“Manaon Na Porsuk Songon
Siihuthon Kristus”
Ikut Menderita Sebagai
Prajurit Kristus
& Ev: II Timotius
2: 1 - 13 & Ep: Poda 16: 16 – 20
A. Patujolo
Hea do ra hita mambege istilah ‘kader’ manang pengkaderan,
na marlapatan asa ide sian sumber tertentu didalanhon angka naung hona kader,
ima na di bina, diparbohali andorang maju tu sada tujuan manang ulaon. Ragam do
jenis ni na hona kader hombar tu prinsip ni sumber ide i. Sipata negatif do
ditanggapi na deba istilah i, ala umummna di bidang sosial – politik do i
godangan marlangku. Mirip tusi do anak haholongan ni si Paulus dison, ima si
Timoteus na manjalo surat on. Haporseaon ni si Paulus do dipapatar tu ibana,
jala ditugashon do ibana patariparhon i nang tu angka na asing na manjalo
haporseaon i asa dohot nasida mamaritahon haluaon na sian Kristus i nang tu
angka donganna na asing.
Ndang ulaon na neang ulaon i, tarlobi na mardomu tu
haporseaon (ugamo). Molo tabege di tingki on na mansai godang parungkilon ni
angka dongan di manang pigapiga luat (suku-suku) di negarata, na gabe disutuh
Kristeninasi. Namun songon i ndang mauhom angka parbarita n auli i, ai tujuan
ni sending, ndada apala asa pajongjong
gareja manang huria na organisatoris, alai asa porsea jala dapot halak
do haluaon na nilehon ni Debata marhhite Jesus Kristus (invisible churhc). Atik
tung godang do na so tardidi manang malua, alai mate di bagasan haporseaon di
Kristus, ala adong naung patariparhon barita nauli i tu sipareonna, dijalo rohana
jala di haporsea i.
B. Hatorangan ni turpuk
1)
Ay. 1- 2; Tu si Timoteus didok manang
diapoi Ap.paulus asa benget ibana manaon na porsuk i. Tu angka sisean ni Jesus
pe nunga naung dilumbahon hian, na ingkon manaon na porsuk nasida ala ni
Kristus i, alai hatuaonnasida do i (Mat.5-6). Dhorhon haporsuhon manang
sidangolon do torop halak na gabe gale, manang sabalikna, hiras do halak molo
sonang manang las rohana. Alai ianggo di hita halak Kristen, ndang perasaan
pardagingon on tulutuluk. Asi ni roha ni Tuhan i do na margogoihon na porsea.
Hagogoon (semangat) tubu do i dibagasan (tingki) panindangion taringot tu Hata
ni Debata na mangolu di dirina, ai beha ma tarbahen tamba bilangan ni na porsea,
ianggo so olo do hita manindangi, asa dibege halak isi ni haporseaonta i, asa
dohot halak na asing mangauhon tu dirina hagogoon ni tangan ni Debata di dirina
? Disi do patar hasintongan ni baritan a uli. Marhite panindangion na mangonjar
na asing i laho manindangi. Kewajiban ni parbarita na uli ndang holan pabotohon
aha haporseaon ni halak Kristen, alai asa dihangoluhon jala dihatindanghon do
haporseaon i tu na humaliangna be. Aha na binto ni si Timoteus taringot tu
Kristus jala na dia hinaargaNa di ngoluna, i do patubuhon angka donganna, asa
marsinondang dila ni palitona be sisuluhononna tu dila ni palito ni donganna
(ay.2). Molo tarisihi angka dongan Kristen torop di humaliang hita, lam torop
do angka panotnton na statis, marhaporseaon dangoldangol sisilon. Atik tung na
adong do di na humaliang hita i angka parhobas na so haposan, sipatubu
hangangguon di na tinogutoguna marhite angka aktifitas siganup ari ( di
parngoluonna), ndang sesuai tu na hinataonna ? Deba na mura mandele molo adong
tantangan tu dirina, mura tersinggung, ala gale dope haporseaonna. Ianggo si
paulus manungkoli do ibana tu si Timotius, jala ndang dipasombu melos
haporseaonna, dihirpasi do ibana jala ditangianghon asa margogo ibana.
2)
Ay.3-4; Parangan ni Kristus do angka na
gabe siihuthon Kristus. Sahalak panurat
terkenal najolo na margoar Seneca mandok: “To live is to be a soldier”. Lapatanna:
Gabe soldadu do halak na mangolu. Halak Rom dohot halak Gorik pe dipangke do
peribahasa i. Patut ma si Paulus menyelaraskan i tu hakristenon dalam versi na
so apala dos, ai hira khusus tu angka uluan dohot parhalado do i tinujuna.
Status ni halak Kristen di jolo ni Kristus, naeng ma songon parangan na rade
jala servis tu indukna. Sikap “patuh” tu parenta ni indukna jala so pola kritis
angka latar belakang ni parenta i, songon i do halak Kristen mangoloi na nidok
ni Debata. Mara partondion do i molo sai terlalu kritis hita tu Hata ni Debata.
Sikap parangan na sintong ima sai olo mamelehon dirina, ai ingkon rade ibana
jongjong songon tembok hidu maradophon musus dohot lembaga na hinaholonganna.
Ndang arta sasaran ni parangan i, alai habaranion kepatriotan dohot kesetiaan
na mangolu secara displiner. Dipajamot si Paulus di turpuk on; so tung alit
tujuan ni hajongjongan ni si Timoteus tu masalah ekonomi/hamaoron, songon jolma
halomoan.
3)
Ay.5; Tumpal hamonangan ima hasil
perjuangan mati-matian ni para atlit na so curang di paraduonna. Siihuthonon ni
ganup na maradu i do aturan na sah (rules of game). Status songon angka na
mangihuthon kontes do nang halak Ksirten di ngoluna. Ndang jadi so ingkon
humosa rade mangihuthon kontes dung jolo lengkap sempurna pangaradeonna na
marragamragam cara. Antong, ndang apala tumpal i na gabe pokok di paraduon i, alai keikutsertaan
asa dibagasan i tarida ma mutu ni paraduonna. Aturan main ni halak Kristen, ima
HOLONG. Di sude aktivitas ngolu ni halak
Kristen sai marojahan di holong, molo so i ndang tagamon tumpal sian Debata.
Gabe Kristen marlapatan do i pendaftaran keikutsertaan di paraduon i. Ai nda
tung mungkin adong na dipartumpali ia so dohot do ibana maradu. Halak na sedang
maradu ndang jadi maradian di tongan dalan, sai matua usahahononna do dapot
gogo (hsa) asa tarbahensa manorushon paraduonna sambil manustus dompak pandang
situjuonna.
4)
Ay. 6 -7; Las ni roha ni partani, ima molo marhasil na
niulana, jala dohot ibana patumona di gotilon. Mansai arga situtu, jala ndang
tarasam nilai ni las ni roha ni parhauma
manganhon patumonaan ni panen. Ai halojaon, haronsoton, sian tingki pangulaon,
parsuanon, parbaboon, pamuroon sahat tu tingki gotilon, ndang malua parhauma i
sian lahan na niulana i. Dison dituntut do sian parhauma i haronsoton mangula:
loja, marhoihoi, hodohon, male, mauas dohot lan na asing. Angkup ni i
habengeton (kesabaran) paima sahat gotilon. Jarang do petani so dibagasan
habengeton paintehon hasil ni na sinuanna. Jarak na marisi kecemasan relatip
leleng manang hatop tergantung tu jenis suansuanan do. Namun ianggo na
niondolhon ni si Paulus ima pengharapan na positif. Ai ingkon jumolo do
parhauma i taruli di parbuena. Songon na nidok ni si Paulus di suratna tu
Korint ( I Kor.9:7) “Tung ise ma dung disuru soldadu so margaji? Tung ise m
pauli porlak so dipangan sian parbuena? Ise ma marmahan dorbia somanganhon susu
ni pinarmahanna?”. Jadi ndada soal hak na niondolhon ni si Paulus disi, ai
kewajaran na mekanis do i. Iaanggo pangantusionta disi: “Silehonlehon ni Debata
do nang kesempatan mandai hasil ni ulaonta. Parjamita 5: 18 “Angkup ni i molo
dilehon Debata tu manang ise jolma hamoraon dohot sinamot, diloas huhut ibana
mangan dohot mambuat jambarna sian i huhut marlas ni roha di ulaonna,
silehonlehon ni Debata do i” Tusi do diarahon si Paulus pikiran ni si Timoteus,
asa unang tarhirim ibana di angka imbalan ni haporsuhon (parungkilon) na nialamanna
di na mamaritahon Barita Na Uli i ibana. AI manang sadihari daionna do parbue
ni na niulana i. Molo maol pe diantusi si Timoteus i, lehonon ni Tuhan i do
roha tu ibana mangarti saluhutna i.
5)
Ay.8; Pandohan : “Paingotingot ma
(ingatlah), marrumang parenta asa ingkon ingoton nasida satorusna.Ingkon tongtong
do dipaingotuingot ni si Timoteus Jesus Kristus i di sude panggulmiton ni
ngoluna. AI holan dibagasan Jesus Kristus i do jumpang hagogoon mardapotdapot.
Jesus Kristsu naung dipangolu sian angka na mate, na sian pinompar ni si Daud.
Pandohan on naeng mangarimpun sude pardalanan ni ngolu ni Jesus; sian mula ni
hatutubuNa sahat tu haheheonNa. Pandohan pinompar ni si Daud (sian suku
Benjamin), laos huhut doi patuduhon hadirion ni Jesus na sasintongna naung
disuriranghon sian mula ni Padan Na Robi (pengharapan Mesias na dibonai sian 2
Samuel 7, jala digonophon di diri ni Jesus Kristus di Padan na Imbaru).
6)
Ay.9-10: Dung dipaandar sintuhu ni haporseaon
i, sahat ma muse tu na paboahon pangulaonna. Ndang na naeng manenganengahon
diri si paulus dison, alai adong sangkap na uli na naeng sipasahatonna, ima:
Ø Molo pe sahat barita tu sipareon ni si Timoteus na tarrante
ibana, pola uhuman na dumokdok sian na parjolo, asa unang mandele jala mandate
si Timoteus alai bolas dilapati jala dipeakhon dohot sintong.
Ø Asa lam dapot di roha ni si Timoteus pangantusion na
singkop di ulaon ni si Paulus ima misi laho mambaritahon Barita na Uli naung
lohot di hadirionna.
Ø Anggiat marhite i dapot disi Timoteus gogo na imbaru dohot
roha na lam tu hirasna.
Dipaboahon AP.Paulus do rumang ni ngolu
na niadopan di hatiha i. Tongon tarrante (tarhurung) ibana paduahalihon di
hurungan na di Rom. Dao dumokdok do uhuman na paduahon i, pola dirajumi ibana
na jonok nama tingkina laho mate. Nang pe di ruhut uhum ni portibi (Kaisar
Romawi di hatiha i) dipatudos ibana tu siula hajahaton (provokator). Alai
tongtong do dihatindanghon ibana: Ala ni Barita na Uli, Barita haluaon na sian
Jesus Kristus do umbahen na tarrante ibana. Panindangion sisongon i do patauhon
ibana sahat tu habengeton manaon na porsuk. Pola do diranap ibana dao tu jolo,
tu misi haluaon ni torop jolma, angka na pinillit ni Debata, taruli di haluaon
i.
7). Ay.11-13; Antong dia ma nanaeng dohonon ni si Paulus
di saluhutna i ? asa dapot nang di angka na porsea benget ni roha
manghamonanghon angka haporsuhon na di tano on. Molo dapot i taruli ma nasida
di haheheon sogot, harajaon ni Debata, hangoluan na manongtong. Mansai ringkot
do on dipalumba marpardomuan tu haporsuhon (pangaleleon sian Kaisar Romawi)
naung muai diadopi halak Kristen di hatiha i.
C. Sipahusorhusoron.
1)
Hajjongjongan songon parbarita na uli
ndang monopoli ni pigapiga halak sambing, ai ingkon patubuon (suanon) do angka
panindangi na asing na marlipat ganda asa: “Siganda sigandua tu dangka ni
singgolom, na sada gabe dua, na tolu gabe onom.” Molo benget hita manariashon
holong ni Debata tu na humaliang hita, hatop manang lambat, di sada tingki marparbue
do i. Dirumatangga pe, natuatua do parbarita na uli tu pangisi ni bagasna. Sai na
jumpang do di sada tingki parbue i asal benget jala unang mansadi tongtong
mamodai, mangajari, nang pe so pintor jumpang hasilna. Alai sitongka do na
mauhom, holan manonton so olo mangula, so tung duhutduhut na tubu di haumanta
i, gabe so masa gotilon. Dilehon Debata ma di hita roha na mangarti saluhutna
i.
2)
Tugasta do songon halak na porsea pajamothon hapolinon ni panjanghononnta di
Kristus i marhite na olo sude hita marmissi mamaritahon Barita na uli i. Asa
sandok portibi on dapot haluaon, asa sude umboto paboa dibagasan Jesus naung
hehe i nunga rade haluaon dohot dalan mulak tu hangoluan salelengnilelengna. Ai
holan Jesus do na boi manaluhon hamatean i, ai tugasta do mamaritahon i ndang
boi lemba hita disi.
3)
Ndang boi tarrante Barita na uli i. Nunga
161 taon HKBP di portibi on marningot angka missionaris na berjuang mamaritahon
Hararat ni Barita na Uli tu Tano Batak. Sian Munson dohot Lyman sahat tu si
Nommensen nang di partingkianta sisaonnari on, ndang boi ambatan hararat Barita
na Uli i. Makin dibabat semakin merambat. Molo tahilala nuaeng lam torop halak
na mangarante manang mangambati barita na Uli marhite na pamaomaolhon izin
gareja, na manutup paksa dohot na manutung angka gareja, songon i nang na
mambahen paraturan laho mempersulit halak Kristen i di singkola nang di
parkarejoan, unang pola tahutan manang mabiar hita. Ai ndang tarrante Barita na
Uli i, ai Jesus do mandok di Johannes 16:
33: “Haporsuhon do jambarmuna di portibi on, alai pos ma rohamuna; nunga talu hubahen
portibi on”.
4)
Unang pola tarsonggot hita, ai nunga
dilumbahon Jesus hian tu angka na naeng mangihuthon Ibana. Asa molo taadopi angka na hansit i muse, unang
panik, unang bobos. Ala dungkon olo hita mambuat haputusan laho mangihuthon
Jesus, mamungka sian na taridid hitam satingkosna nunga rade hita teken kontrak
laho maon na hansit raphon Kristus. Molo rade hita marsitaonon ala ni Kristus,
dongananNa ma hita nang di hamonangan. Haheheon ni Kristus i do na gabe jaminan
di hita. Nunga monang Kristus ala ni i barita ni haheheonNa i pe pasti do monang. Ai ise do na manaluhon portibi on ?
Ima angka na porsea di haheheon ni Kristus do (1 Joh.5: 4-5).
5)
Laho mangadopi situasi pangaleleon,
haporsuhon tu angka na porsea i, ingkon marbisuk songon ulok jala lidang songon
darapati (Mat.10:16). Angka halak Kristen
ingkon bisuk jala lidang mangadopi sude na masa i. Eka Darmaputera
mandok : “Mati karena Kristus itu baik, tetapi jangan mati konyol, jangan mati
siasia karena kebodohan dan kecerobohan.” Amen.
