“MARLAS NI ROHA DIBAGASAN TUHAN I”
Ev. Lukas 15 : 1 – 7 Ep. Psalmen 32: 8 - 11
a.
Dipaandar
do dibagasan turpuk on parjumpangan ni Tuhan Jesus dohot dua horong ditonga ni
halak Jahudi. Horong na parjolo ima angka sijalo beo dohot angka pardosa. Angka
sijalo beo dihosomi do nasida siala ulaon nasida na gabe singkat ni bangso Rom
laho mambuat iuran pajak ditonga
sabangsona sandiri, jala somal do nasida marlomolomo mambahen arga ni
pajak na. Dihasogohon do nasida jala targoar do songon penghianat. Hape horong
na na sadanari ima angka halak Parise dohot siboto surat. Nasida na didok rohana
na burju mangulahon patik i dohot sintong jala adong do parbinotoan nasida
taringot tusi. Siala ni i didok rohanasida na umbadiaan nasida, jala na patut
ma didok rohana laho manguhumuhumi halak na asing. Ido umbahen dihilala
rohanasida na marhasurungan habadiaon nasida asa lomona ma manguhumi halak na
asing.
b. (ay.1-2)Digombarhon si Lukas do halak pardosa on, halak na lea di pingkiran ni halak jala dietong do “ndang patut bongot tu Harajaon ni Debata”, hape dipaboa do nasida na naung somal majumpangi Jesus laho manangihon jamitaNa. Lapatanna napatuduhon adong na mansai manarik sian Tuhanta Jesus, sian pangajarionNa manang sian diri ni Jesus i sandiri, umbahen torop jolma songon halak pardosa i na mandapothon Jesus. Ndang holan i, rap mangan do Tuhan Jesus dohot nasida. Rap marsipanganon hatiha, ndada na holan mangan sambing, alai lapatanna ni i adong sikap panjanghonon, parsaoran na rosu. Ala ni i, marhite na rup marsipanganon nasida, angka sijalo beo dohot halak pardosa i, na pinatoru Jesus do dirina doshon halak pardosa i hape gabe dinilai halak parise i do i songon persetujuan ni Jesus di pangalaho dosa nasida i. Ido umbahen gabe marungutungut ma halak parise, saduse nang angka siboto surat. Ndang tarjalo rohanasida pambahenan ni Jesus i tu halak pardosa i. Hira tudos di barita na masa sinuaeng on; nirimpu do angka halak na martatto i tudos tu angka hala na marnarkoba, hape na jotjot tartangkup aparat na so martatto do na mamahe narkoba i. Atik boha asing pamerenganta molo ro marminggu halak na martatto, halak parjahat ma di rohanta nasida. Nda marhite sikap ni Jesus on paboa halak pardosa i na ro mandapothon Jesus marhite na olo ringgas marminggu gabe sada dalan hamubaon ni roha ? Atik dos do hita songon parrohaon ni hala parise, saduse nang angka siboto surat i. Na mian jala ro tu gareja nang parmingguon holan angka na ringgas marminggu partangiangan, na ringgas masilehonlehon hamauliateon na ma? Asa tardok do naung boi gabe ukuran na tabahen i bongot nasida tu harajaon ni Debata ? Baliksa molo tabereng angka na losok tu parmingguon, tu PHD, na pamunu, angka na jahat, na marmainan, na so suman parhataanna, nasida ma na inkon masuk tu api naroko ? Pemahaman si songon on godang do i di angka ugamo na asing. Hape molo hantus do di roha ni angka halak parise, saduse nang siboto surat Hata na tarsurat di Jesaya 55: 8-9 Ai ndada pingkiranku pingkiranmuna i, jala ndada dalanmuna angka dalanku, ninna Jahowa. Ai songon timbo ni angka langit sian tano on, songon i do tumimbo angka dalanku sian dalanmuna i, jala angka pingkiranku sian pingkiranmuna i. Mansai dao do pangantusion ni jolma sian Debata. Ingkon loasonta do Debata na mangatur sude angka sangkapNa nang dalanNa na dumenggan i masa di pardalanan ni ngolunta. Laos boha pe keadaanta nang situasinta asa tapasahat saluhutna tu Ibana. Jotjot do jolma on ndang mangantusi dalan ni Tuhan i. Marasing jala andul situtu do dalan ni Tuhan i asa sian dalan ni hita jolma, alai dipudi ni i sude asa marsiajar hita satia jala gabe pangoloi di HataNa, asa saut ma lomo ni roha ni Tuhan na dumenggan i di hita.
c.
(AY.3-4)
Laho patoranghon i, dibaritahon Tuhan Jesus do songon tolu umpama di bindu 15:
ayat 1-7 –Birubiru na mago, Ayat 8 – 10 –Hupang na mago, dohot ayat 11-32-anak
na mago. Asa laho paintophon pikiran ni halak parise dohot angka siboto surat,
dibuha Tuhan Jesus marhite parhataan na tangkas: "Ise hamu sahalak parbirubiru
saratus, anggo tardempar sada sian i, na so tuminggalhon na siapulu sia i di
ladang, laho mangalului na so tarida i, paima jumpangsa." Marhite umpama on,
sude halak manangihon Tuhan Jesus di
tingki i, dohot ma disi angka halak Parise, Saduse, nang angka siboto surat.
Dibagasan roha nasida pasti satuju do nasida ia parmahan na denggan, luluanna
do birubiru na mago i, sai bahenonna do angka usaha laho mangalului asa dapotna
birubiru na mago i. Molo songon i do parmahani , lam ma Tuhan Debata mangalului
halak pardosa. Debata parasiroha bolon i, na gok haholongan i, na pahothon asi
ni rohana tu torop jolma, manesa saluhut
dosana, nang hasalaanna (5 Musa 34:6-7). Ndang pintor diambolonghon Tuhan i
hita, sai bahenonna do angka dalan mangalehon kesempatan nang partingkian di
hita jolma asa marhamubaon ni roha. Na lea di roha ni dongan jolma, asa mulak
mangihuthon Tuhan Debata. Mansai bahat do songon na gabe contoh asi ni roha ni
Debata tu jolma i. Isarana
1.
Hatiha
si Jona muruk tu Debata siala 120.000 halak Niniwe ima musu ni Israel ndang
saut di siaphon Debata siala ni na muba roha nasida paserep rohana dungkon
manangihon jamita ni si Jona.
2.
Uju
mangalangkup si Daud dohot si Batsyeba, ndang pintor di uhumi Debata marhite na
mambuat hosana, alai dipasahat Debata do hatana marhite naposona si Natan asa
marhamubaon ni roha si Daud.
Dilului Debata do
angka pardosa i asa malua. Ima na dipasahat turpukta on tu hita songon na
tarsurat di Lukas 19: 10 “Ai na ro do Anak ni jolma i mangalului jala paluahon
na mago.”
d.
Angka
ise ma na mago sinuaeng on ? boi do hita sandiri na manjaha jamita on, asa lam
leleng tasadari ma dirinta naung mandao sian adopan ni Debata, songon birubiru
na manuntun lomo ni rohana, lam dao sian adopan ni Debata gabe tu parmaraan do,
asa disi ma sadar birubiru i na mago do hape ibana sian parmahan i jala lilu. Laos
songon i ma godang jolma i di pardalanan
ni ngoluna, didok rohana ndang pola adong masalah, manang aha, mansai denggan
do sude mardalan parngoluonna sian parhepengon lancar, karir, jabatan mansai
denggan, keluarga pe denggan do sude, jala gabe ro penilaian di diri na patut
ma di dok rohana bongot tu Harajaon ni Debata. Psalmen 14: 2 – 3 Manatapnatap
do Jahowa sian banua ginjang, paidaida jolma manisia, marnida manang na adong
na marroha, na usouso di Debata. Hape tung saluhut do nasida sumurut, tung
sange do nasida marroha mago, ndang adong sibahen na denggan, nanggo sahalak.
Lapatanna ndang boi tabahen sian standar nang penilaianta sandiri, asa asing do
i sian standar manang penilaian ni Debata saluhut do jolma i pardosa ; ahu
dohot hamu saluhutna. Halak na merasa dirina na badia situtu boi do gabe lilu
rohana songon halak Parise , saduse, dohot angka siboto surat i. Ia tangiang
nasida di Lukas 18: 11-12 “Jadi dirgak ma Parise i jongjong; songon on ma
tangiangna di bagasan rohana: Mauliate ma ahu tu Ho, ale Debata, ala so dos ahu
dohot halak na leban, angka panamun, pargeduk, pangalangkup manang songon
sijalo beo an. Dua hali saminggu ahu marpuasa jala huparsampulu do saluhutna na
huomo.” Halak Parise ima halak na dumangol ala nihilala nasida na umboto
saluhut Hata ni Debata nang patik i jala na merasa na badia, na so godang
dosana. Laos songon i do hita na mandok dirina siihuthon Kristus manang halak
Kristen alai sai manghalomohon dosa i. Didok ibana naung maruba manang bertobat
alai ndang adong perubahan dibagasan ngoluna. Molo ari Minggu do bertobat
songon na badia, burju, unduk jala serep rohana, alai disi jumpa ari senen
sahat tu ari sabtu mulai ma muse kompromi tu dosa manang kumat. Molo songon i do
pangalahona, boha do sintongna Tondi Parbadia i mangula dibagasan rohana? Tudos
songon na nidok panurirang Jeremia 4:22” Ai
na oto do bangsongku; ia ahu, ndang ditanda nasida, angka anak na oto do nasida
jala ndang marroha; angka na bisuk do nasida mambahen na jat, alai mambahen na
denggan ndang diboto nasida.”
e.
Molo
so jolo diramoti Tondi Parbadia sasahalak asa jaloonna Jesus Kristus gabe
sipalua di ibana, gabe halak na lilu songon birubiru na lilu i. Birubiru sada
binatang na gale, ndang martaji, ndang boi hatop marlojong, ndang adong
panghrimon diibana. Ndang boi mulak sandiri molo so ro parmahan i mangululuisa.
Laos songon i do jolma i na mardosa i na so boi paluahon dirina sandiri sian mara i. Sadia bahat pe
peleanna, nang pambahenanna angka na uli na denggan tung so boi do manesa sude
dosana. Jesaya 53:6 Luhut do hita
lilu songon birubiru, ganup masitondong dalanna be, alai hajahaton ni hita
sudena dihonahon Jahowa tu ibana.
f. Songon i ma
digombarhon Debata songon Parmahan na gok haholongon i laho mangalului
birubiruNa na mago i. Molo songon i do tangkas na pangantusionta di asi dohot
holong ni roha ni Debata tu hita, nda tung maol be rohanta laho tu gareja
marminggu, tu partangiangan, manutup partigatigaanta laho marminggu ndang pola
rugi rohanta disi, manang mamelehon peleanta laos songon i mandohot i angka
ulaon ni huria ndang maol be rohanta melayani. Saluhut na tajalo di
partingkianta on asi ni roha ni Debata asa adong kesempatan di hita marhamubaon
ni roha. Asi ni roha ni Debata na balga i mangalehon Anakna na sasada i ima
Jesus Kristus i gabe pelean manggantihon dirinta naung mardosa on gabe tarsesa
sude dosanta i, asa gabe partohap hita angka na dipatigor Debata tu Harajaon ni
Debata.
g.
Na
gabe sungkunsungkun di hita, toho do naung marsitutu hita mangalehon ngolunta
tu adopan ni Tuhan Debata? Molo nunga taantusi hita do birubiru na lilu i jala
na mago i laos nuga jumpangan ni Tuhan Debata hita, sipata olo dope hita
mangarunta laho mangalo asa malua sian abingan ni Tuhan i, asa tongtong hita
manghalashon, manghamauliatehon parsaoranta dohot Ibana disi ma hamubaon ni
rohanta. Allah
lebih senang melihat satu buah pertobatan dibanding dengan orang-orang yang
merasa benar dan merasa tidak memerlukan pertobatan. Molo mangula pe hita
songon pegawai manang karyawan, taulahon ma ulaonta dibagasan ias ni roha,
ndada laho ABS (asal bapa senang), alai taulahon ma songon na tu Tuhan Debata.
Molo sahalak pengusaha, diulahon ma ulaonna dohot jujur, ndada holan laho
mangalului paruntungan, alai asa hombar tu lomo ni roha ni Debata, molo nunga
pensiun pe ndada holan laho pasudahon naung adong hian ngoluna alai diingot
martangiang, mandok mauliate dohot sai mangalehon dirina tu huria ni Tuhanta
melayani. Marhite na mangantusi holong ni Tuhan Debata, laos antusanna ma ia
saluhut parngoluonnta asa tapelehon tu adopan ni Tuhan Debata. Ala molo so mardonganhon Tuhan Jesus Kristus, saluhut
angka pencapaian, kebanggaan naung tercapai ujungna gabe marisuang do i sude.
Marhite umpama i dipatorang Jesus ia Tuhan Debata na sai jotjot do torus
mangalului angka na mago i. Alai ndang holan i, adong las ni roha bolon di
Banua ginjang i ala jolma na marhamubaon ni roha di dapot. Debata mangalului
halak na songon si Saulus sahalak panageleli halak Kristen gabe marhamubaon ni
roha gabe si Paulus ma goarna dibahen. Ibana gabe ulaula ni Kristus laho
pararathon barita na Uli asa torop jolma na marhamubaon ni roha, porsea huhut
mangihuthon Tuhan Jesus. Lukas 15:7 Hudok ma
tu hamu: Suman tusi do gumodang las ni roha di banua ginjang mida sipardosa
sahalak, na olo paubahon rohana, asa mida siapulu sia partigor, na so pola
paubahon rohanasida. Begitu bertobat, Allah tidak lagi melihat masa lalunya,
tidak itung-itungan dan berkata, “Paulus, karena kamu dulu sudah begitu jahat,
maka kamu akan kubuat menderita dulu biar impas.” Hati Allah tidak seperti
itu. Karena itu, Paulus mengakui, “Tetapi
justru karena itu aku dikasihani, agar dalam diriku ini, sebagai orang yang
paling berdosa, Yesus Kristus menunjukkan seluruh kesabaran-Nya. Dengan
demikian aku menjadi contoh bagi mereka yang kemudian percaya kepada-Nya dan
mendapat hidup yang kekal” (1Tim. 1:16). Amin.
BE No. 183 NA JUMPANG AU BL. 105
1. Na jumpang na asi roha Di au naung
mago i hian
Tuhan Jesus parasi
roha Di au na lilu na hinan
Nuaeng hutanda
Tuhanki Parasi roha bolon i . Parasi roha bolon i
2. Dibahen godang ni
dosangku Tung hona uhum au tama
Hape ro Jesus
dipadomu Au muse dohot Debata
MudarNa na badia i
Pajongjong pardomuan pajongjong pardomuan.
3. On pe holan asi ni
roha Dipangasahononhon i
Sipujionku do Jahowa
Dung ro na pamanathon i
Unduk huhut las
rohangki Mamuji asiroha i. Mamuji asiroha i.
