Jamita Partangiangan – Epistel Minggu XVI Dung Trinitatis, 28 September 2022

“Ndang Marpansohotan Asi ni Roha ni Tuhan i”

Tak Berkesudahan Kasih Setia Tuhan   

 

& Ev.  II Timoteus 1 : 1 – 14                            & Ep. Andung 3: 19-26                       

 

A.    Patujolo

Hatiha i nunga mamungka lam mangerbang organisasi ni huria di tingki ni si Timoteus. Nunga lam balga huria i, jala patut ma diramoti dibagasan sada aturan ni organisasi na denggan. Alai sian dia jaloon ni si Timoteus panorangion taringot tu ulaonna na dokdok i ? Sian dia ma jaloonnna hagogoon dohot huaso (otoritas) laho manogunogu huria na sai balga ? Ala ni i do umbahen na dipasahat apostel Paulus (dohonon ma i, na manurat turpuk on ) surat on tu si Timoteus, asa margogo ibana laho mangaramoti huria ni Debata.

Tanggung jawab na balga do na tiniopna i di Epesus naung lam mangerbang. Ndang holanuluan na ringga be manguluhon i (manang na kharismatis), alai i ngkon tama botoonna nang na manguluhon organisasi pe. Godang dope na so rade di bagasan organisasi ni huria di tingki i. Torop dope huria na marnida di lapik, jala sangka sisongon i ma na niadopan ni si Timoteus.

 

2. Hatorangan dohot hahonaanna

1. (Ay.1-5)Mamuhai suratna na paduahon tu Timoteus, jumolo do Ap.Paulus pasahathon tabe ni holongna tu si Timoteus, anak partondion na hinaholonganna. Didok Ap.Paulus ala ni sangkap ni Debata na patauhon songon parbarita padan ni hangoluan dibagasan Kristus Jesus. Kesadaran ala ni sangkap  ni Debata on patauhon Ap.Paulus laho mandok mandok mauliate tu Tuhan i siala haradeon ni si Timoteus mangulahon panghobasionna. Diboto Ap. Paulus do ndang neang panghobasion ni si Timoteus di Efesus. Mansai poso dope si Timoteus jala rongking ni angka parsualon na hinorhon ni angka pangajari sipaotooto na mamasuhi huria na di Epesus jala ndang mura mangadopi nasida. Diboto Ap.Paulus do mansai borat na niadopan ni si Timoteus di parhuriaonna, ala ni i tama ma ibana margogoihon anak haholonganna i, asa tau mangadopi i saluhutna dibagasan habisuhon dohot partondion.

 

2. (ay.6-7). Dasor na parjolo di bohal na margogoihon roha ni si Timoteus sian Ap.Paulus ima siala ni asi ni roha na adong diibana sian Debata do i. Holan ala asi ni roha ni Debata sambing do asa dapotan haluaon si Timoteus dohot panjouon tu panghobasion. Dasor na paduahon na dipasahat Ap.Paulus tu si Timoteus ima, siala Debata na paluahon ibana, jala na mangalehon hagogoon tu ibana. Sian asi ni roha nang hagogoon na sian Debata na jinalona i, diapoi Ap.Paulus do si Timoteus asa unang maila manghatindanghon Tuhan i jala uang mabiar manarita ala ni Kristus i.

 

3. Nunga dilehon Debata silehonlehonna na arga i tu si Timoteus, ima ditingki na diampehon Ap.Paulus i tanganna tu ibana. Ditonai apostel i do si Timoteus asa diramoti ibana jala dipararatahon angka silehonlehon ni Debata naung sahat tu ibana. Nunga dilehon Debata tondi hagogoon na margogoihon si Timoteus laho mangulahon tohonanna i. Ai ulaon ni Debata do na n iulana i. Ala ni i do umbahen na dilehon Debata hagogoon tu angka naposona laho mangulahon angka ulaonna. Mangaramoti huria ni Debata, sada bentuk ulaon na dokdok situtu do i, jala ndada tung ulaon hajolmaon i, alai tung ulaon ni Debata do i ditongatonga ni huriaNa. Sian Tuhan Debata do jaloon hagogoon lahi pasidungkon angka ulaonna. On do diparatarata Apostel Paulus tu si Timotius, asa diingot ibana i jala asa pos rohana laho mangulahon ulaon na dokdok i.

 

4. Jala ndada holan i, tung dibasabsahon Debata  nang Tondi haholongon. Dilehon Debata do hagogoon tu angka pangula ni huriana, asa margogo ibana laho manghaholongi huria ni Debata dohot manghaholongi musu ni Debata pe, i ma angka na mamboanmboan huria i tu angka turiturian na so gabeak dohot angka poda haliluon pe. Marhite hagogoon na sian Jesus Kristus do gabe tarhaholongan hita huria ni Debata. Dilehon Ibana do nang tondi pangajarion diri tu angka parhobasNa, ndada tondii hatahuton. Ndada na nirajaan ni biar angka parhobas di huria ni Debata, tung ingkon na nirajaan ni hagogoon na sian Debata do. Ai tung songon dia ma bahenon ni angka parbiar laho mamaritahon hagogoon ni Debata, gari ibana sandiri ndang manjalo hagogoon sian Ibana ?

 

5. Ditonaii AP.Paulus do si Timoteus asa dohot ibana manghophop Barita na Uli i. Laho humophop Barita na Uli i do ibana dijou di bagasan huria ni Debata. Ndada na naeng mamaritahon barita na roa, turiturian na so gabeak, na sai lalap ala ni angka tarombo, manang na pasuanhon angka poda haliluon, alai laho humophop barita na Uli do. On do ulaon ganup parhalado sepanjang jaman, ndang na naeng manambai Barita na Uli i. Nunga singkop Barita na Uli i taringot tu hangoluan – hamamate – ro di haheheon ni Jesus Kristus. Jala on do ditonahon asa gabe isi  ni panindangion ni si Timoteus. Ndang adong na asing sihatindanghonon alai tung ingkon taringot tu Tuhan Jesus do; jala marhite hagogoon na sian Debata sandiri do hasasahat ni Barita na Uli i tu angka na manangihonsa. AI ingkon botoon ni si Timoteus, na so margogo parhalado sian dirina sandiri laho mamaritahon Barita na Uli i, ai ndada gogo ni pingkiran ni hajolmaon bahenon laho pasahathon i tu angka jolma manangihon Barita na Uli i, alai hagogoon na sian Debata do.

 

6. Dipalua jala dijjou do ganup pangula ni huria manang parhalado marhite panjouon na badia. Ndada marguru tu ulaon tung sian tahina dohot sian asi ni roha na binasabasahon ni Debata dibagasan Kristus Jesus na sian mula ni mulana. Ndada tahi ni jolma na naeng saut alai angka na hinalomohon ni Debata do. Lomo ni roha ni Debata do sihatindanghonon di tongatonga ni huria jala ndada lomo ni roha ni jolma (na marisihon poda manang filsafat, manang politik pe dohot lan na asing). Alai tung lomo ni roha ni Debata do sihatindanghononhon ni si Timoteus, songon i nang parhalado di tingki on di tongatonga ni angka ragam ni pangombus ni poda. Naeng unang lilu halak sian tahi ni Debata na denggan i tu saluhut hajolmaon, i ma haluaon sian dosa ro di hangoluan na binasabasahon ni Debata.

 

7. Haheheon ni Jesus i do hataridaan ni sandok huaso dohot hagogoon ni Debata. Jala on do na mian jala na margogo dibagasan Barita na Uli i. Haheheon ni Kristus i do na mangalehon hagogoon tu angka na pinabangkitna gabe parbarita na Uli. Debata do na manjou jala Ibana do nang na mangalehon hagogoon tu angka na jinouna. Diparata apostel i do tona on tu si Timoteus asa diingot ibana jala asa pos rohana laho papatarhon Kristus Jesus Sipalua i. Debata do na papatarhon ha-Debata-onna, jala ulaulana do angka na jinouna i. Ala ni ulaon na papatarhon Kristus Jesus Sipalua i do umbahen na marsitaonon Apostel Paulus. Alai ndada maila ibana disi, ai dirajumi rohana, hagogoon ni Debata do Barita na Uli i di angka jolma na manjalosa. DI angka jolma na naeng mago do na mandok haotoon Barita na Uli i. Apostel Paulus sandiri pe nunga maruli hagogoon sian haheheon ni Jesus, di tingki na jinouna i ibana di tongan dalan dompak Damaskus.anang di dia pe Apostel Paulus sai tong do dipapatar ibana taringot tu Kristus Jesus Sipalua hajolmaon. Sian nasa pos ni roha ni Apostel Paulus do diramoti ibana sandok ulaonna dibagasan haporseaon ni rohana, ai pos do rohana na margogo do Kristus laho mangaramoti na pinalumehonna i tu ibana, ro di ari sogot i (ay.12)
8. Songon sahalak pemimpin nii huria, si Timoteus ingkon poda na tingkos i do tioponna di bagasan haporseaon dohot holong ni roha na di Kristus Jesus i (ay.13). Ingkon aloon ni si Timoteus do angka poda na mangaliluhon halak sian tahi ni Debata. Poda na sintong i do sipodahononna di tingki na mangaramoti huria ni Debata ibana. Pda na sintong i do sihaholonganna, jala marhite holong na sian Kristus i do ramotanna huria ni Debata. Ndang porlu mabiar manang hatahuton si Timoteus maradophon angka parpoda haliluon. Diboto Debata do saluhut na masa di huriaNa, alai pargogoanNa do ganup parhaladoNa laho mangadopi angka i.
9. Tondi Parbadia do mandongani saluhut ulaon di tongatonga ni huria i. Nunga dibagabagahon Kristus hian taringt tu ulaonna laho mangaramoti huria ni Debata, jala mangalehon hagogon tu angka parhaladoNa. Ndang pasombuon ni Debata si Timoteus sahalakna sandiri di angka ulaon na mansai dokdok i. Didok Apostel Paulus, na maringanan di bagasan hita do Tondi Parbadia i. Ibana do dongan ni ganup parhalado di nasa ulaon di huria ni Debata. Jala Tondi Parbadia ii sandiri do na mangalehon poda na tingkos i tu nasa parhalado nang di tingki on pe.

3. Sipahusohusoron

Topik ni minggunta manoarahon : “Ndang Marpansohotan Asi Ni Roha ni Tuhan i” sai jounna do angka na tarjou jala na rade gabe ulaulaNa laho mamaritahon Barita na Uli i. AL ni i sude ruas ni huria tarhou do gabe siboan Barita na Uli i marhite:

1. Manghatindanghon barita na Uli tu humaliangna
2. Papatarhon asi dohot holong ni Kristus i tu saluhut jolma
3. Sai tongtong mangihuthon poda na tingkos i na hombar tu Hata ni Tuhanta. Amen.