Bagasna
I Hamoraon, Hapistaran, Parbinotoan NI Debata
Jesaya
52 : 13 – 53 : 12
A. Di
na deba jolma, ndang apala diringkoti manghatai taringot tu hamatean, ala
mansai songir do i, jala molo boi dipabali diri sian i. Alai halak Kristen, ia
hamatean i mansai ringkot do i ditaringoti siala marningot hamamate ni Tuhan
Jesus hhumonghop hita jolma pardosa nang portibi on. Hamamate ni Tuhan Jesus
Kristus ima holan laho padamehon dohot padenganhon parsaoranni jolma dohot
Debata. Namate do Ibana holan tu hita, siala hamateanNa i ima sada missi nang
tugas na nituhuk ni Jesus songon naposo ni Debata na manarita, laho manuhuk
angka dosa dosanta. Uhuman ala ni dosa i digantihon Jesus sandiri. Diantusi
Panurirang Jesaya do ia pelean situtungon sian dorbia ndang sae laho padamehon
parsaoran ni Debata dohot manisia. Holan pemelean di Jesus do na sae manggarar
arga ni panobusion ni manisia. Ia Johanes pandidi mandok: “On do Birubiru ni
Debata, na mamorsan dosa ni portibi on!”(Joh.1: 29), dipadoshon ibana do Jesus
dohot birubiru paskah. Naposo ni Debata ima anak ni birubiru na pinarade ni
Debata laho gabe pelean paskah.
B. Panurat
Padan na Imbaru mamahe ende Deutro Jesaya ima konteks panaritaan ni Tuhan
Jesus, naposo ni Debata na manarita i ima Jesus. Jesus gombaran ni totalitas
naposo ni Debata na manarita i. Ndang adong tokoh na asing songon naposo ni
Debata na digombarhon ni Panurirang Jesaya. Nuaeng berengonta ma arga ni
panobusion na pinatupa ni Jesus Kristus. Ai didok do di 1 Korint 1 : 18 “Ai
haotoon do hata na taringot tu silang i di roha ni angka na laho mago; alai
hagogoon ni Debata do i di hita na dapotan haluaon.” Haunduhon, pangoloion na
gabe hagogoon laho paluahon jolma.
C. Naposo
ni Debata na mangula dohot denggan jala marbisuk, marhasil do di ulaonna, dung
paujungonna ulaonna, dipatimbo jala dipasangap Debata ma Ibana. Aeonna do angka
hasusaan, hamaolon, panaritaan jala na lea do Ibana, torop na so porsea na
mangula do Debata dibagasan Ibana. Alai ujungna gabe halongangan do di angka
jolma na mamereng hamonangan ni naposo i. Najolo torop jolma na mangarehei,
gabe dihuntam do babana jala maila. Gabe longang do jolma mamereng halongangan
i, na lea i gabe marsangap. Ise ma na porsea mamereng naposo ni Debata manarita
? na boi do idaonta dibagasan Jesus Kristus na binahen ni Debata, patutoru
diriNa jala mamereng Jesus diparsilangkon ? Dibagasan toruk ni roha dohot na
diparsilangkon i Ibana, disima huaso ni Debata dipabotohon laho paubahon
portibi on.
D. Naposo
ni Debata i, ndang uli rupana, manarita do ibana, direhei, mansai songit do
panaritaanNa i. Ndang dietong hian Ibana, ala sian mulana pe molo mamereng
pardompahan ndang apala adong na siaraphononton asa siparrohahononhon Ibana.
Mansai porsuk jala dangol do ngoluna, gok parungkilonNa, jala dibagasan
panaritaanNa i do Ibana ditadingkon. Dirimpu jolma na binuraan Ibana umbahen na
mandao sude. NA deba mandok di rohana na hona uhum ala ni dosa nang hajahatonNa
do Ibana. soada be rupana, ndang songon jolma be, na manggombarhon na diparsilanghon
Jesus i. Ditingki i, naung dilinsingi do Ibana, angka soldadu Rom manghaliangi
Jesus na so marabit i huhut dilinsingi, pola gabe mabugang bohi nang
pamatangNa, gok mudar, mansai hansit dihilala sahat tu holiholiNa. Angka na so
manahan marnidasa, pahusorhon bohina sian silang ni Jesus i. Uhuman na sahat tu
Ibana ndada ala ni hasalaannta, alai hasalaanta do dohot dosanta. Dosa nang
hasalaanta ima na mangalaosi dohot mangalo Debata. Alai gabe Jesus do na
manuhuk hasalaanta nang dosanta i, marhite Jesus do gabe dipadame hita dohot
Debata. Uju dipasahat ibana tu panguhum Silatus, holan na hohom do Ibana
(Mat.26: 63; 27: 12-24), manguhom do Ibana. Jala puncak ni panaritaanNa ima na
holang ibana sian angka na mangolu ima hamatean i. Napatuduhon pangoloionNa
sahat tu na agoan hosa, na mate, mamasuhi hamatean i marhite bulsu ni roha. Sai
hira na marisuang sude na pinerjuanghonNa, sai hira na gagal do missiNa,
hamatean i sai hira ujung ni ulaoNa. Alaidi ujung ni hamamateNa i na nidok na
“Nunga marujung” (Joh.19: 30), lapatanna ndang na talu Ibana alai tugas nang
ulaonNa nunga dipaujung.
E. Ise
ma na mamingkirhon taringot tu si, ise ma na mangantusi na masa i ? ise na ro
membela Ibana uju di panguhuman Ibana jala ditingki uhuman na so adil sahat tu
Ibana ? ise ma na menghargai penghophopon ni Jesus ? Haputusan na sala di
panguhuman i, sude mardalan, jala hasalaanNa gabe adong nang pe so adong salaNa
jala na so mardosa, hape gabe dos ma Ibana dohot angka parjahat i. Dijolo ni
torop halak gabe mate binuraan ni dosa Ibana, alai di adopan ni Debata na Bonar
jala na sintong do Ibana. Hombar tu pangungkapon taringot tu Ibana, na ingkon
mamolus sitaonon do Ibana laho manghophop jolma. Dipasahat Ibana do dagingNa
nang ngoluna laho manobus dosa ni jolma. NA binahenNa i gabe jaloon ni Debata
panobusion i ala dipasahat Jesus do diriNa sandiri gabe pelean na hushus,
dimasa ngoluna pe sai dipahombar do na dihalomohon ni Debata (ptds. 2 Korin 5:
21).
F. Ari
parningotan hamamate ni Tuhan Jesus di Jumat Agung ima : “Dipadenggan Ibana nuaeng
marhitehite daging hajolmaonna i, di na mate i Ibana, laho pajongjongkon hamu
badia jala so hasurahan jala so sipinsangon, maradophon Ibana” ( Kol.1:22). Upa
ni dosa ima hamatean, ndang hangoluan. Laho manggarar utang ni dosanta i hombar
ajaran na di Padan na Robi ima mudar na gabe simbol hangoluan, lapatanna
marhite kesadaran di mudar ni Kristus na use i songon pelean ni dosanta laho tu
hangoluanta. Mateus 8: 17 “asa jumpang na nidok ni panurirang Jesaya:
"Ibana do mangusung pardangolanta jala angka sahitta diporsan."Mateus
9 : 2 “Pos ma roham, ale anaha; nunga sesa dosam!” Hasesaan ni dosa na
mangalehon hamubaon tu ganup jolma na porsea. Hasesaan ni dosa naeng ma
diihhuthon marhite haporseaon na naung disesa dosanta asa botul botul
dipaimbaru hita. Jala marhite i naeng ma tangkas tung sadia godang pe dosanta,
alai marhite mudarNai nunga sesa i. Ala ni i naeng angka na porsea i tarjou
siboan hasesaan tu angka dosa nang hasalaan ni dongan jolma. Amen.
