“Ndang
Marpansohotan Ai ni Roha ni Tuhan i”
Tak Berkesudahan Kasih
Setia Tuhan
& Ev: Andungandung
3: 19 – 26 & Ep: II Timoteus 1: 1 - 14
A. Patujolo
Ia Buku Andungandung ima sada buku na ginurithon
Panurirang Jeremia. Na mangula do panurirang on ditongatonga bangso ni Debata
di Jerusalem na naung sega parrohaonna, di parange nang pambahenan na so tama.
Mansai jut do roha ni si Jeremia mamereng na masa i. Ala ni i sai digoari do
panurirang Jeremia “panurirang na mangandung”. Dijou Debata do ibana gabe
panurirang uju poso dope ibana. Diandungi ibana do na masa di Juda. Dituhuk
ibana do sada ulaon na dokdok. Diadopi ibana di panggosagosa ni sian
humaliangna, tarlumobi sian keluargana. Sai na satia do ibana mangulahon ulaon
na i songon naposo ni Debata saleleng 50 taon alai sada pe saoda na marhamubaon
ni roha. Diida ibana do bangso Israel na sai marjogal roha asa dibereng iban
ama tolu hali masa parporangan na
manaluhon bangso i sian bangso Babel na dipanghe Debata laho manguhum nasida.
Ditutung do huta Jerusalem, dohot ma Bagas Joro
nang angka na disi ditutung jala dibuat sebagian tu babel. Nang pe ndang
dohot si Jeremia di boan tu Babel, alai sude na diidanan i gabe mambahen jut rohana,
mangandungi ma ibana huht tumatangis.
Buku Andung holan marisihon lima bindu jala sude na i
angka andung, angka holso, manetek iluilu nang joujou ala sorat ni roha ni si
Jeremia, ai boban na mansai borat do diibana i ala nunga sahat muruk ni Debata
tu bangsoNa i.
B. Hatorangan dohot
hahonaanna
1.
Dibagasan bindu 3 on dipatorang do na
sai adong do pangkirimon hagogoon nang pangapulon songon aek di tonga ni
halongonan na mahiang jala na marsik. Adong pangkirimon tu hita angka na porsea
na mangadopi hamaolon, hasusaan. Laos songon i ma gombaran ni ngolunta jotjotan
di hasiangan on. Dibagasan habot ni rohana i tongtong do Jeremia mar pos ni
roha tu Tuhan Debata. Pos do rohana di asi ni roha ni Tuhan i tu ibana nang tu
bangsoNa i. Di ayat 19 - 21, di dok si Jeremia do:
2.
3:19 Sai ingot ma dangolhon dohot
pangaleleon na tu ahu ro di raru dohot rasun! Dihilala ibana do nasa panaritaan
i sai na mangalele ii bana dohot na manggosagosa ibana, jala songon rasun do i
na rade laho mamunu ibana di ganup tingki. Ala ni i ma ibana sai joujou tu
Tuhan Debata asa sai diingot Tuhan i ibana nang bangsoNa. Ditonga haporsuhon na
niadopannna i, binsar ma sada haporseaon tu Debata na gok asi ni roha i na sai
patimbulhon panghirimon dibagasan roha diganup jolma na sai olo ro tu ibana. On
ma na dipaboa ibana di ayat 21 on, ima; 1 I ma antong parateatehononku, ala ni
do umbahen marpangkirimon ahu.
2.Pandohan
on paingothon adong pangkirimon dibagasan roha ni si Jeremia, ditonga ni
haporsuhon nang hamaolon i, asa mulak roha ni bangso Israel tu adopan ni Tuhan
Debata jala marningot asi ni rohaNa i tu nasida. Arop roha ni si Jeremia asa
diboto bangso i sai na adong dope pangkirimon. Panaritaan na diadopi nasida
ndada nanaeng maniaphon nasida, alai Tuhan Debata na sai patuduhon asi ni
rohana dohot huasoNa asa bangso i sai marpanghusandean jala mangasahon Tuhan
Debata dibagasan ngoluna.
3.
Dungi digombarhon ma asi ni roha ni
Tuhan i dibagasan ayat 22-26. Angka sintuhu ni haporseaon taringot tu asi ni
roha ni Tuhan i digombarhon do marhite pandohan:
ü 3:22 Asiasi ni
Jahowa sambing do umbahen so haru sun siap hami, ai ndang marpansohotan asi ni
rohana i. 3:23 Mulak rata do i tahe ganup sogot, godang ma tutu habonaronmu. Lapatanna adong pos ni roha ia Debata na sai tongtong
satia diganup tingki nang aha pe na masa tarlumobi molo uju dibagasan hamaolon
bangsoNa i. Asa ingkon marpos ni roha do bangsoNa i, ia asi ni roha ni Tuhan i
ndang marpansohotan, sai na mulak rata do ganup sogot. HolongNa i umbalga do
sian rimasna i, jala holongNa i mangatasi saluhutna. Panindangion on jotjot do
dipasahat parpsalmen na mandok: “Mandok mauliate ma hamu tu Jahowa, ai
pardengganbasa do Ibana, ai ro di salelenglelengna do asi ni rohana!” (di
Psalmen 118: 1,29; Psl.98: 1-2). Tung pe dibagasan panaritaan nang panguhuman
bangso i, alai asi ni roha ni Debata sai na mulak rata do i jala ujung ni asi
ni rohaNa i ima na ro Tuhanta Jesus Kristus mangalehon diriNa humophop hita,
manobus hita jolma pardosa on sian dosa nang panaritaan di hau Pinarsilang i.
ü Paduahon, di ayat 24, dipaboa si Jeremia do; Jahowa do parjambaranku....pandohan on patuduhon pos
ni roha ia Tuhan i do jambarna nang di angka halak na porsea, sai na mian do
Tuhan i di angka ruas na hot marhaporseaon di Ibana. Siala ni i Debata ma
panjambaran ni bangsoNa i, ala ni sai na ramotan ni Debata do bangsoNa i jala
manuntun bangsoNa i dibagasan pardalanan ni ngoluna. Panghaporseaon na songon
on ma na ingkon tandab ditiop ganup ruas ni huria na porsea i, ia diganup
partingkian, Tuhan i do hot tongtong dibagasan bangsoNa, Ibana ma na gabe uluan
na manguluhon pardalanan ni ngolu ni bangsoNa. Songon na nidok Jesus di
Johannes 15: 4 “Sai mian di bagasan Ahu
ma hamu, songon Ahu di bagasan hamu! Songon ranting i, na so tarbahen marparbue
anggo sian dirina, anggo so mian di hau anggur i; laos songon i hamu, anggo so
mian di bagasan Ahu hamu”. Ganup angka
na porsea naeng ma hot mian dibagasan Kristus i asa marparbue nasida,
jala sai na jaloonna do angka sipangidoonna (ptd. Joh.15:7). Suang songon i Ap.Paulus mandok
di Gal.2:20 “Ndada ahu be na mangolu i
nuaeng; Kristus do mangolu di bagasan ahu. Ia mangolu pe ahu nuaeng di bagasan
daging, mangolu marhitehite, haporseaon di Anak ni Debata, na mangkaholongi ahu
jala na mangalehon dirina humongkop ahu.” Manjadihon Tuhan i songon bagian
ni hita na marlapatan ima mangolu dibagasan Kristus, jala Kristus dibagasan
hita. Naung dipasahat Kristus do diriNa tu hita laho gabe haluaonta, asa naung
gabe bagianta do Kristus i.
ü Napatoluhon; dihatindanghon si Jeremia do di ay.25: “Pardengganbasa do Jahowa mida angka na
marhaposan tu ibana, mida tondi ni na mangalului ibana.” Panghaporseaon on
pahothon ia Tuhan i sai na burju do tu hita, asi ni rohaNa i nang hasatiaonNa i
ima dasor ni sude na pinatupaNa tu hita. Siala ni i, haburjuon ni Tuhan i naeng
gabe dasor ni angka na porsea tu Ibana. Ndang ganggu be roha ni angka na porsea
i.
4.
Sian natolu panindangion on, dipaumbuk
ma diayat 26, ima panjouon asa sai maimaima pangurupion ni Tuhan Debata
dibagasan parngoluon ni bangsoNa. Sada pos ni roha di hasatiaon nang haburjuon
in Tuhan Debata naeng ma marujung di haporseaon nang pangalaho na sai satia
paimaimahon Tuhan i dibagasan ngoluna. Asa diarahaon si Jeremia do bangsona i
laho paimaimahon pangurupion na sian Tuhan Debata dibagasan ngoluna nasida. Ala
asi ni roha ni Tuhan i ndang marpansohotan hape jala sai na pasti do Debata na
paluahon dohot na manogu nasida sian panaritaan.
C. Sipahusorhusoron
1.
Topik minggunta ima: “Ndang marpansohotan asi ni roha ni Tuhan i”
gabe sada pos ni roha tu hita angka na porsea di Tuhan Debata na gok holong
nang hasatiaon i. Dipardalanan ni ngolunta angka na porsea mansai godang do
taadopi angka hamolon, nang panaritaan. Na gabe sungkunsungkun di hita; adong
dope pos ni roha di asini roha ni Tuhan i na so marpansohotan i ? Turpuk on na
manjarhon tu hita asa manghaposi jala marhaporseaon tu Tuhan i na gok asi ni
roha nang hasatiaon i. Adong ma tolu hot ni pangkirimon pos ni roha di
haporseaon sian turpuk on laho sipahusorhusoronta:
ü Naparjolo; manghaporseai ia Tuhan Debata na sai hot satia
jala holongNa i ndang marpansohotan dibagasan ngolu ni bangsoNa.
ü Napaduahon; sai hot mambahen Tuhan i gabe uluan
namnaguluhon parngoluonna siganup ari. Asa Tuhan i ma na sai tapingkiri
mandongani jala marmahani hita asa unang ganggu be rohanta dibahen portibi on.
ü Napatoluhon, sai na mangkirim do angka na porsea
paimaimahon pangurupion ni Tuhan i dibagasan ngoluna. Paimaimahon Tuhan i
lapatanna sai tapangasahon ma Tuhan i, jala unang ma hita marpangunsandean tu
dirinta, pikiranta nang pangantusionta sandiri. Ai Tuhan Debata ma na gabe mual
ni hagogoonta nang pangurupinta. Na marpadan do Debata laho mangaramoti
pardalanan ni ngolunta jala marpadan do Ibana mangaramoti hita sahat di
hasusuda ni bohalta.
2.
Siala ni i diarahon do hita angka na
porsea i asa mangolu dibagasan parsaoran dohot Tuhan Debata jala mandok
mauliate disude denggan ni basana. Ala ni unang ma hita mabiar laho mandalani
ari ni ngolunta. 2 Tim.1: 7 “Ai dilehon
Debata do tu hita tondi hagogoon, tondi haholongon, tondi pangarajaion diri,
ndada tondi hatahuton.” Saluhut angka hamaolon, sidangolon, panaritaan
ndang na gabe padaohon hita sian Tuhan Debata, ndada ala ni i ndang marasi ni
roha Tuhanta i tu hita, alai gabe dalan ni Tuhan i lah pahothon hita ia Tuhan i
sai na mian jala rade mangula di ganup panggulmiton ni ngolunta.
3.
Ganup jolma ndang mardia imbar, na mora,
na pogos, naposo, na marsikkola, manang na so marsikola, na adong
parbinotoanna, manang ndang, na pistar manang na oto pe i, ndang boi malua sian
na ginoaranna panaritaan dibagasan ngoluna, sian angka persoalan nang angka
masalah. Molo tapamanat na masa di hasiangan on, angka porang, perubahan cuaca
ekstrem, pangalaho korpsi na mansai torop jolma, pamunu, panggosagosa,
ketidakadilan hukum, halumlamon boi mambahen gabe jut roha manang na gabe
marsak roha, asing ni angka hamolon ni adopan ni jolma na boi masa: pembullian
di sikola, hamaolon di parkarejoan, sursar ni tonga keluarga na masa parbadaan,
marroharoha holong tu na asing, ndang satia tu pasangan, nang hamaolon di
parkarejoan, manang hamatean ni nahinaholongan. Alai saboratborat ni na taadopi
umborat dope na diae ni Tuhan Jesus di hau Pinarsilang i laho mamorsan dosanta.
Unang gabe ganggu rohanta angka na porsea hinorhon ni angka masalah i.
Haporseaonta i ma na patoguhon hita dibagasan Jesus Kristus i asa margogo hita,
marsihohot, jala satia hita boi mangadopi hamaolon na jorbut sahali pe di
ngolunta. Na boi do angka na porsea i merespon ganup kejadian di ngoluna dohot
tenang jala marbisuk asa hot tongtong marpos ni roha ni panogunoguon ni Tuhan
i. Amen.
