan. Taboto ma, sai adong do angka gesekan, sai adong do angka na sala, sai adong do angka na mardosa, sai adong do angka na mambahen hansit  ni roha dongan, sadar manang so sadar ibana. Ala ni i molo jumpang hita jolma sisongon i:

ü  Unang tabahen i gabe dalan manirang hita, gabe dalan tu parbadaan. Unang tapaloas gabe sega manang gabe sursar parsaoran. Alai tatiru ma eme i, sai masiososan asa lam haruar sian kulitna, asa gabe boras na marguna jala gabe pasupasu. Tapangke ma na sala na binahen ni dongan laho mambangun dirinta sandiri dohot hasadaonta.

ü  Molo marsala donganta, unang ma tapasombu, manang tapompomi asa uanng gabe dohot hita marsahit hinorhon ni i, boi do gabe pendendam hita. Alai hatahon ma paduadua. Molo sala donganta unang pintor di paboaboa sar barita na, alai nanget nanget dipasingot. Songon baro na ingkon si huphupan do i, molo so muba dope diboan ma angka na umbisuk laho paingothon. Molo so boi dope, sude ma huria i manangianghon. Ingkon torus do huria i manangianghon asa unang sega huria i, unang adong halak na di paduru huria ala ni hasalaanna, alai torus ma huria i manghamonanghon sude angka parsala.

ü  Songon Jesus Kristus naung manghamonanghon hita jolma pardosa on. Dipatama do hita gabe panean Harajaon Banuaginjang i. Laos songon i ma huria nang halak na porsea manghamonanghon dongan parsala laho mulak tumadinghon dalanna na roa i, bongot tu dalan las ni roha, dalan hasintongan dibagasan Kristus Jesus i.  Topik: Dihalomohon Jahowa Do Hamumulak ni Parjahat. Amen.