Gok
Asi Ni Roha Ni Jahowa Do Tano on.
Heber
11: 32 – 40
a. Ia
panurat Surat Heber on mengharaphkan asa angka halak Kristen i, disituasi
manang aha pe (taingot latar belakang panuratan ni surat Heber on, ditujuhon tu
angka halak Kristen na torus manorus, digosagosa, na boi sajo do murtad nasida
manadingkon haporseaonna ala ni hansitna jala dangolna sitaonon nasida) naeng
do torus nasida margogo jala marpangkirimon na togu di padan ni Debata. Ala ndada
nasida na jumolo manaon na porsuk i molo holan laho mempertahanhhon
haporseaonna tu Tuhan i. Alai nunga jumolo ditaon angka naporsea di Tuhan i
angka hamaolon, sitaonon, nang hamatean siala hasatiaon ni haporseaon nasida tu
Tuhan i.
b. Ia
haporseaon i tung mansai arga jala godang do panghorhonna di ngolu ni angka na
porsea songon na tarida di Heber 11 on. Jojor do dipatuduhon pangalaho ni
haporseaon i, na tangkas mangpanghorhon, jala tarida sian ngolu ni angka na
porsea di Padan na Robi mamungka sian tingki ni si Noak sahat tu tingki ni
angka panurirang. Ndang hasuhatan tutu godang ni tudosan na boi putihan nuaeng
dia dope dohononku ninna di ayat 32 on. Sungkunsungkun on naeng mangondolhon
asa lam taparhatopot panindangion ni haporseaon i di ngolu ni angka na porsea
di sude tingki termasuk di tingki ni angka panguhum i ma si Gideon, Barak,
Simson, Zefta, dohot di tingki ni Raja Daud sahat tu tingki ni angka
panurirang.
c. Marhuaso
do na porsea i songon na di turpuk on patuduhon harajaon patulus hatigoran dohot
patupa angka tanda halongangan. Ndang tarpatupa angka na so porsea ulaon si
songon i, ai ndang dilehon tu nasida huaso laho patupahon si songon i. Holan tu
angka na porsea di goar ni Jesus Sipalua i jala tu angka na manjangkon Ibana do
dilehon huaso asa gabe anak ni Debata (Joh.1: 12), ai Jesus do nampuna huaso di
banuaginjang dohot di tano on. Huaso haanahon i di lehon tu ganup na porsea na
patauhon nasida patundukhon nasa harajaon, manaluhon hagogoon ni portibi jala
mangalo nasa na jahat. Sai na monang do angka na tutu porsea di Tuhan i
maralohon nasa hagogoon ni portibi on jala tuk do na porsea i patupahon angka
ulaon na denggan na naeng mambahen angka tanda halongangan. Alani molo nunga
tahaporseai Jesus jala tajangkon Ibana na tubu i unang be mardua roha hita,
tapangke ma huaso i jala tapasahat ma ngolunta tu Ibana. Adong do deba na
mandok dirina porsea alai ndang pos rohana di hagogoon ni haporseaonna i,
hagogoon ni portibi on do dihaposi gabe talu ma ibana ndang margogo mangalo na
jat. Ujungna adong angka na mulak tu hasipelebeguon ai ndang marniula
haorseaonna i. Unang ma songon i hita angka na porsea, tahaposi ma Tuhan Jesus
di ngolunta asa jumpang songon na di
turpuk on: “Dihuntam baba ni angka babiat, di intop api, malua sian podang,
margogo di hagaleon, jala ditaluhon musu.”
d. Alai
torop do naung manaon na hansit dohot haporsuhon ala ni haporseaon pola sahat
na agoan hosa songon na di turpuk on ( ayat 35-37). Masa do ujian tu angka na
porsea ganup ari alai rade do na porsea mangadopi sitaonon. Ndang daionna
parbue ni na niulana i, alai tu generasi na mangihut nama na mandai perjuangan
iman nasida ( ay.35,39). Nuaeng hasil ni perjuangan ni angka naposo ni Debata i
boi daionta; boi jahaonta Bibel on naung di pertahanhon marhite gok mudar dohot
iluilu, boi hita marminggu dohot denggan jala tenang ala naung dipungka angka
parbarita nauli najolo marjuang do nasida asa sahat tu Indonesia on. Nang pe
ndang berengon nasida hasilna ditingki i alai hot do nasida mangula ulaon i.
e. Adong
dua tujuan ni sinurathon angka goar naposo ni Debata di bagasan Surat Heber
bindu 11 on:
Ø
Asa tauduti ulaon na naung dipungka jala na
dipertahanthon nasida. Ia manisia molo pe mangolu na sai martahan do ibana; adong
angka jolma mangula angka siulaonna asa martahan laho mambalanjoi keluargana
jala asa unang hahurangan, angka na deba nang parompuan sai marusaha do
mampertahanhon pamatangna asa ideal, angka panggomgomi, politisi, sai di gogo
do mangula laho mempertahanhon kedudukan nang hahormatanna, angka pengusaha
manang partigatiga mempertahanhon bisnisna asa unang bangkrut di hamaolon
ekonomi. Angka parsiajar marusaha do mempertahanhon prestasi nang nilai ujianna
asa denggan hasilna. Jala sude tahe jolma sai mempertahanhon ngoluna sian
ancaman hamatean. Ngolu ni manisia ima ngolu na mempertahanhon na dianggap
mansai ringkot di ngoluna. Na gabe sungkunsungkun, holan i do na tapertahanhon
? Alusna: Ndang ! siala Hata ni Debata mandok di Kolose 3: 1- 3 “Asa molo naung
rap hamu dipahehe dohot Kristus, jalahi hamu ma angka na di ginjang; ai disi do
Kristus, hundul di siamun ni Debata. Angka na di ginjang i ma parrohahon hamu,
unang ma angka na di tano on! Ai nunga mate hamu, jala buni do ngolumuna raphon
Kristus di bagasan Debata.” (ptds.Kol.2:6). Angka na diginjang ima taparohahon,
lapatanna dia do lomo ni roha ni Debata na ingkon ulahononta dipardalanan ni
ngolunta (ptds. Pil.2:5). Ia molo simanjojak mandege tano alai ia simanjujung
na diginjang, songon sihol ni rohanta sai tu Banuaginjang i, ala ni i do sai
tapangido di tangiangta asa saut lomo ni roha ni Debata di tonga ni portibi on
songon na di Banuaginjang i (ptds. Tangiang Ale Amanami....). Lapatanna godang
do na ringkot sisarihononhon di ngolunta secara pribadi, alai naeng do dohot
hita dipangke Debata laho sumarihon angka na dihumaliangta patupahon ulaon asi
ni roha.
Ø
Asa tauduti ulaonna i dibagasan hasatiaon.
Songon angka partogi ulubalang ni si Daud na satia tu ibana, angka na pinillit
ni Debata ( 1 Kronika 11: 10), tung margogo do nasida mangulahon nasa parenta
ni si Daud. Alai ndada holan angka ulaon na denggan nasida satia tu si Daud, tu
angka ulaon na so denggan pe satia do nasida (ndada na gabe sitiruon pangalaho
sala on di hita), lapatanna semangat ni hasatiaon nasida i tu si Daud, jumpang
dope i dipartingian sinueng on ? (dipaboa do muse naung madabu si Daud tu dosa
hasalaan di 1 Kronika 21-24, manengahon dohot mangasahon gogo ni paranganna asa
sian Debata). Dungi barita hasatiaon ni si Polikarpus, sahalak sisean ni
Apostel Johannes jala parhobas di huria Smirna. Na ditangkup angka soldadu ni
kaisar do ibana jala disuru asa mansoadahon Kristus. Alai ndang olo si
Polikarpus mansoadahon Kristus, ai didok ibana do: “ualupulu onom taon ahu
marhobas diadopanNa, laos so adong agia saotik pe na sala binahenNa tu ahu,
boha ma bahenonku mansoadahon Ibana ?” Ditali do ibana di sada tiang hau, jala
ditutung alai ndang mosok, dung diseat pe ibana asa mudarna i ma paintophon api
i, angka na manghosomi ibana diulakhon laho manutung ibana. Hasatiaonna i
hasatiaon sahat tu ujung ni ngoluna (ptds. Pangk. 2: 10).
Molo disuru
do hita dohot Tujuan asa mempertahanhon Haporseaonta dohot na satia mangulahon
parsuruon ni Debata laho mamaritahon Barita na Uli; aha do na tapertahanthon
nuaeng ? Ndada pola ingkon dos panaritaan ni angka naposo ni Debata di Bibel i
dohot hita di partingkian on holan laho mempertahanhon nang memperjuangkan
haporseaonna. Alai naeng ma tatorushon ulaon panghobasion na niula nasida
dibagasan ngolunta, jala taulahon i dibagasan hasatiaon tu Tuhan Jesus Kristus
i naung mate humonghop hita jolma pardosa.
f.
Dalam surat yang ditulis untuk putranya, Eduard,
Albert Einstein memberikan nasihat ini: “Hidup itu seperti naik sepeda. Untuk
mempertahankan keseimbangan, kau harus terus bergerak.” Nasihat ahli fisika
terkemuka ini sangatlah bijaksana dan dapat diterapkan. Jala poda on boi
niteraphon tu ngolu haKristenonta. Godang do jolma marhite haporseaonna maju
bergerak mamolus angka hamaolon dohot angka pangunjunan. Alai disi uju madabu
tu bagasan dosa, gabe ndang adong be keseimbanganna dungi gabe madabu ma.
Panolsolion dohot panghilalaan na so layak di asi ni roha ni Debata boi do
mambahen nasida gabe mandele jala mandate jala boi manghorhon na so olo be maju
bergerak di ulaon partondion. Naung masa do sisongon i di angka naposo ni Debata
di Padan na Robi dohot di Padan na Imbaru i: Na margabus di Abraham tu si
Paraoh taringot tu pardihutana si Sara (1 Musa 12: 11-17). Nadiangkali si Jakob
amana asa mandapot pasupasu ni si Esau ( 1 Musa 27:18-19). Na so diulahon si
Musa parenta ni Debata marhite na mampangkulingi batu didolok i baliksa di
lombuti dua hali ( 4 Musa 20.7-12). Songon i nang si Petrus sahalak sisean ni
Jesus naung mansoadahon Jesus mulak rohana manolsoli dosana tu Jesus. Nang pe
tardok gagal mangulahon lomo ni roha ni Debata, alai naung dipatuduhon nasida
do panindangion ni haporseaon nasida tu sundut na mangihut nang tu hita
nuaeng on (ay.39). Disurathon do goar ni
angka naposo ni Debata di Bibel on asa gabe tiruan ma nian haporseon nasida
nang hasatiaon nasida, dungkon madabu nasida di dosa nang pangalaosion, sai ro
do nasida mangadop tu Debata huhut diihuthon muse Patik nang HataNa. Boi do
alamanta songon na nialaman nasida, masalah kehilangan keseimbangan rohani ala
haputusan na so tepat jala gabe dosa, alai molo olo hita mulak tu Debata sai
lehononNa do dalan las ni roha nang hatiuron. Ala ni i boi ma dohonta di Minggu
Misericordias Domini on : “Gok Asi ni Roha NI Jahowa Do Tano On.” Dipatuduhon
Debata do dalan tu hita jolma pardosa ima marhitehite AnakNa Na sasada i Jesus
Kristus manobus dosa nang pangalaosionta jala namanaluhon sibolis dohot
hamatean i, asa dapot hita jambar hangoluan na saleleng ni lelengna i (ptds. 2
Kor.4:16-18). Amen.
