Bagasna
i Hamoraon, Hapistaran, Parbinotoan ni Debata
Rom
11: 33 – 12: 8
A. Sada
panindangion ni Apostel Paulus taringot tu
habalgaon ni Debata na manghamham sandok portibi on. Molo didok Apostel
i “bagasna i antong hamoraon....” namarlapatan do i isara ni aek na so olo
marsik nang pe sai maos ditimba halak aek i sian bagasanna jala dipangke tu
angka na marragam tu haporluanna. Gariada songon sumur, lam ditimba aek sian sumur
i, laos disi di partio ni sumur i, jala ndang ra moru. Suang songon i do
hamoraon ni Debata. AI diusehon do hamoraon i tu ganup halak (ptds. “Halak na
so olo mulaulaon, unang ma ibana mangan). Panindangion taringot tu hamoraon ni
Debata, hape sai humolos dope angka jolma manisia di hapogosonna. Debata
paboahon marhite Apostel Paulus, na mansai bagas do hamoraonNa, parbinotoanNa
dohot hapistaranNa. Marlapatan do i manang ise na naeng mamora, pistar, malo,
ro ma tu Debata, pangido ma roha dohot bisuk na sian Debata, asa ture
parngoluonta saleleng di portibi on hita. Di angka negara manang bangso na
adong pimpinanna manang presidenna, nang pe presiden i na gabe uluan manang
pemimpin, alai sai adong do penasehatna, angka panuturina, gabe boi mandalanhon
parenta panggomgomi i. Jadi idaon mansai godang lapatan ni panuturi tu angka
pimpinan. Hape ianggo maradophon Debata, ndang hea dope adong tabege na adong
manuturi Debata umbahen sahat tu panompaon ni nasa na adong. Jadi ala ndang
adong na manuturi Debata di angka tindakanNa, bebas ma Debata di angka
parulanNa, alai dii angka na porsea tu Debata dihaposi rohana do na laho
pasonangkon ngoluna do na hinarohon ni Debata. Jala lam godang halak na
manuturi, boi do lam bingung di na melaksanahonsa. Ai mura do ianggo laho
mandok, di pelaksanaann na jotjot terkendala (tartuktuk).
B. Molo
tung pe tangkas taboto angka pasupasu ni Debata, ndang na marlapatan i na gabe
mambalos budi ni Debata tu jolma. Mansai sala situtu do i. Alai kesempatan ma i
nian di na marsaulihon pasupasu ni Debata lam tu na dumenggan, sihirimonna sian
Debata sumber ni saluhutna na denggan i. Ala Debata do sumber ni saluhutna jadi
ujungna pe tong do mulak tu Debata. Isara ni namanghaliangi portibi on, m olo
pinungka borhat sian Indonesia, jala sai nitorushon manigor tu jolo, ujung ni
pardalanan tong do muse mulak tu Indonesia on. Songoon i ma nang tu Debata, ala
sian Ibana sumberna, tontu hapateanna pe tong ma mulak tu Debata. Ianggo posisi
ni jolma, holan na manorushon angka ulaon i nama secara estafet; ai na niula
niba, laos i do pinatorushon ni dongan di huria i (ptds. 1 Korint 3:6 Ahu do
manuan, Apollos do pabornokkon; alai Debata do patubuhon.)
C. Somalna
molo pinuji sada halak, tontu na adong ma hasurungan ni halak i sian na somal
di iba. Agann pe nian sai adong be do hasurungan ni sada halak sian na asing,
ai ndang adong ianggo tung na apala sirsir sarupa parbinotoan ni sada halak tu
halakk na asing. AI marasingasing be do memang talenta na pinasahat ni Debata
tu ganup jolma. Jadi di halak na so mangantusi, sai madabu ma ibana tu pangapianon, sai dirimpu ma holan tu halak na
asing i Debata manarihon hape ia tu ibana ndang disarihon Debata, i ma sarita
ni rohana. Hape so pamotoanna tu ganup jolma do dipasahat Debata talenta na
hombar tu ngoluna, jala ingkon sipertanggung-jawabhononna i nian tu Debata
angka talenta na jinalona i. Boi do hita mengagumi sada halak ala halobionna
sian hita, alai ianggo tung manghorhon elat do i manang kecemburuan, sala do i.
AI hita pe dilehon Debata do tu hita talenta na boi kembangkononta hombar tu kemampuanta be.
Umbahen i mulak tu na umpasupasuhon silehonlehon i ma muse angka na tajalo i. Asa
disosoi Apostel Paulus do angka na porsea i laho mamelehon dagingna gabe pelean
na mangolu. Ianggo pamelean ni daging nunga masa i di Padan na Robi, ima
mamelehon pinahan. Dibagasan turpuk dipaimbaru Apostel Paulus do pangantusion
ni pamelean i di Padan na Robi di haporseaon ni halak Kristen. Napinelehon
didok apostel i ima daginta i, na mangolu jala na badia. Na badia i ndada ala
usaha ni jolma i, alai ala naung pinarbadiaan ni Debata do hita dibagasan mudar
ni Jesus Kristus, angka naung tinobus mudar ni Kristus i, naung badia ma ibana.
Ala ni i molo tung tajalo pe roti dohot anggur di ulaon na badia di Jumat Agung
on naeng marningot hita natinaon ni Jesus i laho manghophop hita jolma. Di na
tajalo roti i na melambanghon daging ni Kristus, dohot anggur melambangkon
mudar ni Kristus tajalo ma disi hasesaan ni angka dosanta. Na olo do hita
manjalo lapatanna na olo ma hita pinarbadiaan. Asa angka naung pinarbadiaan
dipasahat hibul ngoluna gabe ulaula ni Debata.
D. Marragam
do silehon lehon niDebata ditongatonga ni huria nang ruas pe. Asa unang adong
ma sian tongatonga ni ruas i na manengahon dirina,alai naung sadar do ibana
natarjou do saluhut halak na porsea laho marhobas ditonga ni huria, masyarakat,
bangso, dohot negara nang di portibi on hombar tu silehonlehon ni Debata i.
dipelehon ma dirina gabe singkat ni Kristus laho mangurupi angka na dangol,
angka na ginosagosa portibi on, angka na tardempar, na pogos, na so mar ama, na
so marina, na so marabit, na anturaparon, na pogos, na so mardihadiha. Jala
diondolhon do muse sada sikap; asa ganup ruas i mangulahon fungsina be
dibagasan ias ni roha, haringgason, hatomanon dohot las ni roha. Ai bagas do
parbinotoan nang hamoraon ni Debata, molo so boi tarpangke Debata hita ala ni
jungkat, nang ginjang ni rohanta, manang ala ni egonta, boi do pangasahononNa
sian na asing (ptds.Luk.19:40). Ala ujung ni saluhutna di portibi on tongtong
do di Tuhan i, ai Ibana do Alpa dohot Omega (bonana dohot ujungna). Ala ni i
tatimbangi ma habisuhon dohot hamoraon ni Debata laho mamelehon AnakNa Jesus
Kristus i asa tartobus hita sian dosa dohot hamatean. Patut ma hita sidok
mauliate huhut mamelohon diri gabe ulaulaNa. Amen.
