Marparangehon
Hatiuron
1
Johannes 1: 1 – 10
a. Ia
huria ima hasadaon ni halak na porsea ditongatonga ni portibi on. Digurithon
Apostel Johannes do taringot na hinatindanghon ibana Jesus Kristus naung mate
jala na hehe i. Tujuanna marhite panindangionna i, ruas ni huria na ganggu roha
taringot tu haheheon ni Kristus i gabe mandapot bohal sitiopon asa porsea ia
Tuhan Jesus ima Mesias na naung hehe sian hamatean. Ganggu do roha ni ruas ni
huria na parjolo i, hinorhon ni pengaruh pengaruh ajaran sesat sian gnostikisme;
tarlumobi sian Doketisme na mangajarhon na so porsea nasida ia Jesus ima
Kristus ala ndang mungkin Debata na badia i songgop tu jolma naung madabu
tubagasan dosa.
b. Ala
ni ido gomos disosohon Apostel Johannes huria i; “...hubge hami.....huida
hami....huhatindangkon hami...naung hujama hami....taringot tu Hata Hangoluan
i....” (ay.1) napatuduhon ibana do haposan laho manghatindangkon i ima Jesus
Kristus, ala ni i ndang pola ragu halak mambege sian ibana. AI ibana do
langsung mamereng na masa taringot tu Jesus Kristus naung hehe i. Hata
hangoluan i do na mangarahon hita angka na porsea mamolus nasa partingkian.
Naung sega do dibahen dosa ngolu ni manisia i saleleng on, alai marhite Hata Hangoluan
ima Jesus Kristus i nunga dipadenggan jala mamparbuehon parsaoran na uli sian
jolma tu jolma dohot sian Debata tu jolma i. Hata Hangoluan i naung paubahon
hamatean na saleleng ni lelengna i gabe hangoluan saleleng ni lelengna.
c. Hatiuron
dohot haholomon; diapoi Apostel Johannes jala diburai angka pargabus na mandok
ia na mananda Debata alai ndang mangulahon parenta ni Debata. Didok nasida do
naung marnampuna parbinotoan nasida taringot tu Debata alai pangalahona mansai
dao sian nahinirim ni etika ha-Kristenon. Jala tegas do Apostel Johannes mandok
ia Debata ima Hatiuron, ido asa angka anak hatiuron i ndang boi mian di dua
pangalaho, ima hatiuron dohot haholomon. Siala ndang adong haholomon dibagasan
hatiuron, jala ndang adong nabuni di na tiur i. Fungsi hatiuron manang
panondang i ima mangarahon ngolu ni jolma tu na denggan. Jala panondang ni
natiur i laho patuduhon sude pangalaho
nang pambahenan ni manisia na sala jala patauhon tu ulaon na sintong.
Ido umbahen nang Apostel Paulus pe manaringoti lapatan ni na hatiuron dohot
haholomon: “Ai na holom do hamu najolo; alai tiur do anggo nuaeng di bagasan
Tuhan i: Marparange ma hamu, songon angka anak hatiuron! Ai nasa habasaon dohot
hatigoran dohot hasintongan, i do parbue ni natiur” (Ef.5:8-9). Haholomon patuduhon
ngolu na onding sian Jesus. Halak na mardalan dibagasan haholomon ima halak na
so mamboto tudia do situjuon (Joh.12: 35). Halak na mangolu dibagasan haholomon
ima halak na mangolu dibagasan hagaoron, ndang adong aturanna, ido ala mangolu
pe ibana ali ndang maradat (ndang bermoral).
d. Mangolu
dibagasan parsaoran; Adong do halak na
menganggap dirina naung malo diparbinotoan dohot di partondion alai ndang
dipatuduhon sikap hamajuon di parbinotoan nang partondion dingolu siganup ari.
Halak na sisongon on ma dihasogohon jala sipasingoton ni apostel Johannes;
angka pargabus halak sisongon i. Ia Debata ima Hatiuron asa angka na marsaor
dohot Debata ima na mardalan dibagasan hatiuron. Marhite pamingkirion na so
denggan i gabe so denggan be hasintongan i. Siala boha do bahenonna sahalak na
mardalan dibagasan haholomon mandpk naung mangolu dibagasan hasintongan ? Ia
hasintongan i ndada holan sekedar kerangka marpingkir na sintong alai boha do
sahalak Kristen marpingkir sintong dohot na mangulahon na sintong tu Debata
nang tu dongan jolma. Ia halak na sai somal tu sikap mapingkir huhut mangulahon
na sintong; boi do madabu tu pangalaho paiasias diri sian nasa dosa. Ido alana
dipaingot Johannes; ia panghophopon ni Jesus Kristus ndada holan manobus angka
dosa manisia na naung salpu alai huhut do pasingkophon manisia i dibagasan habadian
ganup ari, jala sahat tu tingkina be.
e. Marhite
turpuk on : angka halak na porsea i ima angka siihuthon Kristus tarjou do:
1.
Asa songon posoposo na imbaru tubu na sai
tongtong uasan ni susu na tama ima Hata ni Debata dibagasan ngoluna.
2.
Asa dipatuduhon ma dirina mangolu marparangehon
hatiuron
3.
Asa marhite hatiuron i angka na porsea tongtong
tarjou mangolu dibagasan sikap ngolu na marpanindangion.
