Mangolophon
Jala Manghatindangkon Gogo Ni Tuhan i
Psalmen
23 : 1 – 6
a. Hita
na hinaholongan dibagasan Jesus Kristus, nunga jotjot tatangihon jala tajaha
turpuk on. Mansai terkenal do turpuk on jala mansai godang menginspirasi torop halak di portibi on. Dihilala
parpsalemn (si Daud) on do asi dohot holong ni roha ni Debata na marmahani
ompuna na jolo dohot bangsona Israel, nang sahat tu pangkilalaanna. Ido mansai
bagas dilapati dohot digombarhon Ibana pangaramotion ni Debata marhite sahalak
parmahan dohot biru biruna. Ala sian latar belakang ni parpsalmen si Daud ima
sahalak parmahan do ibana di haposoonna. Sahalak anak na so tingkina miniahan
gabe raja marhitehite si Samuel. Ulaonna holan na marmahan do; ima marmahan
birubiru, alai boi gabe raja ibana na pinillit ni Debata. Pengalamanna songon
sahalak parmahan birubiru hape gabe sada bohalna do i laho mangarade diri
songon sahalk uluan na denggan jala disi ma dihilalahon ibana pangaramotion ni
Tuhan. Tarlumobi hatiha marporang ibana raphon bangso Israel laho mangadopi
bangso Palistim. Sahalak sordadu na mansai sihabiaran ni parangan ni halak
Palistim i namargoar Goliat, nang pe naung lengkap pahean ni perlengkapan
porangna jala pamatangna pe mansai balga, alai ndang mabiar si Daud nang pe
mansai metmet ibana ( 1 Sam 17: 4-7) boi manaluhon si Goliat i ala ni bisuk
dohot gogo na nipasahat Debata tu ibana. Ima pengalaman secara pribadi dohot Tuhan,
jala nialamanna i uju sahalk parmahan dope ibana, ala naung berpengalaman ibana
manaluhon dohoot mamunu babiat dohot angka gompul, lam ma si Goliat, ndang apala
maol di ibana manaluhon i nang pe holan marhite katapel.
b. Boi
do masuk diroha molo sai dihilala si Daud pangaramotion ni Debata ditingki
mamuji Debata ibana jala pahusorhusorhon denggan ni basaNa. Ala ni i didok
ibana ma: “Jahowa Siparmahan ahu....”. Ingot do si Daud di pengalamanna songon
sahalak parmahan na sai tongtong patongon birubiruna tu jampalan na lomak, sai
jagaonna do sian angka mara nang hamaolon. Sai berengonna do birubiruna i asa
unang susa, alai asa sonang, laos songon i ma digombarhon ibana pangaramotion
ni Debata. Jala laos ido na dipasahat Jesus di panindangionNa di Johannes 10 :
11 “Parmahan na denggan do anggo Ahu. Diseahon parmahan na denggan i do hosana
humongkop angka birubiruna.” Pos do roha ni Psalm on di parmahanion ni Debata
di ngoluna, disi ro hamaolon, sai holan tu Debata do inganan pangalualuanna.
Molo lao do tu gogo ni portibi on so tau do gabe inganan parlinggoman sian
angka sitaonon, ndang margogo na diportibi on marmahani ngolunta molo ro
hamolon i, jala boi do baliksa madabu tu lam na maol manang susa. Jala songon
na sinurathon di Hesekiel 34: 1-10, digombarhon adong do parmahan na jahat, na
so manganturehon na pinarmahanna i.
c. Holan
Debata do na gabe parmahan na denggan songon na dihatindangkon parpsalmen on;
jala botoonta otik taringot tu birubiru ndang boi dioatongon asalasalan,
isarana molo mangallang duhut duhut pe ingkon diparrohahon do, unang ma
dipangan na adong rasun na, dungi molo tu aek pe unang ma tu aek na doras boi
do marbirsakhan manang manginona tu imbuluna i, gabe dionsop imbuluna i do aek
i gabe boratan ma ibana jala boi madabu tu aek i. Dungi tujuan pardalanan ni
birubiru i pe naeng do torus di jagai parmahan i sotung dibolus angka lombang.
Jadi ala sada binatang na polos do birubiru on ingkon siparrohahononhon do
langkana. Diborngin i pe so boi nok modom birubiru i molo terganggu di suara
agia otik pe. Jadi ingkon menak do diurus birubiru i, jala ditanda birubiru i
do soara ni parmahan i huhut ditandai parmahani do soara ni birubiruna. Nda
songon i do lumobi Debata i ? tung mardosa pe hita jolma i, sai tungguonNa do
hamumulakta manandingkon hajahatonta ala: “....na so lomo do rohangku mida hamatean ni
halak parjahat i, so ingkon mida hamumulak ni parjahat i tumadingkon dalanna i
nian, asa mangolu ibana....” (Hes.33:11). Diparmahani Debata do ngolunta,
dilehon do na ringkot di ngolunta, nang pe sipata hita martangiang mangido aha
na tahalomohon di ngolunta on. Alai ndanda angka pasupasu na tajalo di portibi
on dipasahat tu hita alai dilehon Debata do dalan tu hita jolma asa boi malua
hita sian hamataen na saleleng ni lelengna i. Dilehon do AnakNA na sasada i ima
Jesus i asa dipelehon sahat tu hau Pinarsilang i, pola mate laho manghophop
dosanta nang dosa ni portibi on. Ido umbahen didok di ayat parpudi ayat 6 “Tongon
tahe denggan basa dohot asi ni roha mangihutihut ahu saleleng ahu mangolu, jala
dung mulak ahu masuhanku ma bagas ni Jahowa salelenglelengna”. Ala ni i angka
na porsea i ndang pola be mabiar di angka hahurangan nang hamaolon na
niadopanna dipanggulmiton ni ngoluna.
d. Nuaeng
na gabe persoalan; aha do namambahen rohanta gabe holsoan ? ala ni keluarga do,
manang angka ulaon manang angka na asing na i? Marhite pengalaman si Daud on
boi hita marsiajar ia Debata na
mangurupi hita, molo sai tapajonok do Tu Debata boi do mangkuling rohanta
manghialahon denggan basa ni Debata songon si Job, ndang mura be rohanta
menilai na sala Debata manang na so parduli tu hita. Unang be holsoan hita,
manang gabe metmet rohanta gabe so ada be semangat nang gogonta, alai naeng ma
hita marlas ni roha jala sidok mauliate, tung so tapangido pe, diparrohahon do na
ringkot di ngolunta ariari. Las ni rohanta naeng tongtong dibagasan Tuhan i, so
longkang dope di parningotanta parningotan haheheon ni Jesus sian hamatean i
(Paskah 1), patut ma hita marlas ni roha marolopolop mamuji Debata songon goar
ni minggunta Minggu Jubilate; marolopolop tu Debata sandok tanoon. Na tarjou
doo hita na pinarmahan ni Debata laho marmahani angka dongan jolma na dibagasan
hapogoson, hamaolon, hasusaan, na holsoan namarsitaonon dohot angka lan na
asing ima dalanta marolopolop dohot manghatindanghon gogo ni Tuhan i songon
angka apostel i margogo do nasida manghatindanghon Tuhan Jesus i di ulaonna tu
torop jolma (Ev.Ul.Ap.4:5-12), songon topik ni minggunta: “Mangolophon Jala
Manghatindanghon Gogo Ni Tuhan i”. Amen.
