Monang
Jala Hehe Maralohon Hamatean
Markus
16: 1 – 8
a. Paskah
na marmula sian hata Heber; pesakh, lapatanna; dibolus, manang dihata Inggris
didok “Passover”, namarlapatan dilewati. Paskah na parjolo dipangido Tuhan ima
laho ditaringoti bangso Israel diborngin Tuhan naeng mandabu uhum di tonga
bangso Misir ima bura na pasampuluhon. Diborngin i dipangido Debata do bangso
Israel i laho maneat birubiru tunggal na so martihas, jala mudar na i ingkon
daishonon tu dua tiang parsuhisuhian dohot tu tohang ni angka bagas,
parmanganonnasida i ( 2 Musa 12: 7). Diborngin
i ma dibolus Debata luat Misir, jala mamasuhi ganup bagas nasida be laho mamunu
sude anak buhabaju ni manisia nang binatang pe. Alai molo diida Debata adong
tanda mudar na didaishon di tiang parsuhisuhi dohot di tohang ni bagasna,
salpuhonon ni Debata ma uhumna, ima lapatan ni paskah i, melalui.
b. Ala
ni i hita na manjalo panghophopon ni Jesus Kristus, adong do tanda mudar ni
Kristus di hita, ido umbahen asa mardame hita dohot Debata jala ndang uhumonna
hita di uhuman na saleleng ni lelengna i. Nunga ditobus angka dosa dosanta jala
paheheonNa do hita sogot, asa jaloonta ma hangoluan na gok las ni roha na
saleleng ni lelengna i. Na gabe sungkunsungkun, ise ma sian hita na porsea na
so marlas ni roha jala mandok mauliate di hamamate dohot di haheheon ni Jesus
kristus i ? Naeng do rajumonta na dua na masa i mansai ringkot di hita jolma
nang di haporseaonta songon halak Kristen hita. Na dua na masa i ndang
tarsirang jala na marlapatan teologis halongangan do i. Ia molo hamatean i gabe
sada pangalaho pangoloion ni Jesus Kristus di sangkap asii ni roha ni Debata
laho paluahon jolma sian dosa, ido umbahen haheheon ima sada bukti upa pangoloion ni Tuhan Jesus.
Molo so hehe Kristus i, marisuang ma haporseaonta, jala hita pe dihaholomon ni
dosa dope. Molo so hehe Kristus i, holan turiturian sambing do Barita na Uli i,
ndang adong ringkotna i dibaritahon tu sandok portibi on. Alai marhite haheheon
ni Kristus di ari patoluhon, asa gabe pos ni roha Barita na Uli i. I do umbahen
ditonahon Tuhan Jesus tu angka siseanNa: “Laho ma hamu tu liat portibi on;
jamitahon hamu ma barita na uli i tu nasa na tinompa. Na porsea jala tardidi,
dapotan haluaon; alai na so porsea i, hona uhum do.” (Mark.16: 15-16)
c. Dipaboa
dibagasan turpuk on, sururuan ni Debata na mandok asa paboahon taringot tu
Jesus naung hehe i tu angka siseanNa dohot tu si Petrus. Boasa adong disi didok
goar ni si Petrus ? Boi do tarjalo rohanta, siala manghilala do si Petrus di
arsak ni rohana naung sanga mansoadahon Jesus sahat ro di tolu hali, ala
andorang so tarsilang Jesus, porsea do ibana jala ndang oloanna manadingkon
Jesus. Ala ni i di parningotan haheheon ni Kristus manang Paskah 1 on, ndada
holan jolma na so porsea di Kristus siluluon ni Tuhan i, alai angka jolma na
songon si Petrus pe luluanNa do (ptds. Hes. 33:11 Dok ma tu nasida: Songon
sintongna mangolu ahu, ninna Tuhan Jahowa, tung * na so lomo do rohangku mida
hamatean ni halak parjahat i, so ingkon mida hamumulak ni parjahat i
tumadingkon dalanna i nian, asa mangolu ibana. Antong sai * mulak ma hamu tumadingkon
dalanmuna angka na jahat i! Boasa tung tagonan mate hamu, ala pinompar ni
Israel?). Ro do Tuhan i tu angka na dibagasan hasusaan, hagaleon ni haporseaon,
na marsingkor, dipahehe Tuhan i do semangat nang haporseaonta asa lam margogo.
Na ro do Jesus tu si Petrus siseanNa i ndada marhite rimas, alai marhite
pasupasu ima na mangan ihan na ditutung nasida dohot si Petrus. Disungkun Tuhan
i do si Petrus, holong do rohana mida Ibana ? pola sahat tu tolu hali disungkun
Tuhan Jesus ibana, disi do patuduhonon ni Jesus tu si Petrus laho paimbaruhon
dirina ala naung tolu hali disoadahon si Petrus Ibana. Sian sungkunsungkun na
parjolo sahat tu na paduahon dipangke Jesus do hata “Agape” (holong na so
marpambuat) tu si Petrus, dungi dinapatoluhon dipangke Jesus do hata “Fileo”
(holong masihaholongan) tu si Petrus. Naeng dipatuduhon Tuhan Jesus do tu hita,
nang pe holongta i bersifat fileo tu Tuhan i, alai tongtong do Tuhan i
manghaholongi hita.
d. Haheheon
ni Jesus Kristus sian hamatean ima sada bukti hasintongan ni Barita ni Kristus i,
Ibana do Tuhan i. Ala ni i didok Apostel Paulus di 1 Korint 15: 13-14 “Alai
anggo so adong haheheon ni angka na mate, ndang na hehe nang Kristus. Ai anggo
so hehe Kristus sian angka na mate, rumar ma jamitanami, laos rumar ma nang
haporseaonmuna.” Haheheon ni Kristus mangalehon tu hita:
1.
Pos ni roha, dipudi ni hamatean adong do
hangoluan, ido umbahen didok Jesus di Johannes 11: 25 “Dung i ninna Jesus ma
mandok ibana: Ahu do haheheon dohot hangoluan; na mangolu do na porsea di Ahu,
nang pe mate ibana!”. Ala ni i marhite haheheon ni Kristus adong jaminan na
pasti tu hita angka na porsea paheheonNa do sogot jala jaloonta ma hangoluan na
saleleng ni lelengna.
2.
Asi ni rohaNa, songon na masa tu si Petrus,
naung sanga mardosa na mansoadahon Jesus. Alani i nuaeng on didok do tingki
parasi ni rohaon, dilehon do dihita kesempatan laho manundalhon angka dosanta
jala tumopot Tuhan i, asa muba rohanta manadingkon dosanta laho mangihuthon
Tuhan i.
3.
Perhatian tu horong parompuan, ala dibaritahon
do di turpuk on na jumolo do angka parompuan i laho tu tanoman i naeng mamiahi
bangke ni Jesus dohot miak na hushus, agan pe so dapotsa be disi. Laptanna
balga ni holong ni roha dohot perhatian nasida tu Jesus i, ido umbahen sai
dipahombar hurianta HKBP uju di pesta Paskah I ima parheheon ni parompuan ni
hurianta. Tajamothon ma angka kekerasan tu horong parompuan, asa unang be sai
masa di tonga ni bangso dohot negaranta Indonesia on. Peran ni angka parompuan
mansai arga do i laho mencetak pribadi ni angka anggota keluarga na gok asi ni
roha, jala siparholong roha songon holong ni Kristus Jesus i.
Ala ni i naeng sude hita angka na porsea lam hehe,
lam margogo di haporseaon laho mangalo sumbia ni portibi on dohot sibolis i,
lam marhamubaon ni roha dibagasan pangkirimon dohot holong ni Kristus i. Amen.
