Puji
Ma Debata Na Sun Timbul Jala Na Songkal
Psalmen
47 : 2 – 10
a. Ia
turpukta on ima joujou ni parpsalmen laho mamuji Debata gabe sada dalan laho
gabe pangoloi di Ibana. Ia ende psalmen on dipasahat anak ni si Korah. Anak ni
si Korah ima keluarga ni angka parende, malo do nasida menggubah psalmen(Mazm
42:1-11; 44:1-49:20; 84:1-85:13; 87:1-88:18), asing ni sijaga harbangan(1Taw
9:19; 26:1) dohot parende di bagas joro ni Debata dipartingkian ni si Josapat (2Taw
20:19). Adong ma dua bagian panjouon laho mamuji Debata di turpuk on: 1). Ayat
2-5; panjouon asa marlas ni roha dohot mangolophon Debata dibagasan olopolop;
Sude bangso do diarahon parpsalmen on asa mamuji Debata. Sude bangso didok di
turpuk on boi do tu halak Jahudi, alai lam mangerbang ma sahat tu saluhut
bangso. Dijou do nasida asa mamuji Debata asa marlas ni roha jala mamestahon
las ni roha nasida marhite martopap tangan, dohot ende hamonangan; mangolophon
Debata dibagasan ende pujian. Martopap
tangan songon tanda las ni rohanasida na so tardok jala marbualbual di roha
nasida ala hamonangan naung jinalo nasida marhitehite asi ni roha ni Debata. Marhite
soara hamonangan songon hamonangan ni peserta pertandingan ni olah raga.
b. Na
mamuji do parpsalmen on hinorhon : Debata na songkal mambahen longang nang
balga ni roha jala udut tu roha na hormat jala biar mida Ibana na sun timbul i
(ay.3). Na mamuji do parpsalmen on hinorhon ni hagogoon ni Debata margogoihon
bangsoNa ima bangso Israel laho manaluuhon angka bangso parbegu dohot angka
houm(ay.4). Na mamuji do parpsalmen raphon bangso Israel siala Debata do na
mamillit tano bagabaga i tu bangsoNa bangso Israel, las ni roha ni Jakob
(ay.5). Na mamuji do parpsalemn raphon bangso Israel siala naung hehe Debata tu
habangsaNa marhithitr ende olopolop nang sarune pe (ay.6). Siala ni i joujou
laho mamuji Debata hinorhon ni Debata na gabe Raja jala hajongjonganNa
mangatasi langit dohot tano on. Ibana do na songkal na mambahen bangsoNa gabe
marsuraksurak jala marolopolop marlas ni roha mamuji pasangaphon Ibana.
c. Panjouon
ni parpsalmen laho mamuji Debata ( ay.7-10); Dungkon joujou laho marlas ni roha
mamuji Debata, nuaeng angka na mamuji dijou muse asa mamuji Debata, ima
patuduhon las ni roha bolon na so tardok be songon dia las ni roha nang
olopolop i (ptds. Maz 33 : 1 – 3; 96 : 1 – 3; 98 : 4 – 5; 100 : 1 – 2; 105 : 1
– 3). Marpsalmen lapatanna; marende,
mangendehon ende pujian, mamalu angka parhinaloan nang angka alat musik. Jadii
ndang marhasohotan laho mamuji Debata, jala semangat mamuji pasangap Debata
dibagasan ende pujipujian i tongtong tarida di endehon nasida. Las ni roha
nasida siala Debata do na terbukti na mengatasi nasa na adong. Debata do na
gabe Raja sian saluhut raja na disandok portibi on. Molo didok Debata na gabe
Raja na mangigil pangantusion ni ruasna asa unduk jala hormat sian nasa ateate
dohot pingkiranna. Jadi ndang tu na asing be pujipujian, hormat, nang las ni
rohana; ndang tu arta, ndang tu portibi on, ndang ala ni jabatan, ndang tu
sibolis las ni roha angka naung dipalua Debata dohot lan na asing, alai tu Debata smabing do.
d. Tarlumobi
hita na porsea dibagasan Jesus Kristus; semanagt ni Pesta Paskah 1 dohot 2 hon
ndang longkang dope sian haporseaonta, naeng torus ingot di haporseaonta asa
torus hita marende ende jala marolop olop mamuji Debata. Debata Jahowa na gok asi dohot
holongNa i laho paluahon hita jolma pardosa on marhitehite panghophopon ni
AnakNa na sasada i I ma Jesus Kristus i asa gabe sitean Harajaon na salelengni
lelengna hita raphon Kristus i. Ala ni i sai marsaringar ma soranta mamuji
marende pasangap Debata si ganup tingki nang siganup ari. Songon goar ni
minggunta Minggu Kantate; “Endehon Hamu Ma Di Jahowa Ende Na Imbaru” naeng ma
torus hita mangendenehon ende na imbaru
pasangap Debata Jahowa, ndada holan marhite pamangan nang tangan, alai sude
pamatangta mamuji Ibana marhite pangalaho, parange na imbaru. Siala Debata sai
mangalehon ari na imbaru di hita, disi adong udara na imbaru, mata ni ari,
dohot angka na tajalo haimbaruon di pamatang, gabe marhahipason nang
marhagogoon na imbaru hita. Naeng ma udut haimbaruon ni pangalahonta sahat tu
humaliangta, asa lam tamba jolma na marlas ni roha marendeende mamuji pasangap
Debata. Domu tu Topik ni minggunta: “Puji Ma Debata Na Sun Timbul Jala Na
Songkal” asa pasidohot do hita songon anak dohot boru ni Debata, jala songon
bangso na pinillitNa laho paboahon hasongkalan ni Debata tu sandok portibi on.
Amen.
