“Disarihon Debata do Ganup
na Marungkil
Allah Menjawab
Setiap Pergumulan
& Ev. 2 Korint 12: 7 -10 & Ep.Nehemia 5: 1-13
A.
Patujolo
Ia na di portibi on adong do batas nang masana, ndang adong na hot
manongtong, sai mubauba do sude. Laos songon i do hajolmaonta na terbatas, jala
boi do mubauba ala ni keadaan situasi dohot umur gabe matua, marsahit nang gabe
gale. Tung so boi do ala ni gogo, jabatan, arta nang na adong di portibi on
sipangasahononhon asa laho gabe malua hita sian ragam hamaolon. AI holan
Haporseaon do na paluahon hita di angka na porsea di Tuhan Debata.
Dibagasan turpuk diajari Ap.Paulus do hita sian pengalamanna asa marpos ni
roha jala marhaporseaon di na mangadopi hamaolon, sitanonon.
Parjumpangan ni Ap.Paulus dohot Tuhanta Jesus Kristus uju na margoar si
Saulus na tongon di pardalanan tu Damaskus, pauba roha nang ngoluna sian
sihosomi halak Kristen gabe ulaula ni Tuhan i laho mamaritahon Barita na Uli.
Salauhut pengalaman ni haporseaonna ndada na gabe dihaginjanghon ibana dirina.
Alai na gabe balik do ia hagaleonna i do dibanggahon ibana : Jala asa unang
huhaginjangkon angka pangungkapon na sumurung na tu ahu: Hona basirbasir do ahu
di sibukku, i ma suruan ni sibolis na mamukpuhi ahu, asa unang hupatimbo
diringku. (ay.7)
Naung na nia do leleng na marulakloni dipangido Ap.Paulus tu Tuhan Debata
asa malum jala bolong sahitna i sian pamatangna. Alai ingkon lomo ni roha ni
Debata do na saut. Marhite haunduhon di huaso nang sangkap ni Tuhan i, laos
disi ma asini rohaNa na martambatamba dipasingkop Tuhan i dibagasan dirina.
B. Hatorangan dohot hahonaanna
Adong ma dua hal na boi sipahuhsorhusoronta marhite turpukta on:
1) Sai diramoti Tuhan i do hita dihagaleonta.
Tuk ma asi ni rohangku di ho; ai di hagaleon do sun timbul hagogoon. Asa
tagonan ma hupapujipuji diringku di bagasan angka hagaleonku, asa songgop tu
ahu hagogoon ni Kristus (ay.9). Molo lam balga hagaleon nang ujian na taae ala
ni Kristus, lam tu balgana ma asi ni roha na binasabasahon Tuhan Debata laho
pasauthon lomo ni rohaNa. Manang aha asiasiNa i sai na singkop doi di hita laho
mandalani ariari ni ngolunta. Manghobasi Ibana jala manuhuk hina bernit jala basirbasir
di sibuk. Uju gale hita dibagasan dirinta, alai gabe margogo do hita diabagsan
asi ni roha nang holong ni Jesus Kristus Tuhanta i. Dung tasadari hagaleonta i,
disi ma hita ro tu adopan ni Tuhan Debata jala mangido hagogoon sian Ibana jala
jaloonta ma hagogoon nang asini rohaNa.
2). Hupapujipuji diringku di bagasan angka hagaleonku.
Hata “hupapujipuji dibagasan hagaleonku” (ay.9), lapatanna ndada hagaleon
ala ni dosana, alai panaritaan, reherehe, hahurangan, ginosagosa, nang hasusaan
na nialamanna ala ni Kristus. Dipapujipuji dirina jala marlas ni roha ala ni i
ima ala saluhutna i gabe kesempatan dibagasan Kristus laho papatarhon huasoNa
nang pasingkophon asi ni rohaNa tu tu ibana. Sian saluhutna i ma Ap.Paulus
jotjot do manghilalahon asini roha dohot hagogoon na sian Debata asa botoonna
mandok, uju gale ahu dapotan hagogoon ahu.
Di hita na hinaholongan, uju tatanda dirinta nang hagaleonta, disi ma lam
gogo ro asini roha nang hagogon ni Tuhan i tu
hita. Jaloon ni Ap.Paulus do hinadangol i, jala dihatahon ibana do i
dohot tongam jala dibagasan unduk dohot serep ni roha. Boi do halak na asing
marpikiran tu halak naung hea mandapot parnidaan nang panindangion songon on na
bolas pabonganghon dirina. Alai didok AP.Paulus do, asa hupapujipuji diringku,
nang pe ndang apala adong gunana i. Ido alana ndang apala langsung hatahononna on, pola do dung
sahat tu sampulu opat taon (ay.2). Mnsai bangkol do rohana jala gabe terpaksa
do paboahonsa ala mansai ringkot. Dipaboa ibana do taringot tu dirina sandiri
songon halak na patoluhon, ndang apala tullom dipaboa ahu ma i halakna na
manjalo hasangapon lobi sian na asing. Ima patuduhon serep ni roha ni AP.Paulus
na boi manahan dirina. Sian on na patuduhon di ibana tumagonnan do ndang sai
jojtot tinaringotan. Laos songon i do Ap.Paulus ndang maria imbar sian angka apostel na asing sian hatongamonna,
jala na tangkas tarida ima haserepon ni rohana. Asa gabe siparrohahononta
mansai uli nai molo adong tondi hasrepon nang pe naung marhasil hita di angka
ulaon parkarejoan, nang angka usahanta, asa toho ma na ni dok hata ni Tuhanta,
sipatimboon do angka na patutoru dirina. Lukas 14:11 Ai nasa na
patimbohon dirina, sipaoruon do; jala na paoru dirina, i do sipatimboon!
Asa dihita nahinaholongan bagas
mamereng sian partondionta angka mutiha na mannongtong sian hagaleonta i, asa
marhite i ma huaso ni Kriustus sai marmudumudu hita, maringan dibagasan hita
huhut dibagasan habengeton ni roha nunut tadalani hangoluanta tu hangoluan na
manongtong na di surgo i. Nang pe ndang apala ringkot dipaboahon Ap.Paulus muse i asa unang patar tarida ginjang ni roha
disi, asa unang adong sikap na paburnangburnang diri, ai tung pe godang do sipujion
di angka pelayananna. Tung pe naung marhamubaon ni roha ibana, ndang apala
ringkot roha na papujipuji diri ibana. Alai dipapujipuji ibana do huaso ni
Tuhan i, na mangula dibagasan dirina jala marhite pardalanan ni ngoluna sai lam
dipargogoi Tuhan i ibana lahopararathon Barita na Uli tu torop jolma.
C. Sipahusorhusoron
v Dibagasan ngolunta on ndang haambatan hita asa
ndang marungkil hita, ndang mangadopi sitaonon, hamaolon, parsahiton, harugian,
angka mara nang hinabernit alai na ringkot sijamothononhon i ma unang ala ni saluhut
parungkilon i mambahen hita gabe mandate, mandelel, mandao, marsirang sian asin
i roha ni Debata, hinorhon ni i gabe madabu hita tu bagasan dosa. Parsahiton
dohot hamaolon na boi songgop doi tu pamatang dohot ngolunta alai unang ala
hinorhon ni i gabe lam dao hita sian asini roha ni Debata, alai sebalikna tabahen
ma i gabe dalan laho pasolhothon diri tu Jahowa, mangido hamamalum, dohot
pangurupion sian Ibana. Habengeton manaon na hansit dohot parsorion i do
hataridaan ni jolma na sai manghirim tu Debata. Dipartingkion nuaeng on lam
godang do jolma mandao sian Debata ala ni hariburon dohot hagiot ni portibion.
Alai marhite turpuk on dijouhon do tu hita asa tapangsahon Debata di ngolunta,
holan Ibana do pangkirimonta, holan Ibana do sipujion jala sisombaonta. Benget
mangadopi parungkilon. Porsea tu Jesus berarti rade manaon parungkilon. I do,
umbahen diajari hita, marhite turpuk on, asa benget manaon, jala manghirim di haluaon sian Tuhan
I, huhut tongtong di bagasan partangiangon. Asa unang sumurut ringgas ni roha ala ni sitaonon / hamaolan i.
jala holong partangiangon (hasolhotan ta tu Tuhan Jesus i) do mangalehon hatuaon
mangadopi parungkilon I. Asa songon na
tarsurat di Rom 5:3-4 ” Alai lumobi sian
i dope, ai itahalashon do nang angka haporsuhon, ala taboto, dihorhon
haporsuhon i do habengeton ni roha.Jala dihorhon habengeton ni roha i do
hatauon, jala hatauon i do mangkorhon pangkirimon”.
v Turpuk on manogihon hita asa tangkas ngolunta
manatap tu Jahowa, unang holan na ditanoon tapingkiri jala tahirim. Molo tung
pe rongom ro angka sitaononi marsingkatsorin di parngoluonta naeng ma hita
manat laho mangadopisa. Unang gamang (gegabah) laho mangadopisa gabe mambuat
sada haputusan na salah holan ala mamingkiri na ringkot di haporluan ni ngolu
parsatongkinan, alai ingkon tangkas ma hita mangaranap tu Jahowa nanaeng
pasahathon haluaonta di huta nauli huta ni Debatanta i, na so adong be siaeon
angka na hansit disi. Molo tung porsuk tataon nuaeng on, tung so pasombuon ni
Jahowa do hita laho mangadopi i. Alani i pasahatma dalanmu tu Jahowa jala haposi
Ibana, asa Ibana paturehon. Nanaeng pataridahon Hasation do Kristus di
namangula di Portibion. Nang hita pe Asa Satia di ganup ulaon ta hombar Panjouaon Ulaon na di pasahat Debata di hita marsada-sada. Hasatiaon di
Haposerseaon marpangkorhon Habengeton, Jala dihorhon habengeton ni roha i do
hatauon, jala hatauon i do mangkorhon pangkirimon. (Rom 5:3-4), asa marhite on
do tubu ma dihita Nalom jala Serep ni roha, mangadopi ragam ni angka Hamaolon,
parungkilon, haporsuhon. Amen.
