Mangolophon
Jala Manghatindanghon Gogo Ni Tuhan i
Ulaon
Apostel 4 : 5 – 12
a. Na
marbonsir do turpukta on di panindangion ni Apostel Petrus di Bagasjoro
haporseaon dibagasan Jesus Kristus laho pamalumhon na marsahit. Goar ni Jesus i
marhuaso dibagasan Tondi Parbadia laho pamalumhon. Na porsea di Jesus i jala
paposhon ngoluna nang tondina di Jesus Kristus jaloonna do asi ni roha dohot huaso sian Ibana. Hamamalum sian halak
na marsahit on gabe adong do pangkorhonna tu angka malim sian rapot bolon na
terganggu di halongangan na masa so pamotoan nasida, ndang pasidohot nasida di
ulaon i. I do umbahen sampulu dua apostel i ditangkup jala dihurungkon
saborngin manipat sahat tu na diboan muse nasida mangadop rapot bolon ima
pengadilan. Dihilala Apostel Petrus do naung dipadanhon Jesus asa unang pola
mabiar nasida taringot tu aha nanaeng sihatahononnasida ditonga ni rapot i,
siala Tondi Parbadia na sian Surgo i do na mamparbisuhi nasida dohot mangajari
nasida angka sihatahononhon (Mat.10:19-20). Ido ala digohi Tondi Parbadia do nasida
asa boi pasangaphon Jesus.
b. Naeng
ma tangkas hita mamparrohahon taringot tuson, sipata songon na sodipatimbo
Tondi i do diriNa sandiri, alai pasangap nang manghatindanghon Jesus. Goar ni
Jesus, Mesias sian Nasaret na diparsilangkon jala dipahehe sian hamatean, gok
huaso, Tondi nang pasupasu. Tondi Parbadia manghatindanghon marhite pamangan ni
si Petrus taringot tu hasintongan diadopan ni angka uluan ni bangsona. Ditingki
i, dituduh ibana do angka jolma i na manguhum dohot na mamparsilangkon Jesus
naung dibagabagahon i. Marhite Apostel Petrus, angka pangituai ni ugamo i
dipasahat ndang secara langsung “haluaon” dibagasan Jesus Kristus, ndang holan
tu angka jolma pardosa, alai tu sude jolma na adong di rapot i. Manang ise na
porsea tu Jesus jaloonna ma huaso Tondi Parbadia dohot hangoluan na manongtong.
c. Goar
ni Minggunta ima: Jubilate na marlapatan : “Marolopolop Tu Debata Sandok Tano
on” (Pslm.66:1), na tarjou do hita laho mangolophon jala manghatindangkon Gogo
ni Tuhan i (topik minggu). Alasan na umbahen tarjou hita laho mangolophon dohot
manghatindangkon Tuhan i siala naung dilehon tu hita haluaon dibagasan Jesus
Kristus i, jala ndang lupa dope hita di semangat naung tataringot i Paskah 1i.
Ala ni i ngolu ni jolma na marolopolop ima na olo bersaksi marhitehite Tondi
Parbadia dipardalanan ni ngolunta. Jala Ngolu na marolopolop ima na
manghilalahon parmahanion ni Debata di hita sibagasan Jesus Kristus asa dapot
hita hangoluan na saleleng ni lelengna. Amen.
