Mamuji
Debata Mardongan Tondi Parbadia Naung
NilehonNa I
Psalm
22 : 25 – 31
a. Ia
turpukta on ima psalmen sian si Daud, jala asa lam tumangkas mangantusi turpukta on denggan ma hita
manjahasa sian ayat na parjolo di bindu 22 on. Jotjot do didok bindu 22 on
songon “Mazmur Salib” ala mansai tudos songon panaritaan ni Tuhan Jesus di
Silang Golgota; apa yang dialami oleh Daud merupakan nubuat tentang apa yang
akan dialami oleh Tuhan Yesus Kristus dalam hidup-Nya, secara khusus saat
penyaliban-Nya. Ia ama ni huria na margoar Martin Luther mandok bindu 22 on ima
psalm na ummangat disitaonon ni Kristus; adong tangiang elekelek ni sahalak na
daulat roha dibagasan panaritaan. Pola songon na ditadingkon Debata ibana, songon
na dilupahon jala diambolongkon Debata. Alai dipaboahon do dibagasan bindu 22
on ia parpsalm i ndang hea manadingkon Debata, baliksa sai joujou do ibana
ditangiangna na mandok: “Debatangku,
Debatangku...” Tung pos situtu do rohana na holan Debata na boi paluahon
ibana. Barita taringot pangaramotion ni Debata tu angka ompunasida gabe sada
panindangion haporseaon ni parpsalmen ia halak na sai joujou sai paluaonNa do.
Haporseaon na togu ima na gabe panghirimonna di asiasi ni Debata asa tongtong
manahan ibana di angka sitaonon. Haporseaon i do na gabe ubat di angka
sitaononna dohot pangkirimonna asa mampu ibana tongtong mamujimuji Debata.
b. Ganup
jolma na mangolu, na marhosa dohot na marhaporseaon naeng ma mamuji Debata. Ia
pujipujian sada hahormaton do i tu Debata na tubu sian panindangion paboa saluhutna
naung adong dihita sian Ibana do i. Molo ndang adong panindangion i, tung soada
do pujipujian i. Ido alana ndang adong sian hita na porsea na so olo mamuji
Debata. Ia pujipujian ni parpsalmen on tubu sian pengalamanna sandiri.
Dihatindanghon ibana do: “Ai ndang lea
rohana manang marbiasbias mida pardangolan ni na dangol, jala ndang ditabunihon
bohina maradophon ibana, jala ditangihon do anggukna i tu Ibana.” (ay.25),
jala lehononNa do hatigoran di angka jolma di angka partingkianna be (ay.32).
Molo tandaonta do Debata sian pambahenanNa di ngolunta, naeng ma marhite i
manjou hita laho mamuji Ibana di panggulmiton ni ngolunta. Panindangion na
sisongon i boi do patubu na umbege asa porsea jala pasidohot laho mamuji
Debata. Ragam do cara laho mamuji Debata alai marhite turpuk on dipatuduhon
parpsalmen on pujipujianna marhitehite :
1.
Pelean bagabaga (nazar). Dung dijalo ibana
haluaon sian Debata, ndang lupa ibana di pelean bagabagana manang digantihon
ibana marhite na asing. Ima halak na konsisten diganup pandohanna. Mamuji Debata ndada holan hata, nang
haporseaon, alai dipatuduhon do i marhitehite pambahenan, parange nang
pangalaho (Jak.2: 17).
2.
Haunduhon dohot serep ni roha. Molo so olo
mamuji Debata hape nunga godang dibahen Debata na denggan tu ngoluna tontu
jolma na so parduli tu Debata do i, dohot na so manghamauliatehon angka naung
binahen ni Debata do i. Dos do i tu angka na so manghabiari Debata. Ai jolma na
so manghabiari Debata tutu ndang pola dipingkiri sintong do manang na ndang na
niulahonna, hape na niulahonna i tutu sian angka na so dihalomohon Debata do,
ala parbinoto Debata, jala patar di diadopan ni Debata angka na taulahon ganup
ari (ptds.Poda 15:3). Ingkon sihabiaran ma tutu Debata marhite na olo rade
mangulahon lomo ni rohaNa.
3.
Mamuji Debata di sude partingkian; Dijouhon
par-Psalm on do tu sude asa mangalehon tingkina laho mamuji dohot pasangaphon
Debata, huhut patuduhon haunduhon, ndang marombasombas mamuji dohot pasangaphon
Debata, hape ditingki sonang ngoluna mandao sian Debata. Di Hata ni endenta i
didok: “Manang aha pe na masa las ni roha
arsak pe, tioponku Ho na basa na marholong roha pe....” (BE.No.149: 3). Ndada
holan ditingki marlas ni roha, manang holan ditingki mandapot pangomoan, parlabaan
manang paruntungan hita mamuji Debata, alai disude tingki do hita wajib mamuji
Debata (Pslm 34:2). Ditingki marsitaonon pe, manang ditingki matean tong do
hita ingkon mamuji Debata. I do umbahen na ingkon marende halak Kristen di
tingki matean manang di tingki marsitaonon mamuji Debata. Sude nasa ulaon
ingkon dipungka do i marhite na mamuji Debata.
4.
Mamuji Debata Mardongan Tondi Parbadia Naung
NilehonNa i Dibagasan Tangiang (Minggu Rogate: Martangiang; Pslm 66: 20). Marhabiaran
dohot mamuji Debata i ma alus ni angka na porsea paboa na adong hubungan manang
parsaoran na denggan dohot Debata marhitehite tangiang. Marhite tangiang i do
jolma manjou jala mamuji Debata na hinaposan ni rohana. Jala Debata na
manangihon tangiang i, lehononna do alus tu angka na manghaburjuhon i di tingki
halehetonna be. Ala ni i do ndang pola diaturhon tingki dohot inganan sadihari
manang didia hita martangiang. Martangiang ima kebebasan manang hak istimewa
na nilehon ni Debata tu hita laho manghatai tu Ibana dohot mamuji Ibana na so
pola mamereng tingki, inganan dohot cara, songon kebebasan ni Tondi Parbadia i
songgop tu angka na hinalomohonNa. Sandok urupan ni Tondi Parbadia i do hita
laho patolhansonsa tu Debata, ai Tondi i do manghatahon na ni rohanta tu Debata
(Rom 8: 26). Jonok do Debata tu angka na manjou goarNa. Tung pe ndang boi diida
simalolongta i Ibana, alai tongtong do Ibana mian di lambung ni angka na
porsea, jala disarihon do ngolu ni angka na porsea (Jak.5:16b). Jala didok
apostel Paulus di Rom 12: 12 “Marlas ni roha ma hamu mangkirim! Marbenget ni
roha ma di haporsuhon! Jugulhon hamu ma tangiang!” Molo didok halak na jugul
sai berkonotasi negatif do i ima na so olo niajaran manang pinodaan, alai molo
n amartangiang i didok apostel Paulus ingkon dihajugulhon do. Ido na tabereng
di praktekhon parpsalmen on sian ayat 1 bindu 22 sahat tu turpuk on umbahen
ndada holan sai merasa gale, manang ditadingkon Debata alai boi pangoluhon
semangat nang tondina laho mamuji pasangap Debata huhut manghatindangkon
hagogon ni Debata manogunogu ibana (ptds. Ul.Ap.10:44-48- Kornelius dohot si
Petrus)
5.
Ngolu na mamuji Debata ima ngolu na bersaksi;
pabotohon sude denggan basa ni Debata (ptds. Pslm.23). Nang pe holan halak
Israel na marsomba tu Debata di tingki i, nunga barani si Daud songon pengarang
Psalmen mandok; “Marsomba tu Debata do
sogot sude nasa bangso parbegu”. Buktina di tingki on, ndang holan bangso
Israel be na marsomba mamuji tu Debata, alai nunga dohot Bangso Eropa, Amerika,
Afrika, Asia, nang bangso Batak dohot torop bangso na asing. Laos songon i dope
nang tu tingki na naeng ro, ingkon torus do martamba bilangan ni angka bangso
na marsomba mamuji tu Debata (Pil.2:9-11). Molo nunga denggan parsaoranta dohot
Debata marhite angka tangiang nang pangoloionta di HataNa, naeng ma dos
dengganna parsaoranta dohot dongan jolma. Asa marhite parsaoranta i do boi hita
manghatindanghon denggan basa ni Debata, godang pengalamanta taringot denggan
basa ni Debata ima natabaritahon. Naeng ma jumolo pungkaon panindangionta i tu tongatonga keluarganta, pengalaman na
manghilalahon panogunoguon ni Debata boi do baritahononta tu angka ianakhonta
nang pinomparta, disi ma terbentuk kepribadian na bertumbuh dalam iman jala
ha-Kristenon i pe lam lohot tu nasida. Alai molo so hea baritahononta manang
hatindanghononta taringot tu denggan basa ni Debata, sai songon na so adong do
binahen ni Debata. Unang ma adong natoras na sai mandok ala ni gogona dohot ala
ni malona do umbahen adong hadumaon, nang hamajuon dingoluna. Songon halak na
porsea hita tama do hita manghatindanghon dohot paboahon nang baritahonon
pambahenan ni Debata na manogunogu hita. Asa lam mangerbang ma panindangionta
tu angka halak na dihumaliangta. Ala ni i ndang holan hita na mamuji Debata
alai naeng ma dohot angka pinomparta nang angka na dihumaliangta marhite na olo
hita paboahon angka na taalami denggan basa ni Debata.
6.
Tarjou do halak na porsea sai mamuji Debata
mardongan Tondi Parbadia naung nilehonNa i tu hita, siala Debata ndang
pasombuon hita dibagasan dosa, ai na ditogutogu do hita marhite panobusion ni
dosanta dibagasan AnakNa Jesus Kristus. Jala di Minggu Rogate on sai dipaingot
do hita mamuji Debata ala ndang ditadingkon Jesus Kristus hita, molo pe naung
manaek Ibana tu Banuaginjang i, ai dipasaor do TondiNa ima Tondi Parbadia laho
mangajari, mamodai, maminsang, paingothon dalan ni ngolunta asa hombar tu patik
nang HataNa. Sai tapuji ma Debata dibagasan Tondi Parbadia ai pargogoanNa do
hita manaluhon sumbia ni portibi on nang sibolis pe asa marlas ni roha hita.
Amen.
