Mamuji
Debata Mardongan Tondi Parbadia Naung NilehonNa i
Ulaon
Apostel 10: 44 – 48
a. Hamuna
ruas ni huria na hinaholongan dibagasan Jesus Kristus: porsea do hita na Tondi
Parbadia patomutomu hita ro tu Gareja on ? Porsea do hita na Tondi Parbadia
patomu suami dohot istri asa gabe ripe na gabe tiruan ditonga ni masyarakat ?
Porsea do hita di peranan ni Tondi Parbadia pasahat tu hita angka ulaon
parkarejoan gabe dalan ni ngolungolunta ? molo sangsi do pe hita, porlu do
sisulingkiton haporseaonta. Ala ni i songon halak na porsea hita ingkon pos do
rohanta nang haporseaonta di peranan ni Tondi Parbadia di panggulmiton ni
ngolunta. Nda i do na masa dijolo ni turpukta on asa gabe sahat tu turpuk on ?
asa mura antusan turpuk on naeng ma jahaonta sian ayat na parjolo di bindu 10
on sahat tu turpukta on. Dibaritahon do disi naung jumolo martangiang si
Kornelius dohot si Petrus asa ro ma Tondi i paingothon si Petrus asa pajumpang
dohot si Kornelius (10:19 “....ninna Tondi i ma mandok ibana: Adong do na
mangalului ho!”)
b. Sabotulna
mansai maol do dapot roha ni halak Kristen na sian Jahudi i manjalo na so
sabangsona, ala di adat Jahudi subang do molo martamue na so sabangsona tu
bagasna, laos songon i nang nasisda pe. Hape pangalaho i mansai bagas dope
diulahon manang tarida di sikap ni Apostel Petrus siganup ari, ido umbahen
dipaingot Debata ibana taringot tu parnidaan na sahat tu ibana angka sipanganon
na subang ingkon dipangan ibana, molo di si Petrus naung somal di adat
haJahudion angka subang sipaganon nang di parsaoran dohot na so sabangsona.
Alai marhite subang na ingkon panganonna i laho paingothon ibana na so adong na
subang molo naung dipaias Debata. Lapaanna paingothon apostel Petrus asa
mamungka rohana nang sikapna anjanghon na so sabangsona ima si Kornelius. Jadi
naung diparade Debata do roha ni Apostel Petrus asa manjalo si Kornelius na
marsitutu gabe siihuthon Kristus.
c. Na
menarik tabereng sian sikap ni si Kornelius sian sahalak letnan di horong
Italia, adong progres ni haporseaonna, peningkatan kearah iman yang lebih baik,
masuk do ibana tu kalangan ni halak Jahudi, dungi meningkat masuk ma muse gabe
siihuthon Kristus. Gabe dipatongon surusuruan i ma ibana asa pajumpang dohot si
Petrus asa diajari si Petrus ibana jala gok na jinalona parsiajaran taringot tu
Jesus Kristus naung mate jala hehe sian na mate i sian si Petrus. Ima sai hira
marguru malua di hita nuaeng HKBP, asa lam tang haporseaon ni si Kornelius
diajari si Petrus huhut dipangido tu angka donganna asa didion ma si Kornelius
gabe dos songon nasida angka siihuthon Kristus. Dipatuduhon do disi ndang adong
sikap diskriminasi, manang pembedaan ala ni suku, manang latarbelakangna alai
sandok naung dos do nasida saluhutna gabe siihuthon Kristus raphon si Kornelius
asa tarjalo rohanasida si Kronelius manjalo pandidion nabadia.
d. Gabe
sada poda nang sipaingot do turpuk on tu
halak Kristen manang na targoar siihuthon Kristus: 1) Ia Debata ndada siida
bohi ( songon naung didok apostel Petrus di ay. 10:34-35 Dung i mangkuling ma
si Petrus, ninna ma: Nunga tangkas dapot rohangku, na so siida bohi Debata! Sian
ganup bangso do tahe jangkononna angka na mangkabiari Ibana jala mangulahon
hatigoran). Dihaholongi Debata sude angka na tinompaNa; ndang mardia imbar;
kulit putih, merah, kuning atau hitam, sude jolma haholonganNa do. Ala ni i
dipelehon pe AnakNa na Sasada i ima Jesus Kristus i, ndada holan paluahon halak
Kristen alai sude jolma dohot portibi on tahe, asa malua jala mandapot
hasonangan. Ala ni i na tarjou do angka siihuthon Kristus pararathon Barita na
Uli i tu saluhut jolma, saluhut bangso nang houm, unang ma siida bohi hita ai
naung diparar Debata do hita gabe ulaulaNa pasahathon Asi ni rohaNa tu sude
jolma. 2) Asa tongtong hita martangiang gabe tolap hita mamuji Debata
mardonganhon Tondi Parbadia naung nilehonNa i (topik minggu). Tangiang do na
gabe dalan ni halak na porsea asa margogo jala marbisuk laho mandopang nasa
utiutian ni sibolis, jala tarpatupa hita ulaon na pinasahatNa tu hita. Songon
goar ni Minggunta Minggu Rogate: na marharoroan do i sian hata “Rogatio-rogate-rogatum
(hata latin), na marlapatan: “Mangido, mangelekelek”. Somal do digoari minggu
sadarion Minggu “Rogation Sunday” ima tolu ari nari tagan so hananaek ni Tuhan
Jesus Kristus, lapatanna ia sitolu ari i, i ma ari pangelekelekon. Hananaek ni
Tuhan Jesus Kristus ndang gabe maninggalhon angka na porsea, alai tongtong do
hita mardomu dohot Ibana dibagasan tangiang ai nunga singkop di Ibana haluaon i
e. Huria
na mangolu ima huria na manongtong martangiang, jala huria na martangiang ima
huria na sai didongani Tondi Parbadia, nang pe sai adong angka hamaolon niadopan
ni ruas ni huria di pardalanan ni huria i. Ala ni i tatulak do pandohan ni na
deba huria na mandok di HKBP ndang adong Tondi Parbadia, gabe dibahen nasida do
parameter ni hajongjongan ni Tondi Parbadia marhite na manghasomalhon “bahasa
roh”. Hape Ia Tondi Parbadia i ima Tondi Ni Debata jala Tondi ni Jesus Kristus,
na so boi nirajaan ni na tinompana nang hita jolma. Na bersifat “Omni Present”
(berkehendak bebas) do Ibana tu manang ise lomo ni rohana, ala ni i ndang boi
batasan manang tardodo ni roha dohot pingkiranta hagogoon nang hasangaponNa. Na
deba jolma na tardok siihuthon Kristus ndang sai manjaga panggora ni Tondi i
dibagasan roha nang ngoluna asa umbahen na sai na boi do manghorhon sibolison
halak. Nuaeng nunga lam sibolis godang jolma ala naung mate do rohana di
panggora ni Tondi Parbadia i. Ala ni
tapamanat ma dirinta be angka siihuthon Kristus asa tongtong tinggil
sipareonta di panggora ni Tondi Parbadia i marhite na sai sai tajugulhon laho
martangiang. Na martangiang pe hita ndada na holan pimpit mata lompit tangan
asa gabe tarpodom, alai na martangiang huhut do mamungka simalolongta asa dungo
di kenyataan kehidupan na torop dope jolma dibagasan haholomon, na tarhurung,
naginosagosa portibion, dibagasan halumlamon asa taurupi nasida jala tapatongon
tudalan hatiuron. Amen.
