Selasa, 28 April 2015

Bahan Jamita Epistel Minggu Quasimodogeniti, 12 April 2015

Marparangehon Hatiuron
Psalmen 133: 1 – 3
      a.       Ia Psalmen bindu 133 on ima psalmen na marisihon poda habisuhon dohot hata nauli. Dipaboahon do sian turpuk on ia Tuhan Debata na pausehon pasupasu-Na molo denggan parsaoranta. Ia Tuhan Jesus sandiri diujung ni ngoluna martangiang asa sude hita angka na porsea gabe marsada ni roha. Mangolu dibagasan parsaoran na denggan manang dibagasan hadameon ima na gabe syarat na mansai ringkot laho manjalo dohot mandai nasa pasupasu ni Tuhan i. Adong tolu na mansai ringkot siparrohahononta umbahen na ingkon mangolu hita dibagasan parsaoran na denggan:
1.       Maringan do Debata ditongatonga ni halak na mardame. Molo naung maringan do Ibana naung dipatuduhon do disi sada halongangan las ni roha. Disi maringan Debata, na holom gabe tiur, na marsahit gabe malum, na dibagasan arsak diapuli, na marhahurangan digohi. Jolma na so boi mangolu dibagasan dame dohot donganna jolma tung so boi do mardame dohot Debata. Molo sai jotjot do hita mangolu dibagasan parsualon, disi ma gok pangkilalaan marsak nang hansit ni roha na boi manirang parsaoranta dohot Debata. Ia dirumatangga isarana, molo so denggan parsaoran ni induk somang dohot pardihutana boi do gabe situndal tangiang. Ia Tuhan i pe dipodahon do asa jumolo hita paturehon parsaoranta dohot dongan jolma andorang so mangadop hita tu Ibana laho pasahathon peleanta.
2.       Tuhan Jesus diparsangapi dibagasan parhaha-maranggion na rosu. Dibagasan parhaha-maranggion i ndang adong na patujohon diri. Sude do holan pasangaphon Jesus jala na manghilalahon sude na dibagasan ngoluna i ima siala asi ni roha ni Tuhan i. Dibagasan parhahamaranggion na rosu ndang pola adong pingkiran na jat dohot na negatif nasada tu na sada.
3.       Namangula do Tondi Parbadia dibagasan parhahamaranggion na rosu. Molo mian Tondi parbadia marbungaran do Hata ni Debata  disi. Marningot hita di hasasaor Tondi Parbadia (Ul.Ap. 2: 1 “Jadi dung jumpang ari palimapuluhon i (Pentakoste), pungu ma nasida saluhutna di sada inganan.” Marpungu do nasida di sada inganan dibagasan sada ni roha, sada pingkiran, sada pandohan. Molo sapingkiran manang sapandohan na marlapatan ndang adong be disi roha na ummangat, ndang adong be disi parsalisian. Didok di Barita i na saor do Tondi Parbadia i di nasida na pungu i, jala na marjamita do Apostel Petrus tu 3000 halak jala tardidi.
   b.      Ia turpukta on ima sada dasor ni Hata ni Debata asa sude na porsea i mangolu dibagasan parhahamaranggion na rosu. Sian turpuk boi idaonta ia ruas ni huria na marsada i boi rup mangula laho papatarhon Harajaon ni Debata. Nang dibagasan hamaolon nanag dibagasan las ni roha; dibagasan arsak ni roha i do dipatuduhon na marsada ni roha i, jala mual ni hasadaon i ima sian Sion; inganan las ni roha, dame na manongtong na sian Tuhan Debata. Ia parsaoran na rosu i dubuhai sian keluarga, dungi tu na marhombar balok, sahat tu masyarakat, huria, bangso dohot negaranta Indonesia nang sandok portibbi on. Molo naung denggan do ngolu parsaoran parhahamaranggion i mansai  denggan do panghorhonna tu masyarakat.
    c.       Dihlungunhon parpsalemn on do hasadaon. Digombarhon ibana do hasadaon i songon acara panabalan ni si Aron (2 Musa 29). Di acara i dipatupa do mamiahi songon tanda tugas ni sahalak malim. Pamiahon i mangalehon tu si Aron sada tugas na gabe parhitean ni bangso Israel dohot Debata, mansai ribur do ulaon pamiahon i; digombarhon do songon nambur na ro sian dolok Hermon tungkan utara tu dolok Sion tungkan dangsinga, dua arah na dao marasing dihubungkon. Panabalan ni malim i ndada ulaon na biasa; miak na pinangke tung marasing do. Ndada boi ditiru manang dipargunahon tu ulaon na asing. Lapatanna ia ulaon on ima ulaon na marboho jala ulaon na marimpola; ido umbahen mansai las roha ni bangso Israel, marolopolop, mardame sonang.
    d.      Ia parsaoran i ima pasupasu ni Debata, jala parsaoran i i dipaboa di Johannes 17: 21 “Asa sada nasida saluhutna; songon Ho, ale Amang, di bagasan Ahu jala Ahu di bagasan Ho, songon i ma nang nasida di bagasan Hita, asa porsea portibi on, Ho marsuru Ahu.” Adong tolu na niondolhon si Johannes; na martangiang do Jesus tu diriNa, tu angka siseanNa, dohot tu huria asa adong hasadaon. Hasadaon ini na marrumang, parpunguan, panghobasion nang panindangion manang na jotjot digoari Tri Tugas Panggilan Gereja. Marhite i ma portibi on mananda Jesus Kristus Sipalua i.
    e.      Ndada ulaon na mura patupahon ngolu na marhasadaon, mansai godang do ambat ambat; ima ginjang ni roha, na mangasahon gogona sandiri, adong na holan ringkot di dirina sandiri. Angka pangalaho sisongon on ma na manghorhon parbadaan nang parsalisian ditongatonga ni huria i. Laho mangatasi sisongon i, ringkot do na mangasahon tangiang tu Tuhan Debata. Marhite i ma angka parbue ni Tondi i gabe tarida ditonga tonga ni  hasadaon i (Ptds.Gal.5:22). Jadi molo adong haholongon i boi patimbulhon hasdaon ditonga tonga ni punguan. Nuaeng boha do patimbulhon parhahamarangion na naung sega ? mansai maol do, ndada ulaon na mura i, alai na rumingkot; unang ma pasombuhon angka parasingan na so apala ringkot manegai parhahamaranggion. Sai adong do parasingan i, alai naeng ma mamaereng parasingan i songon pasupasu ni Debata di hita; disi ma naeng patuduhononta lambas dohot serep ni roha na masiargaan na sada tu na asing disi ma tapatuduhon pangalaho hatiuron na masiurupan, masitogutoguan, masitumpahan, pauliulihon, ndang adong be disi na masipasombuan (ptds. Gal. 6:2 “Masiurupan ma hamu mamorsan angka na dokdok i; i ma dalan mangaradoti patik ni Kristus.”). Ia patik ni Kristus i, ima haholongon i; jala haholongon i ma Kristus maringan laos disi ma tapatuduhon hatiuron na sian Kristus i. Taparangehon ma hatiuron i dibagasan parsaoran na rosu. Amen.

Jamita Jumat Agung - 29 Maret 2024

Dibungka Jesus Do DI Hita Dalan na Imbaru    (Yesus Membuka Jalan Yang Baru Dan Yang Hidup) Heber 10: 16 – 25     a)       Dihita na...