Jamita Partangiangan – Epistel Minggu XVII Dung Trinitatis 2022

“Haporseaon na Paluahon”

Iman yang Menyelamatkan   

 

& Ev. 2 Rajaraja 5: 1 - 14                            & Ep. Lukas 17: 11-19                       

 

1. Patujolo

Ia turpukta on paboahon barita taringot tu parsahiton ima sahit puru ni si Naeman, partogi ni parangan ni raja sian Aram. Diboahon sada boruboru na metmet sian tano Israel na boho maringanan di bagas ni si Naeman do na tuk panurirang ni Israel songon parhitean ni Debata pamalumhon i. Ndang apala maol on antusan siala mangihuthon panulingkiton ni angka pande bisuk Padan na Robi, huroha dihatiha i tongon di toru ni huaso Raja sian Aram do bangso Israel Utara. Asa ndang apala maol mangido pangurupion. Bolas ma i borhat sian panatapan ni halak Aram. Alai ianggo di bangso Israel, tarlumobi si Elisa, dirajumi do on songon dalan ni Debata laho patuduhon huasoNa na manghamham saluhut.

Marhite raja sian Israel, dijururi si Naeman do mandapothon si Elisa. Marnida parsitutuon i, disuru si Elisa ma ibana maridi pitu hali di bagasan aek Jordan. Marlapatan do on, ingkon ro do ibana tu Jahowa, ingkon unduk do ibana tu parsuruon ni Jahowa marhite panurirangNa jala ingkon di tano Israel do dapotna hamalumon i.

Dungi taruli ma ibana di hamalumon i sumuang sibuk ni sada dakdanak, mulak ma ibana muse mandapothon si Elisa. Tarida sian i dapot di ibana bangko na mansai uli, ima panandaon di pangurupion patauuhon so ingkon mandok mauliate. Ndang sae holan i, haruar pangokuon manang panindangion: “Nuaeng pe asa huboto na so adong Debata di sandok tano on, dungkon ni di Israel.”

 

B. Hahonaan ni Turpuk

Dungkon tajaha turpuk on tangkas tarimangrimangi, adong ma pigapiga hal siputihonta sian turpuk on, ima:

1. Ndang adong jolma na singkop (sempurna). Tung so boi dohonon ni manisia dibagasan dirina na sempurnah ibana, sai adong do hahurangan ni ganup jolma. Termasuk ma si Naeman, atik boha dirimpu rohana dirina naung sempurna (ay.1). Ibana jenderal ni harajaon Aram (Ram; Syiria), harajaon na disegani uju i. Rajana pe hormat tu ibana, hasian ni raja. Alai diujung ni ayat 1 on didok : “alai puruon”. Dijolo mansai ganjang dipatorang kehebatan, keagungan ni si Naeman i, alai hata parpudi na jempek i do mangambolonghon sude kehebatan na i sude. Hape tung pe hebat, tarbarita, alai ndang boi manaluhon sada sahit na ro tu ibana, ima puruon (kusta). Ala ni i unang ma ginjang rohanta mangasahon haulion, jabatan, hagogoon, di na mangolu on. Sai na marhusor do partingkian, nang portibi on ro diisina, ndang adong na hot. Ratu Elisabet II pe marujung ngolu do, ndang manongtong huasona i.
2. Unang lea rohanta mida halak na metmet. Dung tarbarita huaso,  kesuksesan dohot sahit ni si Naeman. Di ayt. 2 hadir ma sosok ni sahalak na so targoar, na so hebat, na so tarbarita. Ibana sahalak boruboru, dakdanak (halak na metmet na so masuk etongon siberengon). Ibana sahalak tahanan perang na dianggap do ummarga panangga sian tahanan perang. Digoari do angka nasida na so marguna, sampah masyarakat. Penilaian ni halak na uju i tu halak na metmet sai na adong dope nang di partingkianta sinuaeng on. Torop do halak na sai lomoan rohana mamereng halak na tarbarita kehebatanna songon si Naeman. Angka na metmet na so tarbarita ndang apala siberengon manang sitangihonon. Alai dibagasan turpuk on dipabalikhon Tuhan Debata do i. Termasuk na gabe pahlawan tanpa lencana dohot tanpa upa sian haburjuonna.
3. Dung mandele si Naeman ala ni sahitna i, ndang sangap be ibana jala moru ma wibawa kehebatanna i, disi ma ro boruboru na metmet i. Di ayat 3 mandok: “Aut ni di adopan ni panurirang na di Samaria tuanki, sai na paluaonna do ibana sian puruna i.” Boruboru sian bulus ni rohana do ro laho mangalehon pangurupion, ndang adong roha kesempatan dalam kesmpitan songon na deba jolma di hasiangan on. Domu tusi si Naeman pe diungkap ibana do rohana manangihon hata ni boruboru na metmet i. Porsea jala mar pos ni roha do si Naeman di hata boruboru na metmet i. Dison marsiajar hita na olo mambahen segala usaha laho asa malua jala malum sian nasa sahit. Termasuk manangihon halak na metmet (ptd. Luk.17:6).
4. Marhite turpuk on mangajari hita; ia Tuhan Debata ndada holan Debata ni halak Israel, alai Debata ni saluhut na tinompaNa termasuk ma si Naeman. Ai dohot do si Naeman sahalak panglima sian sipelebegu, panglima ni harajaon Aram, dohot do dipalua, dijama jala dipamalum. Jadi ndang boi batasanta haluaon na binoan ni Debata holan tu hita na porsea, alai asi do holong ni roha ni Debata tu angka na marriburibu na mulak porsea jala manghaholongi Ibana. Sian na masa on, mamboan pangantusion; ragam do dalan binahen ni Debata laho patuduuhon huasoNa. Bolas do i marhite tanda halongangan na so tuk piningkiran ni jolma, na so tardodo pingkiran ni jolma. Saluhutna i laho paandarhon hadirion ni Debata di sandok na tinompaNa. Asa, dapot ma monoteisme, ima credo ni haporseaon na holan sada do Debata; jala dapot ma monolatreia, ima hapolinon ni  parsombaon. Holan tu Debata, ingkon dapot ma on ndang holan di tano Israel alai di sude na tinompaNa. Molo pangokuon i nunga dapot sian duru ni Sirael, lam boha ma bangso Israel songon bangso na pinillit ni Debata, so ingkon patuduhon i ?
5. Di turpuk on manosoi hita ia panandaon di hadirion dohot huaso ni Debata patubu roha mandok mauliate. Roha mauliate ima gabe somba tu adopan ni Debata ima na ummarga, jala ingkon dapot do i nang di ngolu siganup ari nang maradophon dongan jolma. Ingkon mangolu do hita di pangalaho na inklusif, dialogis  jala terbuka. Inklusif lapatanna rade manjalo haroro ni angka dongan na ro sian duru ni horongna, uduranta. Laos songon i sian duru ni ugamonta. Dasor pamingkironta  ima marhuaso, marhuraja jala mangula do Debata na tahaporseai i tu sude horong, bersifat universalis. Dialogis, lapatanna nunga ingkon rade hita nang patupa panghataion na rosu nirahutan ni holong na mamolin tu sude houm, tu sude horong. Ndang holan disi, songon si Elisa na rade patupa sipatupaonna songon parhitean ni Debata, naeng ma songon i nang hita. Nunga mansai godang na ingkon sihataan, sipatupaonta, isara ni di konteks etos global, so pola diambati angka parasingan ni simbol-simbol ruhut parduru.  Terbuka, lapatanna gabe parsidohot na burju ma hita, parroha sisangunjur. Na mangolu jala mardalan dibagasan holong na sintong, ndang pola adong disi ngolu na marsitabuni, marpangansi manang marsipaula. Sian nasa gogo naeng patupaonta laho patulushon ngolu na lam kondusif hombar tu lomo ni roha ni Debata asa sude ulu ni tot marhatopothon Debata Jahowa sasadasa pargogo na so hatudosan.
6. Roha na unduk jala pangoloi ima haporseaon: (ptds. 1 Kor.2:9; Ef.3:20), dipatuduhon si Naeman do sikap na mangoloi jala unduk di na pinasahat naposo ni Tuhan i si Elisa. Molo sipangoloi hita di hata ni Tuhan na pinasahat naposoNa sai na sahat do ragam ni pasupasu dibagasan ngolunta asal ma porsea hita. On ma na nialaman ni si Naeman, marhite parsuruon ni si Elisa asa dibonomhon dirina pitu hali di aek Jordan. Songon sada penghinaan do on di roha ni si Naeman na so hormat si Elisa tu ibana. Tung boha ma rohana laho mangulahon parsuruon in si Elisa, na so masuk akkalna na so mangargahon ibana songon pangima na targoar. Dison ma si Naeman sai mambandinghon na diroha nang pingkiranna na dumenggan sian na pinasahat sahalak naposo ni Debata (ptds. 2 Raja 5:11-12). Ala naung diparade si Naaman do tu hahipasonna i marhite surat pengantar resmi sian Raja Aram dohot pengawal soldadu, nang ragam ni arta sipelehononna songon “tuhor” ni hamamalum na sian sahit i tu si Elisa. Ditambai muse ndang langsung mangadop bohi si Naeman dohot si Elisa, sae do holan suruan ni si Elisa paboahon na naeng sipaboahon tu si Naeman aha na ingkon siulahononna asa malum sian sahit i. Jadi andul marasing di roha ni si Naeman dalan hamamalum i ndang pola ingkon arga jala maol, sederhana do dalan ni Tuhan i asal ma pos roha jala marhaporseaon na polin tu Tuhan Debata marhite naposoNa i. Sian on marsiajar hita laho patutoru diri, soala ni gogo, sangap nang arta portibi on hita boi malua sian ragam ni angka hasusaan, panaritaan nang angka sahit. Holan na unduk jala serep rohanta ro tu adopan ni Tuhan Debata mangokui hagaleonta jala taulahon HataNa i. Dungkon dipaingot naposo ni si Naeman muse asa dioloi parsuruon ni si Elisa ima pahothon roha ni si Naeman mangoloi jala mangulahon ni sinuru si Elisa. 5:14 Jadi tuat ma ibana jala mangungkor di bagasan Jordan pitu hali, hombar tu hata ni halak ni Debata, jadi sumuang ma sibukna, songon sibuk ni sada dakdanak, gabe ias ma.
7. Pengalaman rohani ni si Naeman gabe panindangion di hita angka na porsea. Dijalo si Naeman do hamalumon ni pamatangna, alai ndang marujung disi. Pengalaman i justru mamboan ibana tu sada panindangion haporseaon, tu sada pengakuan iman (credo) na luar biasa; “Ida ma, nuaeng pe asa huboto na so adong Debata di sandok tano on, dungkon ni di Israel” (ay.15). Lapatanna ndang adong debata na asing holan Debata Jahowa do na sintong jala tingkos, asa halak na porsea unang be ragu jala munggil sian huaso nang holong ni Debata Jahowa na tuk manarihon na ringkot dibagasan ngolunta. Asa pengalaman rohaninta be ma na gabe paninadngion na tangkas tu angka pinomparta. Boha do pengalaman spiritual i tahilalahon mangula dibagasan ngolunta Debata.

 

C. Sipahusorhusoron

1)      Umbalga do Haporseaon i manarihon ngolunta sian materi manang arta. Ndang marlapatan arta i tu hangoluan sogot,alai haporseaon di bagasan Kristus Jesus i do.

2)      Haporsean na paluahon ima topik ni minggunta na manjou hita asa marsihohot marhaporseaon tu Jesus Kristus naung paluahon hita sian dosa nang hamatean i.

3)      Marhite haporseaon na mangolu i, unang be ragu manang sangsi hita laho manogunogu angka jolma na dibagasan hasusaan so pola mamereng latarbelakang nang ulaonna. Amen.